|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Təzəlik,
gözəllik bayramı Dağların bəyaz örtüklü
yal-yamaclarına iz düşüb. çillədən sonra yaz havası
hökmünü göstərir. Elə buna bənd imiş kimi,
həyət, bağçalarda görünənlər də çoxalıb.
Belı şallı, saçı xınalı
nənələr yulğun süpürgələri işə
salırlar. çiyni kürklü babalar çal-çəpərə əl
gəzdirirlər. Qız-gəlinlər xalça-palazı
havaya çıxarırlar. Qolu zorlu, köksü nurlu kişilər
torpağa bel sancırlar. Bağban qayçıları qurumuş
budaqlarda təmizləmə işi görür. Qışın
buzu, qarı ilə dolub tıxaclaşmış arxlarda
lillənən sular axar tapır. Evlərin divarları
əhənglənir. Qapı-pəncərələr
silinib təmizlənir. Saxlanc sandıqlarının
qapaqları açıldıqca evdəki oğul-uşaqların
əyin-başı təzələnir. Neçə vaxtdan
bəri asılı qalmış təzə paltarların
tozu alınır. Beləcə bütün el, oba camaatı
əziz günə - Novruza hazırlaşır. Yeni astronomik ilə keçid dövrü olan Novruza 50
gün hazırlıq görülür. Əvvəllər Novruz 7 gün qeyd olunardı.
Bayram süfrəsi 7 növ nemətlə bəzənərdi. Novruzun gəlişi 4 çərşənbə
ilə qeyd olunur: Su, Od, Yel və Torpaq çərşənbələri. Novruz bayramının qarşılanması,
təşkili və keçirilməsi əslində sistem
təşkil edir. Bu fikri çoxlu sayda fakt və detallar
təsdiqləyir. Azərbaycan mədəniyyətinin bilicisi,
xalq rəssamı Elçin Aslanov yazır ki, Novruz - İlbaşı
törəni həm kənd, həm də sırf şəhər
- sənət, peşə bayramıdır. Yazda evlənmə ilə bağlı
oyunlar keçirilmişdir. Bunlardan biri böri (qurd) və keçi
(qoyun) oyunudur. Oyunun ana xətti bütün variantlarda eynidir. Bayram vaxtı insanlar yaz və təbiət
kimi yeniləşmək, təzələnmək, günahlardan
azad olmaq istəyirlər. Yeni il, Novruz bayramı qabağı od üstündən
atılan, mənən çirkini, günahını müqəddəs
odda yandırıb təmizlənən insan saflaşır,
ülviləşirlər. Professor Elməddin Əlibəyzadə yazır
ki, ulularımız "Yeni il", "Təzə
il" anlayışında kainatın dövr etməsini,
hərəkətini və bu dövretməni dəqiq hesablayıb
nəzərə alıblar: Novruza, təzə
ilə keçid günü gecə ilə gündüz
bərabərləşir, yəni təzə ildən
uzana-uzana gələn günlər dekabrdan qısalmağa başlayır,
martın 21-də bərabər olur və il yenidən
təzələnir. Novruz bayramına qədər 4 çərşənbə
olur. Və bu çərşənbələrin hər birinin
öz adı, özünəməxsus inancları var. Boz ayın dörd müqəddəs çərşənbəsindən
biri Su çərşənbəsi, "Sular Novruzu"
ilə başlayır. Əzəl çərşənbədə
qarşıdan təzə ilin gəlməsi ilə bağlı
ən əvvəl su təmizlənir. Hamı gün doğmamış
su üstünə gedir, təzə suda əl-üzünü yuyur,
bir-birinin üzərinə su çiləyir, su üstündən atlanır.
