|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Təhsil Nazirliyinin kollegiyasında İKT-nin
tətbiqi vəziyyətinin təkrar monitorinqinin
nəticələri müzakirə olundu Martın
5-də Təhsil Nazirliyində ümumtəhsil
məktəblərində İKT-nin tətbiqi
vəziyyətinin təkrar monitorinqinin
nəticələrinə dair kollegiya iclası keçirildi.
İclasda kollegiya üzvləri ilə yanaşı,
Təhsil Nazirliyinin müvafiq
şöbələri və struktur bölmələri
rəhbərləri, monitorinq qrupu üzvləri və
təkrar monitorinq aparılmış məktəblərin
direktorları iştirak edirdilər. Kollegiya iclasını açan təhsil naziri
Misir Mərdanov zala toplaşanları salamlayıb müzakirə
olunan məsələ barədə məlumat verdi. Nazir
qeyd etdi ki, ümumtəhsil məktəblərinin İKT
ilə təminatı hazırda dövlətin təhsil
siyasətinin ən prioritet istiqamətlərindən birini
təşkil edir. Son 3 ildə bu sahədə xeyli iş görülmüş,
qəbul olunmuş Dövlət Proqramının icrası yönündə
həyata keçirilən tədbirlər nəticəsində
məktəblərin İKT ilə təmin olunmasının
birinci mərhələsi başa çatdırılmışdır.
3 il ərzində bu işə 30 milyon manat vəsait
xərclənmişdir. Dövlətin külli miqdarda vəsaiti
hesabına alınıb məktəblərə verilmiş
İKT avadanlığından necə istifadə olunması
məsələsinin onları daim narahat etdiyini deyən
Misir Mərdanov Təhsil Nazirliyinin 31 oktyabr 2007-ci il tarixli
əmrinə əsasən Bakı və Sumqayıt şəhərlərinin,
Abşeron rayonunun bir sıra ümumtəhsil
məktəblərinin Dövlət Proqramı çərçivəsində
İKT ilə təmin olunması, onların quraşdırılması
və tədris prosesində istifadəsi vəziyyətini
öyrənmək məqsədi ilə monitorinq aparıldığını
bildirdi. Qeyd etdi ki, monitorinqin aparılması üçün 57
nəfərdən ibarət işçi qrupu yaradılmış,
onun tərkibinə nazirliyin TİMS şöbəsinin, Dövlət
Proqramını İdarəetmə qrupunun, Bakı şəhərinin
peşə liseylərinin və Bakı Kompüter Kollecinin
əməkdaşları daxil edilmişdir, Monitorinq Bakı
şəhərində 304, Sumqayıtda 47, Abşeron rayonu
üzrə isə 5 məktəb olmaqla, ümumilikdə 356
məktəbi əhatə etmişdir. Nazir aparılmış monitorinqin
nəticələrinin ötən il dekabrın 25-də keçirilmiş
kollegiya iclasında müzakirə olunduğunu xatırladaraq
bildirdi ki, müzakirə zamanı 85 məktəbdə İKT
ilə təchizat və onun tədris prosesində
tətbiqi sahəsində ciddi nöqsanlara yol verildiyi aşkar
olunmuşdu. Həmin məktəblərdən 72-si Bakının,
11-i Sumqayıtın, 2-si isə Abşeron rayonunun ümumtəhsil
müəssisəsidir. ötənilki kollegiya iclasında İKT
ilə təminat və ondan istifadə sahəsində
ciddi nöqsanlara yol vermiş məktəblərdə bir müddət
sonra yenidən monitorinq keçirilməsi barədə
qərar qəbul edildiyini diqqətə çatdıran nazir
15-26 yanvar tarixlərində sözügedən
məktəblərdə təkrar monitorinqlər aparıldığını
söylədi. Sonra Misir Mərdanov təkrar monitorinqin
nəticələrinə əsasən işçi qrupunun hazırladığı
arayışla kollegiya iştirakçılarını tanış etdi.
