|
Yaponiya Fondu
və Yaponiya Təhsil, Mədəniyyət, İdman, Elm,
Texnologiya Nazirliyinin təşkil etdiyi səfər
proqramı 2009-cu il dekabrın 2-dən 15-dək
olan müddəti əhatə etdi. 25 ölkədən 75 nəfər
təhsil işçisinin iştirak etdiyi tədris səfərinə
Azərbaycandan gedən nümayəndə heyətinin
tərkibinə mənimlə yanaşı "Tərəqqi" liseyinin
direktoru Məhbubə Məmmədova, Bakı şəhəri 20
nömrəli məktəb-liseyin müəllimi Kifayət Rəhimova
da daxil idi. Təhsil işçiləri üçün nəzərdə
tutulan bu proqram 1973-cü ildən fəaliyyət
göstərir və əsas məqsədi Yaponiya təhsili,
tarixi və mədəniyyətini dünyanın müxtəlif
ölkələrində təbliğ etmək və yaponiyalılara
dünya tarixi, mədəniyyəti barədə məlumat
verməkdir. Həmin məqsədi həyata keçirmək üçün
36 il ərzində dünyanın müxtəlif ölkələrindən
7800 nəfər təhsil işçisi Yaponiyaya dəvət
olunub. 2009-cu ildə dəvət olunmuş
nümayəndələrə Yaponiya haqqında məlumat Tokio,
Xerosima, Kyoto, Fuji, Nara şəhərlərində və
Fukui prefekturasında nəzəri və praktik
biliklər vasitəsilə verildi. Həmin şəhərlərə
gedərkən nümayəndə heyəti proqramı təşkil edən
nazirliyin adına uyğun olaraq təhsil,
mədəniyyət, elm, texnologiya və idman
sahələrinin hər biri barədə informasiya almağa
müvəffəq oldu.
Yaponiya
Şərqi
Asiyada, Sakit okeanın qərb hissəsində yerləşir.
Ölkə dörd iri (Honsü, Küsü, Hokkaydo, Sikoku)
və çoxlu sayda kiçik adalardan ibarətdir.
Yaponiya 47 prefekturaya bölünmüşdür. Sahəsi
377, 907 kv. km-dir. Qədim paytaxtı Kyoto,
1868-ci ildən isə Tokio şəhəridir. Əhalinin
sayı 2009-cu ilin məlumatına görə, 127
milyondan artıqdır.
Yaponiyanın
dövlət quruluşu konstitusiyalı monarxiyadır.
Konstitusiyanın tarixi 1889-cu ildən başlayır.
Hazırkı Konstitusiya 1947-ci ildə qəbul
olunmuşdur. Yaponiyanın imperatoru Akihitodur.
Dövlət dili
yapon dilidir.
Xarici dil kimi ingilis dilinə üstünlük verilir.
Din - buddizm (maxayana) və sintoizmdir.
Gündoğan ölkənin bayrağında ağ fonun üzərində
günəş rəmzi olan qırmızı dairə təsvir edilib
və Hinomaru (qırmızı dairə) adlanır.
Yaponiyada sevilən idman növləri sumo, beysbol,
boks və qolfdur. Ölkənin şimal hissəsində qış
idman növlərinə maraq böyükdür.
Yaponiyada çox yüksək inkişaf etmiş sənaye
ölkəsidir və iqtisadi inkişafına görə dünyada
ABŞ-dan sonra 2-ci yeri tutur. Ölkə
iqtisadiyyatının əsasını texnika, maşınqayırma,
gəmi tikintisi, balıqçılıq təşkil edir. Pul
vahidi - Yendir. 1 Amerika dolları 83-85 Yen
arasında dəyişir.
Yaponların ənənəvi yeməyi düyü, balıq və dəniz
məhsullarıdır. Düyü yaponlar üçün əvəzolunmaz
məhsuldur. Ondan məşhur yapon sakisi də
hazırlanır. Maliyyə Nazirliyinin adı da düyü
anlayışı ilə bağlıdır.
