İlin sonunadək qəza vəziyyətində olan 30 məktəb binası yeniləşdiriləcək

Məlum olduğu kimi, Azərbaycan Respublikasının Prezidenti cənab İlham Əliyev bu il iyunun 23-də "Qəza vəziyyətində olan ümumtəhsil məktəb binalarının tikintisi, təmiri və ali təhsil müəssisələrinin maddi texniki bazasının möhkəmləndirilməsi haqqında" sərəncam imzalayıb. Dövlət başçısının təhsilimizə qayğısının yeni parlaq təzahürü olan həmin sərəncama əsasən ölkədə qəza vəziyyətində olan məktəb binalarının yeniləri ilə əvəz edilməsi, aparılan təmir işlərinin başa çatdırılması üçün Prezidentin Ehtiyat Fondundan Təhsil Nazirliyinə 25 milyon manat məbləğində vəsait ayrılıb.

Təhsil Nazirliyindən aldığımız məlumata görə, ayrılan vəsait hesabına ilin sonunadək qəza vəziyyətində olan 30-a yaxın məktəb binası yenidən tikiləcək, bərpa və ya təmir olunacaqdır. Əsasən bölgələrdə yerləşən həmin məktəblərin binaları uyğunlaşdırılmış binalar olub, ötən əsrin 30-40-cı illərində tikilmişdir. Vaxtilə məktəb üçün deyil, başqa məqsədlər üçün nəzərdə tutulmuş, bəziləri isə hətta taxtadan inşa olunmuş həmin binalar uzunillik istismar nəticəsində köhnələrək qəza vəziyyətinə düşmüş, onların bəzisində uşaqlar üçün təhlükəli vəziyyət yarandığından tədris prosesi dayandırılmışdır.

Düşdüyü qəza vəziyyətinin dərəcəsindən asılı olaraq bəzi məktəb binalarının sökülüb yerində yenisinin tikilməsi, bəzilərində isə bərpa, yenidənqurma və əsaslı təmir işlərinin aparılması nəzərdə tutulur.

İKT-nin tətbiqi ilə məşğul olacaq yeni idarə yaradılıb

Azərbaycan Respublikası Nazirlər Kabinetinin qərarı ilə ölkədə təhsil sisteminin bütün pillələrini əhatə edən vahid təhsil informasiya mühitinin formalaşdırılması, informasiya və kommunikasiya texnologiyalarının tətbiqi, bu sahəyə dövlət büdcəsindən və digər maliyyə mənbələrindən ayrılmış vəsaitlərin idarə edilməsi və səmərəli istifadəsi, təsdiq edilmiş proqramın yüksək keyfiyyətlə həyata keçirilməsi məqsədi ilə Təhsil Nazirliyinin nəzdində təsərrüfat hesablı Təhsil Sisteminin İnformasiyalaşdırılması İdarəsi yaradılıb.

Təhsil Nazirliyi özünün indiyədək bilavasitə reallaşdırdığı informasiya və kommunikasiya texnologiyalarının tətbiqi sahəsində dövlət investisiya xərcləri və xarici investisiyalar hesabına nəzərdə tutulmuş vəsaitlər üzrə sifarişçi funksiyasını bundan sonra yeni yaradılmış idarə vasitəsilə həyata keçirəcək.

Təhsil Nazirliyinə Azərbaycan Respublikasının Dövlət Əmlakının İdarə Edilməsi üzrə Dövlət Komitəsi ilə birlikdə yeni idarənin yerləşdirilməsi məsələsini həll etmək tapşırılıb. Təhsil Sisteminin İnformasiyalaşdırılması İdarəsinin strukturu və xərclər smetası hər il Azərbaycan Respublikasının Maliyyə Nazirliyi ilə razılaşdırılmaqla Təhsil Nazirliyi tərəfindən təsdiq olunacaq.

Y.ƏLİYEV