|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Təhsil Nazirliyinin kollegiya iclasında üçüncü
yoxlama
imtahanının nəticələri və buraxılış
imtahanlarına hazırlıqla bağlı
məsələlər müzakirə olundu İyunun 4-də Azərbaycan Respublikası
Təhsil Nazirliyi kollegiyasının iki iclası keçirildi.
Günün birinci yarısında keçirilən və bütövlükdə
ümumtəhsil məktəblərində şagird
nailiyyətlərinin qiymətləndirilməsinə
həsr olunan iclasda kollegiya üzvləri ilə
bərabər, Təhsil Nazirliyinin struktur bölmələrinin
rəhbərləri, rayon və şəhər təhsil
şöbə müdirləri mərkəzləşdirilmiş
qaydada buraxılış imtahanlarının aparılacağı
məktəblərin direktorları və imtahan
rəhbərləri iştirak edirdilər. İclasın müzakirəsinə 2
məsələ çıxarılmışdı: "27
aprel 2008-ci il tarixində mərkəzləşdirilmiş
qaydada keçirilmiş üçüncü yoxlama imtahanının
nəticələri və buraxılış imtahanlarına
hazırlıq" və "2006-2007-ci dərs ilində
ümumtəhsil məktəblərinin XI siniflərini
"əla" qiymətlər və fərqlənmə
attestatı ilə bitirmiş məzunların ali
məktəblərə qəbulu vəziyyəti". İclası təhsil naziri, kollegiyanın
sədri Misir Mərdanov açaraq müzakirəyə çıxarılan
məsələlərin çoxluğunu və
yerlərdən təhsil şöbə müdirlərinin
dəvət olunduğunu nəzərə alıb gün
ərzində iki kollegiya iclası keçirilməsinin
qərara alındığını bildirdi. Nazir iki gündən sonra aparılacaq
mərkəzləşdirilmiş qaydada buraxılış
imtahanlarının obyektiv keçməsi və müvəffəqiyyətlə
nəticələnməsinə hər iki
məsələnin müzakirəsinin müsbət təsir göstərəcəyinə
inandığını bildirdi. Misir Mərdanov qeyd etdi ki, orta
məktəbləri "əla" qiymətlərlə
bitirmiş və fərqlənmə attestatları almış
məzunların son illər ali məktəblərə
qəbulda zəif nəticələr göstərmələri
ilə bağlı Təhsil Nazirliyinin ünvanına tez-tez
iradlar səslənir. Ona görə də bu
məsələnin araşdırılması və müzakirə
olunması lazım bilinib. Nazir qeyd etdi ki, hələ də təhsil
işçilərinin hamısı bu məsələlərin
məsuliyyətini dərindən dərk etmir.
Mərkəzləşdirilmiş imtahanların keçirilməsi
zamanı bir sıra neqativ və xoşagəlməz
hallara yol verilir ki, bunlara da şərait yaradan
əsasən bəzi məktəb direktorlarıdır.