Əsas bayramları Qızlar bayramı,Oğlanlar
bayramı, Yeni il bayramıdır. Yaponlar İmperator
gününü də çox böyük təmtəraqla qeyd edirlər.
Dünyada Yeni ili birinci qarşılayan Yaponiya
əhalisidir və onu ailəvi bayram kimi qeyd
edirlər.
Qızlar bayramında zəngin həyat və ailə
təcrübəsinə malik olan qadınlar yeniyetmə
qızlara ailə və məişətlə bağlı tövsiyələr
verirlər. Oğlanlar bayramı da eyni mahiyyət kəsb
edir.
Yaponiyalıları dünyanın digər xalqlarından
fərqləndirən bir sıra səciyyəvi cəhətlər
vardır. Onlar əl ilə görüşmür, bunun əvəzinə
baş əyirlər, ünsiyyətdə çox nəzakətlidirlər,
xahişi yerinə yetirmək mümkün olmadığı halda
belə, birbaşa imtina etmirlər, üzlərində daim
təbəssüm saxlamağı xoşlayırlar, nədənsə
şikayətlənməyi qəbul etmirlər, təmizliyə ciddi
əməl edirlər,çox işgüzardırlar.
Təhsil
Yaponiya Konstitusiyasının "İnsanların hüquq və
vəzifələri" adlı bölməsində hamının təhsil
almaq hüququ qanunla təsbit edilir.
Konstitusiyaya görə icbari təhsil pulsuzdur.
İbtidai və aşağı orta məktəb təhsili icbaridir
və I-IX sinifləri əhatə edir.
Məktəbəqədər təhsil icbari deyil və bu
müəssisələrə 3-5 yaşlı uşaqlar cəlb edilir.
İbtidai məktəbə qəbul 6 yaşındandır və dərs ili
aprel ayında başlanıb mart ayında bitir.
İbtidaidə 6, aşağı orta və yuxarı orta
məktəblərin hər birində təhsil 3 il davam
edir. Aşağı orta məktəbi bitirənlərin 92,97
faizi yuxari orta məktəblərdə təhsilini davam
etdirir.
2008-ci il mayın 1-nə olan məlumata görə,
Yaponiyada 13626 uşaq bağçası, 22476 ibtidai
məktəb, 10915 aşağı orta məktəb, 5242 yuxarı
orta məktəb, 1026 xüsusi qayğıya ehtiyacı
olanlar üçün məktəb, 64 texniki kollec, 417
yeniyetmələr üçün kolleclər, 765 universitet
,4986 peşə ixtisas kollecləri fəaliyyət
göstərir.
Bu təhsil müəssisələrinin hər birində müvafiq
olaraq 11228, 419312, 249509, 241213, 68675,
4432, 10524, 169912, 51557 nəfər müəllim
fəaliyyət göstərir.
Yaponiya təhsili federal hökumət və regional
(prefektura və bələdiyyə) idarəetmə strukturları
tərəfindən idarə olunur. Federal hökumətin
təhsil sisteminin inkişafı ilə bağlı
fəaliyyətinə təhsil sisteminin idarə edilməsi,
milli standartların yaradılması, müəllimlərə
lisenziyaların verilməsi, təhsilin
maliyyələşdirilməsi, dərsliklərin pulsuz
paylanması aiddir.
Regional strukturlar dedikdə, prefektura və
bələdiyyələr nəzərdə tutulur.
Prefekturalardakı təhsili idarəetmə orqanları
müəllimlərin məktəblərə təyinatı, yuxarı orta
məktəblərin yaradılması və idarəolunması,
məktəblərin tədris şəraitinin yaxşılaşdırılması,
xüsusi məktəblərin açılması üçün icazənin
verilməsini həyata keçirir.
Dövlət məktəblərinin yaradılması və
idarəolunması işi birbaşa bələdiyyələrin
üzərinə düşür.