Od çərşənbəsi martın
əvvəlinə düşür. Bayram axşamı evlərin
qarşısında, damlarda çatılmış tonqallara od
vurulardı. Alovun dilləri səngiyəndə
qoca-cavan, uşaq-böyük tonqal üstündən üç və
ya yeddi dəfə o yan -
bu yana hoppanır. Hər dəfə də deyirlər:
"Bəla bizdən uzaq olsun, qüssə-kədər iraq
olsun", "Azarlığım, bezarlığım , ağrım-acım,
qada-balam bu od üstə tökülsün". Od çərşənbəsinin sonunda insanlar
"Od-alovun ömrü uzun olsun", "Ocağın odlu,
qazanın qaynar olsun", deyib evlərə dönürlər. Xızırın
adına şamlar sancılmış "üskü xonçası"
olan bayram süfrəsi ətrafında əyləşirlər. "Avesta"da yel müqəddəs sayılır.
"Yelin gücü qüdrətli Hörmüzdün gücüdür... Yel Hörmüzddən
güc alıb dünyaya ayaq açmışdır....". "İncil"də və
"Zəbur"da Yel Allahın qüdrəti kimi təqdim
olunur. "Tövrat"da 4 növ Yel ilahəsi olduğu
bildirilir, onların hər birinin özünəməxsus
cəhətləri vardır. "Qurani-Kərim"də Yel Allahın
əlində mərhəmət və cəza antromorfu kimi
göstərilir. Torpaqda qurub-yaradan, əkib-biçən,
cənnətə bənzər bağlar salan
nənələr-babalar torpaqla bağlı deyiblər: Torpaq ovuclayan qızıl ovuclar. Torpaq deyər: öldür məni, dirildim
səni. Xalqımızın zəngin
mənəviyyatı, qədim tarixi, rəngarəng
təbiəti, dünya duyumu haqqında özündə
yetərincə bilik və məlumat yaşadan, daşıyan
Novruz ulu və əbədi bir bayram kimi yaşayır. Ş.MƏMMƏDOV Orta
məktəb dərsliklərində Novruz bayramı Xalqımızın milli bayramı olan
Novruz hər il olduğu kimi, bu il də Vətənimizin
hər yerində böyük təntənə ilə qeyd
ediləcək. Qədim və zəngin
ənənələri olan bayramla bağlı
məlumatların orta məktəblərin Azərbaycan
dili və ədəbiyyat dərsliklərində şagirdlərə
çatdırılması ilə bağlı vəziyyəti
öyrənmək məqsədi ilə "Azərbaycanşünaslığın
əsasları" kitabının müəllifi, professor,
Azərbaycan Milli Elmlər Akademiyasının müxbir üzvü,
Milli Məclisin Mədəniyyət
məsələləri daimi komissiyasının sədri,
Azərbaycanda Atatürk Mərkəzinin müdiri Nizami
Cəfərovla görüşüb fikirlərini öyrəndik. - Orta məktəb dərsliklərində
Novruz bayramına aid müəyyən şeirlər, ümumiyyətlə,
bədii nümunələr verilib. Bunların mövzusu birbaşa
Novruz bayramı barəsindədir. X-XI siniflərdə
ətraflı öyrənilən elə əsərlər
də vardır ki, bu bayram haqqında təfərrüatlı
məlumatlar əks etdirən səhnələrə
malikdir. Məsələn, M.Şəhriyarın
"Heydər babaya salam" poemasında, İ.Şıxlının
"Dəli Kür" romanında elə yerlər var ki,
Azərbaycan xalqının etnoqrafiyasında, məişətində,
dünyagörüşündə Novruzun nə qədər geniş
yer tutduğunu əks etdirir. Eyni zamanda Azərbaycan dili
dərsliklərində, birbaşa olmasa da, müxtəlif cümlələrdə
bu bayrama işarə edilən məqamlar var. Bu cür
məlumatlar tarix dərsliklərində də özünü göstərir.
Təbii ki, nə ədəbiyyat, nə ana dili, nə
də tarix fənləri Novruz bayramı haqqında bütün
təfsilatı ilə məlumat verə bilməz. Ona görə
də müəllimlərimiz həmin bayram
ərəfəsində həm dərslərdə, həm
də sinifdənxaric tədbirlərdə şagirdlərin
qavraya biləcəkləri
qədər, yəni onların yaş, idrak
səviyyələrinə uyğun olaraq daha ətraflı
məlumat verə bilərlər. Belə ki, ibtidai
siniflərdə yazın gəlişi, təbiətin
canlanması, yəni birbaşa görünən
mənzərə əsasında təsəvvür yaradılar.
