|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Azərbaycan
Təhsil Şurasının ümumi yığıncağı
keçirildi
Yığıncaqda
dövlət başçısı İlham Əliyevin Prezident seçkilərində
namizədliyi irəli sürüldü Aprelin 26-da Azərbaycan Dövlət Akademik
Opera və Balet Teatrında respublika Təhsil Şurasının
ümumi yığıncağı keçirildi. Yığıncaqda
təhsil naziri Misir Mərdanov, nazir müavinləri,
millət vəkilləri, ali məktəblərin rektorları,
digər təhsil qurumlarının rəhbərləri,
Təhsil Şurasının üzvləri, tanınmış
alimlər, təhsil ictimaiyyətinin nümayəndələri
və media mənsubları iştirak etdilər. Tədbir
başlanmazdan öncə Təhsil Şurasının üzvləri
və qonaqlar Fəxri xiyabana gələrək ümummilli
lider Heydər Əliyevin, görkəmli oftalmoloq alim, akademik
Zərifə xanım Əliyevanın xatirələrini
yad etdilər, məzarları üzərinə tər çiçək
dəstələri düzdülər. Sonra Şəhidlər
xiyabanında uyuyan azadlıq mücahidlərinin, torpaqlarımızın
bütövlüyü uğrundakı savaşlarda şəhid olmuş
vətən övladlarının xatirəsi yad olundu, ruhlarına
dualar oxundu. Yığıncağı Azərbaycan
Təhsil Şurasının sədri, professor Əjdər
Ağayev açaraq zala toplaşanları salamladı,
tədbirin mövzusu və iş qaydası ilə onları
tanış etdi. Sonra şura sədri "Son illərdə
ölkəmizdə təhsil sahəsində görülmüş işlərin
dəyərləndirilməsi" mövzusunda məruzə
etdi. Məruzəsinə ümummilli lider Heydər
Əliyevin, ölkə Prezidenti İlham Əliyevin
təhsilin əhəmiyyəti barədə dedikləri müdrik
kəlamlarla başlayan professor Ə.Ağayev bildirdi ki, ölkəmizdə
digər sahələrdə olduğu kimi, təhsil
sahəsində də ulu öndər Heydər Əliyevin bütün
fəaliyyəti boyu göstərmiş olduğu diqqət
və qayğı, meydana gətirdiyi konseptual ideya
əsasları möhkəm təməl rolunu oynamış,
təhsilimiz, Heydər Əliyev məktəbinin layiqli
varisi Prezident İlham Əliyevin səyləri və çevik
siyasəti ilə dünyanın qabaqcıl ölkələrinin
standartları tələblərinə cavab verən
səviyyəyə qaldırılmışdır. Bu günlərdə anadan olmasının 85
illiyi ölkəmizdə və ölkəmizdən kənarda
tərəqqipərvər insanlar tərəfindən böyük
istəklə keçirilən ulu öndər Heydər Əliyevin
irsi bu gün inkişafımızın ideoloji qaynağı,
fəaliyyət mənbəyidir. Natiq dedi: - Müstəqil Azərbaycanın
intibahının elə bir sahəsi yoxdur ki, orada
Heydər Əliyevin uzaqgörən siyasəti təməl
rolunu oynamasın. Təhsilə millətin
gələcəyi kimi baxan ulu öndər "Təhsil
sahəsi həyatımızın ən gərəkli,
ən mühüm sahəsidir", - deyir, onun milli
məqsədlər, mənafelər əsasında qurulmasını
tövsiyə edirdi. Eləcə də ulu öndər dünyada mövcud
ən qabaqcıl təcrübəni, texnologiyaları, elmi
fikirləri öyrənməyi, milliliklə ümumbəşəriliyin
vəhdətindən faydalanmağı vacib sayırdı. Müstəqil Azərbaycanın memarı
Heydər Əliyevin xalqımız qarşısındakı
tarixi xidmətlərindən söz açan Ə.Ağayev qeyd
etdi ki, böyük öndər azərbaycançılıq
məfkurəsini meydana qoymaqla, milli
vətənpərvərlik ideyasını irəli sürməklə
yurdu Azərbaycan olan insanların mənəvi birliyini,
qlobal mövcudluq dəyərini ərsəyə gətirdi. Dünyada
tanınan ən ali siyasət müəllimi olaraq, müstəqil
Azərbaycanın tam sərhədli xəritəsini dövlət
başçılarının salonlarında nümayiş etdirdi
və Azərbaycanı bütün dünyada tanıtdı.
