|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Təlimdə
İKT-dən istifadənin əhəmiyyəti Elm
və texnikanın sürətli inkişafı
cəmiyyətdə informasiya bolluğu yaradır, həm
də onları məzmun və əhəmiyyətlilik baxımından
çevik şəkildə dəyişkən edir. Bu
səbəbdən fakt və məlumatların yaddaşda
mühafizə edilməsinə əsaslanan təlim
texnologiyaları aktual bir problem olaraq pedaqoq və psixoloqların
müzakirə obyektinə çevrilir. Yaddaşa əsaslanan
təhsilin dövrün tələblərinə cavab
vermədiyi aydınlaşdıqca
problemli təhsilə keçid daha geniş vüsət alır.
Təlimin təşkilinə verilən yeni
tələblər lazım
olan informasiyaları əldə etmək, onlardan düzgün
istifadə etməklə problemin həllinə nail olmaq
bacarıqlarını gerçək nailiyyət və yüksək
təlim nəticəsi kimi müəyyənləşdirir.
Bu təlim texnologiyası idraki fəaliyyətləri,
tədqiqatçılıq bacarıqlarını, ictimai
vərdişləri və maraqların düzgün
istiqamətləndirilməsini ön plana çəkir. Göstərilən
bacarıq və vərdişlərin formalaşmasında
İKT-nin geniş imkanlarından düzgün istifadə ölkədə
aparılan təhsil
siyasətinin tərkib hissəsidir.
Problemin həllinə nail olmaq üçün sinif otağını
tərk etmədən ən
son məlumat mənbələrinə daxil olmaqla
lazımi informasiyanı əldə etmək imkanını
məhz İKT verir.
Əldə olunmuş məlumatları emal etmək,
onlardan düzgün yararlanaraq problemin həllinə doğru
irəliləmək idraki bacarıqları inkişaf
etdirir. İdraki inkişaf idraki fəaliyyətlə
tənzimlənir. "İdraki fəaliyyət"
ifadəsi müxtəlif cür dəyərləndirilə
bilər, lakin mütəxəssislər təlimdə yeni
yanaşmalar baxımından bunun "yadda saxlama"
və "təkrarlama"dan başqa bütün qalan düşünmə
fəaliyyətlərinə aid olduğunu bildirirlər.
İnformasiyaların yadda saxlanması və təkrarlanması
idraki fəaliyyət hesab edilməsə də, həmin
informasiyalar idraki fəaliyyətin təşkili üçün mühüm
vasitədir. İnformasiya elə bir "xammal"dır
ki, onun emalı prosesində idrak fəaliyyətdə olur,
inkişaf edir. Tədqiqatlar göstərir ki, idraki inkişafın
uğurlu təşkilini yalnız idraki fəaliyyət
vasitəsi ilə həyata keçirmək mümkündür. İnformasiya və kommunikasiya texnologiyaları
təlim prosesində idraki vərdişlərin inkişafına
necə xidmət edə bilər? R.Tayler özünün "Kurrikulum və
təlimin əsasları" əsərində göstərir
ki, tapşırıqların tərtibi zamanı onların
ardıcıl, sistemli düşünməni təşkil
edə bilən olması mühüm şərtdir. Bu, aşağıdakı
mərhələlərdə təqdim edilir: * çətinlik hiss edilsin və ya
suallara həmin vaxt cavab
vermək mümkün olmasın. * Problemi təhlil yolu ilə aydınlaşdırmağa ehtiyac olsun. * Uyğun faktlar toplansın. * Problemin həllinin mümkün izahı
və ya alternativ həlli olan fərziyyələri formalaşdırılsın. * Uyğun materiallarla
fərziyyələr yoxlanılsın. * Problemin həlli olan
nəticələr çıxarılsın. Problemin həllinin yuxarıda sadalanan
mərhələləri idraki fəaliyyətin pedaqoq
və psixoloqlar tərəfindən müəyyənləşmiş
üç tərkib komponentinin vasitəsi ilə reallaşır:
induktiv düşünmə - xüsusini ümumiləşdirmə,
deduktiv düşünmə - ümumini xüsusiləşdirmə
və məntiqi düşünmə - məntiqi arqumentlər
gətirmə, fərziyyələr yürütmə və
nəticələr çıxarma. İnformasiya və kommunikasiya texnologiyalarının
geniş imkanları idraki fəaliyyətin hər üç
mərhələsində şagirdlər üçün problemin
həll edilməsini daha da asanlaşdırır və
şagird fəaliyyətini məhsuldar edir. Belə ki,
şagird İKT
vasitəsi ilə sinif
otağından birbaşa məlumat mənbəyinə qoşularaq
ən son informasiyaları əldə etmək imkanı
qazanır. İKT-nin Microsoft Office
Microsoft Word, Microsoft Power Point, İnternet Explorer
və digər proqramlarının imkanları adıçəkilən
idraki fəaliyyətlərin təşkil
edilməsində, məqsədəuyğun tapşırıqların
yerinə yetirilməsində çox əhəmiyyətlidir.