Yuxarı siniflərdə isə Novruzun
etnoqrafik, ideoloji, mənəvi aspektdən izahı verilir,
onun türk, fars və s. xalqlarda nə cür keçirilməsi, hansı
tədbirlər müşayiət olunması, folklorda necə
əksini tapması şərh edilir. Beləliklə,
nəzərə çatdırılır ki, Novruz bayramı
Azərbaycan xalqının ən qədim dövrlərdən
bəri qeyd etdiyi, müxtəlif dini, ideoloji
təsirlərə məruz qalsa da, təbiətlə bağlı
ilkin təəssüratları özündə daşıyan,
get-gedə daha da zənginləşmiş ən böyük
bayramı olub, xalqımızın mənəvi ucalığının
içərisində olduğu təbiətlə sıx
təmasını, ruhi saflığını nümayiş
etdirir. Qələmə aldı: Şakir CƏFƏROV Novruzu
yaşadan inanclardır Novruz hərarəti ilə böyükdən-kiçiyə
hamının qəlbini isidir, hər kəsə sevinc
və gözəllik bəxş edir. Novruz bizi nağıllar aləminə
aparır. Novruz öz
gəlişi ilə barışıq, sülh,
bərabərlik gətirir. Bu bayramın ecazkarlığı
və cazibəsi onun mənəviyyatımıza, əxlaqımıza
bağışladığı
dəyərlərdədir. Azərbaycan Dövlət Pedaqoji
Universitetinin ümumi psixologiya kafedrasının müdiri,
professor Əbdül Əlizadə:
- Bahar gəlir, öz gəlişi ilə
sevimli Norvuzu gətirir. Xalqımız öz milli bayramını,
adət-ənənələrini yüksək
əhval-ruhiyyə ilə qeyd edir. Novruz baryamının öz
inancları var. Bu inanclara görə hər evi səməni
ilə bəzəyirlər. Novruzla əlaqədar milli
ənənələrimiz çox zəngindir. Xalqımız
bu adət-ənənələri, Novruz bayramı inanclarını
göz bəbəyi kimi qoruyur, bir nəsildən başqa
nəslə ötürür. Bu əziz bayram günlərində
Azərbaycanın təhsili də özünün təmtəraqlı
günlərini yaşayır. Təhsil sahəsində böyük
elmi layihələr həyata keçirilir. Qabaqcıl müəllimlər
yeni pedaqoji nailiyyətlər əldə edərək, ümummilli
liderimiz Heydər Əliyev
ideyalarına sadiqlik nümayiş etdirərək xalqımıza
layiq övladlar tərbiyə edirlər. Bu əziz bayram günlərində mən
Azərbaycan müəllimlərini ürəkdən təbrik
edirəm, onlara böyük uğurlar arzulayıram. Bakı Şəhəri üzrə
Təhsil İdarəsinin müdiri Nailə Rzaquliyeva:
- Novruz ən çox sevdiyim və
ənənələrinə rəğbət
bəslədiyim bir bayramdır. Novruz bayramında, xüsusilə
axır çərşənbə günündə tonqalın yandırılması,
insanların onun ətrafına toplaşması, qapılara
papaq atmaq mənim üçün
ən maraqlı məqamlardandır. Nəzərə alsaq
ki, şəhərdə böyüyüb başa çatmışam,
tonqaldan atılmaq, ətrafında dayanıb ona tamaşa
etmək mənim üçün
əlçatmaz olub. Xüsusilə süfrələrin Novruzun
atributları olan şəkərbura, paxlava, başqa
ləziz təamlarla bəzədilməsi çox xoşuma
gəlir. Fevralın
sonlarından, ilk çərşənbədən Novruzun
gəlişini səbirsizliklə gözləyirəm. Düzdür, inanclara o dərəcədə inandığımı
deyə bilmərəm, amma xatırlayıram ki,
tələbəlik illərimdə
qızlarla yığışıb üzüklə fala
baxardıq. AMEA-nın Milli Arxeologiya və
Etnoqrafiya İnstitutunun şöbə müdiri, akademik Teymur Bünyadov:
- Novruzun tarixi 8 minillik bir dövrə malikdir.
