Xəbər verdiyimiz kimi, Azərbaycan Respublikasının təhsil naziri, professor Misir Mərdanovun rəhbərlik etdiyi nümayəndə heyəti noyabrın 24-25-də Gürcüstanda 2 günlük səfərdə olub. Nümayəndə heyətinə Təhsil Nazirliyinin şöbə müdirləri İlham Mustafayev, Faiq Şahbazlı, Təhsil Problemləri İnstitutunun direktoru Abdulla Mehrabov, Qax Rayon Təhsil Şöbəsinin məsləhətçisi Şarmazi Tartaraşvili, Zaqatala Rayon Əliabad qəsəbə 2 nömrəli orta məktəbinin direktoru Tərlan Rəcəbov daxil idilər. 

Hava limanında nümayəndə heyətini Azərbaycan Respublikasının Gürcüstandakı fövqəladə və səlahiyyətli səfiri Namiq Əliyev, Gürcüstanın təhsil və elm naziri Nika Qvaramiya və nazirliyin əməkdaşları qarşıladıqdan sonra Gürcüstanın Təhsil və Elm Nazirliyində 2 saatdan artıq işgüzar görüş keçirildi. 

Gürcüstanın təhsil və elm naziri Nika Qvaramiya nümayəndə heyətini bir daha salamlayaraq ölkəsinin təhsil sistemi, burada həyata keçirilən islahatlar barədə ətraflı məlumat verdi, Azərbaycan Respublikası Prezidentinin Gürcüstana daim diqqətlə yanaşdığının, Gürcüstandakı təlim Azərbaycan dilində olan məktəblərin dərslik, dərs vəsaiti və digər tədris ləvazimatları ilə təminatına köməyin, eləcə də Qax, Zaqatala və Balakən rayonlarının təlim gürcü dilindəki məktəblərinə həssas münasibətin Gürcüstanda böyük hörmət hissi ilə qarşılandığını xüsusi vurğuladı. O qeyd etdi ki, bu hər iki ölkə başçısının apardığı siyasətin, dostluq və qarşılıqlı hörmətin inkişaf etdirilməsi əsasında mümkün olmuşdur. 

Bununla belə, Nika Qvaramiya Gürcüstan məktəblərinin, o cümlədən təlim Azərbaycan dilində olan məktəblərin təmiri, maddi-texniki təchizatı və müəllim kadrları ilə təminatında çətinliklərin də olduğunu vurğuladı.

Azərbaycanın təhsil naziri, professor Misir Mərdanov gürcüstanlı həmkarına səmimi qarşılanmaya görə təşəkkürünü bildirdikdən sonra Azərbaycanda bütün sahələrdə olduğu kimi, təhsil sahəsində də aparılan islahatlardan, bu işin ilk nəticələrindən söhbət açdı. Nazir Gürcüstanın təhsil sistemində aparılan ciddi dəyişiklikləri tərəqqi kimi qiymətləndirərək bu işlərdə həmkarına yeni uğurlar arzuladı. Sonra Misir Mərdanov Gürcüstandakı Azərbaycan məktəblərinin problemləri barədə danışdı. O, Azərbaycan məktəblərinin sayının ilbəil azalmasından, bu məktəblərə Azərbaycan dilini bilməyən digər millətlərin nümayəndələrinin direktor təyin edilməsindən, bir sıra məktəblərdə ixtisaslı milli kadrların olmamasından, tədris proqramında gürcü dilinə ayrılan saatların azlığından, ali məktəblərdə azərbaycandilli kadr hazırlığının aparılmamasından, Gürcüstandakı təlim Azərbaycan dilində olan məktəblərdə işləyən müəllimlərin ixtisasartırma təhsili sahəsində iş aparılmamasından, Gürcüstanın Təhsil və Elm Nazirliyində azərbaycanlı mütəxəssislərin çalışmaması ilə bağlı azərbaycanlı müəllimlərin üzləşdiyi çətinliklərdən, Gürcüstandakı  təlim Azərbaycan dilində olan məktəblərdə Azərbaycan tarixi və Azərbaycan coğrafiyası, eyni zamanda Azərbaycanda fəaliyyət göstərən təlim gürcü dilində olan məktəblərdə Gürcüstan tarixi və Gürcüstan coğrafiyası fənlərinin tədris edilməməsindən, şagirdlərin dərsliklərlə təminatının qədərincə ödənilməməsindən və digər bu kimi məsələlərdən narahatlığını bildirdi və konkret təkliflərini səsləndirdi.