Belə hallara qarşı tədbirlər görüldüyünü
deyən nazir ümumi işə mane olan, ona kölgə salan,
ziyan vuran neqativ hallara son qoyulmasını,
mərkəzləşdirilmiş qaydada keçirilən
imtahanlara hamının məsuliyyətlə yanaşmasını
tələb etdi. Nazir, yeri gəlmişkən, son vaxtlar gündəlik
məşğul olduqları bir məsələyə --
ən yaxşı müəllim müsabiqəsi üçün
namizədlərin seçimi məsələsinə də
toxundu və bildirdi ki, bu mötəbər müsabiqədə iştirak
üçün yerlərdən göndərilənlər arasında
layiqli namizədlərlə yanaşı, özünü doğrultmayanlara
da rast gəlinir. Bu baxımdan Tovuz, Zaqatala və Qax rayonlarından
göndərilənlərin səviyyəsindən razı
qaldığını deyən nazir bu
məsələyə heç də hər yerdə
məsuliyyətlə yanaşılmadığını
söylədi. Bildirdi ki, hətta müsabiqə iştirakçıları
arasında öz işi haqqında bir kəlmə belə danışa
bilməyənlər də vardır. Misir Mərdanov bu mühüm işə
səhlənkar yanaşmış R(Ş)TŞ müdirlərinə
öz narazılığını bildirdi. Təhsil nazirinin giriş sözündən sonra
nazirliyin Şagird nailiyyətlərinin
qiymətləndirilməsi şöbəsi müdirinin müavini
Təranə Hacıyeva müzakirə olunan birinci
məsələ ilə bağlı "27 aprel 2008-ci il
tarixində mərkəzləşdirilmiş qaydada keçirilmiş
üçüncü yoxlama imtahanının nəticələri və
buraxılış imtahanlarına hazırlıq" mövzusunda
məruzə-təqdimatla çıxış etdi. Ekranda slaydların nümayişi vasitəsi
ilə təqdim olunan məruzədə bu il
mərkəzləşdirilmiş qaydada test üsulu ilə keçirilmiş
sonuncu yoxlama imtahanının nəticələri müxtəlif
yön və parametrlərdən təhlil olundu,
əvvəlki sınaqlarla müqayisələr aparıldı,
yoxlama imtahanının müsbət cəhətləri, yol
verilmiş qüsurlar və onların səbəbləri göstərildi,
nöqsanların aradan qaldırılması, buraxılış
imtahanlarının yüksək səviyyədə təşkili
və keçirilməsi üçün müvafiq tövsiyələr verildi. T.Hacıyeva qeyd etdi ki, cari il aprelin
27-də keçirilmiş 3-cü mərkəzləşdirilmiş
yoxlama imtahanı respublikanın 29 rayonunu, Təhsil
Nazirliyinin tabeliyində və ali məktəblərin
nəzdində olan orta məktəbləri və peşə
liseylərini əhatə etmişdir. İmtahana 51.557
şagird cəlb edilsə də, 49.780 şagird iştirak
etmişdir. Sonra 2-ci və 3-cü yoxlama imtahanlarının
məktəblər və şagirdlər üzrə müqayisəli
göstəricilərini əks etdirən cədvəl
kollegiya iştirakçılarına təqdim olundu.
Cədvəldən aydın oldu ki, əgər 2-ci yoxlama
imtahanında müvəffəqiyyət göstəricisi 90-100
faiz arasında olan məktəblərin sayı 42
idisə, 3-cü yoxlama imtahanında cəmi 8 məktəb bu
cür nəticə göstərmişdir. 70-90 faiz nəticə
göstərən məktəblər 2-ci yoxlama imtahanında
218, 3-cü yoxlama imtahanında 57, 50-70 faiz nəticəsi
olanlar müvafiq şəkildə 350 və 243, 30-50 faiz
nəticə göstərənlər 173 və 310 olmuşdur. 2-ci yoxlamada 110 məktəb, 3-cüdə
isə 275 məktəb 0-30 faiz nəticə göstərmişdir.
2-ci yoxlamada 8, 3-cü yoxlamada isə 22 məktəbin müvəffəqiyyət
faizi sıfır bal olmuşdur. Cədvəldən aydın
görünürdü ki, məktəblər üzrə göstəricilərdə
olduğu kimi, şagirdlər üzrə göstəricilərdə
də üçüncü yoxlamada nəticələr
ikincidəkindən xeyli aşağı olmuşdur.
Belə ki, əgər ikinci yoxlamada 7.649 şagird 1
fəndən, 4.062 şagird 2 fəndən, 792 şagird
isə 3 və daha çox fəndən "2" qiymət
almış və 30.522 (60,84 faiz) şagird müvəffəq
olmuşdursa, üçüncü yoxlama imtahanında 1 fəndən
"2" qiymət alanlar 9.911, 2 fəndən "2"
alanlar 6.131, 3 və daha çox fəndən "2" alanlar
isə 12.256 nəfər olmuş, cəmi 21.482 şagird
(43,15 faiz) imtahanı müvəffəq qiymətlərlə
vermişdir. Sonra rayonlar üzrə reytinq cədvəli nümayiş
olundu. Cədvələ əsasən 3-cü sınaq imtahanı
aparılan bölgələr üzrə 1-ci yerə 71,96 faiz
nəticə ilə İsmayıllı rayonu çıxıb.
