Milli Aviasiya Akademiyası (MAA) ilə Ədliyyə Nazirliyi arasında birgə əməkdaşlıq haqqında Memorandum imzalanıb. Memorandumu Akademiyanın rektoru, akademik Arif Paşayev və ədliyyə naziri Fərid Əhmədov imzalayıblar.

Akademiyadan “Azərbaycan müəllimi”nə bildirilib ki, sazişdə MAA-nın hüquqşünaslıq ixtisası üzrə təhsil alanların Ədliyyə Nazirliyinin struktur bölmələrində təcrübə keçmələri, könüllülər qismində işlə təmin olunmaları və digər məsələlər qeyd edilib.

Görüşdə akademik Arif Paşayev ilə nazir Fərid Əhmədov tərəfindən MAA-nın İqtisadiyyat və hüquq fakültəsinin il ərzində bilik və bacarıqları ilə fərqlənmiş, milli, həmçinin beynəlxalq yarışlarda qalib olmuş tələbələri - Yunanıstanın paytaxtı Afina şəhərində keçirilən XVI Layden-Sarin Məhkəmə Müsabiqəsində (“Leiden-Sarin International Air Law Moot Court Competition”) yarımfinala yüksəlmiş Amal Qorxmaz oğlu Əhmədov, İlahə Azər qızı Səmədova və Rəsul Rövşən oğlu Əliyev, Azərbaycan Respublikasının Ali Məhkəməsi, Məhkəmə-Hüquq Şurası və Vəkillər Kollegiyasının tərəfdaşlığı ilə "Femida Könüllüləri" Təşkilatı tərəfindən hazırlanmış "DİVAN" Milli Məhkəmə Simulyasiyasında l yerə layiq görülmüş Həmayil Qismət qızı Sadıqova, İqtisadiyyat Nazirliyi yanında Dövlət Vergi Xidməti tərəfindən müasir vergi orqanlarının yaradılmasının 25 illiyinə həsr olunmuş "Vergilər" mövzusunda ümumrespublika olimpiadasında III yerə layiq görülmüş Həliməxatun Elnur qızı İsmayılova, Amal Qorxmaz oğlu Əhmədov, İlahə Azər qızı Səmədova, Rəsul Rövşən oğlu Əliyev və Həmayil Qismət qızı Sadıqova təşəkkürnamələrlə təltif ediliblər.