ümummilli lider Heydər Əliyevin anadan olmasının 86-cı ildönümü münasibətilə təhsil müəssisələrində keçiriləcək tədbirlər haqqında

Azərbaycan Respublikası təhsil nazirinin əmri

2009-cu il mayın 10-da dünya azərbaycanlılarının lideri, dahi siyasətçi və müdrik dövlət xadimi Heydər Əliyevin anadan olmasının 86-cı ildönümü tamam olur.

Ulu öndər Heydər Əliyevin nəsillərə nümunə olan ibrətamiz ömür yolu və ictimai-siyasi fəaliyyəti Vətənə, xalqa və dövlətçilik ideallarına sonsuz sədaqətin parlaq nümunəsidir.

Azərbaycanın müstəqil dövlət kimi beynəlxalq aləmdə nüfuzunun yüksəlməsində və qüdrətli ölkəyə çevrilməsində misilsiz xidmətlər göstərmiş Heydər Əliyevin həyat və fəaliyyəti daha dərindən öyrənilməli, gənc nəslin Heydər Əliyevin nümunəsində tərbiyəsi təhsil orqanları və pedaqoji kollektivlərin ən ümdə vəzifə borcuna çevrilməlidir.

Qeyd olunanları tarixi zərurət kimi nəzərə alaraq

ƏMR EDİRƏM:

1. Naxçıvan MR Təhsil Nazirliyinə, Bakı Şəhəri üzrə Təhsil İdarəsinə, Gəncə Şəhər Təhsil İdarəsinə, rayon (şəhər) təhsil şöbələrinə, ali və orta ixtisas, texniki peşə təhsili müəssisələrinin, bilavasitə Təhsil Nazirliyi tabeliyindəki ümumi təhsil müəssisələrinin rəhbərlərinə tapşırılsın ki, 2009-cu il mart ayından başlayaraq ümummilli lider Heydər Əliyevin anadan olmasının 86-cı ildönümü münasibətilə xüsusi tədbirlər müəyyənləşdirib həyata keçirilməsini təmin etsinlər.

2. Respublikanın əsas və orta məktəblərində VII-XI sinif şagirdlərinin iştirakı ilə ulu öndər Heydər Əliyevin həyat və fəaliyyətinə həsr olunmuş inşa yazı müsabiqəsi keçirilsin. Müsabiqənin məktəb və rayon (şəhər) mərhələləri aprel ayının 10-dək yekunlaşdırılsın.

3. İnşa müsabiqəsinin yekun mərhələsi, hər rayon və şəhərdən 1 (bir) nəfər qalib seçilməklə, Təhsil Nazirliyinin müəyyən etdiyi vaxtda Bakı şəhərində keçirilsin.

    Şəhərlər və kənd rayonları üzrə ümumi təhsil şöbələri (A.Muradov, A.Əhmədov) inşa müsabiqəsinin yekun mərhələsinin səmərəli  təşkili, yekunlaşdırılması,  qaliblərin  müəyyənləşdirilməsi  məqsədilə  lazımi tədbir  görsünlər,  ən yaxşı inşaların toplu şəklində  nəşr olunması ilə bağlı İqtisadiyyat  şöbəsi  (H.Zeynalov) və Dərslik və nəşriyyat şöbəsi (F.Şahbazlı) ilə birgə təkliflər hazırlasınlar.

4. Elm şöbəsi (G.Hüseynova), Ali və orta-ixtisas təhsili şöbəsi (İ.Mustafayev) ümummilli lider Heydər Əliyevin elm, təhsil və iqtisadiyyatın inkişafı sahəsində genişmiqyaslı fəaliyyətinə həsr olunmuş respublika elmi-praktik konfransının keçirilməsi ilə bağlı 15 gün müddətinə təkliflər hazırlayıb rəhbərliyə təqdim etsinlər.

5. Tərbiyə və məktəbdənkənar müəssisələrlə iş şöbəsi (A.İbrahimov) 2009-cu ilin martında rayon və şəhərlərdə ümumtəhsil məktəbləri şagirdlərinin iştirakı ilə "Heydər Əliyev və müstəqil Azərbaycan" mövzusunda rəsm müsabiqəsi, şahmat və futbol üzrə respublika turnirlərinin keçirilməsini təmin etsin. Rəsm müsabiqəsinin və turnirlərin keçirilməsi qaydalarını 10 gün müddətinə hazırlayıb yerlərə göndərsin. Aprel ayının ikinci yarısında Bakı şəhərində ən yaxşı rəsmlərdən ibarət sərginin təşkili ilə bağlı müvafiq tədbirlər görsün.

