Prezident Tramp K-12 məktəblərində süni intellektin tətbiqini gücləndirən sərəncam imzalayıb.

"Azərbaycan müəllimi" usatoday.com-a istinadən xəbər verir ki, ABŞ Prezidenti Donald Tramp 23 aprel tarixində K-12 məktəblərində süni intellektin (Sİ) tətbiqini təşviq etmək məqsədilə icra sərəncamı imzalayıb.

Sərəncam ABŞ Təhsil və Əmək Departamentlərinə orta məktəb şagirdləri üçün süni intellekt üzrə kurslar və sertifikatlaşdırma proqramları təşkil etməyi və ştatlarla əməkdaşlıq edərək Sİ təhsilini təşviq etməyi tapşırır.

Tramp sərəncam imzalanmazdan əvvəl Oval kabinetdə çıxış edərək bildirib:

"Bu böyük bir hadisədir, çünki görünür, gələcək süni intellektdədir".

Sərəncama əsasən, Təhsil Departamentinə müəllimlərin hazırlanmasında verilən ixtiyari qrant proqramlarında süni intellekt tətbiqinə üstünlük verilməsi, Milli Elm Fonduna isə təhsildə süni intellektdən istifadənin araşdırılmasına prioritet ayrılması tapşırılıb. Əmək Departamenti də Sİ sahəsində təcrübə proqramlarının genişləndirilməsi istiqamətində fəaliyyət göstərəcək.

Sərəncam həmçinin, Təhsil Katibi Linda MakMahon və Əmək Katibi Lori Çavez-DeRemerin daxil olduğu və Ağ Ev Elm və Texnologiya Siyasəti İdarəsinin direktoru Maykl Kratsiosun rəhbərlik edəcəyi "Süni İntellekt Təhsili üzrə Ağ Ev İşçi Qrupu"nun yaradılmasını nəzərdə tutur. Sözügedən qrup məktəblərdə süni intellektdən istifadənin təşviqinə yönəlmiş "Prezidentin Süni İntellekt Çağırışı" layihəsini hazırlayacaq və dövlət-özəl tərəfdaşlıqlar vasitəsilə məktəblərə resurs təmin edəcək.

Məlumat üçün bildirək ki, 2024-cü ilin dekabrında yayımlanan iki partiyalı konqres hesabatında qeyd olunub ki, K-12 təhsil işçilərinin süni intellekt savadlılığını artırmaq üçün resurslara ehtiyacı var. Lakin hesabatda Sİ-nin işçi qüvvəsi və təhsildə tətbiqinin qanunlar çərçivəsində aparılmasının vacibliyi də vurğulanıb.

Baxmayaraq ki, həm demokratlar, həm də respublikaçılar məktəblərdə süni intellektin vacibliyi məsələsində razılaşırlar, federal tənzimləmələrin rolu məsələsində fikir ayrılıqları qalır. Respublikaçıların aprel ayında keçirilən komitə iclasındakı yekun rəyində bildirilir:

"Süni intellekt şagirdlərin öyrənmə üsulunda inqilab yarada bilər, lakin federal hökumətin buna müdaxiləsinə ehtiyac yoxdur".

Prezident Trampın bu təşəbbüsü yanvar ayında keçmiş Prezident Co Bayden dövründə qəbul olunmuş süni intellektin genişləndirilməsi ilə bağlı qaydaları ləğv edən sərəncam imzalamasından sonra atdığı növbəti addım olub.

Xatırladaq ki, mart ayında Tramp Təhsil Departamentinin ləğv olunmasına yönəlmiş fərqli bir sərəncam imzalayıb, lakin bu agentlik hələ də mövcuddur, buna baxmayaraq, işçi heyətinin sayı iki dəfə azalıb. Agentliyin tamamilə ləğvi üçün isə Konqresin qərarı tələb olunur.

Hazırda bir sıra ştatlar Təhsil Departamentindəki kütləvi ixtisarları qeyri-qanuni hesab edərək Tramp administrasiyasına qarşı məhkəmə iddiası qaldırıblar.