Attestat ala bilməyənlər təkrar imtahan verdilər

İyunun 6-da ölkənin 19 bölgəsində mərkəzləşdirilmiş qaydada aparılmış buraxılış imtahanlarının nəticələrinə əsasən attestat ala bilməmiş onbirinci sinif şagirdləri iyunun 19-da təkrar imtahan verdilər. Bunun üçün paytaxtın təhsil müəssisələrində 5 imtahan mərkəzi yaradılmış və onlarda lazımi hazırlıq işləri görülmüşdü. Bakının və bölgələrin orta məktəblərini təmsil edən şagirdlər "Ankara məktəbi" məktəb-liseyində, S.C.Pişəvəri adına Respublika Humanitar Fənlər Gimnaziyasında, 177 və 202 nömrəli məktəb-liseylərdə, peşə liseylərinin şagirdləri isə ayrıca bir mərkəzdə imtahan verirdilər. Mərkəzlərə Təhsil Nazirliyinin əməkdaşlarından rəhbərlər təyin olunmuş, nəzarətçilər ayrılmışdı. İmtahanların şəffaf və obyektiv keçirilməsini təmin etmək üçün zəruri tədbirlər görülmüş, onların gedişini izləməyə bir sıra qeyri-hökumət təşkilatlarından, KİV-dən nümayəndələr cəlb olunmuşdular.

Təhsil Nazirliyi Şagird nailiyyətlərinin qiymətləndirilməsi şöbəsinin müdiri Təranə Hacıyevadan aldığımız məlumata görə, attestat ala bilməyənlərin sayı 5 minə yaxın olsa da təkrar imtahan vermək üçün onlardan 1500-dən bir qədər artığı nazirliyə ərizə ilə müraciət etmişdir. T.Hacıyeva onu da bildirdi ki, təkrar imtahan məzmun baxımından əvvəlki buraxılış imtahanından fərqlənmir. Yeganə fərq şagirdin ancaq kəsildiyi fənn və ya fənlərdən imtahan verməsindədir ki, bu barədə də şagirdlər, onların valideynləri məlumatlandırılıb.

Təhsil Nazirliyi tərəfindən yaradılmış korrupsiyaya qarşı mübarizə üzrə işçi qrupun üzvü, Korrupsiyaya Qarşı Mübarizə Fondunun icraçı direktoru Vasif Mövsümov və bir qrup KİV əməkdaşı ilə iki mərkəzdə olub imtahanların təşkili və gedişini izlədik. öncə 202 nömrəli məktəb-liseydəki mərkəzdə müşahidələr apardıq. Burada imtahan rəhbəri Təhsil Nazirliyi Şagird nailiyyətlərinin qiymətləndirilməsi şöbəsinin əməkdaşı Nəbi Mahmudov idi. Saat 9.00-dan başlayaraq şagirdlər bir-bir yoxlanılıb içəri buraxıldı.

N.Mahmudovdan öyrəndik ki, bu mərkəzdə 600-dən çox şagird imtahan verir. Yeri gəlmişkən qeyd edək ki, imtahana gələn şagirdlər arasında buraxılış vərəqləri olmayanlar da var idi. Onlar imtahan vermək üçün vaxtında nazirliyə müraciət etməyənlər idi. Məktəbdə belələrinə də diqqətlə yanaşılır, imtahan verməsi üçün şərait yaradılırdı.

Şagirdlər otaqlarda öz yerlərini tutduqdan sonra onlara test kitabçaları paylandı və imtahan başladı. Əvvəlki imtahanda olduğu kimi, təkrar imtahanda da şagirdlərin cavab kartının şagird haqqında məlumat hissəsi nazirlik tərəfindən doldurulmuşdu və onlar buna vaxt sərf etmirdilər. İmtahan gedən bir neçə otağa baş çəkdik. İmtahana gəlməyənlər də var idi.

İkinci baş çəkdiyimiz mərkəzdə - "Ankara məktəbi" məktəb-liseyində isə daha çox şagird imtahan verirdi. Burada da əlində imtahana buraxılış vərəqi olmadan gələnlər vardı. Lakin onları da qəbul edir və otaqlarda yerləşdirirdilər. Mərkəzdə hərəsində 200-300 şagird olan 7 otaqda (sinif otaqları ilə yanaşı məktəbin idman salonu, foye və dəhlizlərindən də otaq kimi istifadə olunurdu) imtahan gedirdi. Hər otağa imtahan rəhbəri təyin olunmuşdu. 7 nömrəli otaqda 360 şagird təkrar imtahan verirdi.

3 saat vaxt ayrılan imtahan saat 13.00-da başa çatdı.

