Bakıda daha 2 bağça açıldı

Bakı şəhərinin qəsəbələrinin 2006-2007-ci illər üzrə sosial iqtisadi inkişafının sürətləndirilməsinə dair tədbirlər Proqramına uyğun olaraq paytaxtın daha iki yaşayış sahəsində yeni məktəbəqədər tərbiyə müəssisələri tikilərək istifadəyə verilib.

 Bunlar Yeni Suraxanı qəsəbəsindəki 330 və Kürdəxanı qəsəbəsindəki 336 nömrəli  körpələr evi-uşaq bağçalarıdır. Birtipli layihə üzrə müasir standartlara uyğun inşa olunmuş hər iki məktəbəqədər tərbiyə müəssisəsi binasının aprelin 9-da rəsmi açılışı oldu. Bu münasibətlə keçirilən mərasimlərdə təhsil naziri Misir Mərdanov iştirak edirdi.

Nazir öncə Kürdəxanı qəsəbəsindəki 336 nömrəli körpələr evi-uşaq bağçasında oldu. Bayramsayağı bəzədilmiş bağçanın həyətində təhsil nazirini Bakı Şəhəri üzrə Təhsil İdarəsinin rəhbər işçiləri, Sabunçu Rayon İcra Hakimiyyəti başçısının müavini, qəsəbə bələdiyyəsinin sədri, ağsaqqallar qarşıladılar.

Misir Mərdanov bağçanın rəmzi açılışını bildirən qırmızı lenti kəsib, yeni açılan müəssisəyə xeyir-dua verdi. Foyedə bağçanın kiçik sakinləri naziri şeirlə, mahnı ilə salamladılar. Sonra nazir və onu müşayiət edən rəsmi şəxslər bağçanı gəzib, burada uşaqların tərbiyəsi üçün yaradılmış şəraitlə tanış oldular.

İkimərtəbəli gözəl bağça binasında 6 qrup üçün məşğələ və yataq otaqları, musiqi zalı, mətbəx, camaşırxana, tibb otaqları, valideynlər üçün gözləmə otağı, uşaqların açıq havada olması üçün geniş eyvan nəzərdə tutulub. Bağçanın özünün ayrıca istilik sistemi var. Bütün otaqlar müasir avadanlıqla təchiz olunub. Kollektivin səyi ilə yüksək zövqlü tərtibat işləri aparılıb. I və II mərtəbələrdəki foyelərdə ölkə Prezidenti İlham Əliyevin, onun xanımı Heydər Əliyev Fondunun prezidenti, millət vəkili Mehriban Əliyevanın uşaqlara qayğısını əks etdirən fotolardan ibarət stendlər yerləşdirilib.

Bir-bir otaqlara baş çəkən nazir görülmüş işlərdən, uşaqların tərbiyəsi üçün yaradılmış yüksək şəraitdən razı qaldığını bildirdi, zövqlə aparılan tərtibat işlərinə görə bağçanın müdirinə təşəkkür etdi.

Bağçanın müdiri çimnaz Səlimova məlumat verərək bildirdi ki, qəsəbədə yeganə  məktəbəqədər tərbiyə müəssisəsi olan yeni bağça 6 qrupluqdur, 120 uşaq üçün nəzərdə tutulub. Qısa müddət ərzində artıq bağçaya 115 uşaq cəlb olunub. Onların tərbiyəsi ilə 12 tərbiyəçi məşğuldur. Tərbiyəçilərin hamısı ixtisas təhsillidir, öz sənətini sevirlər, əksəriyyəti də gəncdir.

Son bir ildə məktəbəqədər təhsil müəssisələrinin tikintisinə diqqətin artdığını deyən Misir Mərdanov bunu ölkə Prezidenti cənab İlham Əliyevin, Heydər Əliyev Fondunun prezidenti, YUNESKO və İSESKO-nun xoşməramlı səfiri, millət vəkili Mehriban xanım Əliyevanın təhsilin bu sahəsinə, uşaqlara göstərdikləri qayğının nəticəsi kimi dəyərləndirdi.

Bağçanın pedaqoji kollektivini, uşaqları, mərasimin digər iştirakçılarını yeni binanın istifadəyə verilməsi münasibəti ilə təbrik edən nazir müəssisənin rəy və təkliflər kitabına ürək sözlərini yazdı, pedaqoji kollektiv üzvləri və uşaqlarla xatirə şəkli çəkdirdi.

Həmin gün Yeni Suraxanı qəsəbəsində də təzə istifadəyə verilmiş 330 nömrəli körpələr evi-uşaq bağçasının açılışı oldu. Mərasimdə iştirak elən təhsil naziri Misir Mərdanov yeni yaşayış massivində - uzun müddət heç bir məktəbəqədər tərbiyə müəssisəsinin olmadığı ərazidə yeni bağçanın açılmasını yüksək qiymətləndirdi.

Eyni layihə əsasında tikilmiş bu körpələr evi-uşaq bağçası da 120 uşaq üçün nəzərdə tutulub. Bağçada körpə qrupu, kiçik, orta, böyük qruplar və məktəbəqədər hazırlıq qrupları  fəaliyyət göstərir. Burada da ayrıca qazanxana inşa olunub. Bağça istiliklə normal təmin olunur.

Nazir inşaat - bəzək işləri yüksək səviyyədə aparılmış, zəngin tərtibatı ilə gözoxşayan, hər cür avadanlıqla, təzə uşaq stol-stulları və yataq dəstləri ilə təchiz olunmuş bu bağçada gördüklərindən də məmnun qaldı, bağçanın rəhbərliyinə, tərbiyəçilərə müəssisəni qorumağı, bu cür yüksək səviyyədə saxlamağı tövsiyə etdi. ölkə rəhbərinin məktəbəqədər təhsilə xüsusi diqqət yetirdiyini vurğulayan nazir 2008-ci ildə 21 körpələr evi-uşaq bağçasının əsaslı təmir olunacağını diqqətə çatdırdı.

Açılış mərasimlərində Təhsil Nazirliyinin müvafiq şöbə və bölmələrinin əməkdaşları, Bakı Şəhəri üzrə Təhsil İdarəsinin rəhbər işçiləri, Sabunçu və Suraxanı rayonları icra hakimiyyətinin rəsmiləri, qəsəbələrin bələdiyyə sədrləri iştirak edirdilər.

Yusif ƏLİYEV