İdraki bacarıqların formalaşmasının İKT
vasitəsi ilə təşkili
üç mərhələ baxımından
araşdırılmışdır: (a) induktiv, (b)
deduktiv və (c) məntiqi
a) Ədəbiyyatın tədrisi zamanı
İKT vasitəsi ilə induktiv vərdişlərin inkişafını
təşkil etmək imkanları çox genişdir. Aparılan
müşahidələr zamanı müəyyən edilmişdir
ki, şagird verilən tapşırığı
yerinə yetirdiyi zaman problemin həllinə nail olmaq üçün
əldə etdiyi məlumatları ümumiləşdirərkən
baş verən idraki fəaliyyət sonrakı
mərhələ üçün ilk addım kimi
dəyərləndirilir. Bu prosesin səmərəliliyi,
əsasən, iki mühüm cəhətlə şərtlənir: 1) İKT məlumatların toplanmasında
ən yararlı vasitədir; 2) İKT problemin həllinin təşkili
üçün çoxsaylı proqramlar mənbəyidir. Şagird verilən problemi həll
edərkən həm onu araşdırır, həm də
müxtəlif kompüter proqramlarının ayrı-ayrı
xidmətlərinin ümumi bir məqsəddə birləşdirilməsi
üzərində düşünür. Bir neçə proqramın
problemin həllində yararlı olan uyğun məqamlarının
seçilib məqsədə çatmaq üçün istifadə
edilməsi tapşırığın icrasını
asanlaşdırmaq və sürətləndirməklə yanaşı,
həm də işin keyfiyyətinin yüksəldilməsini
təmin edir. Bu baxımdan xüsusi cəhətləri ümumiləşdirərək
konkret məsələyə tətbiq etməklə şagird
həm problemin həllinə nail olmaq üçün əldə
etdiyi məlumatları ümumiləşdirmək bacarıqlarını
nümayiş etdirir, həm də
paralel olaraq həmin problemin həllində
keyfiyyət və sürət nümayiş etdirmək
məqsədi ilə müxtəlif proqramların
fraqmentlərini ümumi bir məqsəd ətrafında
birləşdirir. Bu vaxt, eyni zamanda ikiqat
induktiv düşünmə fəaliyyəti baş verir. b) İKT-nin istifadəsi
deduktiv düşünmənin inkişafında
mühüm əhəmiyyət daşıyır. Qeyd
edildiyi kimi, deduktiv düşünmə idrakın ümumini xüsusiləşdirmə
bacarığıdır. Şagird ona verilən tapşırığın,
layihənin yerinə yetirilməsi üçün kompüter texnologiyasının
uyğun proqramlarının imkanlarını götür-qoy
edir. Proqramların ümumi imkanlarının
məqsədə nail olmaq üçün nə kimi xidmət
edə bilməsi araşdırılır. Layihə və
ya tapşırığın hansı
səviyyədə, hansı proqramlar vasitəsi ilə
həyata keçiriləcəyi haqqında qərarlar qəbul
edilir. Şagird İnternet Explorer proqramının ümumi
imkanlarından xüsusi tapşırığın yerinə
yetirilməsində yararlanır. Məsələn, hər
hansı problemin həll edilməsində şagird faktlar
və informasiyalar toplamaq məqsədi ilə İnternet
Explorer proqramı vasitəsi ilə axtarış
səhifələrindən, əldə etdiyi
informasiyalardan gəldiyi qənaətlərlə bağlı
qeydlər aparmaq üçün Microsoft Word proqramından,
təqdimatlar hazırlamaq üçün Power Point proqramının
imkanlarından istifadə edir. Eləcə də digər
məqsədlərə nail olmaq üçün müxtəlif
proqramların ümumi imkanlarını
dəyərləndirir və konkret problemin həllində
ondan istifadə edir. Deduktiv düşünmə
fəaliyyəti toplanmış müxtəlif məlumatlardan
əldə edilən qənaətlərin xüsusi
məsələnin həllinə tətbiqi zamanı baş