6. Nəzərdə tutulmuş tədbirlərin həyata keçirilməsi ilə əlaqədar müvafiq şöbələrin birgə fəaliyyətinin təmin edilməsi və alt-tədbirlərin müəyyənləşdirilib rəsmiləşdirilməsi sahəsində koordinasiya işləri  Aparatın rəhbəri İ.Pirməmmədova həvalə olunsun.

7. İctimaiyyətlə əlaqə şöbəsi (B.Hüseynzadə) əmrin  "Azərbaycan müəllimi" qəzetində və "Təhsil xəbərləri" məcmuəsində dərc olunmasını təmin etsin.

8. Əmrin icrasına nəzarəti öz üzərimə götürürəm.

Misir MƏRDANOV,

Azərbaycan Respublikasının

təhsil naziri

26 fevral 2009-cu il

 Azərbaycan Respublikası Təhsil Nazirliyi və Azərbaycan Respublikası Gənclər və İdman Nazirliyinin birgə

Qərarı

"Uşaq ili"nə həsr olunmuş respublikanın ümumtəhsil və texniki peşə məktəbləri şagirdlərinin V Spartakiadasının keçirilməsi haqqında

Azərbaycan Respublikasının Prezidenti cənab İlham Əliyevin 22 dekabr 2008-ci il tarixli sərəncamı ilə 2009-cu il Azərbaycan Respublikasında "Uşaq ili" elan edilmişdir. Qeyd olunan sərəncama müvafiq olaraq uşaqlar arasında bədən tərbiyəsi və idmanın kütləvi inkişafına kömək göstərmək, uşaqların fiziki cəhətdən sağlam böyüməsinə və idman növləri ilə daimi məşğul olmalarına zəmin yaratmaq, məktəblilərin vətənpərvərlik ruhunda tərbiyəsində bədən tərbiyəsi və idmanın rolunun artmasına nail olmaq və yeniyetmələrin idman ustalıqlarının artırılması məqsədilə Azərbaycan Respublikası Təhsil Nazirliyi və Azərbaycan Respublikası Gənclər və İdman Nazirliyi

Qərara alır:

1. "Uşaq ili"nə həsr olunmuş respublikanın ümumtəhsil, texniki peşə məktəblərinin şagirdləri arasında V Spartakiada keçirilsin.

2. Respublikanın ümumtəhsil, texniki peşə məktəbləri şagirdlərinin V Spartakiadasının Əsasnaməsi, Təşkilat Komitəsinin tərkibi və xərclər smetası təsdiq edilsin.

3. Spartakiadanın keçirilməsi üzrə tədbirlər planının işlənib hazırlanması və təsdiqi Təşkilat Komitəsinə həvalə edilsin.

4. Spartakiadanın keçirilməsinə dair xərclərin ödənilməsi aşağıdakı kimi həyata keçirilsin:

4.1. Yarışların I və II mərhələsi: oyunların proqramına daxil olan idman növləri üzrə şəhər və rayondaxili yarışları, yarışların üçüncü və final mərhələsində iştirak edəcək komandaların ezamiyyə ilə əlaqədar xərcləri şəhər, rayon təhsil şöbələrinin hesabına ödənilsin;

4.2. Yarışların III mərhələsi idman növləri üzrə zona yarışları - idman növləri üzrə hakimlərin, nümayəndələrin ezamiyyə xərcləri, hakimlərin əməkhaqları, idman ləvazimatlarının alınması Təhsil Nazirliyinin hesabına ödənilsin;

4.3. Spartakiadanın III və IV mərhələsi: yarışlar keçiriləcək yerin icarəsi, final mərhələsində şəxsi və komanda qaliblərinin mükafatlandırılması xərcləri Gənclər və İdman Nazirliyinin hesabına ödənilsin.

5. Respublikanın ümumtəhsil, texniki peşə məktəbləri şagirdlərinin V Spartakiadasının baş hakimi beynəlxalq dərəcəli hakim Niftalı Quliyev təsdiq edilsin.

6. Spartakiadanın baş hakimlər kollegiyasının heyəti və idman növləri üzrə Baş hakimlər heyəti təsdiq edilsin.

7. Respublikanın ümumtəhsil, texniki peşə məktəbləri şagirdlərinin V Spartakiadasının Təşkilat Komitəsinə tapşırılsın ki, yarışların gedişatının kütləvi informasiya vasitələri ilə daim işıqlandırılmasını təmin etsin.

8. Qərarın icrasına nəzarət təhsil nazirinin müavini E.Qasımova və gənclər və idman nazirinin müavini İ.İsmayılova həvalə edilsin.