Əli İbrahimov 2024-2025-ci tədris ilində III ixtisas qrupu üzrə keçirilən qəbul imtahanında maksimum nəticə göstərən iki abituriyentdən biridir. O həm də builki Respublika Fənn Olimpiadasında Azərbaycan dili fənni üzrə gümüş medal qazanıb.

Uzun müddət çəkdiyi əziyyət hesabına qazandığı uğurunu indi daha geniş auditoriya ilə paylaşan Əli “Azərbaycan müəllimi” ilə də həmsöhbət olub.

Məktəb dərsliklərindən başlanan uğurlu yol

Qazax şəhəri S. Əfəndiyev adına 1 nömrəli tam orta məktəbin 11-ci sinif şagirdi olan Əli yalnız imtahanlara hazırlaşmaqla kifayətlənməyib. O, bu prosesi böyük məsuliyyət və fərdi yanaşma ilə həyata keçirərək öz uğur yolunu özü formalaşdırıb. Məktəb dərslərinə və dərsliklərinə xüsusi önəm verib, onları yalnız mənbə kimi deyil, anlayışların əsaslandığı baza kimi qiymətləndirib. 

“Orta məktəb dərsliklərindən daha çox istifadə edirdim. Eyni zamanda, video izahları dinləyir, test vəsaitlərindən faydalanırdım”, – deyə Əli bildirir.

Əli bütün fənlərə bərabər vaxt ayırmağa çalışsa da, çətinlik çəkdiyi mövzuların üzərində daha çox dayanıb. O, təkrarın biliklərin möhkəmlənməsində əsas rol oynadığını vurğulayır: “Zəif bildiyim mövzuları dəfələrlə təkrar edirdim. Bu mənə çox kömək etdi. Təkrarlar öyrənmənin ən vacib hissəsidir. Test etməzdən əvvəl də davamlı oxumaq, təkrar etmək vacibdir”.

Əli düşünür ki, sınaq imtahanlarsız hazırlıq prosesini tamamlanmış saymaq olmaz: “Sınaq imtahanları zəif tərəflərimi üzə çıxarırdı və bundan sonra həmin sahələrə daha çox vaxt ayırırdım”.

“Blok sualları daha düşündürücü idi”

Əli İbrahimov buraxılış imtahanında 290 bal toplayıb. Onun fikrincə, bu mərhələ təkcə bilikləri deyil, həm də məntiqi təfəkkür və analitik bacarığı ölçmək məqsədi daşıyır: “Blok imtahanının sualları daha düşündürücü idi. Bu da başadüşüləndir, çünki blok imtahanları ali məktəblərə qəbulda daha böyük rol oynayır və şagirdlər arasında hazırlıq səviyyəsi daha yüksək olanları seçmək məqsədi güdür”.

İstirahət də vacibdir...

Əli gündəlik cədvəl tərtib etməsə də, istirahəti unutmayıb: “Hər bazar yarım gün dincəlirdim. Yorğun olanda özümə vaxt ayırırdım. Bəzən dərslərimə davam etmək üçün hobbilərimə də vaxt ayırmağım vacib olurdu”.

Hüquqşünas olmaq arzusu ilə yola çıxıb

Əli gələcək planlarından danışaraq hüquq sahəsinə olan marağını vurğulayır: “Hədəfim hüquq təhsili alıb ölkəmə layiqli hüquqşünas kimi xidmət etməkdir”. 

O, eyni zamanda, xaricdə təhsil alaraq beynəlxalq təcrübə qazanmaq arzusundadır.

Əli uğur qazanan şagirdləri digərlərindən fərqləndirən əsas xüsusiyyətlərə də toxunur: “Uğurlu şagirdlərdə bir xüsusiyyət var: məqsədlərinin mahiyyətini anlayır və bu məqsəd uğrunda davamlı çalışırlar. Bu, uğurun əsas amilidir”.