Mayın 15-də Təhsil Nazirliyində "Mədəd"
təşkilatının İKT-nin təhsilə tətbiqi üzrə
təlimlərə dair təqdimatı keçirildi. Təhsil
Nazirliyinin rəhbər işçilərinin, İKT sahəsində
fəaliyyət göstərən qurumların nümayəndələrinin
və müvafiq təlim kurslarından keçmiş təhsil
işçilərinin iştirak etdikləri tədbiri giriş sözü
ilə açan təhsil naziri Misir Mərdanov son illər
ölkəmizin təhsil sistemində həyata keçirilən
tədbirlər sırasında İKT-nin təhsilə tətbiqini
xüsusi qeyd edib, bu sahədə aparılan işlərin
təhsil ictimaiyyətini razı saldığını söylədi.
Görülmüş işlər barədə tədbir iştirakçılarına
məlumat verən nazir bildirdi ki, ölkə
Prezidentinin 2004-cü il 21 avqust tarixli 353
nömrəli Sərəncamı ilə "Azərbaycan
Respublikasında ümumtəhsil məktəblərinin
informasiya-kommunikasiya texnologiyaları ilə
təminatı Proqramı (2005-2007-ci illər)" təsdiq
olunmuş, üç il ərzində proqramın həyata
keçirilməsi üçün dövlət büdcəsindən 30 milyon
manat vəsait ayrılmışdır. Ayrılmış vəsaitin 80,6
faizinin texniki avadanlıqların alınmasına, 15
faizinin elektron tədris vəsaitlərinin
hazırlanmasına, 4,0 faizinin təlimlərin
keçirilməsinə, 0,4 faizinin isə proqramın idarə
edilməsinə sərf olunduğunu deyən təhsil naziri
proqram çərçivəsində 3693 məktəbə 31677
kompüter, 1103 noutbuk və proyektor dəsti, 2059
UPS, 2060 çap qurğusu və digər İKT avadanlığı,
28661 kompüter masası və 23346 stul
verildiyini, məktəblərdə 1722 kompüter sinfinin
yaradıldığını diqqətə çatdırdı.
Elektron
tədris vəsaitlərinin yaradılması, müəllimlərin
İKT üzrə təlim kurslarına cəlbi istiqamətində
atılmış addımlardan bəhs edən nazir Azərbaycan
tarixi fənni üzrə 20 adda 37900, kimya fənni
üzrə 8 adda 15160, biologiya fənni üzrə 12 adda
22740, fizika fənni üzrə 3 adda 10200 nüsxə
elektron vəsaitin hazırlandığını, yerli və
beynəlxalq təşkilatlar tərəfindən 20000 nəfər
müəllimin treninqlərdən keçdiyini söylədi.
Sonra Misir Mərdanov ölkə Prezidentinin 2008-ci
il 10 iyun tarixli 2856 nömrəli Sərəncamı ilə
təsdiq olunmuş "2008-2012-ci illərdə Azərbaycan
Respublikasında təhsil sisteminin
informasiyalaşdırılması üzrə Dövlət Proqramı"
çərçivəsində görülən işlər barədə məlumat
verərək bir sıra statistik rəqəmləri tədbir
iştirakçılarının diqqətinə çatdırdı. Nazir
bildirdi ki, həmin proqrama uyğun olaraq
2008-2009-cu illərdə Məlumat və Resurs Mərkəzi
yaradılmış, 20 məktəb "Elektron məktəb" pilot
layihəsinə qoşulmuşdur. 2005-ci ildə "Elektron
məktəb"lərə verilmiş 226 dəst kompüter
avadanlığı götürülərək modernləşdirilmiş və
digər rayonların təhsil şöbələrinə
çatdırılmışdır, əvəzində isə həmin məktəblərə
300 yeni kompüter paylanmışdır.
Daha sonra nazir Bakı və Sumqayıt şəhərlərindən
"1 şagird - 1 kompüter" layihəsi çərçivəsində
seçilmiş məktəblərə Təhsil Nazirliyi tərəfindən
236, "İntel" Şirkəti tərəfindən 100 ədəd
netbukun hədiyyə olunduğunu vurğuladı. Nazir
habelə ikinci Dövlət Proqramı çərçivəsində
kompüterlərin lisenziyalı proqramlarla təmin
olunduğunu, 500 təhsil müəssisəsinin Azərbaycan
Təhsil Şəbəkəsinə qoşulduğunu, Milli Təhsil
Portalının yaradıldığını, 5800 nəfər inzibati
idarəetmə, 25180 nəfər pedaqoji və 800 nəfər
texniki heyətin təlimlərə cəlb olunduğunu,
təhsil sisteminin informasiyalaşdırılması üzrə
normativ-hüquqi sənədlərin hazırlandığını, ölkə
üzrə ümumtəhsil məktəblərinə personal
kompüterlər və 200 noutbuk və proyektor dəsti
paylandığını, bütün bu işlərin görülməsi üçün
2008-ci ildə 8 milyon 353 min, 2009-cu ildə isə
14 milyon 980 min manat vəsait xərcləndiyini
bildirdi.
