|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Kurrikulumlar və onların xarakterik cəhətləri Biz dünyanın bütün ölkələrində
- Qərbdə də, Şərqdə də əldə
olunmuş nailiyyətləri dərindən öyrənməli
və onlardan Azərbaycan üçün müsbət xarakter daşıyan
cəhətləri ölkəmizin təhsil sistemində
tətbiq etməliyik. Heydər ƏLİYEV ölkəmizdə həyata keçirilən
kurrikulum islahatı mərhələli proses olmaqla,
innovasiyalara əsaslanan və əvvəlcədən müəyyən
edilmiş real nəticələrə istiqamətlənmiş
geniş fəaliyyət sahəsinə çevrilmişdir.
Burada atılan hər bir addım düşünülmüş
qərara əsaslanır. Həmin qərarların istinad nöqtəsi
isə müntəzəm aparılan müzakirə və
diskussiyalar, onların obyektiv sonluğunu maddiləşdirən
nəticələrdir. Minlərlə müəllimin bu və
ya digər formada qatıldığı həmin müzakirə
və diskussiyalarda
formalaşan, özünü təhsil həyatında reallaşdıran
Azərbaycan təhsilinin kurrikulumları artıq pedaqoji
ictimaiyyətin fəaliyyətinin vuran nəbzinə çevrilməkdədir.
ötən illərə nəzər salsaq, uğurlu
nəticələr göz qabağındadır:
"Azərbaycan Respublikasında ümumi təhsilin Konsepsiyası (Milli Kurrikulumu)", hökumət
tərəfindən qəbul olunmuş, ibtidai siniflər
üçün fənn kurrikulumları təsdiq edilmişdir. Cari
tədris ilindən fənn kurrikulumları respublikanın
ümumtəhsil məktəblərinin birinci
siniflərində tətbiq olunmağa başlamışdır.
Minlərlə müəllim öyrədici kurslardan keşirilmişdir.
Yeni fənn kurrikulumlarının tələblərinə
uyğun hazırlanmış dərslik komplektləri
məktəblərimizin istifadəsinə verilmişdir
və s. Dərs ilinin ötən yarımili
ərzində yerlərdə fənn kurrikulumlarının
tətbiqi vəziyyəti öyrənilərkən ümumi
qənaət belə olmuşdur ki, bu sahədə müəllimlərin
bəzi çətinlikləri olsa da, yeni təhsil modelinin
maraq doğurduğu, şagirdlərdə fəallıq
yaratdığı, yaradıcı fəaliyyətinə
geniş imkanlar açdığı bu günümüzün reallığıdır.
Bunlarla yanaşı, təhsil kurrikulumlarında
təsbit edilmiş təlim nəticələri, məzmun
standartları, fəndaxili və fənlərarası
inteqrasiya, təlim strategiyaları və
qiymətləndirmə prinsiplərinin mahiyyəti haqqında
elmi-nəzəri əsası olmayan fikirlər də
meydana çıxır ki, bunlar da, heç şübhəsiz, pedaqoji
ictimaiyyətdə müəyyən çaşqınlıq
yarada bilər. Bu yazıda həmin
məsələlərlə əlaqədar bəzi
məqamlara aydınlıq gətirməyə çalışacağıq.
İlk növbədə, nəzərə alınmalıdır
ki, yeni yaranan kurrikulumlar bütövlükdə pedaqoji
ictimaiyyətin məhsulu olmaqla cəmiyyətimizin
təhsillə bağlı tələbatlarının
təzahürü kimi meydana çıxmışdır. Milli
Kurrikulum və fənn kurrikulumları beynəlxalq və
milli məsləhətçilərin iştirakı ilə
400-ə qədər təhsil işçisini əhatə
edən 23 işçi qrupu tərəfindən hazırlanmış,
ictimaiyyətin müzakirəsinə verilmişdir. Toplanmış
təkliflərə əsasən yenidən
nəzərdən keçirilərək milli
səviyyəli bir sənəd kimi təsdiq edilmişdir.
