Nazir korrupsiyaya qarşı mübarizə üzrə işçi qrupunun üzvləri ilə görüşdü

Yanvarın 8-də təhsil naziri Misir Mərdanovun nazirlikdə yaradılmış korrupsiyaya qarşı mübarizə üzrə işçi qrupunun üzvləri olan qeyri-hökumət təşkilatlarının təmsilçiləri ilə görüşü oldu. Görüşdə işçi qrupunun fəaliyyət istiqamətləri, onda təmsil olunan qeyri-hökumət təşkilatları ilə əməkdaşlıq məsələləri müzakirə edildi.

Görüş iştirakçılarını salamlayan nazir ali məktəblərdə qış imtahan sessiyasının artıq başlandığını bildirib, imtahanların şəffaf və obyektiv keçirilməsində, imtahanlar zamanı yarana biləcək korrupsiya hallarının, digər neqativ halların aşkara çıxarılması və aradan qaldırılmasında qeyri-hökumət təşkilatlarının Təhsil Nazirliyinə yaxından kömək edə biləcəyini vurğuladı. Görüşü təkcə ali məktəblərdə semestr imtahanları ilə bağlamağı düzgün saymadığını söyləyən Misir müəllim yaradılan qrupun il ərzində fasiləsiz fəaliyyət göstərməsini, qrup üzvləri ilə nazirliyin rəhbərliyi arasında görüşlərin müntəzəm keçirilməsini, meydana çıxan problemlərin operativ müzakirə olunmasını, qrup üzvlərinin Təhsil Nazirliyinin tədbirlərində iştiraklarını zəruri saydı. Təhsildə korrupsiyaya qarşı fasiləsiz mübarizə aparmağın vacib olduğunu bildirən Misir Mərdanov işçi qrupuna öz fəaliyyətlərini təkcə ali məktəblərdə keçirilən semestr imtahanları ilə məhdudlaşdırmayıb, təhsilin digər pillələrində də korrupsiya hallarına qarşı fəal mübarizə aparmağı tövsiyə etdi.

Misir Mərdanov korrupsiyaya qarşı mübarizənin nəticə verməsi üçün həm ictimaiyyətin nümayəndələrinin, tanınmış ictimai xadimlərin, KİV əməkdaşlarının, həm də valideynlərin, təhsil alanların bu işə fəal cəlb olunmasının zəruriliyini vurğuladı.

Təhsil sistemindəki korrupsiya hallarına qarşı mübarizədə valideynlərin, ictimaiyyət nümayəndələrinin hələ inamsızlıq göstərdiyini deyən nazir onları inandırmaq üçün işi düzgün qurmağı, birgə fəaliyyət göstərməyi, yerlərdə maarifçilik işlərini gücləndirməyi, bu məqsədlə işçi qrupunun üzvlərinin müntəzəm şəkildə təhsil müəssisələrində olmasını vacib saydı.

Görüşdə çıxış edən Korrupsiyaya Qarşı Mübarizə üzrə QHT-lərin Məlumat və Əməkdaşlıq Şəbəkəsinin koordinatoru Əliməmməd Nuriyev, Korrupsiyaya Qarşı Mübarizə Fondunun təmsilçisi Vasif Mövsümov, Müasir Təhsil və Tədrisə Yardım Mərkəzinin koordinatoru Nailə İsmayılova səmimi qəbula görə nazirə minnətdarlıqlarını bildirdilər. Korrupsiyaya qarşı mübarizə sahəsində Təhsil Nazirliyinin gördüyü işləri dəstəklədiklərini söyləyən qeyri-hökumət təşkilatlarının təmsilçiləri özlərinin bu istiqamətdəki fəaliyyətlərindən, planlaşdırdıqları tədbirlərdən söz açıb, təkliflərini bildirdilər.

çıxışlarda işçi qrupu tərəfindən qış semestri ərzində ali məktəblərdə monitorinqlərin aparılması, monitorinqin nəticələrinin birgə müzakirəsinin keçirilməsi, işçi qrupunun saytının yaradılması, saytda öz əksini tapmalı olan məlumatlar, ali məktəblərdə "İnam günü"nün, tələbələr arasında sorğuların keçirilməsi, maarifləndirmə sahəsində işlərin gücləndirilməsi, Azərbaycan hökumətinin qəbul etdiyi "Şəffaflığın artırılması və korrupsiyaya qarşı mübarizə üzrə Milli Strategiya"nın mahiyyətini təhsil işçilərinə çatdırmaq üçün yerlərdə maarifləndirmə işlərinin aparılması, bu məqsədlə konfransların, seminarların təşkil olunması, İctimai televiziyadakı "Açıq dərs" verilişinin birinin bu mövzuya həsr olunması, "Təhsil sistemində antikorrupsiya sorğu kitabçası"nın hazırlanması, daxil olan siqnallara operativ reaksiya verilməsi, siqnal gələn yerlərə işçi qrupunun üzvləri və Təhsil Nazirliyinin nümayəndələrindən ibarət qrupun göndərilməsi, əməkhaqları plastik kartlarla verilməyən yerlərdə bu sistemin tətbiqinin sürətləndirilməsi və s. kimi təkliflər səsləndi.

Görüşdə iştirak edən "Şəffaflıq Azərbaycan" təşkilatının layihə baş koordinatoru Ceyhun Atayev imtahanlar zamanı korrupsiya hallarının aşkarlanması, bu hallara qarşı tədbirlərin görülməsi məqsədilə təqvim şəklində hazırladıqları və üzərində "Tələbə! Rüşvət vermə! Bu qaynar xətlərə zəng vur!" sözləri, Təhsil Nazirliyinin və "Şəffaflıq Azərbaycan" təşkilatının "qaynar xətt"lərinin telefon nömrələri, elektron poçt ünvanları yazılmış flayeri nazirə təqdim etdi. 5000 nüsxə hazırlanmış həmin flayerlərin ali məktəblərin tələbələrinə paylanması, elan lövhələrində yerləşdirilməsi nəzərdə tutulub.

Görüşü yekunlaşdıran nazir deyilən təkliflərlə razılaşdığını bildirib onların həyata keçirilməsində işçi qrupuna nazirliyin lazımi dəstək verəcəyini söylədi, belə çətin hava şəraitində görüşə gəldikləri üçün qeyri-hökumət təşkilatlarının  təmsilçiləri olan işçi qrupunun üzvlərinə minnətdarlıq etdi.

Yusif ƏLİYEV