Aydın oldu ki, monitorinq aparılmış 85
məktəbdən 59-da problemlər həll olunub və
hazırda vəziyyət normaldır. Nazir bu
məktəblərin adını da kollegiya iştirakçılarına
açıqladı. Misir Mərdanov, eyni zamanda Bakı şəhərində
28, Abşeron rayonu üzrə isə 1 olmaqla 29
məktəbdə İKT avadanlıqlarının quraşdırılması
və onlardan istifadə üzrə problemlərin hələ
də həll olunmadığını
bildirdi. Bu məktəblərin adı və onlarda aşkarlanan
faktlar da kollegiya iştirakçılarının
diqqətinə çatdırıldı. Nazir həmin
problemlərin bir qisminin məktəb
rəhbərliyindən asılı olmayan
səbəblərdən öz həllini tapa
bilməməsini qeyd etsə də, əksər
təhsil ocaqlarında, o cümlədən Bakıdakı 65,
78, 137, 215, 222, 232, 242, 303 nömrəli və s.
məktəblərdə bu baxımdan vəziyyətin
qənaətbəxş olmamasını məktəb
direktorlarının zəif nəzarətinin, laqeydliyinin
nəticəsi kimi qiymətləndirdi,
onların qısa müddətdə aradan qaldırılması
üçün Təhsil Nazirliyinin müvafiq şöbəsinə tapşırıqlar
verdi. Nazir habelə monitorinqdə iştirak
edənlərə təşəkkür edib,
bu işin davam etdirilməsini, bölgələrdə
də müvafiq monitorinqlərin keçirilməsini zəruri saydı.
Nazir
ötən sınaq imtahanının
nəticələrindən razı qaldığını
bildirdi Təhsil naziri Misir Mərdanov kollegiya iclasının sonunda fevralın
24-də keçirilən ikinci sınaq imtahanına da münasibətini
açıqladı, onun əvvəlki sınaq imtahanından
daha mütəşəkkil keçirildiyini bildirdi.
Nəticələrin yüksək olduğunu vurğulayan
nazir ikinci sınaqda tətbiq olunmuş bir sıra yeniliyi,
xüsusən də nəticələrin nazirliyin İnternet
saytında yerləşdirilməsini, beləliklə,
hər bir şagirdə və onun valideyninə
nəticələrlə əyani tanış olmağa
şərait yarandığını
müsbət qiymətləndirdi, məhz bunun
nəticəsində apelyasiyaya ehtiyac qalmadığını
söylədi. Ancaq nazir bütün bunlarla yanaşı,
bəzi məktəb direktorlarının imtahanlara
məsuliyyətsiz yanaşmaları, səhlənkarlığa
yol vermələri üzündən bir sıra problemlər
yarandığını, nəzarətçi müəllimlərin
bir çoxunun öz vəzifələrinin öhdəsindən
gələ bilmədiyini də diqqətə çatdırdı.
Növbəti sınaq imtahanına daha ciddi
hazırlaşmağın vacib olduğunu vurğulayan
nazir məktəbin, müəllimin nüfuzunu yüksəltməyə
xidmət edən bu işdə bütün məktəb
rəhbərləri və müəllimlərin yaxından
və dərin məsuliyyət hissi ilə iştirak
etməli olduqlarını söylədi. Nazir sınaq
imtahanları ilə əlaqədar ictimaiyyət arasında
maarifləndirmə işlərinin gücləndirilməsini
də vacib saydı. İclasda Misir Mərdanov növbəti sınaq
imtahanın vaxtını da elan etdi.
Məlumat verdi ki, imtahanları mərkəzləşdirilmiş
qaydada test üsulu ilə verəcək XI sinif şagirdləri
üçün növbəti sınaq imtahanı aprelin 27-də aparılacaq.