Tətbiq olunduğu vaxtdan kurrikulumların
reallaşdırılması istiqamətində
monitorinqlərə başlanmışdır. İlkin
təcrübə olduğundan əldə edilən
nəticələrə görə müəyyən
dəyişikliklərin aparılmasına istisna hal kimi
icazə verilmişdir. Lakin ümumi qaydalara görə,
kurrikulumların milli səviyyədə
qiymətləndirilməsi, müvafiq dəyişikliklərin
aparılması 4-5 ildən bir nəzərdə
tutulur.
Kurrikulum praqmatik sənəddir ümumiyyətlə, dünya təcrübəsində
kurrikulumların hazırlanması istiqamətində aparılan
araşdırmalar tətbiqi araşdırmalar hesab olunur.
Ona görə ki, onların hazırlanmasında və
tətbiqində, əsasən, pedaqoji ictimaiyyət,
bilavasitə müəllimlər iştirak edir. Bu
sənəd birbaşa pedaqoji prosesi təşkil
edənləri, onu həyata keçirənləri
istiqamətləndirir. ölkəmizdə hazırlanmış
kurrikulumlar da həmin xarakterə malik olması ilə
fərqlənir. Təcrübi əhəmiyyət daşıdığına
görə praqmatik sənəd kimi qəbul edilir. Yeri gəlmişkən qeyd etmək lazımdır
ki, dünyada kurrikulum nəzəriyyəsinin formalaşdırılması
istiqamətində indiyədək xeyli sayda tədqiqatlar
aparılmışdır. Onun nəzəri əsasları,
məzmun və forma xüsusiyyətləri, tipoloji və
digər cəhətləri ilə bağlı yüzlərlə
əsər yazılmışdır. Bu nəzəri
tədqiqatlar, heç şübhəsiz, kurrikulumların hazırlanmasına,
zaman-zaman onların yeniləri ilə əvəz olunmasına
imkan yaratmışdır. Azərbaycanda kurrikulum yaradıcılığı
prosesinə başlanarkən ənənəvi olaraq
təhsilin müxtəlif sahələrinə aid aparılmış
tədqiqatlara, eyni zamanda beynəlxalq miqyasda kurrikulumların
nəzəri və praktik problemləri ilə bağlı
araşdırmalara istinad olunmuşdur. Nəticədə
bu gün təhsilimizin müasir inkişaf səviyyəsini
ifadə edən və praktik əhəmiyyəti ilə
fərqlənən kurrikulumlar meydana çıxmışdır.
Məlum olduğu kimi, kurrikulumlarda ilkin
olaraq təlimin məzmunu öz əksini tapır. Təlimin
məzmunu ənənəvi proqramlardan fərqli olaraq
nəticələr formasında verilir, bu
nəticələr şagirdlərin
yiyələnəcəkləri bilik və
fəaliyyəti konkret ifadə etməklə çox şəffaf
xarakter daşıyır. Mahiyyət etibarı ilə bacarıqlardan
ibarət olan bu nəticələr minimum tələb kimi
təsdiq olunduğundan həm də standart hesab edilir. Hər bir dərslik yazmaq istəyən,
təhsili idarə edən, məktəb kurrikulumlarını
hazırlayan və nəhayət, təlim prosesinin təşkilatçısı
olan şəxs bu nəticələrin
əldə olunması üçün özünəməxsus
metodik sistem hazırlaya bilər. Bu zaman
nəticələr bir standart olaraq hamı üçün
nailiyyətin ölçü vahidi kimi diqqət mərkəzində
saxlanılır. Bunlar isə nəticələrdən
ibarət məzmun standartlarının əvəzsiz
praktik əhəmiyyətə malik olmasını sübut
edir. "ümumtəhsil məktəblərinin
I-IV sinifləri üçün fənn kurrikulumları" kitabının
ikinci hissəsindəki "Təlim strategiyaları",
eləcə də "Şagird nailiyyətinin
qiymətləndirilməsi" bölmələri də
bilavasitə dərslik müəlliflərinin,
müəllimlərin praktik fəaliyyətini
istiqamətləndirmək məqsədi ilə verilmişdir.
