|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
"Ən
yaxşı məktəb", "Ən yaxşı müəllim":
seçim necə olmalıdır?
"İlin
ən yaxşı müəllimi" kim
ola bilər? Məlum olduğu kimi, Respublika Təhsil
Nazirliyi "İlin ən yaxşı məktəbi"
və "İlin ən yaxşı müəllimi"ni müəyyənləşdirməyə
qərar vermişdir. Olduqca əhəmiyyətli
tədbirdir. Tədbirin tam obyektiv şəkildə, hamının
bəyəndiyi formada həyata keçirilməsində
təkcə müəllimlər maraqlı deyil; valideynlər
də, şagirdlər də, bütün təhsil işçiləri
də tədbirin nəticəsini səbirsizliklə gözləməli
olacaqlar. Kim ilin ən yaxşı müəllimi olacaq? İlin
ən yaxşı müəllimi necə müəyyənləşdiriləcək? Suala birmənalı cavab vermək o
qədər də asan iş deyil. Nə üçün? çünki
məktəblərimizdə tədris olunan fənlər
məzmunca bir-birindən xeyli fərqləndiyi kimi, onların
tədrisi metodikaları da eyniyyət təşkil etmir.
Halbuki ilin ən yaxşı müəllimi axtarışında
ortaya fizika müəllimi də, kimya müəllimi də, tarix
müəllimi də, hər hansı digər fənni
tədris edən müəllim də çıxa bilər.
Belə olduğu halda, yenə təbii sual yaranır:
Fənlərin məzmunundakı və tədrisi metodikasındakı
müxtəlifliyi istisna edən və bütün müəllimlərin
iştirakını təmin edən ümumi meyarlar, göstəricilər
müəyyənləşdirmək mümkündürmü?
Fikrimizcə, mümkündür! Belə meyarlar təhsil naziri Misir
Mərdanovun bir əmri ilə dərslik kimi çap olunmuş,
digər əmri ilə bəzi ümumtəhsil
məktəblərində, habelə ixtisasartırma və
yenidənhazırlanma müəssisələrində
tətbiqi vacib hesab edilmiş "Məktəb pedaqogikası"nda
var. Bizcə, pedaqoji prosesin tamlığını
təmin etmək; dərsin təhsilləndirici,
tərbiyələndirici və inkişafetdirici
vəzifələrini vəhdətdə həyata keçirmək;
təlimin vəzifələri ilə strateji
məqsədini uzlaşdırmaq; dərsdə
mənimsənilən milli və ümumbəşəri
dəyərləri dərsdənkənar
tədbirlərlə daha da möhkəmləndirmək; son
zamanlar müşahidə olunan bəzi neqativ hallara qarşı
barışmaz olmaq bu cür meyarlar hesab edilə bilər. Pedaqoji prosesin tamlığının
təmin edilməsi ideyasına nəzər salaq. Bu ideyaya
görə bütövlükdə məktəbin fəaliyyəti, o cümlədən
hər bir müəllimin fəaliyyəti şagirdlərə
yalnız təhsil verməkdən və ya onları yalnız
tərbiyə etməkdən, yaxud onların psixoloji qüvvələrinin
inkişafını təmin etməkdən ibarət olmur;
pedaqoji prosesdə təlim də, tərbiyə də,
təhsil də, psixoloji inkişaf da eyni
dərəcədə diqqət mərkəzində saxlanılır;
çalışılır ki, onlar bir-birini tamamlasın. Bu ümumi ideyanı başa düşən, onu
qəbul edən və öz fənninin tədrisində
nəzərə alan müəllim üç başlıca yaxın
vəzifəni və bir uzaq strateji məqsədi həyata
keçirməli olur. Dərsin həyata keçirməli olduğu yaxın
vəzifələrə diqqət yetirək. Fənnin
xarakterindən, hansı sinifdə təşkil
edildiyindən asılı olmayaraq, müəllim hər bir
dərsdə üç başlıca vəzifə yerinə
yetirməli olur: 1.Proqram üzrə hansısa yeni biliyin, bacarıq
və vərdişin şagirdlər tərəfindən
şüurlu və möhkəm mənimsənilməsini
təmin edir; 2. öyrənilən bilik və bacarıqlar