Qədim əsrlərdə də onun əlamətləri
var, Nizaminin, Vaqifin əsərlərində də Novruzla bağlı
hadisələr cərəyan edir.
Mart boz aydır. Görürsünüz ki, hava hər
saatdan bir dəyişir. Su, Yel, Torpaq, Od çərşənbələri
var. Hər biri özündə müxtəlif
mənalar kəsb edir. Bolluq, ruzi- bərəkət, hərarət,
təmizlik, saflıq, torpaqda canlanma... bütün bunlar Baharın,
Novruzun gəlişindən xəbər verir. Novruz bayramı
inancları ilə sevilir. Məsələn, qızlar daha
çox bəxt falına baxardılar.
Mən özüm də cavan olmuşam axı. Hamı kimi
mən də sevmişəm, sevilmişəm.
Cavanlıqda qulaqpusmaya gedərdim.
ürəyimdə sevdiyim qızı tutub qapı arxasında
gizlənib, ilk eşidəcəyim sözləri gözləyərdim.
Beləcə, hər kəs kimi mən də öz bəxtimi
sınayardım. Novruzda gecə-gündüzlə
bərabərləşir. Bu hadisə o zamanlar qara zurnanın
sədaları altında qarşılanardı. İllərlə bu bayram qadağan olunub. Amma bu
bayramın o qədər böyük hikməti var ki, onu
unutdurmaq mümkün olmayıb. Heydər Əliyev adına
məktəb-liseyin ibtidai sinif müəllimi Hökumə Əliyeva:
- Novruz xalqımızın
milli bayramıdır.
Novruz bayramında el tonqal başına yığılır,
küsülülər barışır, qohumlar, dostlar
bir-birlərinin evlərinə təbrikə gedirlər.
İnanclara o qədər də inamım yoxdur. Amma
axır çərşənbə günündə tonqal üzərindən
tullanmağı xoşlayıram. ürəyimdə niyyət
tutmuşam. Düzdür, arzuladıqlarım
qismən gerçəkləşsə də, artıq bu
inanclar insanlar üçün bir
ənənəyə çevrilib. Evdə səməni qoyuram, bolluq,
bərəkət rəmzidir. Hər bir azərbaycanlı
Novruz ərəfəsində evində səməni
saxlayır. Bayramı
bu cür qarşılamaq insanların məhz bu inanclara
rəğbətindən, inamından irəli gələn
xüsusiyyətlərdir. Azərbaycan
Dövlət Pedaqoji Kollecin direktoru, filologiya elmləri
doktoru Nurlana Əliyeva: - Novruz bayramı hər zaman
nənələrimizin, babalarımızın,
ailəmizin, qohum-əqrəbalarımızın, tanıdıqlarım
insanların ən əziz bayramıdır. Hətta ən
kasıb ailələr belə bu bayramın yolunu
səbirsizliklə gözləyər, yüksək
əhval-ruhiyyə ilə qeyd edərdilər. Bu bayramın
özəlliyi odur ki, hər ev Novruzda təmizliyə çıxar,
hər kəs təzə paltar geyər, hamının
evində süfrəsi cürbəcür şirniyyatlarla, milli xörəklərimizlə
bəzədilər. O vaxt yadımdadır ki, anam
ən gözəl mürəbbələrini Novruz bayramına
saxlayardı. Bayramda gül, qoz, qarpız qabığı mürəbbəsini
süfrəyə qoyardılar. Novruz
bayramında gözəl-gözəl xuruşlarla aş
dəmlənərdi. Atam danışardı ki, babam Hacı
Seyidrza Axund Gəncənin varlı və xeyriyyəçi kişilərindən
biri olub. O, Novruz bayramından
bir həftə əvvəl kəndin bütün kasıb-kusublarının
siyahısını tutdurar və hamısına sovqat göndərərmiş.
