Cənubi Koreyanın KAİST Universitetinə qəbul davam edir

"Xarici ölkələrdə təhsil alacaq Azərbaycan gənclərinin seçim Qaydaları"na uyğun olaraq Cənubi Koreyanın KAİST Universitetində (Koreya Yüksək Elm və Texnologiyalar Universiteti) müxtəlif ixtisaslar üzrə bakalavr pilləsində təhsil almağa göndəriləcək azərbaycanlı tələbələrin seçilməsi məqsədilə Təhsil Nazirliyi müsabiqə elan edib.

Müsabiqədə Azərbaycanın ali məktəblərinin bakalavr pilləsinin I və II kurslarında təhsil alan, ali məktəblərə tələbə qəbulu üzrə aparılan test imtahanları çərçivəsində texniki sahələr üzrə ən azı 550 bal, digər sahələr üzrə isə ən azı 600 bal toplayan 18 yaşı tamam olmuş tələbələr iştirak edə bilərlər.

Müsabiqədə iştirak etmək üçün iddiaçılar ərizə-əsaslandırma (2 dildə - Azərbaycan dilində və xarici dildə), doldurulmuş xüsusi anket forması (Təhsil Nazirliyindən əldə edilir), 2 ədəd tövsiyə məktubu (iddiaçının təhsil aldığı ali məktəbin professor-müəllim heyəti tərəfindən verilir, ərizə formasını 

http://admission.kaist.ac.kr/sub05/sub05_1.do

saytından əldə etmək  mümkündür), xüsusi anket forması

(http://admission.kaist.ac.kr/sub05/sub05_1.do

saytından əldə etmək olar), ali məktəbə qəbul zamanı topladığı bal haqqında TQDK tərəfindən verilmiş arayış, tələbənin ali məktəbdə təhsil alması barədə arayışın və qiymət kitabçasından çıxarışın surətləri (notarial qaydada təsdiq olunmuş və ingilis dilində tərcüməsi ilə),  tərcümeyi-hal (CV, 2 dildə - Azərbaycan dilində və xarici dildə), 6 ədəd rəngli fotoşəkil (3,5x4,5 sm ölçüdə) və şəxsiyyət vəsiqəsinin surətini 10 may 2009-cu il tarixinə kimi Təhsil Nazirliyinə təqdim etməlidirlər.

Müsabiqədə uğur qazanan tələbələr Koreyanın KAİST Universitetində nanotexnologiya, biomühəndislik, mexaniki, aerokosmik və sistem mühəndisliyi, mülki və ekoloji mühəndislik, sənaye dizaynı, kimya və biomolekulyar mühəndisliyi, materialşünaslıq və mühəndislik, nüvə və kvant mühəndisliyi, elektrik mühəndisliyi, kompüter elmləri, sənaye və sistemlər mühəndisliyi kimi ixtisaslar üzrə təhsil almaq imkanı əldə edəcəklər.

Azərbaycanlı tələbələr Türkiyənin 12 nüfuzlu

universitetində təhsil alacaqlar

Azərbaycan Respublikası Təhsil Nazirliyi ilə Türkiyə Respublikası Milli Təhsil Nazirliyi arasında imzalanmış təhsil sahəsində əməkdaşlığa dair müqaviləyə uyğun olaraq, 2009-2010-cu dərs  ilində Azərbaycan vətəndaşlarının Türkiyənin ali məktəblərinin bakalavr pilləsində dövlət xətti ilə təhsil alması məqsədilə 48 yer ayrılıb.

Təhsil Nazirliyinin müvafiq sifarişinə əsasən, 19 aprel 2009-cu il tarixdə Türkiyə nümayəndə heyəti ilə Azərbaycan Respublikası Tələbə Qəbulu üzrə Dövlət Komissiyası qəbul imtahanları keçirib.

Türkiyə tərəfi Təhsil Nazirliyinin sifarişini qəbul edərək Azərbaycan gənclərinin təhsil almaları üçün 24 prioritet ixtisas üzrə (tibb, təyyarə mühəndisliyi, kompüter mühəndisliyi, beynəlxalq əlaqələr, turizm və otelçilik, ispan dili, italyan dili, yapon dili, maliyyə, molekulyar biologiya, genetika və s.) Türkiyənin 12 ən nüfuzlu universitetində yer ayırıb. Bu ali məktəblər arasında Ankara, İstanbul, Boğaziçi, Orta Doğu Texniki, Hacəttəpə, Qazi, İstanbul Texniki, Mərmərə kimi universitetlərin adlarını xüsusi qeyd etmək olar.

Eyni zamanda iki ölkənin müvafiq qurumları arasında mövcud olan razılaşmaya əsasən, Türkiyənin ali məktəblərinin magistratura pilləsində Azərbaycan Respublikası üçün müvafiq prioritet ixtisaslar üzrə yüksək səviyyəli kadrların hazırlanması məqsədilə Türkiyə tərəfi 12 təqaüd ayırıb. Bakalavr pilləsini Azərbaycanda bitirən və təhsillərini Türkiyədə davam etdirmək arzusunda olan gənclər də müvafiq qaydalara uyğun olaraq Tələbə Qəbulu üzrə Dövlət Komissiyasının təşkil etdiyi imtahanlarda iştirak etməlidirlər.

Türkiyə ali məktəblərində təhsil almaq hüququ qazanmış Azərbaycan vətəndaşlarının təhsili, qeydiyyatı və yataqxana ilə təmin olunması pulsuzdur. Bununla yanaşı, həmin tələbələrə həm Türkiyə, həm də Azərbaycan hökuməti tərəfindən aylıq təqaüd verilir və ildə bir dəfə yay tətili müddətində təyyarə ilə gediş-gəliş xərcləri Azərbaycan Respublikası Təhsil Nazirliyi tərəfindən ödənilir.

"Milli dövlətçiliyimizin qurucusu, memarı" mövzusunda "açıq dərs"

Aprelin 22-də Yasamal Rayon İcra Hakimiyyətinin Heydər Əliyev məktəb-muzeyində Bakıdakı 158 nömrəli  orta məktəbin X sinif şagirdlərinin iştirakı ilə "Heydər Əliyev milli dövlətçiliyimizin qurucusu, memarıdır" mövzusunda "açıq dərs" keçildi.

 Ulu öndər Heydər Əliyevin anadan olmasının 86-cı ildönümünə həsr olunmuş "açıq dərs"də məktəbin tarix müəllimi  mövzu haqqında şagirdlərə məlumat verdi. Şagirdlər qrup şəklində dahi şəxsiyyətin müasir Azərbaycanın inkişafı yolunda tarixi xidmətlərindən, böyük sərkərdə kimi öz xalqı qarşısındakı  xilaskarlıq missiyasından danışdılar. Onlar Azərbaycan xalqının, eləcə də Türk dünyasının  böyük oğlu Heydər Əliyev haqqında tədbir iştirakçılarına ətraflı məlumat verdilər.  Sonra  şagirdlər   çəkdikləri gözəl rəsmlərlə ümummilli lider Heydər Əliyevə olan böyük sevgilərini bir daha nümayiş  etdirdilər.

Tədbir ulu öndər Heydər Əliyevə  həsr olunmuş filmin nümayişi ilə başa çatdı.

Rəşad ZİYADOV