NASA-nın astronavtları Aya qaytarmağı hədəfləyən Artemis proqramı mühüm texniki və təşkilati çətinliklər səbəbindən təxirə salınıb.

"Azərbaycan müəllimi" NASA-nın saytına istinadən xəbər verir ki, 2026-cı il üçün planlaşdırılan Ay enişi missiyası 2027-ci ilin ortalarına qədər mümkün olmayacaq.

2025-ci ildə astronavtların Ay ətrafında uçmasını nəzərdə tutan "Artemis II" missiyası isə 2026-cı ilin aprelindən tez olmayacaq.

NASA hər iki missiyanın əsas komponenti olan Orion ekipaj kapsulundakı texniki çətinliklərin gecikmələrə səbəb olduğunu təsdiqləyib.

Bildirilib ki, 2022-ci ildə ekipajsız Artemis I missiyası zamanı Orionun istilik qalxanı kosmik gəminin Yer atmosferinə yenidən daxil olması zamanı aşınmaya məruz qalıb.

NASA-nın administratoru Bill Nelson bildirib ki, risklərin azaldılması üçün əlavə sınaqlar keçirilib, lakin Orion kapsulunun atmosferə girişi ilə bağlı məsələlər hələ də həllini gözləyir.

NASA rəhbərliyi, xüsusilə Ayın cənub qütbündə yerləşən qiymətli su buzu ehtiyatlarının strateji əhəmiyyətini vurğulayaraq, bu sahədə ABŞ-ın Çinlə rəqabətini ön plana çəkir.

"Cənub qütbünə enmək bizim üçün həyati əhəmiyyət daşıyır ki, bu sahəni Çin nəzarətə almasın", - deyə Nelson qeyd edib.

Qeyd edək ki, Çinin 2030-cu ilə qədər astronavtlarını Aya göndərmək niyyətini açıqlaması ABŞ-dakı rəsmilərin kosmosdakı üstünlüyü qorumaq məqsədlərini daha da aktuallaşdırıb. NASA-nın hazırkı Artemis proqramında Orion kapsulunun performansı və kosmik missiyaların vaxt cədvəli yaxın illərdə də müzakirələrin mərkəzində qalacaq.