2024-2025-ci tədris ilində Dağlıq Şirvan Regional Təhsil İdarəsinin tabeliyində olan ümumtəhsil müəssisələrində “Peşə təmayüllü siniflərin təşkili” daha da genişləndirilib.

Bu barədə "Azərbaycan müəllimi"nin sorğusuna cavab olaraq regional təhsil idarəsindən məlumat verilib. Bildirilib ki, hazırda “Peşə təmayüllü siniflərin təşkili” layihəsi üzrə Dağlıq Şirvan Regionu üzrə Ağsu rayonundan 2 məktəb - Ağsu şəhər 3 nömrəli məktəbdə X, XI siniflər üzrə, və Ağsu şəhər 4 nömrəli tam orta məktəbində X, XI siniflər üzrə, Qobustan rayonundan bir məktəb - Qobustan şəhər 1 nömrəli tam orta məktəbində X, XI siniflər üzrə, Şamaxı rayonundan bir məktəb -Şamaxı şəhər iki nömrəli tam orta məktəbində XI sinif, İsmayıllı rayonundan iki məktəb - İsmayıllı şəhər 3 nömrəli ta orta məktəbində X, XI siniflər, İsmayıllı rayon Sumağallı kənd tam orta məktəbində XI sinif, olmaqla ümumilikdə region üzrə  6 məktəbdə 10sinfi,  180 şagirdi və 30 müəllimi əhatə edir.

Cari tədris ilində layihə çərçivəsində dülgər, çilingər, aşpaz, kombi-kondisioner ustası və santexnik, mebel quraşdırma, aqronom, dərzi peşə ixtisasının tədrisinə başlanılıb.Peşə təmayüllü siniflərdə dərs deyən müəllimlərinin bilik və bacarıqlarının artırılması məqsədilə vaxtaşırı təlimlər təşkil edilir” deyə regional idarədən bildirilib.

Peşə təmayüllü siniflərin iştirakı ilə bir sıra sosial layihələr də həyata keçirilir. Belə ki, ötən tədris ilində Dağlıq Şirvan Regional Təhsil İdarəsinin nəzdində fəaliyyət göstərən məktəblərin peşə təmayüllü siniflərinin şagirdləri ilə "Təbiət bizik" sosial-ekoloji düşərgəsi təşkil olunub. İsmayıllı rayonu, Şahdağ Milli Parkında təşkil olunan düşərgədə şagirdlər üçün müxtəlif mövzularda təlimlər, interaktiv və əyləncəli müsabiqələr təşkil olunub. Müsabiqələrdə qalib gəlmiş şagirdlərimiz hədiyyə və sertifikatla təltif ediliblər.

Qeyd edək ki, X-XI sinif şagirdləri üçün nəzərdə tutulan peşə təmayüllü siniflərin yaradılmasında məqsəd ümumi orta təhsil bazasında təhsilalanların müxtəlif peşələr üzrə ilkin bilik və bacarıqlara yiyələnməsi, peşə ixtisasları barədə məlumatlandırılmaqla əmək bazarına, eləcə də peşə təhsilinə hazırlanmasıdır. Təhsilalanlara ilkin sahibkarlıq bacarıqlarının aşılanması, əmək bazarının peşəyönümü hazırlıqlı və əmək qabiliyyətli şəxslərlə təmin edilməsi də layihənin əsas məqsədlərindən biridir.