Təhsil naziri çıxışında 2010-cu ildə Dövlət
Proqramı çərçivəsində görülməsi nəzərdə tutulan
işlərə də toxundu və qeyd etdi ki, bu il
Azərbaycan Təhsil Şəbəkəsinə əlavə olaraq 400
təhsil müəssisəsinin qoşulması və onların
sürətli İnternetə çıxışla təmin olunması, 2000
nəfər inzibati idarəetmə, 2000 nəfər "Elektron
məktəb" layihəsinə qoşulmuş məktəblərin, 23000
nəfər isə digər pedaqoji heyətin təlimlərə cəlb
olunması, Bakı və Sumqayıt şəhərlərinə 2005-ci
ildə verilmiş kompüterlərin 1500 ədədinin
modernləşdirilib digər regionlara göndərilməsi
və həmin müəssisələrə bir o qədər kompüterin
verilməsi, "Elektron məktəb" layihəsinə
regionlardan daha 10 məktəbin əlavə olunması, "1
şagird - 1 kompüter" layihəsinin əhatə
dairəsinin genişləndirilməsi məqsədi ilə əlavə
1500 netbukun verilməsi planlaşdırılıb.
Təhsil naziri çıxışının sonunda onu da vurğuladı
ki, məktəblərə verilən İKT avadanlığı nə qədər
çox və müasir olsa da onlardan istifadənin
səmərəliliyi, ilk növbədə, müəllimlərdən,
onların bu işə necə hazırlanmasından asılıdır.
Bu baxımdan müəllimlərin İKT üzrə müvafiq
treninqlərdən keçirilməsinin ən vacib işlərdən
biri olduğunu söyləyən təhsil naziri indiyədək
bu işlə "Mədəd" təşkilatının məşğul olduğunu, bu
təşkilatın təhsildə İKT-nin tətbiqi üzrə işlərin
həyata keçirilməsində mühüm xidmətləri olduğunu
bildirdi və görülmüş işlər barədə tədbir
iştirakçılarını da ətraflı məlumatlandırmaq üçün
sözü "Mədəd" təşkilatının rəhbəri Emil Məmmədova
verdi.
Tədbirdə Emil Məmmədov və "Mədəd" təşkilatının
məsləhətçisi Ülkər Babayeva təmsil etdikləri
qurumun tarixi, məqsədi və fəaliyyət
istiqamətləri, son 5 ildə gördüyü işlər barədə
geniş təqdimatla çıxış etdilər.
Təqdimatda bildirildi ki, fəaliyyət göstərdiyi
dövr ərzində "Mədəd" təşkilatı bir sıra
beynəlxalq qurumlarla, o cümlədən "İntel",
"Ultra" və b. ilə əməkdaşlıq əlaqələri
qurmuşdur.
Təqdimatçılar təşkilatın təhsildəki fəaliyyətinə
diqqəti yönəldərək həmin fəaliyyətin
təkmilləşdirməni, pedaqoji ali təhsili, inzibati
heyəti, metodistləri, elektron təhsil
vəsaitlərini, qüsurlu uşaqları, onlayn icmanı
əhatə etdiyini söylədilər. Qeyd olundu ki,
"Mədəd" təşkilatı öz fəaliyyətini iki istiqamət
üzrə qurub, həyata keçirir. Bunlar beynəlxalq
təcrübənin öyrənilməsi və bu təcrübənin
Azərbaycanda tətbiqidir.
Təqdimatda hər iki istiqamət üzrə ayrıca məlumat
verildi. Bildirildi ki, təşkilat tərəfindən
2003-2006-cı illər ərzində beynəlxalq təcrübə
ilə tanışlıq məqsədi ilə araşdırma aparılıb.
Sonra təqdimatda Azərbaycan təcrübəsindən bəhs
olundu. Qeyd edildi ki, "Mədəd"in ölkənin təhsil
sistemində İKT üzrə təşkil etdiyi təlimlərdə
məqsəd şəxsiyyətyönümlü və interaktiv təlim
metodlarına, fənn tədris proqramlarına
əsaslanma, pedaqoji və informasiya
texnologiyalarından səmərəli istifadə,
müəllimlərin həm öyrədən, həm də öyrənən kimi
iştirak etmələri, dərsin tədqiqat üsulu vasitəsi
ilə qurulmasıdır.
Təqdimatda habelə müəllimlərin peşə səviyyəsinin
təkmilləşdirilməsi, inzibati idarə heyəti üçün
İKT-nin təhsilə tətbiqi və idarəetmə sistemləri
üzrə təlim, "Elektron məktəb" layihəsi üçün
seçilmiş pilot məktəblərdə təlimin hər biri
haqqında ayrıca məlumat verildi. Müəllimlərin
təlimdən əvvəlki və sonrakı vəziyyəti müqayisəli
şəkildə diqqətə çatdırıldı, müəllim və
şagirdlərin nailiyyətləri qeyd olundu.
Təqdimatda 2005-ci ildən bəri keçirilən təlimlər
haqqında bəzi rəqəmlər misal gətirildi. Qeyd
olundu ki, təlimlər ölkənin 36 bölgəsinin 2500
məktəbini əhatə edib və 90 təlim mərkəzində
aparılıb. Son iki il ərzində İKT üzrə təlim
keçmiş müəllimlərin 95 nəfəri "Ən yaxşı müəllim"
müsabiqəsinin qalibi olub.
Tədbirin sonunda bu sahədə fəaliyyəti daha da
təkmilləşdirmək və səmərəli etmək üçün təkliflər
irəli sürüldü, Sumqayıt Şəhər Təhsil Şöbəsinin
müdiri Vidadi Bağırov, Bakıdakı 220 nömrəli orta
məktəbin direktoru Almaz Əsgərova "Mədəd"
təşkilatının xətti ilə görülən işlər haqqında
danışdılar.
Yusif ƏLİYEV |