verdiyi kimi, həm də proqramın ümumi imkanlarını
xüsusi məqsədlərdə istifadə etmək
prosesində formalaşır, yəni şagirdin deduktiv düşünməsinin
inkişafına bir tapşırıq yerinə
yetirilərkən iki mövqedən yanaşılır. c) Mütəxəssislər məntiqi düşünməni,
yuxarıda qeyd edildiyi kimi, məntiqi arqumentlər
gətirmə, fərziyyələr yürütmə və
nəticələr çıxarma kimi
dəyərləndirirlər. Xüsusinin ümumiləşdirilməsi
(induktiv) və ümuminin xüsusiləşdirilməsi (deduktiv)
fəaliyyəti ilə şagird artıq problemin
həllinin bir neçə mərhələsini geridə qoymuş
olur. Problemin həlli zamanı yerinə yetirilən tapşırığın
xüsusiyyətləri və kompüter proqramının imkanları
məntiq etibarı ilə üst-üstə düşməlidir.
Eksperimentlər göstərir ki, şagirdlər İKT-nin
istifadəsi ilə əldə edilmiş məlumatlarla
fikirlərini əsaslandırır, fərziyyələr
irəli sürür və nəticələr çıxarırlar.
Şagirdlər gəldikləri nəticələrə
əsasən uyğun kompüter
proqramları vasitəsi ilə təqdimatlar hazırlayır,
fikirlərini yoldaşları
ilə bölüşürlər. Məlumatlar toplamaq, toplanmış
məlumatlardan əldə edilmiş qənaətləri
hər hansı məsələyə tətbiq etmək, mülahizələr
yürüdüb nəticələr çıxarmaq kimi
fəaliyyətlər problemin həllinə nail olmaq üçün
mərhələli şəkildə ayrı-ayrı
təlim proseslərinin məqsədi ola bilər. Lakin
idraki təfəkkürün tərkib hissələri olaraq onlar
vəhdət təşkil edir və hər hansı
problemin həllinə nail olmaq üçün kompleks şəkildə
tətbiq edilir. İnformasiya və kommunikasiya texnologiyaları,
verilən tapşırığı yerinə
yetirərkən bir problemin
müxtəlif proqramların
imkanlarından çıxış edərək fərqli çalarlarda
həll edilməsi istiqamətində şagirdlərin seçim
imkanlarını artırır, yəni şagird problemin
həllini Microsoft Word proqramının imkanlarında bir çalarda,
Power Point proqramının imkanlarından çıxış
edərək başqa çalarda təsəvvür edir. Bütün
bunlar şagirdin idraki fəaliyyətinin formalaşmasında
mühüm amillərdir. Bu cür dərslərin həyata keçirilməsi
üçün aşağıdakı məsələlər mühüm
şərt kimi dəyərləndirilir: * müvafiq bilik və bacarıqlara malik
müəllim; * texniki təchizatlarla təmin edilmiş
sinif otağı və ya kompüter laboratoriyası; * texnologiyalarla çalışma vərdişlərinə
malik şagirdlər; * uyğun proqram təminatı; * hər zaman yardımçı olmağa
hazır olan mütəxəssislər, həmkarlar. Pedaqoji heyətin, şagirdin və ümumiyyətlə
məktəbin istər strateji, istər metodiki,
istərsə də texniki baxımdan hazırlığı
vacib şərt hesab edilməklə orta ümumtəhsil
məktəblərindən uyğun şəraiti olan Bakı
şəhərindəki 181 nömrəli orta məktəbin
XI sinfində M.Ə.Sabirin yaradıcılığını
öyrənmək məqsədi daşıyan bu cür
dərslər keçildi. Əldə edilən
nəticələrdən belə məlum oldu ki, tapşırığın
İKT vasitəsi ilə həyata keçirilməsi şagirdlərin
idraki fəaliyyətinin təşkilinə uğurlu şərait
yaratmış və qarşıya qoyulmuş
məqsədə nail olunmuşdur. Belə ki, şagirdlər
problemin həllinə nail olmaq üçün öncə materiallar