Amma faytonçusuna tapşırarmış ki, bayram payının
onlara kimin verdiyini bir kimsəyə deməsin. çünki Hacı
Seyidrza Axund həmin insanın onunla rastlaşarkən
utanacağından ehtiyat edərmiş.
Yaxşı
yadımdadır, nənəm
qonşudakı bütün qızlara şəkərbura, paxlava
bişirməyi, xonça bağlamağı öyrədərdi.
Deyərdi ki, qadının
ən böyük üstünlüyü onun əl qabiliyyətində,
təmizliyində, səliqə-sahmanlı olmasındadır.
Novruz inancları çoxdur. Qapıpusma,
falabaxma və s. Bu, əsasən,
gənc qızlar, gəlinlər arasında geniş
yayılıb. Hərçənd
mən fala o qədər də inanmıram, amma mən
onların arasında
ən çox ürəkdə niyyəttutma inancına inanıram.
Məsələn, ürəyində hər hansı bir
niyyət tutursan və ilk danışacaq adamdan eşitdiyin
sözün nədən ibarət olduğunu gözləyirsən.Bununla
da həmin kəlmə ilə sən arzunun yerinə
yetəcəyini, yaxud gerçəkləşməyəcəyini
müəyyən edə bilirsən. Sonra
hətta bu niyyətin baş tutanda
heyrətlənirsən. Həqiqətən, bu tipli inanclar
xalqın sınağından keçmiş məqamlardır. BDU-nun jurnalistika nəzəriyyəsi
və təcrübəsi kafedrasının müdiri Cahangir
Məmmədli: - Mən Novruzu
dini bayram hesab
etmirəm, amma o
mənim üçün müqəddəsdir. Novruz deyəndə
əkin-biçin yada düşür, bilirsən ki, 20 gündən
sonra ağaclar çiçəkləyəcək, güllər açacaq.
İnanclara gəlincə isə "papaqatdı",
"qulaqpusdu" mənim üçün əzizdir. Hansı vaxt
olursa olsun, çox sevinirəm ki, mənim də qapımı
döyürlər. Qulaqpusduya, əsasən, qadınların marağı
çoxdur. Həmin günü evdə ancaq xoş şeylər danışırıq.
çərşənbə axşamları
tonqalların qalanması ilə elə bilirəm dünyaya işıq
gəlir. Novruz bayramının hər anı mənim
üçün çox əziz və unudulmaz xatirələrlə dolu
məqamlardır. Sumqayıt şəhəri
N.Gəncəvi adına Texniki və Təbiət
Elmləri Liseyinin direktoru,
əməkdar müəllim, Prezident təqaüdçüsü, "Şöhrət"
ordenli pedaqoq Minarə Tahirova: - Novruz elə
bir bayramdır ki, onun gəlişinə
sevinməmək mümkün deyil. Novruzu hər kəs
səbirsizliklə gözləyir.
Novruzda təbiət oyanır, ətrafda
bizi əhatə edən hər
şey canlanır. Ən xoşuma gələn küsülülərin
barışması, qohum-əqrəbaların bir-birinə
gedib-gəlməsi, böyüklərə bu bayram günlərində
diqqətin artmasıdır. Axır çərşənbə günündə
insanların ürəklərində niyyət tutması,
qulaqpusmaya çıxması, gənc qızların müxtəlif
üsullarla fala baxması kimi adət-ənənələr
illərin sınanmış
rəmzləridir. Yadıma düşür ki,
üzüyün qaşı ilə aya baxıb onun neçə günlük
olduğunu müəyyən edirdilər. Mən
gənclərə də tövsiyə edirəm ki, illərin
sınağından çıxmış bu
ənənələrə inansınlar, onları
yaşatsınlar. Aynur GüLüSTAN Təbiətin
oyanış çağı Nərgiz Quliyeva (Azərbaycan MEA-nın
Arxeologiya və Etnoqrafiya İnstitutunun müasir dövr
etnoqrafiya şöbəsinin aparıcı elmi işçisi,
tarix elmləri doktoru): - Elimizin ən ülvi hisslər əsasında
əsrlərdən bəri hifz edib saxladığı
Novruz bayramı bu gün də bol-bərəkətli
məhsul yetişdirmək, kənd əməkçilərinin
