Təhsil ocağı ölkəmizdə ilk liseylərdən biri kimi tarixə düşüb

Biz artıq "Ən yaxşı  ümumtəhsil məktəbi" müsabiqəsinin qalibiyik. Bu qalibiyyətimiz üçün, ilk növbədə, belə bir müsabiqənin keçirilməsinə sərəncam verən möhtərəm Prezidentimiz İlham Əliyevə və müsabiqənin şəffaf, obyektiv keçirilməsini təmin edən komissiyaya, hörmətli nazirimiz Misir Mərdanova özüm və bütün müəllim kollektivimizin adından dərin minnətdarlığımı bildirirəm.

Belə müsabiqələrin keçirilməsi və ayrılan mükafat məktəblərin maddi-texniki bazasının yüksəldilməsinə, təhsilin keyfiyyətinin artırılmasına imkan verir, digər tərəfdən də müəllimlərin gərgin əməyinə verilən qiymət kimi bizi daha da yaxşı işləməyə ruhlandırır.

Xətai rayonunda yerləşən 287 nömrəli "Zəkalar" liseyi 1992-ci ildə yaradılıb. Bu təhsil ocağı Azərbaycanda ilk liseylərdən biri kimi tarixə düşüb.

Liseyimizi bu il 63 şagird bitirmişdir. Onlardan qəbul imtahanlarında 8 nəfəri 600-dən, 5-i isə 650-dən yuxarı bal toplamışlar. Sənəd verən şagirdlərdən 45-i ali məktəbə daxil olmuşdur. Bunlardan bir nəfəri Türkiyə Polis Akademiyasına, 1 nəfəri isə Moskva Dövlət Universitetinin kibernetika fakültəsinə daxil olmuşdur. 685 bal toplamış məzunumuz Gültən Məmmədova Prezident təqaüdçüsüdür.

Məktəbimizə verilən pul mükafatının təhsilin idarə edilməsinin informatlaşmasına, elektron tədris vəsaitlərinin alınmasına, istedadlı şagirdlərə və bu uğurların qazanılmasında xüsusi rolu olan müəllimlərə mükafat verilməsi istiqamətində xərclənməsini nəzərdə tuturuq.

Aygün ƏHMƏDLİ,

Bakıdakı 287 nömrəli

"Zəkalar" liseyinin direktoru

Prezidentimizin qayğısına əməli işlə cavab verməliyik

ümummilli liderimiz Heydər Əliyevin siyasi kursunu layiqincə davam etdirən ölkə Prezidenti cənab İlham Əliyev digər sahələr kimi təhsilin də inkişafına xüsusi qayğı ilə yanaşır. Son beş ildə tikilən yeni məktəb binaları, inşa edilən əlavə tədris korpusları, köhnəlmiş təhsil ocaqlarının əsaslı və cari təmiri  buna bariz nümunədir. Heç bir ölkədə qısa müddət ərzində bu qədər məktəb tikilməmişdir.

Dərsliklərin yüksək səviyyədə nəşri və məktəblərə paylanaraq şagirdlərə pulsuz verilməsi, mütəmadi olaraq təhsil ocaqlarının maddi-texniki bazasının möhkəmləndirilməsi, məktəb kitabxanalarının yüksək səviyyədə qurulması, bədii ədəbiyyatın latın qrafikası ilə nəşri müəllimlərin yaxşı işləməsi, dərsin müasir tələblərə cavab verəcək səviyyədə keçilməsi üçün şərait yaradır.

ölkə başçısının sərəncamı ilə müəllimlərə verilən fəxri adlar, respublikada ilk dəfə olaraq "Ən yaxşı ümumtəhsil məktəbi" və "Ən yaxşı müəllim" müsabiqəsinin keçirilərək yaxşı müəllimlərin üzə çıxarılıb mükafatlandırılması pedaqoji kadrlar arasında sağlam rəqabətin yaranmasına səbəb olmuş, təhsilin inkişafına yeni təkan vermişdir. Yeri gəlmişkən qeyd edim ki, işlədiyim 290 nömrəli məktəbin iki müəllimi - Xalidə Rüstəmova və Fəridə Hüseynova bu müsabiqədə iştirak etmiş, "Ən yaxşı müəllim" adına layiq görülmüşlər. Məhz yaradılmış münbit şəraitə görə bu il yüksək balla ali məktəblərə qəbul olmuş məzunlarımız ötən illərə nisbətən sayca çoxluq təşkil edir. Xarici ölkələrdə oxumaq üçün yaradılan şərait şagirdlərimizi ruhlandırır. Pedaqoji kollektivimiz Prezident İlham Əliyevin siyasi kursunu dəstəkləyir və bu ilin oktyabrında keçiriləcək prezident seçkilərində yalnız ona səs verəcəklər.

ölkə başçısının bu günlərdə imzaladığı sərəncamla təhsil müəssisələrində işçilərin əməkhaqlarının yenidən 25 faiz artırılması müəllimlərin maddi rifahının yaxşılaşdırılmasına xidmət edir. Buna görə də kollektivimiz adından ölkə başçısı İlham Əliyevə minnətdarlıq edirəm. Biz də, öz növbəmizdə, Prezidentimizin bu qayğısına əməli işlə cavab verməliyik.

Adilə QARAYEVA,

Bakıdakı 290 nömrəli orta

məktəbin ingilis dili müəllimi