28 iyul 2025-ci il tarixində Qərbi Azərbaycan İcmasının Naxçıvan MR üzrə nümayəndəliyinin təşkilatçılığı ilə Naxçıvan şəhərində “Qərbi Azərbaycan İrsi” kitabının I cildinin yekun təqdimat mərasimi olub. 

"Azərbaycan müəllimi" xəbər verir ki, tədbiri giriş sözü ilə açan Naxçıvan Dövlət Universitetinin rektoru, Qərbi Azərbaycan İcmasının Naxçıvan Muxtar Respublikası üzrə nümayəndəsi Elbrus İsayev nəşrin tarixi yaddaşın qorunmasında və akademik araşdırmalara əsaslı töhfə verməsindəki əvəzsiz rolundan söz açıb.

O bildirib ki, beş hesabatdan ibarət olması nəzərdə tutulan kitabın I cildində 1991-ci ilə qədər Qərbi Azərbaycan ərazisində mövcud olmuş, hazırda isə yalnız xarabalıqları qalmış 700-dən çox azərbaycanlı qəbiristanlığının 201-nin əvvəlki və indiki vəziyyətindən bəhs edilir. Kitabda həmçinin hərbi-topoqrafik xəritələrdən, peyk təsvirlərindən istifadə edilib və müasir metodoloji təhlillərlə ərazidə mövcud olan qəbiristanlıqların monitorinqi aparılıb. Ən ciddi milli ideoloji istiqamətlərdən biri olan Qərbi Azərbaycan irsinin tədqiqat toplusu olan kitabın üç dildə nəşri isə onun beynəlxalq əhəmiyyətini daha da artırır.

Naxçıvan MR ədliyyə nazirinin müavini, nazir vəzifəsini müvəqqəti icra edən Hüseyn Səfərov çıxış edərək nəşrin mahiyyəti və məqsədindən bəhs edib.
Naxçıvan Muxtar Respublikasının İnsan Hüquqları üzrə Müvəkkili (Ombudsman) Günay Rzayeva qeyd edib ki, təqdimatı keçirilən kitab Qərbi azərbaycanlılara qarşı etnik təmizləmə siyasətini, insan hüquqları prinsiplərinin, beynəlxalq hüquq normalarının və konvensiyaların ciddi və sistematik pozulmasını bir daha faktlarla sübut edir. 

Naxçıvan Muxtar Respublika Prokurorluğunun şöbə rəisi, baş ədliyyə müşaviri Faiq Səfərov isə bildirib ki, Qərbi Azərbaycan irsinin yaşadılması və erməni cəlladlarının törətdiyi maddi və mənəvi ziyanın ödənilməsi tarixi zərurətdir. O əlavə edib ki, Qərbi Azərbaycana qayıdış və tarixi Azərbaycan torpaqlarında mədəni irsimizin bərpa edilməsi də mütləq ki, reallaşacaqdır.

Sonda “Qərbi Azərbaycan İrsi” silsilə nəşri ilə bağlı hazırlanmış videoçarx nümayiş olunub.

Qeyd edək ki, bundan öncə “Qərbi Azərbaycan irsi” kitabının birinci cildinin  ilkin təqdimatı Naxçıvan şəhərində olub, daha sonra Ordubad,  Kəngərli, Babək, Sədərək, Şərur, Şahbuz və Culfa rayonlarında  kitabın geniş ictimaiyyətə təqdimatı keçirilib. Rayonlarda keçirilən təqdimat mərasimlərində Qərbi Azərbaycan əsilli vətəndaşların iştirakı təmin olunub. Elbrus İsayev Qərbi Azərbaycandan olan soydaşlarımıza tədqiqatçılarla birgə işləməyə, şəxsi arxivlərində olan materialların və xatirələrin nəşrində aktiv olmağa çağırıb. NDU-da yaradılmış Qərbi Azərbaycan Araşdırma Mərkəzi ilə sıx əməkdaşlığa dəvət edib.