Təhsilə ayrılan xərclər də bu üç orqan arasında
bölüşdürülür. Təhsilə qoyulan xərclərin 2
hissəsi Federal hökumətinin, 5 hissəsi
prefekturanın, 3 hissəsi bələdiyyələrin payına
düşür.
Yaponiya Təhsil, Mədəniyyət, İdman, Elm,
Texnologiya Nazirliyi təhsil sistemini idarə
etmək üçün Təhsil Şurasını yaradıb. Bu qurum
ölkənin təhsil siyasətini müəyyənləşdirir,
yerli təhsil orqanlarının nümayəndələrini
istiqamətləndirir və göstərişlər verir. Hər
prefekturadan 1 nəfər Təhsil Şurasının üzvlüyinə
təyin olunur, rəhbər isə üzvlər arasından
təyin edilir.
Yerli təhsili idarəetmə orqanları Təhsil
Komitəsi adı altında fəaliyyət göstərir. O,
idarəetmə və koordinasiya , ümumtəhsil,
fasiləsiz təhsil, mədəniyyət, idman
bölmələrindən ibarətdir.
Yaponiyada təhsil islahatı Dünya Bankının
maliyyə dəstəyi ilə 2006-cı ilin dekabrından
başlanmışdır və əsas məqsədi demokratik,
sülhsevər cəmiyyəti fiziki və əqli cəhətdən
yüksək inkişaf etmiş vətəndaşlarla təmin
etməkdir.
Kurikulum tarixi və qiymətləndirilməsi
Yaponiyada kurikulum müəyyən tarixə malikdir
və dövri olaraq qiymətləndirilərək məzmununda
zəruri dəyişikliklər edilmişdir. Bu baxımdan
kurikulumun dəyişdirilməsini məqsəd və
tarixinə görə aşağıdakı kimi qruplaşdırmaq
mümkündür:
Müasir kurikulumda əsas məqsəd və tələb
tənqidi təfəkkür bacarıqlarına geniş yer
ayırmaq, təhsilalanların mənəviyyatını
zənginləşdirməkdir. Bu məqsədlə ibtidai və
aşağı orta məktəblərdə yapon dili, ictimai
fənlər, riyaziyyat, təbiət elmləri və fiziki
tərbiyə dərslərinin tədrisinə ayrılan saatların
təxminən 10% artırılması, yuxarı orta
məktəblərin kurikulumunda yapon
dili,riyaziyyat və xarici dilin tədrisinin
icbariliyi nəzərdə tutulmuşdur.
Son iki ildə kurikulumlar həyati bacarıqlara
əsaslanmaqla daha da təkmilləşdirilmiş, yapon
dilində dəqiq və düzgün oxu, yazı
bacarıqlarının inkişafı ön plana çəkilmişdir.
Tarixin, dini və mədəni irsin tədrisinə xüsusi
yer ayrılır, şagirdlər yapon musiqi alətləri,
milli geyimlərlə tanış olur və məktəblilərə
milli musiqi alətləri və geyimlərinin
hazırlanması texnologiyasını öyrədirlər.
Tədris səfərində Yaponiya təhsil sistemi barədə
nəzəri məlumatları Tokioda əldə etdikdən
sonra praktik məsələləri yerində görmək üçün
Fukui prefekturasına yollandıq.
Fukuinin ərazisi 4189,54 kv.km, əhalisinin
sayı 816694 nəfərdir. Təhsilin səviyyəsinə görə
Yaponiyada ikinci olan Fukui prefekturası
əhalisinin sayına görə 47 prefektura arasında
43-cü yerdədir.
Hələ 2002-ci ildə təhsilin yüksək inkişafını
təmin etmək məqsədilə Fukui prefekturasında
xüsusi proqram qəbul olunmuşdur. Onun məqsədi
məktəblə ailənin qarşılıqlı əlaqəsini
gücləndirmək və təhsilin daha yüksək inkişafını
təmin etməkdir.Bunun üçün aşağıdakı tədbirlər
müəyyənləşdirilmişdi:
1. Siniflərdə şagirdlərin sayını minimuma
endirmək;
2. Həyati bacarıqları inkişaf etdirmək;
3. Təbiət elmləri və riyaziyyatın tədrisini
təkmilləşdirmək;
4. Məktəbin idarəedilməsinin səviyyəsini
yüksəltmək;
5. Şagirdlərin keyfiyyətli qidalanmasını təşkil
etmək.
