|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Azərbaycan müəllimlərinin qurultayları tarixindən Xəbər verdiyimiz kimi, bu il sentyabrın
ikinci ongünlüyündə Azərbaycan Respublikası müəllimlərinin
XIII qurultayı keçiriləcək. Yaradılmış
Təşkilat Komitəsi bu tarixi hadisə ilə bağlı
geniş miqyasda iş görməkdədir. Bu sahədə
reallaşdırılmış işlərdən biri müəllimlər
qurultaylarını əks etdirən tarixi-xronoloji,
stenoqrafik-statistik materialları, fotoları əks
etdirən toplu-kitabın (705 səhifəlik)
araya-ərsəyə gətirilməsidir. Buraxılışa
məsul respublika təhsil naziri, professor, əməkdar elm
xadimi Misir Mərdanovdur. Oxucuların maraq və ehtiyacını
nəzərə alaraq keçirilmiş ali məclislərin gündəlikləri
ilə bağlı yığcam məlumatları dərc
edirik. I
qurultayın gündəliyindən Hər bir tarixi hadisənin bu və ya
digər xalqın həyatında müəyyən müsbət
təsiri olur, izi qalır. Bu mənada çar Rusiyasını
silkələyən 1905-ci il inqilabı imperiyada birləşdirilmiş
xalqların maarifinə də təsirsiz qalmadı.
Belə ki, xalq maarifinin yerli əhalinin idarəsinə
verilməsi, üçillik ibtidai məktəb həcmində ümumi
icbari təhsilin həyata keçirilməsi; kişilərlə
bərabər qadınlara da təhsil hüququnun verilməsi;
tədrisin hər bir xalqın öz ana dilində aparılması;
maddi vəziyyətini yaxşılaşdırmaqla xalq müəllimləri
hazırlığının təkmilləşdirilməsi
və s. tələblər irəli sürüldü. Rusiya müsəlmanlarının I və II
qurultaylarının keçirilməsi azərbaycanlı müəllimlərin
bir toplum olaraq birləşməsinə, pulsuz ibtidai
təhsil, xüsusi müəllimlər seminariyasının açılmasıE
kimi tələblərin irəli sürülməsinə
sosial-tarixi şərait yaratdı. Bunların müzakirəsi
və həlli ilə bağlı qurultay keçirilməsi
zərurəti ortaya çıxdı. 1906-cı ilin 15
avqustunda başlayıb 30-na kimi davam etmiş I qurultayın
məramnaməsi (proqramı) "Dəbistan" jurnalının
1906-cı il 8-ci nömrəsində dərc edildi. Qafqaz müsəlman
müəllimləri məclisinin gündəliyi aşağıdakı
məzmunda olmuşdur: 1. Hal-hazırda bulunan proqramları
nəzərdən keçirib təqazayi-zəmanəyə görə
təzədən proqram tərtib etmək. 2. Təzə tərtib olunan proqramlara müvafiq
kitablar təyin və təlif etmək (bu niyyətlə müəllimlər
komissiyası məclisdən müqəddəm islam
mərkəzlərindən ibtidai məktəblərdə
lazım olan kitabları yazdırıb
gətirdəcəkdir). 3. Oxumaq və yazmaq üsulunu asanlaşdırmaq
üçün ümumi bir üsuli - tədris və təlim əxz
etmək. 4. Kənd müəllimlərinin əhval
və güzəranlarına dair məsələlərə
baxmaq. 5. Darülmüəllimin (seminariya) proqramını
müzakirə edib və zamanın tələbinə görə
təkmilləşməsini tələb etmək. 6. üzvlər tərəfindən təqdim
olunan məsələləri məclisdə həll
etmək. Komissiyanın sədri N.Nərimanov, üzvləri
H.B.Məlikov, Ə.Cəfərov, Ə.Həsənov,
katib Y.Əfəndiyev seçilmişdi. Qurultaya hazırlıq hələ may ayından
başlamış, bu məqsədlə "Nicat"
qiraətxanasında toplantı keçirilmişdi. Qurultayın
iclaslarında ciddi məsələlər müzakirə
olunmuşdu. Bunlardan biri ana dili təlimi ilə bağlı
