Mariya Stadnik Azərbaycana beşinci olimpiya medalını qazandırdı

Pekin olimpiadasının 8-ci günü, avqustun 16-da Azərbaycanın idman azarkeşləri növbəti medalı güləşçi Mariya Stadnikdən (48 kiloqram) gözləyirdilər və onların bu ümidi doğruldu. Sonda olimpiya çempionu olmuş kanadalı Kerol Xinxə məğlub olan idmançımız sonrakı görüşlərdə dalbadal qələbə qazanaraq bürünc medalın sahibi oldu.

AzərTAc

Dərsliklər məktəblərə çatdırılır

ümumtəhsil məktəblərinə dair dərsliklərin nəşri ilə əlaqədar Təhsil Nazirliyindən aldığımız məlumatda bildirilir ki, 2008-2009-cu dərs ili üçün dərsliklərin hazırlanması işi müvəffəqiyyətlə davam edir. I siniflərə aid Milli Kurrikulum əsasında hazırlanmış dərslik komplektlərinin bir hissəsinin çapı bu günlərdə başa çatmaq üzrədir. Digər qismi isə dərs ilinin   başlanmasına qədər hazır olacaqdır.

III-XI sinif dərsliklərinin çapı da artıq başa çatmış, çap olunmuş bu dərsliklərin böyük hissəsi rayon və şəhər təhsil şöbələrinə göndərilmişdir.

Hazırda dərsliklər yerlərdə cavabdeh şəxslərin rəhbərliyi altında   məktəblərə paylanır.

Şakir CƏFƏROV

Bu il Bakıda 29 məktəb üçün yeni tədris korpusu tikiləcək

Bakı Şəhəri üzrə Təhsil İdarəsindən aldığımız məlumata görə, 2008-2009-cu dərs ilində bu quruma tabe olan 29 məktəbdə yeni tədris korpusu tikiləcək. 12200 şagird yerlik yeni tədris korpuslarında bütövlükdə 603 sinif otağı olacaq.

Paytaxtın iri və şagird sıxlığı çox olan bir sıra tədris müəssisələri (299, 60, 271, 272, 159, 292, 46, 106 nömrəli məktəblər və b.) əlavə sinif otaqlarına daha çox ehtiyac hiss etdiklərindən onlar üçün nisbətən böyük - hər biri 600-800 şagird yerlik tədris korpuslarının inşası nəzərdə tutulub. Paytaxtın 11 rayonunu əhatə edən 38 məktəbdə isə əsaslı təmir işləri aparılacaqdır. Bundan başqa, il ərzində 19 məktəbəqədər tərbiyə müəssisəsinin də əsaslı təmir olunması planlaşdırılıb.

Hazırda təhsil müəssisələrində tikinti və təmir işləri sürətlə davam etdirilir. Onların əksəriyyəti yeni dərs ili başlayanadək şagird və müəllimlərin istifadəsinə veriləcək.

Sumqayıtın 10 təhsil müəssisəsində tikinti və təmir işləri aparılır

Hazırda Sumqayıt şəhərinin 10 təhsil müəssisəsində tikinti və təmir işləri aparılır. Şəhər 19 nömrəli orta məktəb üçün 600, 5 nömrəli orta məktəb üçün 400, humanitar, təbiət və riyaziyyat təmayüllü "İstedad" liseyi və 9 nömrəli orta məktəbin hər biri üçün 300, əqli və fiziki cəhətdən qüsurlu uşaqlar üçün internat məktəbdə 260, 42 nömrəli orta məktəb üçünsə 220 şagird yerlik yeni tədris korpusları inşa olunur. Şəhər 29, 31 nömrəli orta məktəblərin, peşə məktəbinin və 44 nömrəli uşaq bağçasının binaları isə əsaslı təmir olunur. Sözügedən təhsil müəssisələrindəki bütün tikinti və təmir işləri dövlət vəsaiti hesabına həyata keçirilir. Tikinti və təmir işlərinin sentyabrın 15-dək başa çatdırılması nəzərdə tutulub.

 Y.ƏLİYEV  

Uşaqların rahatlığı üçün normal şərait yaradılıb

Havaların isti keçməsinə baxmayaraq, Bakının 6 nömrəli körpələr evi-uşaq bağçasında körpələrin rahatlığı, tərbiyəçilərin isə yaxşı işləməsi üçün normal şərait yaradılıb.

6 nömrəli körpələr evi-uşaq bağçasının müdiri Səadət Məmmədova bildirdi ki,  bu gün bağçada yaşyarımdan 6 yaşadək 4 qrup üzrə 70 nəfər uşaq tərbiyə alır. Onlarla 8 tərbiyəçi məşğul olur. Burada uşaqlar arasında didaktik oyunlar, müxtəlif yarışlar və test üsulu ilə təşkil  olunmuş məşğələlər keçirilir. Şəhərin ayrı-ayrı yerlərinə ekskursiyalar da maraqlı olur.

Bağçada yeni dərs ilinə hazırlıqla bağlı təmir işləri gedir. Məşğələ otaqları, o cümlədən qapılar, pəncərələr rənglənmiş, səliqə-sahman işləri aparılmışdır.  Bu işdə tərbiyəçilərdən  Məhsəti Həsənova, Fərqanə Ələkbərova və Raidə Bağırovanın zəhməti daha çox olmuşdur.

Şakir CƏFƏROV

Gəzintilər uşaqların  dünyagörüşünü artırır

Bakıdakı 32 nömrəli məktəbəqədər təhsil  müəssisəsində hər şənbə günü uşaqların gəzintiyə  çıxarılması ənənə halını alıb. Ekskursiyalar zamanı tərbiyəçilər Şəfəq Əhmədova, Fərqanə Səmədova, Gülşən Abdullayeva, Məlahət Məlikova onlara tariximiz, təbiətimizin flora və faunası haqqında ətraflı məlumatlar verirlər.

Bu günlərdə bağçanın balaca sakinləri  Milli Parkda, Şirvanşahlar sarayında, Xalçaçılıq muzeyində və Zooparkda olmuşlar. Onlar gəzintidən aldıqları xoş təəssüratlarını bizimlə bölüşdülər. Uşaqların sevincinin həddi-hüdudu yox idi. Gəzdikləri yerlər barədə verdiyimiz suallara balacalar dəqiq cavablar verdilər.

Loqopedlərin əməyi hədər getməyib

Paytaxtımızdakı 17 nömrəli  nitqi və əqli qüsurlu körpələr-evi uşaq bağçasında 12 qrup fəaliyyət göstərir.

Bağçada fiziki və əqli qüsurlu  diaqnozu ilə daxil olan 128 uşaq  tərbiyə alır. Loqopedlərin səyi nəticəsində nitqindəki qüsurları aradan qaldırılan 37 uşaq bu il şəhərimizin müxtəlif məktəblərinə yola salınıb. Onlardan 4 nəfəri yardımçı məktəblərdə, 5 nəfəri liseylərdə, qalanları isə ümumtəhsil məktəblərində təhsil alacaqlar.

S.SƏFƏROVA