Fukui prefekturasında təhsilin uğur
qazanmasının əsas səbəbi müəllimlərin bacarıqlı,
şagirdlərin çalışqan, ailələrin məktəblə sıx
əlaqə saxlayaraq onu mənəvi, fiziki və maddi
dəstəkləməsidir.
İbtidai məktəb
Fukui prefekturasında ibtidai məktəblərin hər
sinfində şagirdlərlə 2 müəllim məşğul olur.
Hər sinif üzrə bir qrup və qrupdakı
şagirdlərin sayı 21-35 nəfər arasında olur.
Uşaqların ibtidai məktəbə məktəbəqədər
müəssisələrdən gəlməsi mütləq deyil. İbtidai
məktəbə şagirdlər həm məktəbəqədər
müəssisələrdən, həm də ailələrdən qəbul edilir.
Fukuidə ibtidai məktəblər məktəbəqədər
müəssisələrlə sıx əməkdaşlıq edir, çox zaman
hər iki müəssisə qonşu binalarda yerləşir.
İbtidai məktəblərdə tədris ili 11 ay və 3
smestrdən ibarətdir.
130 şagirdin təhsil aldığı bu məktəbdə 16
əməkdaş, o cümlədən 10 müəllim çalışır.
Dərslər səhər saat 8-də başlanır və dərsdən
əvvəl 5 dəqiqə ərzində şagirdlər açıq havada
idman edir. Şagirdlər hər gün 4 dərs keçir,
məktəbdə nahar etdikdən sonra evə qayıdırlar.
Dərslər səsli-küylü, müzakirə və oyunlar
şəklində keçirilir və uşaqlar daha çox tətbiqi
bacarıqlara yiyələnirlər.
İbtidai məktəbdə bir tədris ilinin hər
semestrində orta hesabla minimum iki kiçik
summativ, bir böyük summativ qiymətləndirmə
aparılır.Qiymətləndirmə vasitəsi kimi daha çox
testlərdən istifadə olunur. Əvvəllər şagirdlərin
nailiyyətləri 5 ballıq sistemdə rəqəmlə
qiymətləndirilirdi, hazırda isə təsviri
qiymətləndirmədən istifadə edilir:
-
00 - yaxşı
-
0 - orta
-
 -
pis
Şagird proqramı minimum səviyyədə
mənimsəmədikdə dərs vaxtı müəllim ona xüsusi
vaxt ayırır. Bu üsul da kömək etmədikdə həmin
şagirdlə fənn müəllimi dərsdən əlavə vaxtda
xüsusi məşğul olur.Belə fərdi yanaşmadan sonra
da şagirddə heç bir irəliləyiş olmadıqda o,
məktəbdən kənarlaşdırılır.
Yaponiyada, o cümlədən Fukui məktəblərində ailə
-məktəb əlaqələri yüksək səviyyədə qurulub. İldə
bir dəfə valideynlərlə böyük iclas keçirilir.
Digər iclasları isə il ərzində valideyn
komitəsinin nəzdindəki komissiyalar keçirirlər.
Məktəbli formasını valideynlər alır və hər fəslə
uyğun xüsusi məktəbli geyimi vardır. Məktəbli
geyim dəstinə eyni ayaqqabı, corab və çanta da
daxildir.
Şagirdlərin məktəbdə naharının pulunu
valideynlər ödəyir. Gündəlik naharın dəyəri
hər şagird üçün 250 yen təşkil edir. Bu və ya
digər səbəblərə görə valideynlər pul
ödəmədikdə şagird naharı evdən gətirir.
Fukui məktəblərində xadimə ştatı yoxdur və
məktəblər şagirdlər tərəfindən yığışdırılır,
nəticədə bunun üçün məktəb ayrıca vəsait sərf
etmir.