toplamaq zərurəti qarşısında qalmışlar,
yəni hər qrup tapşırılan insan
hüququ ilə bağlı M.Ə.Sabirin
yaradıcılığına
müraciət etmiş, problem baxımından
cəmiyyətdə baş verən haqsızlıqları
tənqid edən mövcud satira
nümunələrini əldə etmişlər. Şagirdlər
Azərbaycan Respublikasının Konstitusiyasında öz
əksini tapmış müvafiq hüquq və azadlıqları
da müəyyənləşdirmişlər. Sonrakı
mərhələdə onlar mühakimələr
yürüdərək faktları əlaqələndirmiş,
müəyyən nəticələrə gəlmiş,
qərar qəbul etmiş və
problemin həllinə nail olmuşlar. Problemin həllinə nail olmaq üçün şagirdlərin
idraki fəaliyyəti Blumun idraki taksonomiyalarının:
bilik, anlama, tətbiq, təhlil, sintez,
dəyərləndirmə kimi bütün altı
mərhələsində təşkil edilir. Şagirdlər
idraki fəaliyyətin birinci növü olan induktiv düşünmə
zamanı Azərbaycan Respublikasının Konstitusiyasından
və müvafiq İnternet səhifələrindən
problemin həllində yararlı ola bilən məlumatları
əldə etmək üçün İnternet
Explorer proqramından, üzünü
çıxarıb onları sürətlə və
keyfiyyətlə bir araya gətirmək üçün Word proqramından
istifadə edir, Konstitusiya ilə Sabir satiraları arasında
problem baxımından əlaqələri öyrənərkən
digər İnternet səhifələrinə də müraciət
edilmiş, fikirlər ümumiləşdirilmişdir. Problemin
həllinə nail olmaq üçün planlaşma aparılmışdır.
Bu, növbəti mərhələnin başlanğıcı
kimi dəyərləndirilmişdir. Şagirdlər
məlumatları ümumiləşdirdikdən sonra
gəldikləri qənaətlərə əsasən
problemin incəliklərini özləri üçün aydınlaşdırmış,
əldə etdikləri məlumatları tətbiq etmiş
və məsələnin
hissələri nəzərə alınmaqla təfərrüatlı
açılmasını təşkil etmişlər. Əldə
edilmiş materiallara əsasən təqdim olunacaq kiçik
yaradıcılıq nümunələri hazırlamışlar.
Mövzudan çıxış edərək Konstitusiya
maddələri yazılmış, seçilmiş şeirlərdən
parçalar köçürüb səhifədə yerləşdirmiş,
uyğun tərtibat işləri aparmışlar. Bu,
təqdimatın həm estetik, həm də məzmun baxımından
dolğun olmasını təmin etmişdir. Vizuallığın
təmin edilməsi fikirlərin ifadəsini daha da asanlaşdırmışdır.
Bundan sonra təhlillər aparılmış, uyğun
faktların məqsədyönlü
əlaqələndirilməsi ilə əldə olunan
nəticələr təqdim edilmişdir.
Nəticələrin zəif və ya üstün
cəhətlərinin müzakirə edilməsi idraki
fəaliyyətin ən yüksək
dəyərləndirmə mərhələsi olduğundan, tam
əminliklə bu qənaət hasil edilmişdir ki, aparılmış
təcrübələr zamanı şagirdlərin idraki
fəaliyyəti uğurlu şəkildə təşkil
edilmişdir. Ədəbiyyatın tədrisində İKT-dən
istifadə məktəbin qarşısında duran mühüm
vəzifələrin həyata keçirilməsi üçün böyük işlər
görə bilər. Təlim nəticələrinin yüksəldilməsinə
nail olmaq istəyən həm məktəb, həm də müəllim
bu ecazkar təlim vasitələrindən istifadənin
əhəmiyyəti üzərində dərindən düşünməli
və tədris-təlimin təşkilində bu
istiqamətdə həlledici addımlar atmalıdırlar.
Afət SüLEYMANOVA, Təhsil Nazirliyinin aparıcı məsləhətçisi |