vasitəsi ilə, dərsin çoxsaylı tərbiyəvi
imkanlarını işə salmaqla şagirdlərin
mənəvi aləmini Azərbaycan xalqının arzuladığı
faydalı keyfiyyətlərlə zənginləşdirir;
3. Biliklərin və mənəvi keyfiyyətlərin
mənimsənilməsi prosesində uğurlu təhsil
üçün zəruri şərt olan diqqətin, hafizənin,
təxəyyülün, təfəkkür tərzlərinin, iradi
keyfiyyətlərin intensiv inkişafına təkan verir. "İlin ən yaxşı müəllimi"ni
səciyyələndirməyə imkan verən meyarlardan
biri də müəllimin dərsdənkənar
tədbirləri ilə əlaqədardır. Belə müəllimin
ətraflı ölçülüb-biçilmiş dərsdənkənar
tədbirləri şagirdlərin dərslərdə qazandıqları
təhsillilik, tərbiyəlilik və psixoloji inkişaf
səviyyəsinin yüksəldilməsinə xidmət edir. Bu cür yaxın vəzifələri
həyata keçirən ilin ən yaxşı müəllimi daim
xatırlayır ki, belə vəzifələr pedaqoji
prosesin uzaq, strateji məqsədinin reallaşdırılmasına
yönəlir. Pedaqoji prosesin strateji məqsədi isə
respublikamızın reallığını
nəzərə alan "Milli pedaqogika"da belə
ifadə olunmuşdur: "Milli və ümumbəşəri
dəyərləri gənc nəslə məqsədyönlü,
planlı və mütəşəkkil aşılamaq yolu
ilə respublikamızın ərazi bütövlüyünü,
sərhədlərinin toxunulmazlığını, dövlət
müstəqilliyini qorumağa, ölkəmizi inkişaf etmiş
demokratik dövlətlər səviyyəsinə qaldırmağa
qadir olan fəal vətəndaşlar yetişdirmək
pedaqoji prosesin strateji məqsədidir". Nəhayət, ilin ən yaxşı müəllimi
son zamanlar bir çox cəhətdən qəbuledilməz hesab
edilən bəzi neqativ hallara qarşı, o cümlədən
repetitorluğa qarşı barışmaz mövqe tutur. Beləliklə, milli pedaqogika baxımından
ilin ən yaxşı müəllimi öz
fəaliyyətində pedaqoji prosesin tamlığını
təmin edir; hər dərsdə təhsilləndirmə,
tərbiyələndirmə və inkişafetdirmə
vəzifələrini vəhdətdə həyata keçirir;
bu vəzifələri dərsdənkənar
tədbirləri ilə daha da möhkəmləndirir;
dərsin və dərsdənkənar tədbirlərin
vəzifələrini pedaqoji prosesin strateji
məqsədinə istiqamətləndirir; təhsildə
neqativ hallara qarşı barışmaz mövqeyi ilə
fərqlənir. Nurəddin KAZIMOV, əməkdar elm xadimi, pedaqoji elmlər doktoru, professor Hikmət Haqverdili (əməkdar müəllim,
İsmayıllı rayonunun Lahıc qəsəbə orta
məktəbinin direktoru): ölkə rəhbəri cənab İlham
Əliyevin "Ən yaxşı məktəb və
ən yaxşı müəllim mükafatlarının təsis
edilməsi haqqında" sərəncamı ürəyimizdəndir.
Sərəncam pedaqoji kollektivdə ciddi müzakirə edilib.
Hamımız birmənalı şəkildə bildiririk
ki, bu sərəncam Azərbaycan təhsilinin inkişafına
xidmət etməklə yanaşı, pedaqoji kadrların
potensial imkanlarının üzə çıxmasına təkan
verəcəkdir. Bu amil də ölkəmizin
gələcəyi olan yüksək intellektli
vətənpərvər gənclərin yetişməsinə
şərait yaradacaqdır. Ən yaxşı məktəbin əlverişli
iş şəraiti olmalı, təlimin müasir texnologiyalarından
və fəal təlim üsullarından məqsədyönlü
istifadə olunmalıdır. Fənn müəllimləri
əsasən ali təhsilli, dayaq
məntəqələrinin işi yaxşı,
məktəb şurasının fəaliyyəti yüksək,
şagird özünüidarəetmə orqanlarının işi
lazımi səviyyədə aparmağa qadir olmalıdır.