Aşağı orta məktəb
Şagirdlər ibtidai məktəbdə təhsilini bitirdikdən
sonra 3 sinfi əhatə edən (VII, VIII, IX) aşağı
orta məktəblərə gedirlər. Nümayəndə heyəti belə
məktəblərdən birində, Eşitzen şəhərində yerləşən
Nan-Etsu aşağı orta məktəbində oldu. Məktəb
1950-ci ildə təsis edilib. Məktəbdə 441 şagird
təhsil alır, 45 nəfər müəllim çalışır.
Yeni tədris qaydalarına uyğun olaraq məktəbdə
ünsiyyət bacarıqlarına xüsusi diqqət verilir.
Riyaziyyat, təbiət fənləri,yapon və ingilis
dillərinin tədrisinə daha çox vaxt ayrılır. Bu
məktəbdə dərsdən sonra mədəniyyət və idman
dərnəkləri fəaliyyət göstərir.
Qeyd edək ki, Yaponiyada hər məktəbin öz devizi
var. Həmin devizlər daha çox fiziki tərbiyə və
əxlaqla bağlıdır.
Nan-Etsu aşağı orta məktəbinin illik
fəaliyyəti
Nan-Etsu aşağı orta məktəbinin 2009-cu il
üçün tədris planı
Yuxarı orta məktəbdə təhsil icbari deyil, ancaq
buna baxmayaraq, aşağı orta məktəbi bitirən
şagirdlərin 93%-i yuxarı orta məktəbə daxil
olur.Nümayəndə heyəti Takefu Higaşi yuxarı orta
məktəbində oldu. Takefu Higaşi yuxarı orta
məktəbində böyük önəm verilən beynəlxalq şöbə
fəaliyyət göstərir. Bu şöbə gənclərin
beynəlxalq aləmə yaxınlaşmasnda böyük rol
oynayır.
Beynəlxalq şöbədə dünyanın digər inkişaf etmiş
ölkələrindən dəvət olunan müəllimlər şagirdlərə
ingilis dilində mühazirələr oxuyur, eyni
zamanda həmin məktəbin müəllim və şagirdləri
Tailand, Filippin, ərəb ölkələri, ABŞ, Yeni
Zelandiya, Avropa ölkələrində tədris
səfərlərində olurlar.
Şöbənin yaradılmasında əsas məqsəd ingilis
dilini mükəmməl bilən məzunlar vasitəsilə yapon
dili və mədəniyyətini dünyaya tanıtmaqdır.
Yuxarı orta məktəblərin beynəlxalq şöbəsini
bitirən şagirdlərin bir qismi digər ölkələrin
təhsil sahəsində, beynəlxaq tədbirlərdə
volontyor qismində çalışır.
Yuxarı orta məktəbdə ingilis və yapon dilləri,
riyaziyyat dərsləri yüksək səviyyədə tədris
olunur. Həmin məktəblərdə kollec və
universitetlərə daxil olmaq üçün hazırlıq
sinifləri fəaliyyət göstərir. Şagirdlər
kompüter texnologiyasının ən müasir tələblərinə
cavab verən bacarıqlara yiyələnməklə yanaşı,
natiqlik sənətini də öyrənirlər.Yeni
standartlarda təbiət elmləri beynəlxalq
səviyyəyə uyğunlaşdırılır, tədris prosesində
müşahidəyə, təkrarlamağa, nəticəyönümlülüyə
geniş yer verilir, həm ana, həm dillərin
tədrisində şagirdlərə nitq vərdişləri
aşılanır.Xarici dilin tədrisində nəzərdə
tutulan 900-1200 sözdən 300-nün, 1300-1800
sözdən 500-nün öyrənilməsi ən aşağı norma
sayılır.
Takefu Higaşi yuxarı orta məktəbin beynəlxalq
şöbəsinin kurikulumu
Yuxarı orta məktəblərin hər birində nümunəvi
davranış qaydaları haqqında sənəd qəbul edilir.