Mərkəzləşdirilmiş buraxılış
imtahanları isə iyunun 6-da keçiriləcək. Nazir
hər iki imtahana ciddi hazırlıq işlərinin aparılması
üçün nazirliyin müvafiq şöbəsinə və Bakı
Şəhəri üzrə Təhsil İdarəsinə göstərişlərini
verdi. Nazir habelə ibtidai təhsil
pilləsindən əsas təhsil pilləsinə keçid
zamanı ana dili və riyaziyyatdan, IX sinifdən X-ya keçid
zamanı isə əsas fənlərdən imtahanlar aparılmasının
nəzərdə tutulduğunu söylədi. Təhsil naziri çıxışının
sonunda zalda əyləşən qadın təhsil işçilərini,
onların şəxsində təhsil sistemində çalışan
bütün qadınları 8 Mart Beynəlxalq Qadınlar Günü münasibəti
ilə təbrik etdi. Kollegiya ümumtəhsil
məktəblərində İKT-nin tətbiqi
vəziyyətinin təkrar monitorinqinin
nəticələrini nəzərə almaqla qərar
qəbul etdi. Yusif ƏLİYEV
Təhsil
Nazirliyində Boloniya prosesinə dair seminar keçirildi Seminarda
həmin prosesə ilkin qoşulmuş Azərbaycan
Dillər Universitetinin təcrübəsindən, kredit
sisteminin tətbiqi ilə bağlı qarşıya çıxan
problemlərdən söz açıldı Martın
1-də Təhsil Nazirliyinin böyük akt zalında Boloniya
prosesinə qoşulmaqla bağlı ölkəmizin ali
təhsil sistemində görülmüş işlərə və
mövcud problemlərin həlli yollarına həsr olunmuş
seminar keçirildi. Seminarda təhsil naziri Misir Mərdanov, nazir
müavinləri, nazirliyin şöbələrinin və struktur
bölmələrinin rəhbərləri, ali məktəb
rektorları, prorektor və dekanlar, digər şəxslər
iştirak edirdilər. Tədbiri giriş sözü ilə açan
təhsil naziri Misir Mərdanov zala toplaşanları
salamlayıb onları seminarın mövzusu və iş qaydası
ilə tanış etdi. Bildirdi ki, ölkəmizin artıq
üç ildir Boloniya prosesinə qoşulmasına, bu müddət
ərzində Boloniya bəyannaməsinin prinsiplərinin
tətbiqi istiqamətində ali
məktəblərimizdə xeyli işlərin görülməsinə
baxmayaraq, hələ də bir çoxlarının ali
təhsilin modernləşməsində həlledici rol
oynayan Boloniya prosesinin, onun əsasını təşkil
edən kredit sisteminin mahiyyəti haqqında kifayət
qədər bilik və məlumatı yoxdur. Məhz bunu
nəzərə alan Təhsil Nazirliyi həm nazirliyin
mərkəzi aparatında, həm də ali
məktəblərdə bu mövzuda seminarların keçirilməsini,
seminarlarda həmin məsələləri daha yaxşı
bilən mütəxəssislərin silsilə mühazirələr
oxumasını məqsədəuyğun sayıb. Bu baxımdan
ilk seminara yığışdıqlarını deyən
nazir onun məruzəçisini - Azərbaycan Dillər
Universitetinin dekanı, professor Əfqan Abdullayevi tədbir
iştirakçılarına təqdim etdi. Sözü məruzəçiyə verməzdən
öncə təhsil naziri zala toplaşanların diqqətini
bir vacib məsələyə yönəltdi. Qeyd etdi ki, ölkə
Prezidenti cənab İlham Əliyevin ali təhsilin inkişafı
ilə bağlı, təxminən, bir ay öncə imzaladığı
sərəncamla Təhsil Nazirliyinə tabeliyində ali
təhsil müəssisələri olan digər qurumlarla
birlikdə Azərbaycan Respublikasının ali təhsil
sistemində islahatlar üzrə Dövlət Proqramının
layihəsini hazırlayıb hökumətə təqdim
etmək tapşırılıb. Həmin vaxtdan bu
sahədə iş aparılır, tərkibində ali