Azərbaycanlı gəncləri xarici ölkələrin yüksək
imicli universitetlərinə təhsil almağa göndərərək,
azərbaycanlı istedadının təbiiliyini nümayiş
etdirdi. Ulu öndər iki dövlət, bir millət olan Türkiyə-Azərbaycan
dostluğunu, qardaşlığını möhkəmləndirdi.
öz nitqləri, çıxışları,
məruzələri, ayrı-ayrı görüşlərdəki
söhbətləri, fərmanları, sərəncamları
ilə ölkəmizin təhsil strategiyasını müəyyənləşdirdi,
təlimin məzmununa aydınlıq gətirdi, milli
tərbiyə işinin konsepsiyasını verdi. Bir sözlə,
azad, müstəqil, gözəlləşən, qüdrətlənən
Azərbaycanın inkişafının özülünü qoydu,
təməl möhkəmliyini yaratdı. Məruzəçi məhz bütün bunların
sayəsində və bu gün dövlətimizin başçısı
İlham Əliyevin gərgin, ardıcıl səyləri,
nikbin, qurucu baxışları ilə Azərbaycanın
yeni inkişaf mərhələsinə qədəm qoyduğunu,
müasir dünyanın müasir ölkəsinə çevrilmək yoluna
düşdüyünü vurğuladı. Qeyd etdi ki, 1998-ci ildə
ulu öndər Heydər Əliyev tərəfindən
irəli sürülən təhsil islahatı ideyası, 1999-cu
ildə təhsil sahəsində islahat proqramı
səviyyəsində təsdiqləndi və reallaşma
yoluna düşdü. 1998-ci idən ötən 10 il ərzində görülmüş
işlərin dinamikasını 1998-2003-cü illər və
2003-2008-ci illəri əhatə edən 2 dövrə ayıran
Ə.Ağayev islahat proqramının üç
mərhələdə (1999-cu il, 2000-2003-cü illər
və 2004-cü ildən başlayan mərhələ)
nəzərdə tutulduğunu, ötən müddətdə
130-a qədər konkret tədbir həyata keçirildiyini
diqqətə çatdırdı və hər
mərhələdə görülmüş işləri sadaladı.
O qeyd etdi ki, 1998-2003-cü illərdə ulu öndərin göstərişləri
ilə islahatın hüquqi-normativ bazası yaradıldı,
təhsilin məzmunu (tədris proqramları və
dərsliklər) yeniləşdirildi, məzmun milli
dəyərlər əsasında hazırlandı,
vətəndaş təhsili, vətəndaş
cəmiyyəti quruculuğu sahəsində addımlar atıldı
və digər quruculuq işlərinə başlandı. 2003-2008-ci illərdə təhsil
sahəsində görülən işlər modern
mahiyyətinə, çevikliyi və sürətliliyinə, genişliyi
və qloballığına, texnoloji imkanlarına görə
təkcə inkişafı ilə deyil, yeniləşmə
tendensiyası ilə diqqəti cəlb etdi. Məruzədə ölkə Prezidenti İlham
Əliyevin təhsilin inkişaf etdirilməsində kompleks
yanaşmadan istifadə etməsi siyasəti yüksək
qiymətləndirilərək bunun nəticəsində
həm məktəbin maddi-texniki bazasının, həm
tədris təchizatının, tədris
vəsaitlərinin, həm də yeni fəal və
interaktiv təlim metodlarının, informasiya-kommunikasiya
texnologiyalarının, istedadlara qayğının,
beynəlxalq əlaqələrin, təhsil sistemindəki bütün
təhsil strukturlarının, ən başlıcası,
insan kapitalından məqsədyönlü istifadənin
səmərəlilik səviyyəsinin və müasirləşmə
sürətinin xeyli artdığı qeyd edildi. Vurğulandı
ki, Prezident İlham Əliyevin təhsil sahəsinə
diqqət və qayğısı yalnız iqtisadi-sosial
mahiyyəti ilə deyil, mənəvi-psixoloji nikbinlik
əhvalı ilə insanları ruhlandırır. Son illər təhsil sahəsində görülmüş
işlərin bəzi məqamlarına toxunan Ə.Ağayev
məktəb tikintisi üzərində ayrıca dayandı.
