Azərbaycan Rəssamlar İttifaqının dəstəyi ilə sənətşünaslıq üzrə fəlsəfə doktoru, rəssam Səkinə Z.Bağırovanın “Bəzən bir ümid...” adlı fərdi sərgisi keçirilib.

“Azərbaycan müəllimi” xəbər verir ki, sərgidə rəssamın 60-a yaxın rəngkarlıq, qrafika, batika və miniatür əsərləri yer alıb. Müxtəlif növ və janrlarda işləyən rəssamın yaradıcılığında lirik simvolizm, lirik dekorativizm üslubları səciyyəvidir.

Tədbirdə Mərakeşin Azərbaycandakı fövqəladə və səlahiyyətli səfiri Məhəmməd Adil Embarşı, Azərbaycan Rəssamlıq Akademiyasının rektoru, Xalq rəssamı, professor Natiq Əliyev, Əməkdar incəsənət xadimi, Azərbaycan Dövlət Akademik Musiqili Teatrının direktoru Əliqismət Lalayev, Xalq rəssamı, Azərbaycan Rəssamlar İttifaqının katibi Ağəli İbrahimov, Xalq rəssamı Xanlar Əhmədov, Xalq artisti Təranə Muradova, Yunus Əmrə İnstitutunun Bakı Nümayəndəliyinin rəhbəri Səlçuk Karakılıç və digər rəsmi qonaqlar, ziyalılar, sənət adamları iştirak ediblər. 

Səkinə Z.Bağırova sərgidə nümayiş olunan işlərin şəxsi yaradıcılıq yolunun bir növ xronikası olduğunu vurğulayıb, sərginin təşkilində əməyi keçən hər kəsə, təşəkkürünü bildirib.

Sərgidən sonra, Xalq artisti Fidan Hacıyeva və əməkdar artist Fərid Əliyevin, o cümlədən “Metzo” orkestrinin ifasında klassik musiqi proqramı təqdim olunub.

Tədbir iştirakçılarını həm sənətin, həm də musiqinin ecazkar harmoniyası əhatə edib. 

Qeyd edək ki, sənətşünaslıq üzrə fəlsəfə doktoru olan Səkinə Z.Bağırova 2008-ci ildən Dünya Xalq Yaradıcılıq Təşkilatının (International Organization of Folk Art) (IOV) və 2009-cu ildən Azərbaycan Rəssamlar İttifaqının, 2023-cü ildən Azərbaycan Yazıçılar Birliyinin üzvüdür. 

Rəssamın mənzərə, məişət və natürmort janrlarında çəkdiyi əsərlər dünyanın bir sıra sərgi salonlarında nümayiş olunmuş və ABŞ, Fransa, Almaniya, Ukrayna, Rusiya, Özbəkistan, Flippin, Türkiyə və Azərbaycanda şəxsi kolleksiyalarında saxlanılmaqdadır. Onun əsərləri rəngarəngliyi ilə səciyyələnir.

Səkinə Bağırova bir sıra konfransların iştirakçısı olmuş, ölkəmizdə, o cümlədən xaricdə nəşr olunan 30-a yaxın elmi-publisistik məqalənin müəllifidir. 2014-cü ildə Rus Dram Teatrında dövlət sifarişi əsasında tamaşaya qoyulan "В хрустальном дворце" tamaşasının və bir sıra qısametrajlı filmlərin rəssamıdır. Səkinə Z.Bağırova həmçinin bir sıra ölkələrdə  beynəlxalq sərgi və forumların iştirakçısıdır.

28 oktyabr 2024-cü il tarixində Fidan Hacıyeva Vokal Musiqi Məktəbində (Şəmsi Bədəlbəyli 106) açılışı baş tutan Səkinə Z.Bağırovanın “Bəzən bir ümid...” adlı fərdi sərgisi 8 noyabr tarixinədək davam edəcəkdir.