məktəblər olan nazirliklərin nümayəndələrinin
iştirakı ilə işçi qrupu yaradılıb, öz
maddi-texniki bazaları haqqında müəyyən olunmuş
formada məlumat vermək üçün ali
məktəblərə məktub göndərilib. İşçi
qrupu tərəfindən proqramın layihəsi üzərində
aparılan işlərin artıq başa çatdığını
və sənədin ona təqdim olunduğunu söyləyən
Misir Mərdanov burada öz əksini tapmış əsas
istiqamətlərlə seminar iştirakçılarını
tanış etdi. Bildirdi ki, sənədi hazırlayan mütəxəssislər
onun 8 istiqamətdə olmasını zəruri saymışlar
ki, bunlara da ali təhsilin normativ hüquqi bazası, ali
təhsilin məzmunu və təlim texnologiyaları, ali
təhsilin strukturu və idarə olunması, ali
təhsildə keyfiyyətin təmin olunması, ali
təhsildə kadr hazırlığı, elmi-tədqiqat
işləri, təhsilin maddi-texniki bazası, ali
təhsilin iqtisadiyyatı daxildir. Həmin
istiqamətlərin hər biri haqqında qısa
məlumat verən nazir layihəylə tanış olmaq,
rəy və təkliflərini bildirmək üçün
sənədin ali məktəblərə göndəriləcəyini,
alınan təkliflər əsasında işlənib
təkmilləşdirildikdən sonra onun hökumətə
təqdim olunacağını bildirdi. Təhsil naziri Misir Mərdanov giriş sözündə
seminar iştirakçılarının diqqətini bir fakta da
yönəldərək dedi ki, ölkə
Prezidentinin müvafiq sərəncamı ilə təsdiq
olunmuş Azərbaycan gənclərinin xarici ölkələrdə
təhsili üzrə Dövlət Proqramı çərçivəsində
bu il ilk dəfə olaraq 5 nəfər azərbaycanlı
gənc Koreyaya göndərilib. Onların 5-i də BDU-nun
iqtisadi kibernetika fakültəsinin tələbəsidir.
Azərbaycanlı gənclər Koreyada möhtərəm
Prezidentimizin fəxri doktoru olduğu Kyunq He
Universitetində təhsillərini davam
etdirəcəklər. Sonra söz seminarın məruzəçisi,
professor Əfqan Abdullayevə verildi. Ə.Abdullayev seminar iştirakçıları
qarşısında Boloniya prosesinin və onun əsasını
təşkil edən kredit sisteminin mahiyyətinə,
Azərbaycan Dillər Universitetində kredit sisteminin
tətbiqi yönündə görülmüş işlərə, bu
prosesdə rast gəlinən problemlərə həsr
olunmuş geniş məruzə-təqdimatla çıxış
etdi. çıxışına xalqımızın
ümummilli lideri Heydər Əliyevin dediyi
"Cəmiyyətin gələcək tərəqqisi bir
çox cəhətdən indi gənclərimizə nəyi
və necə öyrətməyimizdən asılı olacaqdır"
müdrik sözləri ilə başlayan Ə.Abdullayev həmin
fikirdə Boloniya prosesinin mahiyyətinin öz əksini tapdığını,
bu prosesin məhz nəyi və necə öyrətmək
probleminin uğurlu həlli yolu olduğunu bildirib, ölkəmizin
Boloniya bəyannaməsinə qoşulmasını ali
təhsilin daha da inkişaf etdirilməsi, Avropa təhsil
məkanına inteqrasiyası zərurətindən
irəli gəldiyini vurğuladı. çalışdığı Azərbaycan
Dillər Universitetində bu istiqamətdə görülmüş
işlərdən danışan məruzəçi 2005-ci
ildə Avropaşünaslıq fakültəsi ilə başlanan
Boloniya prosesinə keçidin artıq başa çatdığını,
bu ali təhsil ocağının bütün fakültə və
ixtisaslarında kredit sisteminin tətbiq olunduğunu söylədi. Ə.Abdullayev məruzə-təqdimatında
Boloniya prosesinə gedən yol, bu prosesdə qəbul olunmuş
və ona qoşulan bütün ölkələr üçün həyata keçirilməsi
