Qızıl medala aparan yolda beş təmiz qələbə

Cüdoçu Elnur Məmmədli Pekin olimpiadasında Azərbaycana ilk qızıl medalı qazandırdı

73 kiloqram çəkidə yarışan cüdoçu Elnur Məmmədli avqustun 11-də Pekin olimpiadasında Azərbaycana ilk qızıl medalı qazandırmışdır. İdmançımız finala qədər keçirdiyi dörd görüşün hamısını vaxtından əvvəl təmiz qələbə (ippon) ilə başa çatdırmışdır.

Onun final görüşü isə Ginnesin rekordlar kitabına daxil edilməyə layiqdir. 20 yaşlı Azərbaycan idmançısı dünya çempionatının finalında uduzduğu cənubi koreyalı Ki çu Vonqu cəmi 13 saniyə ərzində ippon fəndi ilə məğlub etmişdir. Heç şübhəsiz ki, bu, Olimpiya oyunlarının final görüşləri tarixinə düşəcək bir qələbədir.

Xatırladaq ki, Elnur Məmmədli bu qələbəsi ilə 2008-ci il olimpiadasında MDB ölkələri arasında ilk qızıl medalı Azərbaycana qazandırmışdır.

Yarışları izləyən dövlət başçısı, Azərbaycan Milli Olimpiya Komitəsinin prezidenti İlham Əliyev 73 kiloqram çəki dərəcəsində cüdoçulara medalların təqdim olunması mərasimində iştirak etmişdir.

Pekin olimpiadasının üçüncü günü Azərbaycan idmançısının qələbəsi şərəfinə ölkəmizin Dövlət himni səslənmişdir.

Həmin gün olimpiya çempionunun ailəsini təbrikə gedən AzərTAc-ın müxbiri idmançının yaxınları, jurnalistlər, Bakı Şəhər Baş İdman və Gənclər İdarəsinin rəhbəri Rafiq Abbasovla birlikdə final döyüşünü izləmişdir. Elnurun anası Gülnarə xanım göz yaşlarını gizlətmədən deyirdi ki, bu qələbə Azərbaycan Prezidenti, Milli Olimpiya Komitəsinin prezidenti İlham Əliyevin ölkəmizdə idmanın inkişafına və gənclərimizin sağlam böyüməsinə diqqət və qayğısı sayəsində mümkün olmuşdur. çox sevinirəm ki, oğlum bu etimadı doğrultdu. O, bu qələbəni Azərbaycana, dövlət başçısına həsr etmişdir.

Həmin gün ölkəmizin birinci xanımı Mehriban Əliyeva Pekindən telefonla Elnur Məmmədlinin anasına zəng edərək, oğlunun parlaq qələbəsi münasibətilə səmimi təbriklərini çatdırmışdır.

Xatırladaq ki, XXIX Yay Olimpiya oyunlarının çempionu idmanla 9 yaşından Respublika İxtisaslaşdırılmış Olimpiya Ehtiyatları Uşaq Gənclər İdman Məktəbində məşğul olur, hazırda "Neftçi" İdman-Sağlamlıq Mərkəzinin üzvüdür.

AzərTAc

Medallarımızın sayı artır

Pekin olimpiadasında Azərbaycana ilk qızıl medalı qazandıran Elnur Məmmədlinin böyük qələbəsindən sonra olimpiadanın dördüncü günü də idmançılarımız üçün uğurlu olmuşdur. Yunan-Roma güləş növü üzrə  yarışan Rövşən Bayramov (55 kq) və Vitali Rəhimov (60 kq) komandamıza  iki gümüş medal qazandırmışlar.

Dövlət başçısı, Milli  Olimpiya Komitəsinin prezidenti İlham Əliyev və xanımı Mehriban Əliyeva da Pekində bu yarışları izləmişlər. Rövşən Bayramov və Vitali  Rəhimov çıxışa uğurla başlamışlar. Rövşən əvvəlcə misirli Mustafa Məhəmmədə və kubalı Yaqner Ernandesə qalib gəldikdən sonra köhnə rəqibi Roman Amoyanı da məğlub edərək finala çıxmışdır. Lakin finalda  Rövşən Bayramov rusiyalı Nazir Mankiyev ilə görüşdə qızıl medalı əldən vermişdir.

Vitali  Rəhimovun çinli Yanq Şenqlə və rumın Eusebio Daçianu ilə qarşılaşması idmançımızın qələbəsi ilə başa çatmışdır.

 Rövşən Bayramov kimi Vitalini də olimpiya medalına aparan yolda  erməni idmançı ilə görüş gözləyirdi. O, bolqarıstanlı erməni əsilli Armen Nazaryana aşkar üstünlüklə qalib gəlmişdir.

V.Rəhimov növbəti rəqibi, qazaxıstanlı Nurbakit Tenqizbayevi asanlıqla məğlub etsə də, finalda  rusiyalı İslambek Albiyevə uduzaraq gümüş medal qazanmışdır.

Yarışlar davam edir. İdmançılarımıza növbəti yarışlarda yeni-yeni qələbələr arzulayırıq.   

Şakir CƏFƏROV

P.S.  Qəzet  çapa gedərkən Pekindən daha bir şad xəbər eşitdik. Cüdoçumuz Mövlud Mirəliyev (100 kq) Polşa idmançısına qalib gələrək bürünc medala layiq görülmüşdür. Hələlik  idmançılarımız bir qızıl, iki gümüş və bir bürünc medal qazanmışlar.