Ali məktəblərin nəzdindəki orta
məktəblər 70,24 faizlə 2-ci, Şirvan şəhəri
isə 60,11 faizlə 3-cü yeri tutublar. Buraxılış
imtahanlarının mərkəzləşdirilmiş
qaydada test üsulu ilə keçirilməsi sahəsində artıq
3 illik təcrübəsi olan Bakı şəhərinin,
habelə əvvəlki yoxlama imtahanlarında daha yüksək
nəticələr göstərən Sumqayıt, Mingəçevir
kimi şəhərlərin reytinq cədvəlində
sonuncu yerlərdə qərar tutması, təhsilin
keyfiyyəti baxımından o qədər də seçilməyən
bəzi bölgələrin isə yüksək
nəticələr göstərərək reytinq
cədvəlinin əvvəlində yer almasının
həmin bölgələrdə yoxlama imtahanının
obyektiv keçirilməsinə şübhə yaratdığı
vurğulandı. Bakı şəhərinin rayonları üzrə
reytinq cədvəlinin nümayişindən aydın oldu ki,
paytaxtda ən yaxşı nəticəni Xətai rayonu göstərib:
60,11 faiz. Əzizbəyov rayonu isə 19,63 faizlə ən
aşağı pillədə
qərar tutub. Bilavasitə Təhsil Nazirliyinin
tabeliyində olan lisey və gimnaziyaların reytinq
cədvəlində isə "İntellekt" liseyi
birinci, A.S.Makarenko adına respublka humanitar fənlər
təmayüllü gimnaziya sonuncu yerdədir. Təqdimatda 3-cü yoxlama imtahanlarının
bir sıra digər parametrlər üzrə
nəticələri də kollegiya iştirakçılarının
diqqətinə çatdırıldı. Belə ki, 3-cü
yoxlama imtahanı üzrə bütün şəhər və
rayonların məktəblərinin nəticələrini
əks etdirən cədvəllərin də hazırlandığını
deyən T.Hacıyeva Bakının Binəqədi rayonu,
Sumqayıt şəhəri və İsmayıllı
rayonu məktəblərinin nəticələrini əks
etdirən cədvəlləri nümunə kimi kollegiya iştirakçılarına
nümayiş etdirdi. Daha sonra yoxlama imtahanının
fənlər üzrə hesabat göstəriciləri haqqında
məlumat verildi. Bununla əlaqədar nümayiş olunan
slayda əsaslanaraq bildirildi ki, onbirincilər sınaq
imtahanında Azərbaycan tarixi, ana dili və xarici
dildən daha yaxşı nəticələr göstərmişlər.
Ən aşağı nəticə isə fizika fənni
üzrə qeydə alınıb. Gətirilən faktlardan
məlum oldu ki, Azərbaycan tarixi fənni üzrə şagirdlərin
10,01 faizi "2", 11,53 faizi isə "5"
qiymətlər alıblar. Ana dili üzrə müvafiq göstəricilər
isə 10,41 və 10,20 faiz olub. Xarici dil üzrə göstəricilər də
digər fənlərlə müqayisədə yaxşıdır.
Belə ki, şagirdlərin 14,92 faizi sınaq imtahanında
xarici dildən "2", 16,61 faizi isə "5"
qiymət alıb. T.Hacıyeva bu baxımdan coğrafiya
fənni üzrə nəticələrin digər
fənlərə nisbətən yüksək olduğunu da
vurğuladı. T.Hacıyevanın çıxışından
aydın oldu ki, rəhbərlik etdiyi şöbə öz işini
təkcə qiymətləndirmə ilə başa çatmış
saymır. Cavab kartlarının təhlili, şagirdlərin
fənlər üzrə bütün suallara verdikləri cavabların
öyrənilməsi istiqamətində də iş aparılır.