Bütün bunlar hazırlanmış kurrikulumların praqmatik
xarakterini daha da gücləndirir. Məzmun standartlarının mahiyyəti "Aparılan araşdırmalarda belə
nəticəyə gəlinmişdir ki, təhsildə
yaranan böhranların aradan qaldırılması üçün
hələ 60-cı illərdən islahatların aparılmasına
başlanılmışdır. Bu zaman cəmiyyət
və onun təhsili arasında ciddi qarşılıqlı
adaptasiyasının (uyğunlaşmanın) aparılmasının
zəruriliyi qeyd edilmişdir. Bunun üçün isə təhsilin
standartlaşması formalardan biri kimi təklif olunmuşdu"
(Baydenko N.İ. Obrazovatelnoy standart. "Opıt sistemnoqo
issledovaniya", Novqorod, 1999, səh. 15). Bu fikrə istinad
etsək, təhsil sistemində standartların hazırlanmasına
başlanılması məhz bu cür tədqiqatların
nəticəsində mümkün olmuşdur. Azərbaycanda təhsil standartlarının
formalaşdırılması ilə bağlı təşəbbüslər
ötən əsrin 90-cı illərinə təsadüf edir.
Ulu öndər Heydər Əliyevin rəhbərliyi ilə
hazırlanıb 1995-ci ildə qəbul olunmuş
Azərbaycan Respublikasının Konstitusiyasında minimum
təhsil standartlarının müəyyənləşdirilməsinin
təsbit edilməsi bu sahədə irəliyə doğru
atılan ən ciddi addım idi. Azərbaycan hökuməti
tərəfindən 1999-cu ildə təsdiq edilmiş
"Azərbaycan Respublikasında ümumi orta təhsilin dövlət
standartları" isə Konstitusiya tələbinin
həyata keçirilməsi istiqamətində görülən ilk
real tədbirlərdən biri oldu. Sonralar islahatın gedişi
prosesində təhsil standartlarının hazırlanması
sahəsində inkişaf etmiş ölkələrin təcrübəsi
öyrənildi və 2005-ci ildən etibarən kurrikulum
islahatı çərçivəsində yeni təhsil standartlarının
hazırlanmasına başlanıldı. Artıq bu gün həmin standartlar kurrikulumlarımızda
özünə xüsusi yer tutmuşdur. Təlimin məzmununu
ifadə edən bu standartlar kurrikulumların əsasını
təşkil etməklə mühüm əhəmiyyət daşıyır,
öyrədilməsi zəruri
olanları ehtiva etməklə kurrikulum komponentləri arasında
aparıcı yer tutur. Bəzən yanlış olsa da, belə
fikirlər səslənir ki, kurrikulumlarda təlim
standartlarının mahiyyəti açıqlanmamışdır,
bunun üçün müxtəlif çeşidli çalışmaların
hazırlanmasına ehtiyac vardır. Belə düşünənlər
çox böyük yanlışlığa yol verirlər. çünki çalışmalar,
sadəcə olaraq, standartlarda nəzərdə tutulan
nəticəni əldə etmək üçün vasitə rolunu
oynayır. Fəlsəfi anlayış kimi "Mahiyyət
maddi sistemin inkişafının əsas cəhət
və meyillərini müəyyən edən dərin
əlaqələrin, münasibət və daxili qanunların
məcmusudur" (Fəlsəfə. Ensiklopedik lüğət.
Müəllif kollektivi. "Azərbaycan Ensiklopediyası"
Nəşriyyat-Poliqrafiya Birliyi. B., 1997, səh.268). Bu
mənada məzmun standartı dedikdə onun nədən
ibarət olması, hansı daxili məzmuna malik olması
başa düşülür. Məzmun standartı mahiyyət etibarı
ilə nəticə şəklində olub özündə
konkret mənimsəniləcək biliyi və
fəaliyyəti ehtiva edir. Bilik komponentində nəyin öyrədiləcəyi,
fəaliyyət komponentində isə öyrənilənin
necə nümayiş etdiriləcəyi göstərilir. Fənn kurrikulumlarında hər bir əsas
standart alt-standartlarla müşayiət edilir. Bu, bir neçə
məqsədə nail olmağa imkan verir. Kifayət
qədər ümumi formada ifadə olunan alt-standartlar müxtəlif
təlim məqsədlərini reallaşdırmaq üçün
onlara dönə-dönə müraciət etmək imkanı yaradır.
