İqlim dəyişikliyi və insan fəaliyyəti nəticəsində yararsız hala düşən torpaq sahəsi Antarktida ərazisini keçərək 15 milyon kv. km olub.

"Azərbaycan müəllimi" xəbər verir ki, Potsdam İqlim Təsirinin Tədqiqi İnstitutunun araşdırmasına görə, planetdə deqradasiyaya uğramış torpaqların sahəsi Antarktidanın ərazisini keçib. Deqradasiya prosesi ildə təxminən 1 milyon kv. km  sahəyə təsir göstərir ki, bu da iqlimin sabitləşdirilməsi, təbiətin mühafizəsi və davamlı ərzaq təminatının edilməsi səylərini ciddi şəkildə çətinləşdirir.

Araşdırmada deyilir: “Deqradasiyaya uğramış ərazilərin sahəsi artıq 15 milyon kv. km-dir ki, bu da Antarktidanın ərazisini üstələyir”. Torpaq ekosistemləri son vaxtlara qədər antropogen karbon qazının demək olar ki, üçdə birini udurdu, lakin son on ildə onların bunu etmək qabiliyyəti 20% azalıb. Bu, meşələrin qırılması və iqlim dəyişikliyi ilə bağlıdır.

Bərəkətli torpaqların itirilməsinin əsas səbəbi, araşdırmaya görə, davamlı olmayan kənd təsərrüfatı üsullarından istifadədir. Kimyəvi maddələrin və pestisidlərin istifadəsi meşələrin 80%-nin yox olmasına səbəb olub. Bu dəyişikliklər iqlim böhranını dərinləşdirir və gələcək ərzaq ehtiyatlarını təhlükə altına alır.

Bundan əvvəl Birləşmiş Millətlər Təşkilatının Ətraf Mühit Proqramının (UNEP) ekspertləri bəşəriyyət üçün əsas təhlükələri, o cümlədən irimiqyaslı meşə yanğınlarını müəyyən ediblər.

Bu arada Rusiya Federasiyası Dövlət Dumasının deputatı Anatoli Vasserman superkompüterin 2050-ci ilə qədər bəşər sivilizasiyasının mümkün süqutu ilə bağlı proqnozunu şərh edərkən “ya anqlo-saksonlar, ya fırıldaqçılar, ya da dəlilər dünyanın sonuna inanır” fikrini ifadə edib.

Mənbə: “The Guardian”