Takefu Higaşi yuxarı orta məktəbinin daxili
qaydalarına görə dərsdə üzürsüz səbəbdən
iştirak etməmək və gecikmək qadağandır.Dərsə
iştirak etməmənin üzürlü səbəbini göstərən
sənədin olması vacibdir.
Xüsusi qayğıya ehtiyacı olanlar üçün məktəb
Fukui prefekturasında əqli və fiziki cəhətdən
qüsurlu uşaqlar üçün 11 xüsusi məktəb
var.Əvvəllər belə uşaqlar müxtəlif məktəblərdə
oxuyurdular.Bu məktəblər tibbi müəssisələrlə
birgə işləyir və digər məktəblərin uşaqları
ilə əlaqə saxlayırlar. Olduğumuz məktəbə
şagirdlər bir-birinə yaxın olan 3 şəhərdən
məktəb avtobusu ilə gətirilir. Məktəbdəki 104
şagirdlə 90 müəllim məşğul olur.Burada idman,
rəsm, musiqi dərnəkləri fəaliyyət göstərir.
Fiziki qüsuru olan şagirdlər belə müəllimin
köməyi ilə özünə uyğun idman növü ilə məşğul
olur. Burada təhsil alan şagirdlərin bir qismi
məktəblərdəki emalatxanalarda müxtəlif məişət
əşyaları, o cümlədən stol, stul, kiçik şkaflar
düzəldir,onları satışa çıxarırlar. Şagirdlərin
digər hissəsi həyətyanı sahədə təsərrüfat
işləri ilə, bir qismi isə mətbəx işləri ilə
məşğul olurlar.
Bu məktəblərdə təhsil alan şagirdlər fiziki
çətinliklərə baxmayaraq, mütəmadi olaraq
ekskursiyalara aparılırlar.
Yaponiyada qüsuru o qədər də ciddi olmayan
şagirdlər digər məktəblərdə də təhsil ala
bilərlər. Lakin yuxarı orta məktəbə yalnız bu
tipli məktəblərdən daxil olmaq mümkündür. Qeyd
edək ki, xüsusi qayğıya ehtiyacı olanlar üçün
nəzərdə tutulan məktəblərin yuxarı
siniflərində ciddi qüsuru olanların 2%-i, az
qüsuru olanların 6 %-i oxuyur.
Dərsliklər
Yaponiyada dərsliklər dövlət tərəfindən pulsuz
paylanır. Dərsliklərin yazılması üçün Təhsil
Şurası yerli təhsili idarəetmə orqanlarına
standartları göndərir və hər bir prefekturada
müvafiq struktur bölmələri fənn proqramlarını
tərtib edir. Həmin proqramlar əsasında
dərsliklər yazılır. Bu dərsliklər Təhsil
Nazirliyi tərəfindən təsdiq edildikdən sonra
məktəblərə paylanılır.
Ciddi nəzarət edilməklə yanaşı, məktəblərdə
alternativ dərsliklərdən istifadəyə də icazə
verilir.
Eyni zamanda fənn müəllimi də yardımçı dərslik,
dərs vəsaiti yarada bilər.Ancaq bu vəsait
təhsili idarəedən orqanlar tərəfindən təsdiq
edilməlidir.
Müəllim hazırlığı
Yaponiyada müəllim hazırlığı və işə qəbulu
məsələsinə çox ciddi yanaşılır.Müəllimlər işə
tələbləri kifayət qədər ciddi və sərt olan
imtahan verdikdən sonra qəbul edilir. Orta
hesabla işə qəbul edilmək üçün sənəd verən min
nəfər müəllimin yüzü bu imtahanlardan keçməyə
müvəffəq olur. Müəllimlərin böyük əksəriyyəti
könüllü şəkildə axşam saat 9-a qədər
şagirdlərlə fərdi məşğul olmaqla məktəbdə
işlərini davam etdirirlər. Müəllimlər maddi
vəziyyətinə görə cəmiyyətin orta səviyyədə
yaşayan nümayəndələri sayılır.Yaponiyada
müəllimlərin ixtisasartırması üç pilləni
mərhələli şəkildə əhatə edir:
1. Məktəbdaxili - müəllimlər məktəbin qabaqcıl
müəllimlərinin "açıq dərs"lərində iştirak edir.