Məsələlər ətrafında müzakirələr aparıldı.

Noyabrın 25-də təhsil naziri Misir Mərdanov və Gürcüstanın təhsil və elm naziri Nika Qvaramiya ulu öndər Heydər Əliyevin Tbilisi şəhərində ucaldılmış büstünü ziyarət etdilər. Sonra Tbilisi şəhərindəki 73 nömrəli təlim  Azərbaycan dilində olan məktəbin və qonşuluqdakı təlim gürcü dilində olan məktəbin müəllim və şagirdləri ilə görüşən Azərbaycan nümayəndə heyəti və digər qonaqlar həmin tədris ocaqları ilə yaxından tanış olub, onların maddi-texniki təchizatının vəziyyəti ilə maraqlandılar. 

Daha sonra Azərbaycan nümayəndə heyəti və qonaqlar Marneuli rayonuna gələrək Resurs Mərkəzində oldular və ötən il orta və əsas məktəbləri yüksək nailiyyətlərlə bitirmiş şagirdlərin 3 nömrəli məktəbdə təltifolunma mərasiminə qatıldılar. Sevindirici haldır ki, həmin məzunlardan qızıl medala layiq görülən iki şagirdin ikisi də azərbaycanlıdır. Mərasimdə Azərbaycan Respublikasının təhsil naziri Misir Mərdanov nitq söyləyib soydaşlarımızın bu uğurlarından qürur duyduğunu bildirdi.

Marneuli şəhər 8 nömrəli orta məktəbinə gələn nazir Misir Mərdanov kollektivlə görüşərək onları dinlədi və işlərində uğurlar arzuladı.

Nümayəndə heyətinin Marneuli şəhərində yerləşən Heydər Əliyev adına Gürcüstan - Azərbaycan Humanitar Universitetinin müəllim və tələbələri ilə görüşü də maraqlı keçdi. Bu universitetin rəhbərliyi təhsil ocağının akkreditasiyası ilə bağlı məsələni hər iki nazirin diqqətinə çatdırdı və problemin həlli ilə əlaqədar köməklik göstərilməsini xahiş etdi.

Nazirlər və onları müşayiət edən heyət Qızılhacılı kənd əsas məktəbinə də gələrək burada görülmüş işlərlə yaxından tanış oldular.

Həmin gün Dmanisi rayonuna səfər edildi. Təlim Azərbaycan dilində olan Donisi kənd əsas məktəbinin kollektivi ilə görüşən nümayəndə heyəti daha sonra Dmanisi şəhərində Heydər Əliyev Fondunun köməyi ilə yaradılan kompüter mərkəzində oldu. Bundan sonra təlim gürcü dilində aparılan orta məktəbdə fəaliyyət göstərən gürcü dilinin intensiv tədris edildiyi Resurs Mərkəzində müəllimlərlə görüşən nazir Misir Mərdanov dinləyicilərə dövlət dilinin öyrənilməsinin əhəmiyyəti ilə bağlı fikirlərini bildirdi və öz tövsiyələrini verdi. 

Bütün görüşlərdə soydaşlarımız Azərbaycan Respublikasının təhsil nazirinin Gürcüstan təhsil müəssisələrinə gəlişini müsbət qiymətləndirərək belə səfərlərin ölkələrimiz arasında elm və təhsil sahəsində mövcud olan səmərəli əməkdaşlığın daha da inkişaf etdirilməsinə layiqli töhfələr verəcəyinə və bütövlükdə Gürcüstanda yaşayan azərbaycanlıların problemlərinin həllinə müsbət təsir edəcəyinə ümidvar olduqlarını bildirdilər.

Azərbaycanın və Gürcüstanın təhsil nazirləri səfərin nəticələrindən məmnunluqlarını bildirərək gələcəkdə əməkdaşlığın və belə işgüzar səfərlərin faydalı olacağına əminliklərini ifadə etdilər.

Sonda Misir Mərdanov gürcüstanlı həmkarına qonaqpərvərliyə və əməkdaşlığa görə təşəkkürünü bildirdi və onu Azərbaycana işgüzar səfərə dəvət etdi. 

Faiq ŞAHBAZLI,
Təhsil Nazirliyinin şöbə müdiri