Bununla əlaqədar hazırlanmış və şagirdlərin
fənlər üzrə bütün suallara cavablarını
əks etdirən cədvəllər kollegiya iştirakçılarına
təqdim olundu. Cədvəllər üzərində müvafiq
izahatlar verən T.Hacıyeva xüsusi qeyd etdi ki,
fənlər üzrə suallara şagirdlərin verdikləri
cavabların təhlili onların bilik səviyyəsi,
fənlərə münasibəti, hansı testdə hansı
sualı necə cavablandırdığı və s. kimi
məqamlar haqqında məlumat əldə etməyə
imkan verir. Təhlillər göstərir ki, şagirdlər
nəzəri biliklərə aid suallara daha çox və düzgün
cavablar verir, tətbiqi xarakterli testləri isə cavablandırmaqda
çətinlik çəkirlər. Bu da şagirdlər arasında
əzbərçiliyə meyilin hələ də güclü olduğunu,
məktəblərdə biliklərin tətbiqi yönündə
kifayət qədər iş aparılmadığını
göstərir. Fikirlərini şagirdlərin ana dili
fənnindən 30 suala verdikləri cavablara istinad
etməklə əsaslandıran T.Hacıyeva bu yolla
digər fənlər üzrə hazırlanmış və
şagirdlərin suallara düz və ya səhv cavab
verdiklərini əks etdirən cədvəlləri də
kollegiya iştirakçılarına təqdim etdi. Şöbə
müdirinin müavini şagirdlərin müasirliklə bağlı
suallara verdikləri cavabların ürəkaçan olmadığını,
fizikadan nəzəri sualları cavablandırdıqları
halda tətbiqi xarakterli suallara cavablar verməyə çətinlik
çəkdiklərini təəssüf hissi ilə qeyd etdi. T.Hacıyeva çıxışında son
yoxlama imtahanında apelyasiyaya müraciət edənin olmadığını
da xüsusi diqqətə çatdırdı. Apelyasiyaya müraciəti
yaradan səbəblərdən danışan məruzəçi
buna nəzarətçilərin çaşması üzündən
variantın qarışdırılmasını, şagirdlərin
eyni sayda sualları olan fənlərə cavablar
yazarkən cavab kartında onların yerini dəyişik
salmaları və s. kimi texniki məsələlərin
səbəb olduğunu, son yoxlama imtahanında bu kimi halların
müşahidə olunmadığını bildirdi. T.Hacıyeva məruzə-təqdimatında
yoxlama imtahanında nümunəvi fəaliyyəti ilə
fərqlənmiş nəzarətçilərdən də danışdı.
Onlara misal olaraq Təranə Əmiraslanovanın, Famil
Məmmədovun, Məlahət Babayevanın (189 nömrəli
məktəb), Sədi Namazovun (233 nömrəli
məktəb), Ziyafət Zeynalovanın (233 nömrəli
məktəb), Zöhrə Polvanovanın, Validə Babayevanın
(286 nömrəli məktəb), Xanlar Pircanovun (166 nömrəli
məktəb), Zərnigar Əlibəyovanın (195 nömrəli
məktəb), Zemfira Abdullayevanın (273 nömrəli
məktəb), Tərlan Kərimovun (176 nömrəli
məktəb), Səbinə Qurbanovanın (314 nömrəli
məktəb) adlarını, soyadlarını çəkdi,
onlara təşəkkürünü bildirdi. Bütün nəzarətçilərin
öz işlərində məsuliyyətli olmalarını
arzuladı. T.Hacıyeva bildirdi ki, imtahandan sonra prosesin
gedişi haqqında nəzarətçilərin fikirlərini
bilmək və növbəti imtahanda işi daha yaxşı
təşkil etmək üçün onlarla anonim anket sorğusu keçirilib.
