Elm və Təhsil Nazirliyinin 2024-cü ildə elan etdiyi “Təhsildə könüllü fəaliyyətin təşkili” qrant müsabiqəsinin qalib layihələri artıq fəaliyyətləri ilə diqqət çəkir. Qaliblər arasında Azərbaycanlı Tələbələr və Məzunlar Platformasının “Birlikdən biliyə” və “Bir Könüllü” Tələbələrin Əməkdaşlığı İctimai Birliyinin “Məktəblilər üçün yaşıl gələcək təşəbbüsü” layihələri xüsusilə seçilir.

“Əsas hədəf tələbə və müəllimlərin praktik bacarıqlarını gücləndirməsidir”

Azərbaycanlı Tələbələr və Məzunlar Platforması tərəfindən həyata keçirilən “Birlikdən biliyə” layihəsi pedaqoji ixtisaslarda təhsil alan tələbələrin və gənc müəllimlərin inkişafına yönəlib. Layihənin məsul şəxsi Gülüstan Kərimli bildirir ki, əsas məqsəd türk dövlətlərində təhsil almış azərbaycanlı məzunların təcrübəsini gənc müəllim və pedaqoji ixtisaslar üzrə oxuyan tələbələri ilə bölüşmək, iştirakçıların müxtəlif ölkələrin təhsil sistemləri ilə tanışlığını artırmaq və bu biliklərin Azərbaycan təhsil mühitinə inteqrasiyasını təşviq etməkdir: “Layihə Türkiyə, Qazaxıstan, Özbəkistan, Qırğızıstan və Türkmənistan kimi ölkələrin təhsil sistemlərini əhatə edir. Əsas hədəf tələbə və müəllimlərin təcrübə mübadiləsi vasitəsilə praktik bacarıqlarının gücləndirməsidir”.

Gülüstan Kərimlinin sözlərinə görə, layihənin nəticələri birbaşa dərslərin keyfiyyətinə təsir edəcək: “Gənc müəllim və pedaqoji tələbələr burada əldə etdikləri bilik və bacarıqları dərs prosesində tətbiq edəcəklər. Məktəblilər isə dolayısı ilə bu layihənin nəticələrindən faydalanacaqlar. Layihə çərçivəsində təlim və mentorluq proqramları təşkil olunur. Xaricdə təhsil almış azərbaycanlı məzunlar bu prosesdə mühüm rol oynayır, müxtəlif ölkələrin təcrübəsini bölüşərək iştirakçılara yeni yanaşmalar öyrədirlər. Bu həm tələbə-məzun həmrəyliyini gücləndirir, həm də Azərbaycan təhsilinə yeni metodların inteqrasiyasına zəmin yaradır. Təlimlər zamanı gənclər bir-biriləri ilə müzakirələr aparır, ünsiyyət bacarıqlarını inkişaf etdirir, həmçinin beynəlxalq əməkdaşlıq imkanları qazanırlar. Eyni zamanda, layihə nəticəsində yaradılacaq şəbəkə gələcəkdə davamlı əməkdaşlıq və bilik mübadiləsinə imkan verəcək”.

Gülüstan Kərimli əlavə edib ki, əldə olunan biliklərin davamlılığı üçün iştirakçılarla mentorluq əlaqəsi davam etdiriləcək: “Layihə materiallarının açıq şəkildə paylaşılması isə digər gənclərin də bu biliklərdən faydalanmasına şərait yaradacaq”.

“Məktəblilərə bu dəyərlər erkən yaşda aşılanarsa, onlar gələcəkdə ekoloji davranışları əsas prinsip kimi qəbul edəcəklər”

“Bir Könüllü” Tələbələrin Əməkdaşlığı İctimai Birliyi tərəfindən icra olunan “Ekoloji maarifləndirmə və dayanıqlı inkişaf: Məktəblilər üçün yaşıl gələcək təşəbbüsü” layihəsi məktəblilər arasında ekoloji bilik və bacarıqların artırılmasını hədəfləyir. Layihənin məsul şəxsi Nemət Rzayev bildirir ki, layihənin əsas məqsədi məktəblilər arasında ekoloji maarifləndirməni gücləndirmək, onların iqlim dəyişiklikləri, ətraf mühitin mühafizəsi və dayanıqlı inkişaf prinsipləri barədə bilik və bacarıqlarını artırmaqdır: “Bu təşəbbüs gənc nəslin məsuliyyətli və ekoloji dəyərlərə sadiq vətəndaş kimi yetişməsinə xidmət edir. Layihənin yaranma ehtiyacı Azərbaycanın son illərdə həyata keçirdiyi genişmiqyaslı ekoloji siyasətlə bağlıdır. Qarabağ və Şərqi Zəngəzurun “Yaşıl enerji zonası” elan edilməsi, alternativ enerji layihələrinin icrası, “Azərbaycan 2030” milli prioritetlərində ekoloji təhlükəsizlik və resursların səmərəli istifadəsi istiqamətlərinin önə çəkilməsi bu təşəbbüsün aktuallığını artırır”.

Nemət Rzayev qeyd edir ki, ekoloji maarifləndirmə sadəcə dərs mövzusu deyil, uşaqların gələcək həyat tərzini müəyyənləşdirən əsas amildir: “Məktəblilərə bu dəyərlər erkən yaşda aşılanarsa, onlar gələcəkdə ailələrində, icmalarında və peşə fəaliyyətlərində də ekoloji davranışları əsas prinsip kimi qəbul edəcəklər. Bu isə bütövlükdə ölkənin ekoloji mədəniyyətinin formalaşmasına xidmət edəcək”.
Layihə çərçivəsində ekoloji biliklərin daha praktik və maraqlı formada çatdırılması planlaşdırılır. İnteraktiv təlimlər, ekoloji ekskursiyalar, yay düşərgələri, debat sessiyaları və oyunlar təşkil olunacaq. Məktəblilər tullantıların çeşidlənməsi, su və enerjiyə qənaət, təkrar emal prosesi ilə tanış olacaqlar.

Nemət Rzayev əlavə edib ki, təşəbbüsün uğuru məktəblərin və müəllimlərin fəal iştirakı ilə birbaşa bağlıdır. Bu səbəbdən müəllimlər üçün də xüsusi təlimlər nəzərdə tutulub ki, onlar öyrəndiklərini davamlı şəkildə dərs prosesinə inteqrasiya edə bilsinlər: “Məktəblər və müəllimlər bu təşəbbüsün ən mühüm dayaqlarıdır. Onlar şagirdlərin ekoloji fəaliyyətlərə cəlb olunmasına şərait yaradır, ekoloji biliklərin yalnız layihə çərçivəsində deyil, davamlı olaraq məktəb mühitində yaşamasını təmin edirlər”.