2. Prefekturadaxili - prefekturada fəaliyyət
göstərən xüsusi kurslarda təcrübə qazanırlar.
3. Ölkə miqyasında - xarici ölkələrə tədris
səfərlərinə gedirlər.
Yaponiyanın orta məktəblərində bir müəllim eyni
bir məktəbdə 6 ildən çox dərs deyə bilməz. Bu
müddət bitdikdən sonra prefekturadakı digər
məktəbdə, bəzən isə digər prefekturadakı
məktəblərdə işlə təmin edilir. İş yerini dəyişən
müəllimin evlə təmin edilməsi təhsili idarəedən
orqanlar tərəfindən həyata keçirilir.
Müəllimlərin fəaliyyəti məktəb direktorları
tərəfindən 5 ballıq sistemlə (A,B,C,D,E)
qiymətləndirilir və Prefektura Təhsil
Komitəsinə göndərilir. Məktəb direktoru
müəllimə yazdığı qiymət barədə onlara məlumat
vermir.
Ali təhsil
Ali məktəblərın bakalavriat pilləsində təhsil
4 ildir. Magistratura və doktorantura
pillələrinin hər birində isə 2 ildir.
Yaponiyada dövlət və özəl universitetlər
fəaliyyət göstərir:
Ali məktəblərə qəbul olunanların sayı 1980-ci
ildən üzü bu tərəfə yüksələn xətt üzrə inkişaf
edir. Eyni bir hal yuxarı orta məktəbə və
kolleclərə daxil olanların sayında da özünü
göstərir.
Yaponiyanın ali məktəblərində təhsil alan xarici
tələbələrin sayı ilbəil artır. Hazırda
Yaponiyanın müxtəlif universitetlərində 123829
gənc təhsil alır.Onlardan 72766 nəfər Çin Xalq
Respublikasından, 18862 nəfər Cənubi Koreyadan,
5082 nəfər Tayvandan, 2873 nəfər Vyetnamdan,
2271 nəfər Malayziyadan , 2203 Zelandiyadan,
2024 nəfər ABŞ-dan , 1791 nəfər İndoneziyadan,
1686 nəfər Banqladeşdən, 1476 nəfər Nepaldan və
12795 nəfər isə digər ölkələrdəndir.Eyni zamanda
80023 nəfər yaponiyalı gənc xarici ölkələrdə
təhsil alır.
Əlbəttə ki, qədim tarixə,zəngin mədəniyyətə,
adət-ənənəyə, gözəl təbiətə və ən əsası yüksək
səviyyəli təhsil sisteminə malik olan
Yaponiyanı 15 günlük tədris səfəri çərçivəsində
təfərrüatına qədər öyrənmək və bu barədə söz
demək çətindir. Ancaq bir şey bəllidir ki, hər
hansı bir ölkənin təhsil sistemi barədə ümumi
informasiya almaqla həmin ölkənin mədəniyyəti,
iqtisadiyyatı, inkişafı və digər dəyərləri
barədə müəyyən məlumata malik olmaq mümkündür.
Bizə belə bir imkan yaratdığı üçün Yaponiya
hökumətinə və Azərbaycan Respublikasının Təhsil
Nazirliyinin rəhbərliyinə təşəkkür edirik.
Arzu edərdik ki, gələcəkdə dünyanın inkişaf
etmiş ölkələrinə tədris səfərləri təhsili
idarəedənlər və öyrədənlərlə bərabər,
millətin gələcəyi olan öyrənənləri də əhatə
etsin.
Təranə HACIYEVA,
Azərbaycan Respublikası
Təhsil Nazirliyinin Monitorinq və
qiymətləndirmə şöbəsinin müdiri |