Qeyd etdi ki, dövlət başçısı İlham Əliyevin
"Uşaqlar yaxşı məktəblərdə oxumalı,
müəllimlər də yaxşı
məktəblərdə işləməlidirlər" göstərişinin
həyata keçirilməsi nəticəsində bu gün
Azərbaycanda məktəb tikintisi, abadlaşdırma geniş
vüsət almışdır. 2003-cü ildən bəri ölkədə
1200-dən çox yeni məktəb, əlavə korpuslar
tikilmişdir. Bu sahədə Heydər Əliyevin adını
daşıyan Fondun, Fondun prezidenti Mehriban xanım Əliyevanın
əvəzsiz xidmətlərinin yüksək dəyərini
Mehriban xanıma olan ümumxalq sevgisi, ehtiramı bir daha
təsdiqləyir. Məruzədə Milli Kurrikulumun hazırlanması
və hökumət tərəfindən təsdiqi ölkədə
təhsilin inkişafının mühüm göstəricilərindən
biri kimi dəyərləndirildi. Qeyd olundu ki, Təhsil
Şurasının keçirdiyi monitorinqlərdə müəllimlər
Milli Kurrikulumu təhsilin məzmununu ağırlıqdan
çıxaran, öyrənənlərin müstəqilliyini və
yaradıcı imkanlarını artıran,
qiymətləndirməni-nailiyyəti təmin edən bütün
göstəricilərə görə aparan, şəxsiyyətyönümlü
olan və fəallığı təmin edən
aspektlərinə görə yüksək qiymətləndirmişlər. Tədrisdə müasirləşməyə -
fəal və interaktiv metodlardan istifadəyə geniş
yer verilməsini də məruzəçi təhsildə yüksək
dəyərə malik istiqamətlərdən biri sayaraq
təlim metodlarının yeniləşdirilməsi və
optimallaşdırılmasının əməli
nəticələrinin müsabiqələrdə, ən yaxşı
müəllim seçimlərində, elmi-praktik konfranslarda meydana
çıxdığını, zaman keçdikcə genişləndiyini
söylədi. Ə.Ağayev diqqətə çatdırdı
ki, dövlətimizin başçısı İlham Əliyevin
həyata keçirdiyi Azərbaycan iqtisadiyyatının inkişaf
strategiyası, ölkəmizdə informasiya cəmiyyətinin
bərqərar olması zərurəti və müasir elmi
texnologiyaların mənimsənilməsi ilə bağlı
məsələlər təhsil sisteminin keyfiyyətcə
yaxşılaşdırılmasına, məzmunca müasirləşdirilməsinə
xidmət edir. ölkə başçısının
"Azərbaycan Respublikasında ümumtəhsil
məktəblərinin informasiya və kommunikasiya
texnologiyaları ilə təminatı Proqramının
(2005-2007-ci illər) təsdiq edilməsi haqqında"
2004-cü il 21 avqust tarixli sərəncamının icrası
ilə bağlı aparılan araşdırmalar, orta
məktəb şagirdlərinin müxtəlif beynəlxalq
fənn olimpiadalarında və ali məktəblərə
qəbul imtahanları zamanı nümayiş etdirdikləri
bilik səviyyəsi göstərir ki, ölkənin bir sıra
ümumtəhsil məktəblərində günün
tələblərinə cavab verən innovativ təhsil üsullarının
inkişaf etdirilməsi üçün kifayət qədər müasir
təhsil mühiti formalaşmışdır. Məruzədə ölkəmizin Avropa
təhsil məkanına daxil olması istiqamətində
atılan addımlara, ölkə Prezidentinin bu sahədə işləri
daha da sürətləndirmək məqsədi ilə imzaladığı
"Azərbaycan Respublikasının ali təhsil müəssisələrinin
Avropa ali təhsil məkanına inteqrasiyası ilə bağlı
bəzi tədbirlər haqqında" sərəncamına
yüksək dəyər verildi. Qeyd olundu ki, təhsil
sahəsində görülmüş işlərin keyfiyyətinin
yüksəlməsində təhsil alanların və
təhsil verənlərin fəal vətəndaşlıq
mövqeyinin artmasında Prezidentin insan kapitalından daha
səmərəli istifadəyə üstünlük verməsi,
insanların qabiliyyəti, yaradıcı əməyi
