|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Uşaq
problemləri Uşaqlar kompüterdən neçə saat istifadə edə bilərlər? Elmin, texnikanın inkişaf etdiyi bir dövrdə
kompüterdən istifadə artıq gündəlik
tələbata çevrilib. Respublikamıza gətirilən müxtəlif
ölkələrin istehsalı olan kompüterlərin sayı da
gündən-günə artmaqdadır. Bəs görəsən bu
kompüterlər öz istifadəsinə görə nə
qədər keyfiyyətlidir? Kompüter rahat işləmək
baxımından arzuolunan səviyyədədirmi? Bu gün
istifadə edilən kompüterlər
əvvəlkilərdən nə ilə fərqlənir?
Hazırda orta məktəblərdəki kompüterlər müasir
tələblərə cavab verirmi? ümumiyyətlə, seçim
zamanı hansı kompüterlərə üstünlük
verilməlidir? Kompüter insan səhhətində nə kimi
problem yarada bilər? Bu və ya digər suallara aydınlıq
gətirmək üçün "Ultra" şirkətinin
prezidenti, iqtisad elmləri namizədi Tahir Mirkişiliyə
və Mərkəzi Neftçilər xəstəxanasının
göz şöbəsinin həkimi Aytəkin İbrahimxəlilovaya
müraciət etdik. Tahir müəllim qeyd etdi ki, 2004-cü ilə
qədər Azərbaycana gətirilən kompüterlərin
monitorları böyük ekranlı idi. Bu monitorlarda şüalanma
dərəcəsi yüksəkdir. çünki monitorlarda təsvir
elektronların hərəkəti ilə yaranırdı.
Ona görə də bu monitorlar gözə ziyan idi. Bundan qorunmaq
üçün monitorların ön hissəsinə göz filtrləri
asmaq lazım gəlirdi. Göz filtrləri həm şüalanmanın,
həm də artıq işıqlanmanın qarşısını
alır. Həmin monitorları olanlara göz
filtrlərindən istifadə etmək tövsiyə olunur. Hazırda
yeni monitorlar maye kristal monitor adlanır. Onlarda təsvir
maye kristalların üzərində yarandığından
şüalanma və artıq işıqlanma yox
dərəcəsindədir. Bu gün orta məktəblərə
verilən kompüterlər maye kristal monitorlarla təchiz
olunub ki, bu, özlüyündə çox yaxşı bir haldır. Müəllim
kompüterləri "Pentium 4", şagird kompüterləri
isə İntel Celeron prosessorları ilə təchiz olunub
ki, fikrimizcə bu, tədris prosesi üçün kifayətdir.
Sadəcə, məktəblərdəki kompüterlərlə
xidməti gücləndirmək, proqramları daim yeniləşdirmək
və antivirus əməliyyatları keçirmək lazımdır. Son dövrlər texnologiyalar inkişaf
etdiyindən kompüter alınarkən aşağıdakılara
diqqət vermək lazımdır: 1.Prosessor İntel Duo olsun. 2.Əməliyyat yaddaşı minimum 1GB
olsun. 3.İnternetə daxil olmaq üçün Fax Modem qurğusu
olsun. 4.DVD yazan və oxuyan qurğusu olsun. 5.Keybordu Multimedia olsun. 6.Siçanı optik lazerli olsun. 7.Monitoru Maye Kristal (LCD) olsun. 8.Bərk diski ən azı 80 GB olsun. 9.Video kartı ən azı 128 MB olsun. Kompüter və noutbuk almaq
istəyənlər ilk öncə hansı markanı seçməyə
qərar verməlidirlər? Bu gün ölkəmizdə milli
marka NEXUS kompüter və noutbukları, "Kür"
kompüterləri, xarici markalardan HP, Acer, Fujitsu-Siemens kompüter
və noutbukları, Toshiba noutbukları və yerli yığılma
kompüterləri alıcılara təklif olunur. Biz hər
kəsə marka kompüter və noutbuk almağı
məsləhət görərdik. çünki onlar satışa çıxarılmazdan
əvvəl dəfələrlə testdən keçirilir
və keyfiyyət yoxlamalarına məruz qalır. Eyni
texnologiyaya malik milli və xarici markalar yalnız dizayn
və qiymətinə görə fərqlənir. Yeri
gəlmişkən, eyni texniki xarakteristikalara və
keyfiyyətə malik olan Nexus noutbukları Toshiba noutbuklarından
30 faiz ucuzdur. Bu, ölkəmizdə işçi qüvvəsinin
nisbətən ucuz və istehsal xərclərinin aşağı
olması ilə əlaqədardır. Onu da əlavə edim ki, keyfiyyətsiz kompüter
istifadənin keyfiyyətinə ciddi mənfi təsir göstərir.
