|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Ukrayna Prezidenti Bakı Slavyan Universitetinin müəllim və tələbələri ilə görüşüb Ukrayna
Prezidenti Viktor Yuşşenko və xanımı Katerina Yuşşenko
aprelin 10-da Bakı Slavyan Universitetində (BSU) olmuşlar. Xatırladaq ki, Ukrayna ilə Azərbaycan
arasında əməkdaşlığın inkişafında,
xalqlarımızın dostluq münasibətlərinin möhkəmlənməsində,
elm, təhsil və mədəniyyət sahəsində
əlaqələrin genişlənməsi və
dərinləşməsində görkəmli
xidmətlərinə görə Ukrayna Prezidenti Viktor Yuşşenko
2006-cı ildə BSU-nun fəxri doktoru adına layiq görülmüşdür.
Ukrayna Prezidentini və xanımını
burada səmimiyyətlə, gül-çiçəklə qarşıladılar.
Ukrayna dövlətinin başçısı
əvvəlcə Taras Şevçenko adına Ukrayna dili
linqafon kabinetinin açılışında iştirak etdi. Sonra Prezident Yuşşenko və xanımı
Ukrayna Mədəniyyət Mərkəzi və Ukrayna bazar
günü məktəbi ilə tanış oldular.
Məktəbin dinləyiciləri və BSU-da ukraynaşünaslıq
ixtisası üzrə təhsil alan tələbələr
ali qonağı və xanımını Ukrayna dilində
səmimiyyətlə salamladılar. Prezident Viktor Yuşşenkoya məlumat
verildi ki, 2001-ci ildə Ukrayna Ali Radasının sədri
İvan Plyuş tərəfindən açılan Ukrayna
Mədəniyyət Mərkəzi hazırda
universitetdə fəaliyyət göstərən
mərkəzlərdən birincisidir. Onun nəzdindəki
Ukrayna bazar günü məktəbi isə respublikamızda ilk
belə məktəbdir. Daha sonra Prezident Viktor Yuşşenko
universitetin elmi şurasının üzvləri, professor-müəllim
heyəti və tələbələri ilə görüşdü.
BSU-nun rektoru, AMEA-nın müxbir üzvü Kamal
Abdullayev ali qonağı universitetin professor-müəllim
heyəti və tələbələri adından salamladı.
Rektor dedi ki, Ukrayna Prezidentini Azərbaycanda
müdrik, iradəli siyasətçi, ölkəmizin böyük dostu kimi
tanıyırlar. Elmi şuranın üzvləri və
universitetin bütün kollektivi əmindir ki, BSU-nun fəxri
doktoru Viktor Yuşşenko ölkələrimizin
elmi-mədəni əlaqələrinin daha da genişlənməsinə,
BSU ilə Ukraynanın ali təhsil müəssisələri
arasında əməkdaşlığın dərinləşməsi
üçün əlavə imkanlar yaradılmasına, Bakının
bu təhsil ocağında ukraynaşünas mütəxəssislər
hazırlanmasının keyfiyyətinin yaxşılaşmasına
kömək edəcəkdir. K.Abdullayev vurğuladı ki, ümummilli lider Heydər Əliyevin fərmanı ilə
2000-ci ildə yaradılan Bakı Slavyan Universiteti
Azərbaycan ilə Ukrayna arasında mənəvi, elmi,
mədəni əlaqələrin inkişafında xüsusi
rol oynayır. BSU-da ukraynaşünaslıq həm bakalavr,
həm də magistr pillələrində tədris olunur.
Məzunlar Azərbaycanın müxtəlif təşkilatlarında
uğurla çalışır, bir çoxları
Ukrayna-Azərbaycan əlaqələrinə dair elmi araşdırmalar
aparırlar. Prezident Viktor Yuşşenko Azərbaycana
rəsmi səfərini, aparılmış danışıqları
yüksək qiymətləndirərək bildirdi ki,
ikitərəfli münasibətlərimiz dinamik inkişaf
edir. Konkret iqtisadi layihələrin həyata keçirilməsi
də daxil olmaqla, bizi əla perspektivlər gözləyir. Ukrayna rəhbəri Azərbaycan xalqını
qazandığı uğurlar münasibətilə təbrik
etdi və əminliklə dedi ki, Ukrayna dövlətinin və
xalqının simasında Azərbaycan xalqının
həmişə dostları olacaqdır. O,
Ermənistan-Azərbaycan, Dağlıq Qarabağ
məsələsinə toxunaraq bəyan etdi ki, Ukrayna münaqişənin
yalnız Azərbaycanın ərazi bütövlüyü çərçivəsində
həll olunmasını dəstəkləyir. Prezident Viktor Yuşşenko Azərbaycan
paytaxtında onun ölkəsinin, xalqının tarixini, dilini
və mədəniyyətini öyrənən universitetin
fəaliyyət göstərməsinin Ukrayna üçün çox mühüm
olduğunu vurğuladı, BSU-nun
tələbələrinə və professor-müəllim
heyətinə yeni uğurlar, dost Azərbaycan xalqına
isə sülh və tərəqqi arzuladı. Görüşdə iştirak edən
Azərbaycan Baş nazirinin müavini Elçin Əfəndiyev
BSU-nun avropaşünaslıq kafedrasının dosenti Habil
Məmmədovun "Müasir Ukrayna tarixi" kitabını
və Taras Şevçenkonun Azərbaycan dilində nəşr
olunmuş seçilmiş əsərlərini Ukrayna dövlətinin
başçısına təqdim etdi. BSU-nun rektoru Kamal Abdullayevə Nizami
Gəncəvinin "Leyli və Məcnun" poemasının
Ukrayna və Azərbaycan dillərində yubiley nəşri
təqdim olundu. Ukrayna Prezidenti universitet
tələbələrinin suallarına cavab verdi. AzərTAc |