Yeni nəşrlərlə bağlı məsələlər müzakirə olundu

Naxçıvan Dövlət Universitetinin Azərbaycan MEA-nın Naxçıvan bölməsi ilə birgə nəşrə hazırlayacağı H.Cavid ensiklopediyasının tərtibi məsələləri və qarşıda duran vəzifələr müzakirə olundu.

Universitetin rektoru, akademik İsa Həbibbəyli çıxış edərək muxtar respublika rəhbərliyinin bu nəşrin hazırlanmasına xüsusi qayğı və tələbkarlıqla yanaşdığını, Naxçıvan MR Nazirlər Kabinetinin maliyyə vəsaiti ayırdığını qeyd etdi. Akademik İ.Həbibbəyli H.Cavid ensiklopediyasının nəşri işinə şairin Bakıdakı ev muzeyinin əməkdaşlarının - Kamran Əliyev, Gülbəniz Babaxanlı kimi cavidşünasların cəlb olunduğunu bildirdi.

Universitetin tədris işləri üzrə prorektoru, əməkdar elm xadimi, filologiya elmləri namizədi Hüseyn Həşimli, universitetin dilçilik kafedrasının müdiri, filologiya elmləri doktoru Sevindik Vəliyev, jurnalistika və dünya ədəbiyyatı kafedrasının müdiri Seyid Surə, beynəlxalq münasibətlər və xarici dillər fakültəsinin dekanı, dosent Qurban Qurbanlı, coğrafiya elmləri namizədi Nazim Bababəyli, mühəndis-memarlıq fakültəsinin müəllimi Cavid İsmayılov ensiklopediyanın nəşri ilə bağlı təklif və mülahizələrini bildirdilər.

***

Universitetin hazırlamaqda olduğu kəhrizlərlə bağlı dərsliyin də nəşri məsələlərinə toxunuldu. Rektor, akademik İsa Həbibbəyli Naxçıvan MR-də fəaliyyət göstərən Beynəlxalq Miqrasiya Təşkilatı ilə birgə hazırlanmaqda olan dərsliyin memarlıq, coğrafiya, iqtisadiyyat ixtisası tələbələri üçün nəzərdə tutulduğunu qeyd etdi. Rektor bu kollektiv nəşrin müəlliflərinin, prinsiplərinin müəyyənləşdirildiyini, planın tərtib olunduğunu bildirdi.

AMEA-nın Naxçıvan bölməsinin Tarix, Etnoqrafiya və Arxeologiya İnstitutunun direktoru, tarix elmləri doktoru Fəxrəddin Səfərli nəşrin işçi qrupunun fəaliyyətindən danışdı. Digər çıxış edənlər dərsliyin nəşrinin əhəmiyyətindən və tərtibi məsələlərindən söz açdılar.

Mehriban SULTAN,

NDU-nun mətbuat

xidmətinin rəhbəri

NDU-da təqdimat mərasimi

Naxçıvan Dövlət Universitetində bu günlərdə Amerika Beynəlxalq Təhsil Şurasının həyata keçirdiyi JFDP (Juniour Facultu Development Proqram) Proqramı çərçivəsində təqdimat mərasimi keçirildi.

Tədbiri Naxçıvan Dövlət Universitetinin elmi işlər üzrə prorektoru, fizika-riyaziyyat elmləri doktoru, AMEA-nın müxbir üzvü Vəli Hüseynov açdı.

Sonra söz Azərbaycan Texniki Universitetinin dosenti Yaşar Hacıyevə və Bakı Dövlət Universitetinin sosial idarəetmə və psixologiya kafedrasının müdiri İradə Məmmədovaya verildi.

Qonaqlar qeyd etdilər ki, yüzlərlə ölkənin qatıldığı JFDP Proqramına Azərbaycandan 2007-2008-ci dərs ilində 46 nəfər qoşulmuşdu ki, onlardan yalnız 6-sı ABŞ-ın müxtəlif ali təhsil məktəblərində 6 ay müddətində təhsillərini davam etdirmək şansı qazandı. Məhz ali təhsil məktəblərinin müəllimləri üçün nəzərdə tutulan bu proqram dördmərhələlidir.

JFDP Proqramının əsas məqsədi tələbələrdə pedaqoji təcrübənin formalaşdırılması və inkişaf etdirilməsi, habelə seçdikləri fənlərin ABŞ-ın ali təhsil məktəblərində tədrisi metodikasının öyrənilməsi və onların Azərbaycan ali məktəblərində, həmçinin Naxçıvan Dövlət Universitetində uğurlu tətbiqindən ibarətdir.

NDU-nun elmi işlər üzrə prorektoru, fizika-riyaziyyat elmləri doktoru, professor Vəli Hüseynov tədbirə yekun vuraraq Azərbaycan Respublikasının Təhsil Nazirliyinə, JFDP Proqramı nümayəndələrinə belə imkan yaratdıqları, qonaqlara isə zəngin təcrübələrini bölüşdükləri üçün minnətdarlığını bildirdi.

Nərmin CƏFƏROVA,

NDU-nun mətbuat

xidmətinin əməkdaşı