Məktəb rəhbərlik tərəfindən elmi şəkildə
idarə olunmalıdır. Son 10 ildə məzunlarının
ali məktəblərə, ali hərbi
məktəblərə və xarici ölkələrin
universitetlərinə qəbulu göstəriciləri, şagirdlərinin
fənn olimpiadalarının respublika turunda və
beynəlxalq olimpiadalarda, digər sərgi, müsabiqə
və yarışlarda nəticələri
nəzərə alınmalıdır. Məktəbin
beynəlxalq əlaqələri, saytı, elektron poçtu
olmalı, müəllimləri son 5 ildə tam şəkildə
ixtisasartırma kurslarından keçməli, müxtəlif
layihələrdə iştirak etməli və qalib
gəlməlidir. Təhsil ocağının tərtibatı
yüksək olmalı, orada məktəbli forması tam
tətbiq edilməlidir. Son 5 ildə məktəbdə
qanunvericilik qaydalarının pozulmasına yol
verilməməlidir. Məhz belə təhsil ocaqları
ən yaxşı məktəb adına layiq görülə
bilər. Yuxarıda göstərilən amillər bizim
təhsil ocağında olduğu üçün tədris müəssisəsinin
pedaqoji şurasında Lahıc qəsəbə orta
məktəbinin "Ən yaxşı məktəb"
müsabiqəsində iştirak etməsi haqqında qərar
qəbul edilmişdir. Mən, şəxsən 120 yaşlı
Lahıc qəsəbə orta məktəbini respublikanın
50 ən yaxşı məktəbi sırasında görmək
arzusundayam və bu ada özümüzü layiq bilirəm. Ən yaxşı müəllim başqalarına
nümunə olmalı, məktəbdə və valideynlər
arasında böyük hörmət qazanmalı,
dərslərində daim fəal təlim metodlarından
yaradıcılıqla istifadə etməli, kompüterlə işləməyi
bacarmalıdır. Yaxşı müəllim həmçinin
"öyrədən" statusu verən sertifikata sahib olmalı,
mətbuatda öz tədris metodikası ilə bağlı çıxışlar
etməli, dərs dediyi şagirdlər fənn olimpiadalarının
müxtəlif turlarında, yarış və müsabiqələrdə
yüksək yer tutmalı, qabaqcıl iş təcrübəsi
öyrənilib rayon və respublika miqyasında yayılmalıdır.
Ən yaxşı müəllim mütəmadi olaraq pedaqoji mühazirələrdə,
konfranslarda çıxış etməlidir. Məhz bu
amillərə sahib olan müəllimlər ən yaxşı
müəllim adına layiq görülə bilərlər. Sədaqət
Məhərrəmova (əməkdar müəllim, Qobustan
rayonunun Ağasəf Qıblı adına
Nərimankənd kənd orta məktəbinin
dil-ədəbiyyat müəllimi): "Ən yaxşı məktəb"
və "Ən yaxşı müəllim" seçimi ilə
əlaqədar onu deyə bilərəm ki, bu
sərəncam ölkə rəhbərinin təhsilə olan
qayğısından irəli gəlmişdir. Prezidentimizin
məlum sərəncamından sonra respublikanın pedaqoji
kadrları arasında bir canlanma yaranmışdır.
Ən yaxşı müəllim savadlı, bacarıqlı,
davranışı ilə başqalarına nümunə olmalı,
dərs dediyi şagirdlərlə isti münasibət qurmaqla
onların yaxın dostu və sirdaşı olmalı,
tədrisi günün tələbləri səviyyəsində
aparmaqla respublikaya layiqli, bilikli və
vətənpərvər gənclər hazırlayıb
tərbiyə etməlidir. Yaxşı müəllim fərdi
yanaşma metodu ilə dərs dediyi şagirdlərin
potensial imkanlarını üzə çıxarıb, onları
gələcək təhsil və ixtisas seçimində
istiqamətləndirməlidir. Əgər müəllim özünü
şagirdə qayğılı dost kimi göstərə
bilərsə, şagirddə özünə qarşı inam
yaradar və şagird çəkinmədən müəllimindən
məsləhət alıb gələcək həyat yolunu
düzgün istiqamətləndirər. Müəllim dərs dediyi
şagirddə fənnə maraq oyatmalı, bilikli və
vətənpərvər gənc kimi yetişməsi
ilə yanaşı, onun nitq mədəniyyətinə xüsusi
fikir verməlidir. Rayon rəhbərliyi məsləhət
bilsə də, "Ən yaxşı müəllim" seçiminə
mən öz namizədliyimi verməmişəm. Fikirləşirəm
ki, məndən də yaxşı müəllimlər var.
Əgər bu ada layiqəmsə, qoy bu seçimi rayon
rəhbərliyi özü etsin. Müəllimlərin yaxşı işləməsi üçün yaxşı məktəblərin də olması daha vacibdir. Yaxşı məktəb günün tələblərinə cavab verməli, lazımi avadanlıqla təmin olunmalı, fənn kabinetləri və laboratoriyaları müasir səviyyədə qurulmalı, savadlı və yüksək intellektual səviyyəyə malik rəhbər tərəfindən idarə edilməlidir. Ən yaxşı təhsil ocaqları ali məktəblərə qəbul zamanı məzunlarının yüksək göstəriciləri ilə başqa məktəblərdən seçilməlidir.
|