Nazirliyin fəaliyyət planı müsbət qiymətləndirildi

Fevralın 21-də Avropa Şurası və USAİD-lə birgə təşkil edilən "Azərbaycanın Korrupsiyaya qarşı mübarizə strategiyasına dəstək (AZPAC)" layihəsinin təqdimatı keçirilib.

Tədbirdə Avropa Şurasının uzunmüddətli məsləhətçisi Kventin Rid "AZPAC" layihəsi və onun iş planını təqdim edib, milli strategiyanın həyata keçirilməsi ilə əlaqədar ayrı-ayrı qurumların işini dəyərləndirib. Eyni zamanda Kventin Rid Korrupsiyaya qarşı mübarizə üzrə Milli Strategiyanın icrası istiqamətində Azərbaycan Respublikası Təhsil Nazirliyinin fəaliyyət planını da müsbət qiymətləndirib.

Lerikin Piran kəndində məktəb binasının təməli qoyulub

Lerik rayonunun Piran kəndində 320 şagird yerlik ikimərtəbəli məktəb binasının təməli qoyulub. Heydər Əliyev Fondunun vəsaiti ilə   tikintisinə başlanılan yeni tədris müəssisəsində idman və akt zalları, yeməkxana, kitabxana, həkim və kompüter otaqları, fənn kabinetləri olacaq.

Təməlqoyma mərasimində rayon icra hakimiyyətinin başçısı Rövşən Bağırov, Milli Məclisin deputatı Miri Qənbərov, Dövlət Neft Şirkətinin prezidenti Rövnəq Abdullayev  iştirak ediblər. Müəllim və şagirdlər, kənd sakinləri 40 il əvvəl uyğunlaşdırılmış binada yerləşən orta məktəb üçün yeni binanın inşasına, regionlarda təhsilin inkişafı və onun maddi-texniki bazasının möhkəmləndirilməsinə göstərdiyi qayğıya görə Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevaya minnətdarlıqlarını bildiriblər.