Bir qayda olaraq əsas standart bir neçə sinifdə və
hətta bütün təhsil pilləsi ərzində eyni formada
ifadə olunur. Bu zaman sinifdən-sinfə keçdikcə
əhatə olunan bilik və bacarıqların miqyası
alt-standartlar vasitəsilə müəyyən olunur. Bu,
həm də sinifdən-sinfə biliyin və
fəaliyyətin necə inkişaf etdiyini
izləməyə imkan verir. Digər tərəfdən,
alt-standartların köməyi ilə
biliyin kateqoriyaları (deklarativ, prosedural, konseptual)
və fəaliyyətin xüsusiyyətləri (bilmə,
anlama, tətbiqetmə, təhliletmə, sintezetmə,
dəyərləndirmə) hissələrə bölünür ki,
bunlar da müəllimlərin təlim məqsədlərini müəyyənləşdirməsini
asanlaşdırmağa xidmət göstərir. Məsələn, ana dili üzrə I
sinfə aid aşağıdakı əsas və
alt-standartları nəzərdən keçirək. Şagird: 2.1.Qarşılaşdığı yeni sözlərin
mənasını başa düşdüyünü nümayiş
etdirir. 2.1.1. Rast gəldiyi yeni əşya və
hadisələri adlandırır. 2.1.2. öyrəndiyi yeni sözlərin mənasını
sadə formada izah edir. 2.1.3. Yaxınmənalı və
əksmənalı sözləri fərqləndirir. 2.1.4. öyrəndiyi yeni sözləri cümlə içərisində
işlədir. (ümumtəhsil məktəblərinin I-IV
sinifləri üçün fənn kurrikulumları. Bakı,
Təhsil, 2008, səh.21). Göründüyü kimi, ana dili üzrə bir əsas
standart və ona aid dörd alt-standart verilmişdir. Onlar şagirdin
anlama səviyyəsini müəyyən etməyə yönəlmişdir.
Əsas standartda ifadə olunan yeni sözlərin mənası
bilik, "başa düşdüyünü nümayiş
etdirmək" isə fəaliyyətdir. Fikrimizcə,
burada standartın daxili məzmunu, mahiyyəti aydın
şəkildə görünür, əlavə izaha ehtiyac qalmır.
Məzmun standartlarının mahiyyəti
ilə bağlı ikinci yanaşma onların sıralanması,
düzülməsi ardıcıllığındadır.
Standartların sıralanmasının məntiqi müxtəlif
fənlərdə müxtəlif ola bilər.
Məsələn, ana dilində sadədən mürəkkəbə,
riyaziyyatda məlumdan məchula, yaxud tarixdə xronologiya üzrə
ola bilər. Bu zaman fənnin məzmunu üzrə bütün
resurslardakı ardıcıllıq da həmin
məntiqə əsasən qurulmalıdır.
Kurrikulumlardan danışarkən
bir vacib məqam da qeyd olunmalıdır ki, hər bir
fənn üzrə kurrikulumda məzmun xətləri müasir
tələblər təhsil ehtiyacları nəzərə
alınmaqla müəyyənləşdirilmişdir. Bu
məsələ ilə bağlı fikirlərimizi
riyaziyyat kurrikulumunun nümunəsində izah edəcəyik.
Son otuz ildə statistika (çox vaxtlar məlumatların analizi
və ehtimal adı altında) inkişaf etmiş ölkələrin
riyaziyyat kurrikulumlarının vacib komponentinə çevrilmişdir.
