Harvard Universitetinin alimləri qida rasionunda bitki və heyvan zülallarının balanslı nisbətinin ürək-damar və işemik ürək xəstəlikləri riskini azaltdığını müəyyən ediblər. Məsələn, qırmızı əti fındıqla əvəz etmək də ürək sağlamlığını yaxşılaşdırır.

“Azərbaycan müəllimi” xəbər verir ki, Harvard Universitetindən olan alimlər ABŞ-də qidalanma vərdişlərinin ürək-damar xəstəlikləri (ÜDX) riskinə təsirini araşdıran bir tədqiqat aparıblar. Araşdırmanın nəticələri “American Journal of Clinical Nutrition” (AJCN) elmi jurnalında dərc edilib.

Tədqiqat zamanı komanda heyəti 30 il ərzində təxminən 203 min kişi və qadının qidalanma, həyat tərzi və ürək-damar sisteminin vəziyyətinə dair məlumatlardan istifadə edib. Tədqiqat çərçivəsində mütəxəssislər hər iştirakçının gündəlik zülal istehlakını və heyvan və bitki mənşəli qidalardan alınan zülalların payını hesablayıblar.

Araşdırma müddətində 16 min ürək-damar, o cümlədən 10 mindən çox işemik ürək xəstəliyi və 6 minə yaxın insult hadisəsi qeydə alınıb.

Məlumatların təhlili göstərib ki, bitki və heyvan zülallarının demək olar ki, bərabər nisbətdə olduğu qida rasionu ürək sağlamlığını yaxşılaşdırmağa kömək edir. Bitki və heyvan zülallarını 1:1,3 nisbətində qəbul edən insanlar 1:4,2 nisbətində zülal qəbul edənlərlə müqayisədə ürək-damar xəstəlikləri riskini 19 faiz azaldıb və işemik ürək xəstəliyinə tutulma halları 27 faiz daha az olub.

Bundan əlavə, qırmızı və emal edilmiş ətlərin gündəlik rasionda fındıqla əvəz edilməsi, insult riskini daha da azaldıb, arterial təzyiqi normallaşdırıb və iltihab biomarkerlərini azaldıb.

Həmçinin araşdırma nəticəsində aşkar edilib ki, mütəmadi olaraq istehlak edilən mal əti ürək üçün təhlükə yaratmır.