Sonda bir məsələni qeyd etmək istərdim ki,
saatlarla kompüter arxasında oturmaq düzgün deyil. Biz mütəxəssislər
də hesab edirik ki, kompüterdə çox işləmək
insanda daha çox zehni yorğunluğa səbəb olur. Ona görə
də buna məhdudiyyətlər qoyulur.
Məsələn, 3-5 yaşlı uşaqlara 15, 5-6 yaşlılara
25, 7-8 yaşlılara isə bu vaxt 35-40 dəqiqə müəyyən
olunub. Yəni, gün ərzində bu vaxtdan artıq işləmək
qeyd etdiyim kimi, daha çox zehni yorğunluğa səbəb
olur. Zehni yorğunluq da yaddaşın
zəifləməsinə gətirib çıxarır. Kompüterdən
istifadə zamanı bunu diqqətdə saxlamaq lazımdır. Həmsöhbətimiz olan Mərkəzi Neftçilər
Xəstəxanası göz şöbəsinin həkimi
Aytəkin İbrahimxəlilova isə uşaqların kompüterdə
fasilələrlə maksimum 2 saat məşğul olmasını
bildirdi. Sual oluna bilər ki, niyə fasilələrlə?
çünki hər 30-45 dəqiqədən sonra gözlər
yorulur. Əgər gözlər bir nöqtəyə uzun müddət
dikilirsə, həmin vaxt göz əzələləri yığılmış,
gərgin bir vəziyyətdə olur. Belə
vəziyyət uzun müddət davam edərsə, sonradan kompüterdən
istifadə olunmasa belə gərginlik aradan qalxmır. Uşaqlarda gözlə bağlı müəyyən
problemlər yaranır. Əvvəlcə bu, onlarda yalançı
miopiyaya - yaxından görməyə, sonradan isə
həqiqi miopiyaya çevrilir ki, belə bir hal da özlüyündə
ağır xəstəlikdir, uşaq uzağı pis görür.
Yaxından görmənin ən ağır fəsadı
nədir? Bu zaman göz alması, gözün ölçüləri böyüyür.
Vaxtında həkimə müraciət edilmədikdə, gözdə
ciddi problemlər yaranır və bu, son nəticədə
hətta korluğa gətirib çıxara bilər. Kompüterdə
məşğul olanların
gözlərində baş verən
xəstəliklərdən biri də onlarda quruluğun
yaranması, göz suyunun tükənməsidir. Belə ki, kompüterdən
gələn işıq enerjisi adi həyatdakından artıqdır
və bu da birbaşa gözlərə öz mənfi təsirini
göstərir. Miopiya xəstəliyi olan uşaq uzağı,
demək olar ki, pis görür. Belə uşaqlarda
adətən, müəyyən komplekslər olur. Valideynlərə məsləhətim odur
ki, öz övladlarına kompüter arxasında uzun müddət
oturmağa icazə verməsinlər, yuxarıda qeyd etdiyim
vaxta riayət olunmasına nəzarəti
artırsınlar. Əgər
uşaqlarında gözlə bağlı hər hansı
bir problem yaranarsa, vaxtında həkimə müraciət
etsinlər ki, baş verən fəsadların getdikcə ağırlaşmasının
qarşısı alınsın. Söhbəti qələmə aldı: Samirə KƏRİMOVA
|