1989-cu ildə Amerika Riyaziyyat Müəllimləri Şurasının
(NCTM National Council of
Teacher of Mathematics) qəbul etdiyi və sonralar Amerikanın
bütün ştatları, Kanada və digər bir sıra dövlətlər
üçün əsas kimi qəbul olunan kurrikulumlara məlumatların
analizi və ehtimal ayrıca məzmun xətti kimi daxil
edilmişdir (bax: National Council of Teacher of Mathematics (1989),
Curriculum and Evaluation Standards for
School Mathematics. Reston,
VA: The Council. 2. National Council of Teachers
of Mathematics (2002-2004). Navigating through Data Analysis and
Probability Series. Reston,
VA: The Council). Bu məzmun xətti üzrə standartlarda
şagirdlərin məlumatların toplanması və emalı
üsullarını bilməsi, onların əsasında
suallar formalaşdırması, digərlərinin belə
məlumatlara aid suallarına cavab tapmaq üçün
cədvəl, sxem və qrafik üsullardan istifadə
etməsi, həmçinin bu məlumatlar əsasında mühakimələr
yürütməsi və qərarlar qəbul etməsi vacib bacarıqlar
kimi irəli sürülür. Məqsəd də ondan ibarətdir
ki, cəmiyyətin hər bir üzvü təsadüfi və ya
ehtimal olunan hadisə, proses və informasiyalardan baş çıxarmalı,
öz davranış və hərəkətlərinin
nəticəsi barədə proqnoz verməyi bacarmalıdır.
çünki həmin hadisə və proseslərin ehtimal
nəzəriyyəsi və statistikanın qanunlarına
tabe olması haqqında lazımi təsəvvürlərə
malik olmadan ictimai həyatın istənilən
sahəsində uğurlu fəaliyyət göstərmək mümkün
deyildir. Uşaqlar təsadüfi hadisələrin baş
verdiyi şəraitdə informasiyaları toplamaq, təhlil
etmək və onların əsasında düzgün qərarlar
qəbul etməyi öyrənməlidirlər. Real həyat
hadisələrinin baş verməsində çoxvariantlılığın
mümkünlüyü, insanın öz fəaliyyətində bunu
həmişə nəzərə alması və riskin
dərəcəsini qiymətləndirərək düzgün
qərarlar qəbul etməyə çalışması
ehtimal-statistik təfəkkür tərzinin formalaşmasını
tələb edir. İnkişaf etmiş ölkələrdə
riyaziyyatdan ibtidai məktəblər üçün
nəzərdə tutulmuş resurslara baxdıqda
nəzərəçarpan əsas cəhətlərdən
biri məlumatların təqdimat formalarından geniş
istifadə olunmasıdır. ümumiyyətlə, orta
məktəbdə riyaziyyatın tədrisində
məlumatların xətti, nöqtəvi, qrafik, dairəvi
və ya düzbucaqlı diaqram, histoqram, cədvəl,
piktoqram kimi növlərindən istifadə oluna bilər.
Ənənəvi olaraq bizim məktəblərdə
məlumatların cədvəl və dairəvi diaqram
formasından daha çox istifadə olunur. Aydındır ki,
dairəvi diaqramlardan istifadə edilməsi üçün şagird
kəsr anlayışı ilə tanış olmalı,
miqyas haqqında müəyyən təsəvvür əldə
etməlidir. Cədvəl, piktoqram və düzbucaqlı
diaqramdan (barqraf) başqa, qalanların hamısında aşkar
və ya gizli formada koordinant sistemindən istifadə olunur.
Bu təqdimat növlərindən hansına üstünlük
verilməlidir? Aydındır ki, ibtidai siniflərdə
statistikaya aid mövzuların tədrisində təqdimatın
cədvəl formasına geniş yer ayrılmalıdır.
Bu təbiidir, çünki şagirdlər istər-istəməz
cədvəllərdən (dərs cədvəli, şagird
gündəliyi, nəqliyyatların hərəkət
cədvəli və s.) istifadə etməli olurlar. Bu
mənada cədvəlin bir növü olan piktoqramdan məlumatın
təqdimatında daha geniş istifadə edilə
bilər. Eyni zamanda cədvəldən başqa, şəkillərdən
də istifadə kiçikyaşlı məktəblilər
tərəfindən statistik məlumatda verilən
informasiyanın başa düşülməsini asanlaşdırır.