Nazirlikdən aldığımız məlumata görə imtahanın nəticələri bu gün Təhsil Nazirliyinin rəsmi İnternet saytında yerləşdiriləcək.

Y.ƏLİYEV  

Tələbələr biliklərini nümayiş etdirdilər

Ali məktəblərdə, texnikum və kolleclərdə təhsil alan tələbələr həyəcanlı günlər yaşamaqdadırlar. Elə imtahan həyəcanının yaşandığı anları müşahidə etmək üçün Azərbaycan Memarlıq və İnşaat Universitetində olduq. Universitetin tədris şöbəsinin müdiri Sabir Məmmədovdan imtahanların təşkili, gedişi və nəticələri barədə məlumat verməsini xahiş etdik. O dedi:

- Yay  imtahan sessiyasına hazırlıq rektorun əmrinə uyğun olaraq yerinə yetirilir. Bu məqsədlə bütün qruplarda yay sessiyasında imtahan keçiriləcək fənlərin siyahısı, bilet nümunələri fakültələrin informasiya lövhələrində asılıb. Bütün universitet üzrə imtahan cədvəlləri hazırlanıb və rektorun əmri ilə imtahanların obyektiv, şəffaf və mütəşəkkil keçirilməsi məqsədilə universitetin qabaqcıl əməkdaşlarından ibarət nəzarətçilər qrupu yaradılıb. Sessiya iyunun 30-na kimi davam edəcək. Universitet üzrə 255 bakalavr qrupunda 3645 tələbə yay imtahan sessiyasında iştirak edir. Onlardan 738 nəfəri IV kursu bitirmək üçün dövlət imtahanları verir, buraxılış işlərini müdafiə edir. Bu gün universitet üzrə 22 qrupda imtahan keçirilir. Onlardan 7-si monitorinq üsulu ilə, 15-i isə ənənəvi yolla aparılır...

İmtahan sessiyasına nəzarət qərargahının sədri Şahin İsmayılov söhbətə qoşularaq bildirdi ki, Təhsil Nazirliyinin əmrinə uyğun olaraq universitetimizdə imtahanlara nəzarət qərargahı yaradılmışdır. Məqsəd imtahanlara nəzarəti, obyektivliyi təmin etmək, ortaya çıxan problemləri operativ həll etmək, birinci mərtəbədə qoyulmuş qutuda toplanmış ərizə və şikayətlərə yaradılmış komissiya tərəfindən baxmaq, ictimai fikri öyrənməkdən ibarətdir.

Birlikdə imtahan aparılan auditoriyalara yollandıq.

Nəhayət, ilk müşahidəyə inşaat fakültəsində aparılan mühəndis geodeziyası fənni üzrə keçirilən imtahandan başladıq. Burada 207 A2 əyani qrupun I kurs tələbələri imtahan verirdilər. Monitorinq yolu ilə aparılan imtahanda qrupda olan 20 nəfər tələbənin hamısı iştirak edirdi. Artıq tələbələrin əksəriyyəti imtahan suallarını yazılı şəkildə cavablandırıb, auditoriyanı tərk edirdi. çox keçmədi ki, müəllim Səfail Verdiyevin, assistent Rölan Piriyevin və nəzarətçi Cəmilə Mustafayevanın rəhbərliyi ilə aparılan imtahan başa çatdı. Elə buradaca "əla" qiymət almış Günel Seyidovanın 16 nömrəli biletin "Miqyaslar və onların növləri, həndəsi niverliləmənin üsulları" suallarına yazdığı cavablar və xəttin maqnit azimutunun hesablanmasına aid olan məsələnin həlli ilə tanış olduq. Hər bir sual qısa və konkret şəkildə cavablandırılmış, məsələ düzgün həll edilmişdi. Günelin özu ilə də söhbət etdik. öyrəndik ki, o, bundan əvvəlki Azərbaycan tarixi fənnindən də "əla" qiymət alıb. Axırıncı fizika fənnindən verəcəyi imtahandan da "əla" qiymət alacağına böyük ümid bəsləyir. Günel imtahanın tam obyektiv və şəffaf aparıldığını, tələbələrə sərbəstlik verildiyini bildirdi.

Sonra mexanikləşdirmə və avtomatlaşdırma fakültəsinin 805-ci qrupunda iqtisadi nəzəriyyə fənnindən ənənəvi qaydada aparılan imtahanı müşahidə etdik. Bu imtahanda 19 tələbənin hamısı iştirak edirdi. İmtahan verib auditoriyanı tərk etmiş tələbələrlə apardığımız söhbətlər zamanı bəlli oldu ki, onlar heç bir problemlə rastlaşmayıblar və imtahanın gedişindən tam razı qalıblar.

Ədalət DAŞDƏMİRLİ