və təhsilin inkişafındakı
xidmətlərinə görə
dəyərləndirilməsi mühüm rol oynayır. Ali
məktəbə yüksək fəallıqla qəbul olanların,
ümumiyyətlə istedadlı gənclərin, xüsusi
xidməti olan müəllimlərin, alimlərin Prezident
təqaüdünə, fərqlənən təhsil və elm
fədakarlarının fəxri adlara layiq görülməsi,
digər mükafat və təltiflər insanları duyğulandırır,
onları müstəqil Azərbaycanın inkişafında
xidmətlərini daha da artırmağa və insanları
örnək olası fəaliyyət nümunəsi göstərməyə
sövq edir. Məruzədə respublika Təhsil Şurasının
ölkənin təhsil həyatında oynadığı
roldan da bəhs olundu. Qeyd edildi ki, Şura
tərəfindən indiyədək 100-dən artıq
təklif irəli sürülmüşdür. Bu
təkliflərdən fasiləsiz pedaqoji təhsil
konsepsiyasının hazırlanmasında, Təhsil Qanunu
layihəsində, dərsliklərin yeniləşdirilməsində,
regional təhsil təcrübəsinin öyrənilməsi
və müzakirəyə çıxarılması
tədbirlərində, Heydər Əliyev irsinin öyrənilərək
vətəndaş təhsili konsepsiyasının hazırlanmasında,
Avropa təhsil məkanına qoşulma təcrübəsinin
ümumiləşdirilməsində, pedaqoji fəaliyyətin
elmi-nəzəri əsaslarının işlənməsində
və digər onlarca hazırlanmış tədris-metodik
sənədlərdə istifadə edilmişdir. Təhsil
Şurası demək olar ki, hər həftə media
mənsublarının müraciətinə cavab verir,
təhsildəki bu və ya digər problemlərlə
əlaqədar ədalətli və obyektiv
dəyərləndirmə fikrini söyləyir.
Valideynlərin, təhsil alanların, təhsil
verənlərin qaldırdığı
məsələyə, irəli sürdüyü
təkliflərə çevik münasibət bildirir, faydalı
təklifləri dəstəkləyir. Professor Ə.Ağayev məruzəsinin
sonunda Prezident İlham Əliyevin qayğısı və
diqqətinin, fərman və sərəncamlarının
Azərbaycanda təhsilin müasirləşmə mövqeli
davamlı inkişafında mühüm əhəmiyyət daşıdığını
bir daha qeyd edib, sevimli Prezidentimiz İlham Heydər oğlu
Əliyevə vətənimizin inkişafı naminə
fəaliyyətində yeni-yeni nailiyyətlər arzuladı. Məruzə ətrafında çıxışlar
oldu. Müzakirələrdə söz alan Azərbaycan Dövlət
Pedaqoji Universitetinin kafedra müdiri, professor Əbdül Əlizadə,
BDU-nun professoru Abuzər Xələfov, Sumqayıt şəhər
11 nömrəli orta məktəbin direktoru Ofeliya Babayeva,
əməkdar müəllim Heybət Qədirov,
Lənkəran rayonundakı Haftoni kənd orta
məktəbinin direktoru Akif Xalıqov, Dövlət İdarəçilik
Akademiyasının rektoru, professor Seyfəddin Qəndilov,
Naxçıvan Dövlət Universitetinin rektoru, akademik İsa
Həbibbəyli Təhsil Şurasının
fəaliyyətini yüksək
dəyərləndirərək, onun təhsilimizin inkişafında,
bu sahədəki problemlərin aradan qaldırılmasında
Təhsil Nazirliyinə, digər dövlət qurumlarına yaxından
kömək göstərdiyini qeyd etdilər. çıxışlarda
ümummilli lider Heydər Əliyevin xilaskarlıq missiyasından,
dövlət quruculuğu sahəsindəki
xidmətlərindən ətraflı söz açıldı, böyük
öndərin ideyalarının, başladığı
nəhəng quruculuq işlərinin onun layiqli davamçısı,
ölkə Prezidenti İlham Əliyev tərəfindən uğurla
davam etdirildiyi, dövlət başçısı
tərəfindən təhsilə davamlı qayğı göstərildiyi
vurğulandı. çıxış edən natiqlər