İlkin təcrübələr onu göstərir ki, belə
yanaşma həm də şagirdlərin təlim marağının
yüksəlməsinə əhəmiyyətli
dərəcədə müsbət təsir göstərir. Son dövrlərdə elektron
vasitələrinin sürətli inkişafı
nəticəsində piktoqramların yeni bir növü -
"bəzəkli piktoqramlar" gündəlik həyatımıza
sürətlə daxil olmaqdadır. Bunu xüsusilə yüksək
səviyyəli idman yarışlarında komandaların
və oyunçuların təqdimatı zamanı get-gedə
daha mükəmməl formalarda görmək olar. Barqraf və
teliqraf da bu qəbildən olan çox sadə təqdimat
formaları kimi mühüm təlim əhəmiyyəti daşıyır.
ümumiyyətlə, çalışma, tapşırıq
və sairdən ibarət olan vasitələr əlavə
resurslar kimi standartların reallaşdırılması
prosesində mövcud imkanlara uyğun hazırlanır. Onları
standart səviyyəsində işləyib təqdim
etmək təhsilin demokratik və humanist
prinsiplərinə ziddir. ölkənin təhsil müəssisələrinə
milli səviyyədə zəruri tələb kimi yalnız
təhsil standartları təqdim olunur. Təhsildə inkişafın
səviyyəsi də həmin standartlar əsasında müəyyənləşdirilir.
İnteqrasiya məzmun komponenti kimi İnteqrasiya müasir dünya təhsilinin qlobal
problemlərindən biridir. Bir prinsip kimi onun
nəzərə alınması təhsilin bütün
mərhələlərində potensial əlaqələri
tapmağa, onları fəaliyyət müstəvisində
reallaşdırmağa imkan yaradır. Bu gün respublikamızda
həyata keçirilən İslahat Proqramının
prinsiplərindən birinin inteqrasiya olması da, heç şübhəsiz,
bu zərurətdən irəli gəlir. Xüsusən, ümumi
təhsildə onun nəzərə alınması
səmərəlilik baxımından son dərəcə
zəruri və lazımlı hesab edilir. Dünyanın təhsil təcrübəsində
inteqrasiyanı real təlim şəraitində
fəaliyyətlərin mühüm tələbinə çevirmək
geniş miqyas alıb. Ona görə də məzmunun
inteqrativliyi, fənnin inteqrativliyi, standartların
inteqrativliyi, kurrikulumların inteqrativliyi, bacarıqların
inteqrativliyi, prosesdə inteqrativlik və s.
məsələlər daim müzakirə obyektinə çevrilib.
Təhsil siyasətində xüsusi bir istiqamət kimi maraq doğurub.
Hazırlanmış bütün kurrikulumlarda
inteqrasiya xüsusi tələb kimi nəzərə alınmışdır.
İnkişaf etmiş ölkələrdə olduğu kimi,
inteqrasiyanı ifadə edən materiallar fənnin
məzmunu hissəsində verilmişdir. Bu hansı
zərurətdən irəli gəlmişdir? Əvvəla, kurrikulum konseptual sənəd
olduğuna görə, ilk növbədə, təlimin
məzmununu ifadə edən dərslik komplektini və
digər resursları istiqamətləndirir. Bu baxımdan
istər fəndaxili, istərsə də fənlərarası
inteqrasiyanın əlaqəli standartların fonunda
verilməsi zəruri hesab edilir. Ona görə də bütün
fənlər üzrə kurrikulumlarda iki cədvəl
təqdim olunur: fəndaxili üfüqi və şaquli
inteqrasiya; fənlərarası inteqrasiya. Fənlərarası
inteqrasiyaya aid cədvəllərdə bir-biri ilə
əlaqə yaratmaq imkanı olan nəticələr
(standartlar) üfüqi və şaquli formalarda uyğun
pozisiyalar üzrə qruplaşdırılır,
fənlərarası inteqrasiya cədvəlində isə
konkret bir fənnin digər fənlərlə
əlaqəsi olan nəticələrinin (standartların)
kodları qeyd edilir. Dərsliyi, digər hər hansı
vəsaiti hazırlamaq istəyənlər inteqrasiyaya aid
bu minimum göstərişi istiqamət kimi
qəbul edə və onun reallaşdırılması
üçün fəaliyyət göstərə bilərlər. İkinci, təlimin məzmun komponenti kimi
verilmiş inteqrasiya həm də müəllim
tərəfindən idarə olunan təlim prosesinin
səmərəli və maraqlı qurulması üçün faydalı
istiqamət hesab olunur. Müəllim bu istiqamət üzrə özünün
potensial imkanları daxilində hərəkət edir. Bununla belə, müasir dövrdə inteqrasiyaya
sadəcə fəndaxili əlaqə, yaxud
fənlərarası əlaqə yaratmaq imkanı kimi
baxmaq düzgün olmazdı. Onu mühüm pedaqoji prinsip kimi daha geniş
anlamda qəbul etmək və dəyərləndirmək
lazımdır. İnteqrativ fənlərin yaradılması
ideyası da məhz bu yanaşmadan bəhrələnir. Qiymətləndirmə nailiyyətlərimiz Qiymətləndirmə təhsilin qlobal
problemlərindən biri hesab edilir. Dünyada təhsil
sisteminin mükəmməl, eyni qiymətləndirmə işinin
tam və əhatəli olması, möhkəm elmi-pedaqoji
əsaslar üzərində qurulması ilə ölçülür.
