“Yeni yol xəritəsi Azərbaycanda ingilis dili təhsilinin gücləndirilməsi üçün ortamüddətli strateji planı təqdim edir və əsas məqsədi 9-cu və 11-ci siniflərdə ingilis dili nəticələrini yaxşılaşdırmaqdır ki, daha çox şagird müvafiq olaraq Ümumi Avropa İstinad Çərçivəsi (CEFR) üzrə A2+ və B1 səviyyələrindəki mövcud hədəflərə çata bilsin”.

“Azərbaycan müəllimi” xəbər verir ki, bu fikirləri Elm və Təhsil Nazirliyi və Britaniya Şurası arasında imzalanmış birgə fəaliyyət planı çərçivəsində Təhsil İnstitutu ilə əməkdaşlıqda hazırlanmış “ELSA Roadmap” (English Language Strategy for Azerbaijan Roadmap – Azərbaycan üçün İngilis Dili Strategiyası Yol Xəritəsi) sənədi ilə bağlı açıqlamasında Təhsil İnstitutunun direktor səlahiyyətlərini icra edən Elnur Əliyev deyib.

O qeyd edib ki, bu strateji məqsədə çatmaq üçün yol xəritəsi Elm və Təhsil Nazirliyinin müəyyən islahatları dəstəkləməsini təklif edir:
– İbtidai siniflərdə ingilis dili tədrisinə ayrılan dərs saatlarının artırılması; 
– İngilis dilinin tədrisi və qiymətləndirilməsində dörd bacarıq (dinləmə, danışıq, oxu və yazı) yanaşmasının tətbiqi; 
– İngilis dili müəllimləri üçün müəllim hazırlığı, adaptasiya, peşəkar inkişaf və sertifikatlaşdırma üzrə qərarların qəbulunu təmin edən peşəkar standartlar çərçivəsinin hazırlanması.

O həmçinin əlavə edib ki, ingilis dilinin tədrisi üçün zəruri dil bacarıqlarına, bilik və metodiki səriştələrə yiyələnmiş ixtisaslı kadr hazırlığının təmin edilməsi, yeni fəaliyyətə başlayan ingilis dili müəllimlərinə dəstək göstərmək üçün səmərəli induksiya (adaptasiya) sistemlərinin yaradılması, ingilis dili kurikulumunun səmərəli icrasını təmin edən təlimlərin və yerlərdə (məktəbdə) peşəkar inkişaf sisteminin tətbiqi də vacibdir.

“9 və 11-ci siniflərin buraxılış imtahanlarının təsiri çox güclüdür və bu imtahanları yeni kurikulumun kommunikativ və dörd bacarıq prinsipinə uyğunlaşdırmaq inkişaf üçün vacib addım olacaq. Müəllimlərin peşəkar fəaliyyətlərinin bütün mərhələlərində onların bilik, bacarıq və yanaşmaları elə inkişaf etdirilməli və ölçülməlidir ki, keyfiyyətli tədris nəticələrini dəstəkləsin və kurikulumun nəzərdə tutulan şəkildə tətbiqinə imkan versin. Yol xəritəsi buna görə müəllim keyfiyyətinə xüsusi önəm verir. Bununla yanaşı, müəllimlərin sinifdəki fəaliyyətlərinin yaxşılaşdırılmasına yönəlmiş, onları təşviq edən, məqsədyönlü və davamlı peşəkar inkişaf çərçivəsi də yaradılmalıdır”, – Elnur Əliyev əlavə edib.