Azərbaycan Respublikasında 2008-ci ilin oktyabrında keçiriləcək
Prezident seçkilərində ölkə başçısı
İlham Əliyevin namizədliyini irəli sürdülər. Yığıncaqda təhsil naziri Misir
Mərdanov çıxış etdi. Tədbir iştirakçılarını
salamlayan nazir Təhsil Şurasının iclasının
ümummilli lider Heydər Əliyevin anadan olmasının 85
illik yubileyinin bütün ölkəmizdə təntənə
ilə qeyd olunduğu bir vaxtda keçirilməsinin təsadüfi
olmadığını, bu ictimai qurumun 1998-ci ildə çağırılmış
Azərbaycan müəllimlərinin XI qurultayında məhz
Heydər Əliyevin təşəbbüsü və
dəstəyi ilə yarandığını bildirdi. Nazir
bir qeyri-hökumət təşkilatı olaraq Təhsil Şurasının
işini yüksək qiymətləndirib, fəaliyyət göstərdiyi
dövrdə onun ulu öndər Heydər Əliyevin
"Gərək bu şura müstəqil
olsun, ictimai təşkilat olsun, öz sözünü hökumətə,
hakimiyyət orqanlarına desin və öz təkliflərini
irəli sürsün" tövsiyələrinə daim sadiq qaldığını
söylədi. ümummilli liderin müəllimlərin XI qurultayındakı
tarixi çıxışında təhsil işçilərinin
ünvanına dediyi dəyərli fikirləri xatırladan
Misir Mərdanov Heydər Əliyevin bütün həyatı
boyu müəllimlərə böyük hörmət
bəslədiyini söylədi. Vurğuladı ki, məhz
buna görə də "Mən dünyada müəllimdən yüksək
şəxsiyyət tanımıram", - deyərək müəllim
peşəsinə yüksək qiymət verən ulu öndərin
şəxsiyyətinə nəinki müəllimlər, bütün
xalqımız böyük hörmət və ehtiram göstərirlər.
Böyük öndər Heydər Əliyevi tariximizin ən böyük
azərbaycanlısı adlandıran təhsil naziri onun
Azərbaycan xalqını, dövlətini yüksəltməklə,
onu dünyaya tanıtmaqla özünün də xalqımızla
bərabər yüksəldiyini, ən yüksək
zirvəyə çatdığını söylədi. Ulu öndərin ölkəmizdə əsasını
qoyduğu böyük quruculuq işlərinin onun layiqli varisi
Prezident İlham Əliyev tərəfindən uğurla
davam etdirildiyini deyən təhsil naziri ölkə başçısının
apardığı praqmatik, dünyəvi siyasət
nəticəsində son illər Azərbaycanda qlobal
dəyişikliklərin baş verdiyini, digər
sahələr kimi təhsil sistemində də bir çox
irimiqyaslı proqram və layihələrin həyata keçirildiyini,
yüzlərlə təhsil işçisinin dövlət mükafatlarına
layiq görüldüyünü bildirdi. Bütün bunlarla yanaşı, Azərbaycan
təhsil işçilərinin qarşısında təhsili
daha da inkişaf etdirmək baxımından ciddi və mühüm
vəzifələr durduğunu qeyd edən M.Mərdanov
təhsil işçilərini öz vəzifələrinə
məsuliyyətlə yanaşmağa çağırdı. Sonda Təhsil Şurasının ümumi yığıncağı
məruzə və çıxışları
dinləyərək qərar qəbul etdi. Qərarda
deyilir: - ölkə başçısı İlham
Heydər oğlu Əliyevin Azərbaycan Respublikasında
2008-ci ilin oktyabrında keçiriləcək seçkilərdə
prezidentliyə namizədliyi irəli sürülsün. - "Son illərdə ölkədə
təhsil sahəsində görülmüş işlərin müasir
təhsil quruculuğunda əhəmiyyətli yer tutduğu
qeyd edilsin. - Azərbaycan Respublikasının Təhsil
Şurasının Nizamnaməsinə uyğun olaraq bu ilin
sentyabr ayında Azərbaycan müəllimlərinin XIII
qurultayının çağırılması Təhsil
Nazirliyinə təklif olunsun". Bununla da ümumi iclas öz işini başa çatdırdı. Yusif ƏLİYEV
|