Bu gün Qarabağ Universitetində Azərbaycan Milli Elmlər Akademiyasının (AMEA) 80 illik yubileyinə həsr olunmuş “Azərbaycan Milli Elmlər Akademiyasında Qarabağnamə ənənəsi və müasir dövr” mövzusunda ilk elmi konfrans keçirilib. Tədbir Elm və Təhsil Nazirliyi və AMEA-nın birgə təşkilatçılığı ilə baş tutub.

“Azərbaycan müəllimi”nin məlumatına görə, konfransın açılış mərasimində elm və təhsil naziri Emin Əmrullayev, AMEA-nın prezidenti, akademik İsa Həbibbəyli və Qarabağ Universitetinin rektoru Şahin Bayramov çıxış ediblər. Onlar yubileyin əhəmiyyətindən bəhs edib, Qarabağda elmi mühitin bərpası və inkişafı istiqamətində görülən işləri diqqətə çatdırıblar.

Tədbir çərçivəsində AMEA tərəfindən Qarabağ Universitetinin kitabxanasına 1000 nüsxə kitab hədiyyə olunub.

Konfransın elmi hissəsində AMEA-nın bir sıra institut rəhbərləri məruzələrlə çıxış ediblər. AMEA-nın Abbasqulu Ağa Bakıxanov adına Tarix və Etnologiya İnstitutunun direktoru, professor Kərim Şükürov “Azərbaycan tarixində Qarabağnamələr və yeni dövrün Qarabağnaməsinin yaradılmasında Milli Elmlər Akademiyasının missiyası” mövzusunda çıxış edərək Qarabağnamə ənənəsinin elmi baxımdan davam etdirilməsinin əhəmiyyətini vurğulayıb.

Arxeologiya və Antropologiya İnstitutunun direktoru Fərhad Quliyev Qarabağ və Şərqi Zəngəzur ərazilərində aparılan arxeoloji tədqiqatların nəticələrindən danışıb.

Nəsimi adına Dilçilik İnstitutunun direktoru Nadir Məmmədli isə Qarabağda ermənilər tərəfindən saxtalaşdırılmış Azərbaycan toponimlərinin bərpa olunmasının elmi əsaslarını diqqətə çatdırıb.

Folklor İnstitutunun direktoru Hikmət Quliyev “Qarabağ folkloru: Böyük Qayıdış kontekstində folklor yaddaşının reaktuallaşdırılması” mövzusunda məruzə ilə çıxış edərək bölgənin zəngin folklor irsinin yenidən elmi dövriyyəyə daxil edilməsinin aktuallığını qeyd edib.

Bununla yanaşı, gün ərzində universitetdə paralel mühazirələr təşkil olunub. Filologiya, tarix, kimya, biologiya, informatika, fizika-energetika, fəlsəfə, sənətşünaslıq və ekologiya sahələrini əhatə edən mühazirələrdə ölkənin tanınmış alimləri çıxış ediblər.

Konfrans Qarabağda elmi həyatın canlanması və Böyük Qayıdış prosesində elmin strateji rolu baxımından mühüm əhəmiyyət daşıyıb.