idi. Bu barədə Qori Müəllimlər Seminariyasının
müəllimi F.B.Köçərli geniş məlumat vermişdi. Qurultayda orta məktəblərin sayının
artırılması qərara alınmış; müəllim
hazırlığının yaxşılaşdırılması
zəruri sayılmış; yaşlılar üçün axşam
məktəbləri yaradılması problemi müzakirə
olunmuşdu... F.B.Köçərli "İrşad"
qəzetində (1906, N 202) dərc olunmuş "Müəllimlər
ictimainə" (ictimai - ərəb sözüdür, aşağıdakı
mənaları bildirir: 1) bir yerə toplaşma, yığılma;
2) bir məclis və ya
heyətin toplanması) məqaləsində qurultayın
əhəmiyyətini şərh etmişdi. Azərbaycan maarifi və təhsili
tarixində pedaqoji fəaliyyətlə məşğul
olan insanların ilk qurultayı 1905-ci ilin 15 avqustunda, genişmiqyaslı
hazırlıq işləri aparıldıqdan sonra, Bakıda
başlamış, çoxsaylı iclaslarda dövr və
gələcək üçün böyük əhəmiyyəti olan
məsələlər müzakirə edilmiş, qərarlar
qəbul olunmuşdur. Qurultayın son iclasında qəbul
olunmuş qərarları həyata keçirmək üçün nümayəndələrin
tərkibindən seçilmiş şəxslərdən
ibarət daimi komissiya yaradılmışdı. İclasda
həmçinin ikinci müəllimlər qurultayını 1907-ci
ilin yayında Gəncədə keçirmək qərara alınmışdı. II
qurultayın gündəliyindən Azərbaycan müəllimlərinin birinci
qurultayının qərarı üzrə II qurultay 1907-ci
ilin yayında Gəncədə keçirilməli idi. Lakin bu
ali məclis Gəncədə deyil, yenə də Bakıda,
avqustun 25-də öz işinə başlayıb. "Füyuzat" jurnalının 1907-ci il 30
və 31-ci nömrələrində dərc olunmuş
materiallardan aydın olur ki, qurultay boyu on bir inqad (yığıncaq)
keçirilib. Bu qurultayda H.B.Zərdabi və N.Nərimanov
iştirak etməyiblər. Qurultayda əsas yer ruhani
məktəblərinin işini nizama salmağa verilmişdi.
İlahiyyat dərslərinin üsuli-cədidlə aparılması
üçün mollalara pedaqoji kurs açmaq məsələsi qaldırılmış,
ərəb əlifbasının islahı təklif olunmuş
(F.Ağayev, S.B.Axundov və A.B.Əfəndiyevin təklifi
panislamistlər tərəfindən etirazla qarşılanıb),
ibtidai qızlar məktəbi üçün ümumi və müntəzəm
proqram tərtibi Mahmudbəyova tapşırılmış,
Müəllimlər İttifaqının nizamnaməsini
qəbul etmək məsələsi ortaya gətirilmişdi. 25 avqustda başlayıb sentyabrın
5-də başa çatmış qurultayda proqrama aşağıdakı
məsələlər daxil edilmişdi: I. 1906-cı ildə Bakıda çağırılmış
müsəlman müəllimlərinin tərtib etdiyi proqrama
baxmaq. II. Mövcud olan və qurultaya təqdim
ediləcək tatar (Azərbaycan - red.) dili və hesab kitabına
baxmaq. III. Tatar (Azərbaycan - red.) əlifbasının
çatmayan tərəflərinə baxmaqE IV. Tatar kitab dilinin təmrini. V. Tatar dilinin tədris üsulunun işlənilməsi. VI. Müsəlmanlar arasında savadı yaymaq
üçün yol araşdırmaq. İkinci qurultaya sədrliyi Əli bəy Hüseynzadə
etmiş, Mahmud bəy Mahmudbəyov, Süleyman bəy Axundov
sədr müavini, üzeyir bəy Hacıbəyov, Mirzə
Abdulla Talıbzadə və Fərhad Ağayev katib seçilmişlər. İclasların, demək olar ki, çoxuna
Mahmud bəy Mahmudbəyov sədrlik etmiş, ayrı-ayrı
məsələlərlə bağlı komissiya üzvlərinin
çıxışları dinlənilmişdir. |