vacib olan prinsiplər haqqında da geniş məlumat verdi,
Boloniya prosesinin əsasını təşkil edən
kredit sisteminin, "kredit" və "kredit sistemi"
anlayışlarının mahiyyətini açıqladı. Dünyada
iki kredit sisteminin - ABŞ kredit sistemi və Avropa kredit
transfer sisteminin mövcud olduğunu deyən məruzəçi
hər iki sistem, onların fərqli və oxşar
cəhətləri ilə seminar iştirakçılarını
tanış etdi. Daha sonra Ə.Abdullayev qloballaşan dünyamızda
kredit sisteminin tələbələrə verdiyi fayda
və imkanlardan, tədris planlarında onlara təklif
olunan fənlərin bölgüsündən söz açdı, bu
sistemdə tələbələrin fənn seçiminə, müstəqil
işlərinə daha çox yer ayrıldığını
bildirdi. Məruzə-təqdimatda Boloniya
prosesinə qoşulmazdan öncə Azərbaycan Dillər
Universitetində həyata keçirilmiş
tədbirlərdən də bəhs olundu, aparılmış
hazırlıq işləri sadalandı. Məruzəçi bu
məqsədlə struktur rəhbərləri üçün
treninqlərin, kredit sistemi ilə oxuyan
tələbələrlə işləyəcək
professor-müəllim heyəti üçün nümunə
dərslərinin təşkil olunduğunu, ixtisaslaşmalar
üzrə yeni tədris proqramlarının hazırlandığını,
yeni tələblərə cavab verən dərsliklər
alındığını və yazıldığını,
Avropa kredit transfer sistemi haqqında müəllimlər,
tələbələr və valideynlər üçün yaddaş
kitabçaları çap olunduğunu, birinci kurs
tələbələri və onların valideynləri
üçün həftəsonu mühazirələr təşkil
edildiyini söylədi. Ə.Adbullayev habelə
məruzə-təqdimatda Boloniya prosesinin
tələblərinin həyata keçirilməsində qarşılaşdıqları
çətinliklərdən də bəhs etdi. Boloniya sisteminin
müvəffəqiyyətlə tətbiqi üçün yeni normativ hüquqi
sənədlər hazırlamaq lazım gəldiyini
deyən məruzəçi mövcud akademik sənədlərin
(təlimat və əmrlərin) bu sistemin
tələblərinə uyğun gəlməməsini,
professor-müəllim heyətinin heç də hamısının
bu sistemi qəbul etmək istəməməsini, yaxud buna
hazır olmamasını, maarifləndirmə işlərinin
lazımi səviyyədə aparılmamasını,
valideynlərin əksəriyyətinin hələ də bu
sistem haqqında məlumatsız olmasını və s.
belə çətinlik və problemlərə misal olaraq qeyd
etdi və onların aradan qaldırılması, bütövlükdə
Boloniya prosesinə qoşulmanın, kredit sisteminin
tətbiqinin daha uğurlu və problemsiz getməsi üçün
bəzi təkliflərini irəli sürdü. Qeyd etdi ki, yeni
qəbul olunacaq Təhsil Qanununda Boloniya prosesinə qoşulmaqla
əlaqədar müəyyən müddəaların öz
əksini tapmasını, bu sahədə bir universitetin
pilot olaraq seçilməsi və bəzi
məsələlərin həllində ona müstəqillik
verilməsini, müəllimlərin akademik yüklərinin illik
deyil, semestrlik müəyyənləşdirilməsini,
semestrin nəticələrinə görə kredit qazana
bilməyən tələbələrə növbəti
semestrdə kəsildikləri fəndən dərslərin
təşkil olunmasını, hər il 8-10 həftəlik
könüllülük prinsipinə əsaslanan "İntensiv yay
sessiyası" təşkil olunmasını,
tələbənin biliyinin qiymətləndirilməsinin çoxballı
sistemi haqqında əsasnaməyə yenidən baxılmasını
və s. məqsədəuyğun saydı. Y.ƏLİYEV |