2020-ci ildən başlayaraq Elm və Təhsil Nazirliyinin Fəaliyyət Planına əsasən, inklüziv təhsilin təşkil edildiyi ümumi təhsil müəssisələrinin şəbəkəsi Bakı, Gəncə, Sumqayıt, Mingəçevir şəhərləri ilə bərabər regionlarda da genişləndirilərək sayı 69-a çatdırılıb.

“Azərbaycan müəllimi” xəbər verir ki, bu fikirləri  bu gün “Autizm: Tədqiqatdan təcrübəyə” mövzusunda keçirilən Beynəlxalq Autizm Konfransı zamanı elm və təhsil nazirinin müavini Firudin Qurbanov səsləndirib.

O bildirib ki, inklüziv təhsil sahəsində bilik və bacarıqların artırılması istiqamətində müəllimlər üçün tədris proqramları, valideynlər üçün isə öyrədici metodiki vəsaitlər hazırlanıb:

"İbtidai təhsil səviyyəsi üzrə inklüziv siniflər 520 əyləncəli öyrədici test proqramları yazılmış elektron masalarla təchiz edilib. Ümumi təhsil müəssisələrində inklüziya mədəniyyətini formalaşdırmaq məqsədilə pedaqoji və inzibati heyət, o cümlədən şagird və valideynlərlə maarifləndirici görüşlər keçirilib. Layihə müddətində 1000 ibtidai sinif müəllimi, 250 direktor, ADPU və filiallarından 400 müəllim-professor heyəti, 1350 tələbə təlimlərə cəlb olunub. Ali təhsil müəssisələri və qurumlara isə inklüziv təhsil üzrə beynəlxalq ekspertlər tərəfindən hazırlanmış iki dərslik və 10 tədris vəsaiti tərcümə və çap edilərək aidiyyəti üzrə təqdim edilib. Eyni zamanda, tərcümə olunmuş bütün materiallarının elektron variantları layihə çərçivəsində 12 bülleten yaradılıb, www.inkluzivtehsil.edu.az portalına müəllim inkişaf proqramları əsasında hazırlanmış 10 vebinarda yerləşdirilib.