Əsas məqsəd həm nöqsanları görmək,
həm də bir mərkəzin nümunəsində imtahanı
təhlil etmək olub. Sonra o, sorğunun
nəticələrini kollegiya iştirakçılarına
təqdim etdi. Söylədi ki, bu fikirlər subyektiv xarakterli
olsa da, müəyyən nəticə çıxarmağa imkan
verir. Təqdim olunan slayd üzərində məlumat
verən T.Hacıyeva dedi ki, anket sorğusunda 43
nəzarətçi müəllim (38 qadın, 5 kişi) iştirak
edib. "İmtahanın gedişindən razısınızmı"
sualına nəzarətçilərin 65 faizi
"bəli", 23 faizi "qismən", 6 faizi
"xeyr" cavablarını vermiş; 6 faizi heç nə
qeyd etməmişdir. "Bir daha nəzarətçi olmaq
istərdinizmi" sualına onların 29 faizi
"xeyr", 71 faizi "bəli" cavablarını
vermişdir. Maraqlıdır ki, 65 faizi imtahanın gedişindən
razı olan nəzarətçilərdən 20 faizi bir daha
nəzarətçi olmaq istəmədiyini qeyd etmişdir. "İmtahan nə dərəcədə
obyektiv keçdi" (faizlə göstərməklə) sualına
nəzarətçilərin 14 faizi imtahanın 80 faiz, 44 faizi
onun 100 faiz, 9 faizi 0 faiz, 6 faizi 70 faiz, 14 faizi 90 faiz, 5 faizi
50 faiz, 5 faizi 99 faiz, 2 faizi 30 faiz obyektiv keçdiyini göstərmişdir. "Nəzarətçi kimi
fəaliyyətinizdən nə dərəcədə razısınız"
sualına müəllimlərin 64 faizi öz
fəaliyyətlərindən 100 faiz razı olduğunu, 6
faizi 90 faiz, 10 faizi 80 faiz, 2 faizi 70 faiz, 2 faizi 99 faiz razı
olduğunu qeyd etmişdir. 14 faiz sualı cavabsız qoymuş,
2 faizi özünü "aldadılmış" hesab etdiyini
bildirmişdir. "İmtahan rəhbərinin
fəaliyyətindən nə dərəcədə razısınız"
sualına nəzarətçilərin 61 faizi 100 faiz, 11 faizi 90
faiz, 6 faizi 80 faiz, 2 faizi 70 faiz qeyd etmiş, 18 faizi heç bir
cavab verməmiş,2 faizi "çalışdı" cavabını
yazmışdır. "Mərkəzləşdirilmiş
qaydada keçirilən imtahanın müsbət
tərəfləri hansılardır" sualına
nəzarətçilərin cavabları aşağıdakı
kimi olmuşdur: şagirdlərin özünə inamı, müstəqil
işləməsi, obyektivlik - 22 faiz; şagirdlər
fənlərin öyrənilməsinə ciddi yanaşırlar
- 16 faiz; şagirdlərin qəbul imtahanlarına hazırlaşması,
testə alışması - 14 faiz; biliyin düzgün qiymətləndirilməsi
14 faiz; şagirdlər məsuliyyət hiss edirlər - 6
faiz; direktorların özbaşınalığının
qarşısı alınır - 2 faiz; şagirdlər 4
deyil, 8 fənni öyrənirlər - 2 faiz;, saxta hazır
cavab satanlar gəlir götürürlər - 2 faiz, belə imtahanın
müsbət tərəfi yoxdur - 2 faiz. 20 faiz iştirakçı
suala cavab verməmişdir. "Mərkəzləşdirilmiş
qaydada keçirilən imtahanın mənfi tərəfləri
hansılardır" sualına nəzarətçilərin
cavabları aşağıdakı kimi olmuşdur: şagirdlərdə arxayınçılıq
yaranmışdır, aldıqları saxta cavablarla
gəlirlər - 3 faiz; psixoloji sarsıntı və
gərginlik yaradır - 5 faiz; mənfi tərəfi yoxdur -
46 faiz; müəllimlərin istirahət günü olmur - 2 faiz;
eyiblərimiz görünür - 2 faiz; biz buna hələ tam hazır
deyilik - 2 faiz; mobil telefonların imtahana gətirilməsi -
5 faiz; mənfi tərəf olsa belə mən onu görmürəm
- 2 faiz. 33 faiz iştirakçı sualı cavabsız qoymuşdur. "Bugünkü imtahanın çatışmazlıqlarını
nədə görürsünüz" sualına nəzarətçilərdən
6 faizi cavab verməmiş, 42 faizi "çatışmazlıq
yoxdur", 42 faizi "hər şey qaydasında idi",
2 faizi "test sualları məktəb proqramına uyğun
gəlmir və bu şagirdlərin narazılığına
səbəb olur" cavablarını vermiş, 2 faizi
test kitabçalarının qarışıq düşməsi,
4 faizi şagirdlərin məsuliyyətsizliyi və arxayınçılığını,
2 faizi şagirdlərin imtahana hələ də alışa
bilmədiyini qeyd etmişdir. Kollegiyada yoxlama imtahanı zamanı
məktəb direktorlarının səhlənkarlığı
üzündən qeydə alınmış bəzi
problemlərdən də söz açıldı. Bildirildi ki,
bəzi məktəb direktorlarının diqqətsizliyi
nəticəsində bir neçə şagirdin oxuduğu
məktəb, soyadı, adı və ya atasının adının
yazılışında səhvlərə yol verilmişdir.
