Azərbaycan Memarlıq və İnşaat Universitetinin (AzMİU) Təbliğat-təşviqat komandası tərəfindən Sabunçu rayonu Bakıxanov qəsəbəsində yerləşən 252 nömrəli məktəb-liseydə yuxarı sinif şagirdləri üçün maarifləndirici görüş təşkil olunub.

Bu barədə universitetdən “Azərbaycan müəllimi”nə məlumat verilib. Bildirilib ki, görüşün əsas məqsədi ümumi təhsil müəssisələrinin şagirdlərini ali təhsil sisteminin tələbləri, AzMİU-da mövcud olan tədris istiqamətləri və ixtisaslar, həmçinin universitetin elmi-tədqiqat və layihə fəaliyyəti barədə məlumatlandırmaqdan ibarət olub. Tədbir çərçivəsində AzMİU-nun struktur quruluşu, tədris planları, təqaüd sistemləri, maddi-texniki baza, beynəlxalq əməkdaşlıq əlaqələri və karyera imkanları barədə söhbət açılıb.

Tədbir interaktiv formatda keçirilib, iştirakçıların sualları cavablandırılıb, ixtisas seçimi ilə bağlı vacib məqamlar vurğulanıb. AzMİU nümayəndələri ali təhsildə innovativ yanaşmalar, mühəndislik və memarlıq sahələrində müasir çağırışlar və bu istiqamətlər üzrə universitetdə aparılan yeniliklər haqqında məlumat veriblər.

Universitet tərəfindən keçirilən bu kimi təbliğat-təşviqat tədbirləri gənclərin peşə yönümündə düzgün istiqamətləndirilməsi və onların ali təhsil müəssisəsinə inteqrasiyasının dəstəklənməsi baxımından mühüm əhəmiyyət kəsb edir.