Müsabiqə qalibləri mükafatlandırıldı

Mayın 7-də Azərbaycan Dövlət Akademik Milli Dram Teatrında Bakı Şəhəri üzrə Təhsil İdarəsinin Təhsil İşçiləri Azad Həmkarlar İttifaqı Respublika Komitəsi ilə birgə keçirdiyi "Biz Heydər Əliyev irsini öyrənirik" müsabiqəsinin qaliblərinə mükafatların təqdim olunması mərasimi oldu. Mərasimi giriş sözü ilə açan Bakı Şəhəri üzrə Təhsil İdarəsinin müdiri Nailə Rzaquliyeva ümummilli lider Heydər Əliyevin 85 illik yubileyinin bütün ölkəmizdə böyük təntənə ilə qeyd olunduğunu bildirdi. Ulu öndərin Azərbaycan xalqı qarşısındakı xidmətlərindən danışan N.Rzaquliyeva onun mənalı həyatının, çoxcəhətli fəaliyyətinin və zəngin irsinin böyüməkdə olan nəslə dərindən öyrədilməsinin zəruriliyini vurğuladı.

BŞTİ müdiri rəhbərlik etdiyi qurumda və paytaxtın təlim-tərbiyə ocaqlarında bu yöndə sistemli iş aparıldığını diqqətə çatdırdı və keçirilən müsabiqənin də bu məqsədə xidmət etdiyini söylədi.

Mərasimdə "Ədəbi-bədii", "Elmi-tədqiqat", "İnternet layihələri" nominasiyaları üzrə keçirilmiş müsabiqənin nəticələri açıqlandı, qaliblərə mükafatlar təqdim olundu.

Təhsil naziri Misir Mərdanov mərasimdə çıxış etdi. Qalibləri təbrik edən nazir müsabiqənin yüksək səviyyədə, böyük öndərin adına layiq təşkil olunduğunu vurğuladı. Nazir, eyni zamanda Bakı Şəhəri üzrə Təhsil İdarəsinin bu yöndəki fəaliyyətini təqdir etdi.

Misir Mərdanov ümummilli lider Heydər Əliyevin 85 illik yubileyinin bu günlər ölkəmizin hər yerində geniş qeyd olunmasını böyük öndərə ümumxalq məhəbbətinin təzahürü kimi dəyərləndirdi. Dahi şəxsiyyət və müdrik dövlət xadimi Heydər Əliyevin Azərbaycanda hakimiyyətdə olduğu illərdə təhsilin inkişafına böyük önəm verdiyini, onu ölkənin tərəqqisi üçün ən vacib amil saydığını söyləyən nazir ulu öndərin təhsilə və təhsil işçilərinə hər zaman xüsusi diqqət və qayğı göstərdiyini bildirdi.

Nazir çıxışının sonunda ümummilli liderin ideyalarının, arzu və istəklərinin, başlamış olduğu nəhəng quruculuq işlərinin onun layiqli varisi, ölkə Prezidenti İlham Əliyev tərəfindən uğurla həyata keçirildiyini vurğuladı.

Tədbirdə iştirak edən Azərbaycan Həmkarlar İttifaqları Konfederasiyasının sədri, millət vəkili Səttar Mehbalıyev, Səbail Rayon İcra Hakimiyyətinin başçısı Sahib Ələkbərov da qalibləri təbrik edərək onlara böyük yaradıcılıq uğurları arzuladılar.

Mərasimdə məktəblilər maraqlı konsert proqramı ilə çıxış etdilər.

Y.ƏLİYEV