T.Hacıyeva həmin şagirdlərin adı-soyadını
və səhvə yol verən direktorların işlədikləri
məktəblərin nömrələrini diqqətə çatdırdı. İmtahanların coğrafiyasının
getdikcə genişlənməsi ilə əlaqədar işlərinin
çoxaldığını deyən T.Hacıyeva
fəaliyyətlərini daha da təkmilləşdirmək
üçün müvafiq iş apardıqlarını bildirdi. Qeyd etdi
ki, mərkəzləşdirilmiş qaydada keçirilən
imtahan nəticələrinin emal olunmasında istifadə
olunan OMR-300S optik oxuyucu qurğusundan səmərəli
istifadə olunması məqsədilə təhsil nazirinin
11/236 nömrəli əmrinə əsasən şöbənin
əməkdaşları Almaniya Respublikasında
"DATAWIN" şirkətində təlim
səfərində olmuş, OMR-300S qurğusunun sazlanması,
optik oxuyucu qurğunun ayrı-ayrı hissələrinin
dəyişdirilməsi, qurğunun cavab kartına uyğun
olaraq nizamlanması, cavab kartlarının ağırlıq
və ölçülərinə görə qurğuda işıq
selinin tənzimlənməsi məsələlərini öyrənmişlər.
Onlar, eyni zamanda cavab kartı üçün təyinat faylının
hazırlanması, yeni avadanlıqlarla və onların
texniki göstəriciləri ilə tanış olmuşlar. Təlimin sonunda "DATAWIN" şirkəti
tərəfindən şöbənin əməkdaşlarına
sertifikat təqdim olunub. T.Hacıyeva məruzə-təqdimatında
mərkəzləşdirilmiş qaydada keçirilən buraxılış
imtahanları və onlara hazırlıq istiqamətində
görülmüş işlər barədə də kollegiya iştirakçılarına
məlumat verdi. Bildirdi ki, bu il iyunun 6-da respublikanın 29
rayonunda, Təhsil Nazirliyinin tabeliyindəki lisey və
gimnaziyalarda, ali məktəblərin
nəzdində olan orta məktəbləri və peşə
liseylərini əhatə edən mərkəzləşdirilmiş
qaydada buraxılış imtahanı keçiriləcəkdir.
133 mərkəzdə keçiriləcək imtahanlarda 52
minə yaxın şagird iştirak edəcək. Kənd
rayonlarındakı mərkəzlərə iki imtahan
rəhbəri təyin edilmişdir. Həmçinin, ötən tədris ilində müəyyən
fənlərdən qeyri-kafi qiymət almış
1.500-ə yaxın gənc imtahanlara cəlb edilmişdir.
Həmin gənclər builki məzunlarla bir yerdə deyil,
onlar üçün yaradılmış 4 mərkəzdə imtahan
verəcəklər. Təlimata uyğun olaraq səkkiz fənnin
hər hansı birindən qeyri-müvəffəq qiymət
alan şagird orta təhsil haqqında attestat almayacaq. Şöbədə iki istiqamətdə
proqram təminatı hazırlanmışdır.