Azərbaycanda aparılan təhsil islahatlarında
qiymətləndirmə amilinə xüsusi
əhəmiyyət verilir. Kurrikulumların hazırlanmasında
şagird nailiyyətlərinin qiymətləndirilməsi
ayrıca bir komponent kimi diqqət mərkəzində
saxlanılır. İslahatın gedişi prosesində
kurrikulumların hazırlanmasına həm də şagird
nailiyyətlərinin qiymətləndirilməsi üzrə
konseptual yanaşmanın formalaşdırılması
prosesi kimi baxılır. Burada qiymətləndirmə işinin
elmi-nəzəri əsaslarını, xüsusən də
didaktik əsaslarını işləyib hazırlamaq vacib
mərhələ hesab edilir. Bunun üçün didaktik
prinsiplərin müəyyənləşdirilərək bütün
qiymətləndirmə fəaliyyətinin əsasına
gətirilməsi son dərəcə zəruridir. Ona görə
də həmin prinsiplər "Azərbaycan Respublikasında
ümumi təhsilin Konsepsiyası (Milli Kurrikulumu)" və
ayrı-ayrı fənn kurrikulumlarında öz əksini tapmışdır.
Hazırda həmin prinsiplərə istinad olunmaqla
qiymətləndirmə sisteminin-qiymətləndirmənin məzmunu, forması, vasitə və üsullarının
yaradılması istiqamətlərində işlər aparılır.
Artıq ibtidai təhsil üzrə şagird
nailiyyətlərinin qiymətləndirilməsi
məsələləri ilə əlaqədar xeyli
irəliləyişlər əldə olunmuşdur. Yaxın
gələcəkdə bütöv qiymətləndirmə
sisteminin hazırlanması nəzərdə tutulur. ümumiyyətlə, dünya praktikasında
kurrikulumların tətbiqinə onun hazırlanmasından
da çətin mərhələ kimi baxılır. Cünki tətbiq etmək üçün
təhsil siyasətini, hazırlanmış kurrikulumların
xüsusiyyətlərini, mövcud təhsil şəraitini, onun
durumunu yaxşı öyrənmək, iş prosesində
nəzərə almaq tələb olunur. Artıq bu yolda
ilkin addımlar atılmışdır. Onu
gələcəkdə də uğurla davam etdirmək,
inkişaf etmiş ölkələrdəki
səviyyəyə çatdırmaq Azərbaycanın
təhsil sistemi qarşısında dayanan təxirəsalınmaz
vəzifədir. Aydın ƏHMƏDOV, Təhsil Nazirliyinin şöbə müdiri, "Kurrikulum islahatı" üzrə alt-komponent koordinatoru, Ənvər ABBASOV, TPİ-nin direktor müavini, Kurrikulum Mərkəzinin direktoru,
Tariyel TALIBOV, fizika-riyaziyyat və informatika təmayüllü liseyin direktoru
|