Mərkəzləşdirilmiş və təkrar imtahanda iştirak
edənlərin cavab kartlarını oxumaq və
qiymətləndirmək üçün fərqli proqram təminatından
istifadə ediləcək. T.Hacıyeva təqdimatının sonunda
şagird nailiyyətlərinin qiymətləndirilməsi
sahəsində aparılan işləri
gələcəkdə daha da təkmilləşdirmək
üçün aşağıdakı təkliflərini də
kollegiya iştirakçılarının diqqətinə çatdırdı: 1.Dərsliklərdə və müəllim hazırlığında
nəzəri biliklərin tətbiqinə yönəlmiş
məsələlərə geniş yer verməli. 2.Beynəlxalq qiymətləndirmə proqramında
riyaziyyat və təbiət elmlərinə aid təklif
olunan məsələlərlə təhsil
ictimaiyyətinin, dərslik müəlliflərinin tanış
olmalarının və iş təcrübələrində
istifadə etmələrinin təmin olunması. 3.Şagird nailiyyətlərinin
qiymətləndirilməsi əmsalları və metodlarının
təkmilləşdirilməsi. 4.İmtahanda nizam-intizamın gücləndirilməsi
məqsədi ilə aşağıdakı
tədbirlərin həyata keçirilməsi nəzərdə
tutulsun: a) imtahan otağındakı şagirdlərin
sayına uyğun test kitabçası variantlarının hazırlanması; b) işçi-ekspert qrupunun genişləndirilməsi; c) cavab kartında sualların fənlər
üzrə deyil, ardıcıl nömrələnməsi; ç) nəzarətçi müəllimlər bazasının
yaradılması; d) test bankının təkmilləşdirilməsi
və test kitabçasını yığan proqram təminatının
yaradılması. Təqdimat başa çatdıqdan sonra
təhsil naziri Misir Mərdanov müzakirə olunan
məsələ ilə bağlı bəzi fikir və
təkliflərini kollegiya iştirakçılarının
diqqətinə çatdırdı. Mərkəzləşdirilmiş
qaydada keçiriləcək buraxılış imtahanları
ilə bağlı tövsiyə və tapşırıqlarını
verdi. Nazir üçüncü yoxlama imtahanında yaxşı işi
ilə fərqlənən nəzarətçilərin, eyni
zamanda şagirdlərin adlı siyahılarının
Təhsil Nazirliyinə təqdim edilməsi zamanı
səhvlərə yol vermiş məktəb
rəhbərlərinin adları-soyadlarının kollegiya
qərarında qeyd olunmasını təklif etdi. Misir Mərdanov yaxın
gələcəkdə ümumi təhsilin ibtidai və
əsas pillələrinin sonunda imtahanlar keçirilməsini
məqsədəuyğun saydı. Növbəti dərs ilindən yoxlama imtahanlarının
hər yarımildə bir olmaqla ildə 2 dəfə keçirilməsinin
nəzərdə tutulduğunu bildirdi, rayon və şəhərlərdə
məktəb rəhbərlərinin bu istiqamətdə iş
aparmalarını zəruri saydı. Misir Mərdanov gələn ildən başlayaraq
Bakı və Sumqayıt şəhərlərində IX
siniflərdə də buraxılış imtahanlarının
mərkəzləşdirilmiş qaydada keçirilməsini,
daha sonra bu təcrübənin bütün ölkədə tətbiq
olunmasını zəruri hesab etdiyini söylədi. Bildirdi
ki, mərkəzləşdirilmiş qaydada keçiriləcək
buraxılış imtahanlarının
nəticələrinə əsasən müəllimlərin,
məktəb rəhbərlərinin fəaliyyətinə
qiymət verilməli, dərsliklər və proqramlar bu baxımdan
yenidən nəzərdən keçirilməlidir. Təhsil naziri Misir Mərdanov çıxışında
bir sıra digər məsələlərə
də toxundu, təhsil rəhbərlərinə
mərkəzləşdirilmiş qaydada keçiriləcək
buraxılış imtahanlarında yaranan problemlərin
həllinə kömək göstərməyi tapşırdı. Yusif ƏLİYEV
|