uğurlu illərinin başlanğıcı, uzaq ölkələrdən
uçub gələn quşların şən nəğməsi,
ailələrin sevinci kimi xalqımızın həyatında
dərin kök salmışdır. Novruz bayramı bütövlükdə
xalq ilə bağlı olduğuna görə xalqımızın
Novruzla səsləşən musiqisi, rəqsləri, mahnıları,
şənlikləri çoxdur. Deyişmələrlə yanaşı,
güləş, dirədöymə və onlarca başqa
əyləncələr də vardır. Azərbaycan xalqının
nəcib xüsusiyyətlərini əks etdirən
keyfiyyətlərdən biri də ailədə övladları
vətənpərvərlik ruhunda tərbiyə
etməkdir. Vətəni qorumağa yollananlara uğur
arzulayır, arxalarıyca su atırdılar. Anaların,
bacıların istəklilərinə inamına görə
bu bir qab su döyüşə yollananların uğurunu açır,
yolunu aydın edərdi. Novruzda bişirilən şirniyyatlar
səma cisimlərinin - şəkərbura ayın, paxlava
ulduzun, şorqoğalı Günəşin rəmzidir. Əli Əhmədov (BDU-nun biologiya fakültəsi
torpaqşünaslıq kafedrasının professoru, biologiya
elmləri doktoru): - Novruzun gəlişi ilə təbiət
oyanır, həyat canlanır, bolluğun, firavanlığın
əsası qoyulur. Bütün çiçəklərin ətri, quşların
nəğməsi ətrafa yayılır, meşələr
yarpaqlanır. Torpaq heç kimə borclu qalmır, onun üstündə
zəhmət çəkənlərə, tər tökənlərə
o öz barını, bol nemətini əsirgəmir. Amma yuxarıda
dediklərimizlə bərabər, torpaq həm də çoxsaylı
ekoloji funksiyalar yerinə yetirir. Hər il Yer kürəsində
fotosintez prosesi ilə külli miqdarda bioloji məhsul
əmələ gəlir. Bu qalıqlar çürüyərkən
ətraf mühitdə çoxlu miqdarda antisanitariya prosesləri baş
verir. Həmin qalıqlar torpaqda basdırılanda çürümə
prosesi yenə də davam edir və ayrılan qaz qatışıqları
torpaq tərəfindən udulduğu üçün ətraf mühitin
çirklənməsinin qarşısını alır. Torpaq
planetimizdə tənzimləyici rol oynayır.
Nəzərə alsaq ki, yazın başlanğıcından
payız ayının sonuna kimi, yarpaqlar tökülənədək
bitkilər nə qədər fotosintez prosesində karbon
qazını mənimsəyirlərsə, karbon qazı qış
aylarında torpaq onun məhlulu tərəfindən udulub
saxlanılır. Əhatə olunan mühitdə qazlar qatışığının
nisbətinin saxlanmasına şərait yaradırsa,
digər tərəfdən yaz fəslində havalar
istiləşəndə bitkilərdə yaşıl
yarpaqların əmələ gəlməsi
mərhələsində qış fəslində topladığı
karbon qazını hissə-hissə ayırıb yerüstü mühitə
verməklə bütün vegetasiya müddətində
bitkilərdə baş verən fotosintez prosesi üçün xammal
rolunu oynayır... Hazırladı: Sifai SƏFƏROVA Tələbələrin
bahar şənliyi Qafqaz Universitetinin tələbə
və müəllim heyəti xalqımızın əziz
bayramı olan Novruzu hər il təntənə ilə qeyd
edirlər. Bu il tələbələr bayram şənliyini
Xırdalan Şəhər Mədəniyyət Sarayında
keçirdilər. Şənliyin əsas təşkilatçıları
universitetin xor, teatr və rəqs klubları idi. Lakin onda
istedadlı, şeiri, sənəti sevən və
qiymətləndirən bütün tələbələr ifaçı
qismində iştirak edirdilər. Aparıcılar zala toplaşanları bayram
münasibəti ilə təbrik edəndən sonra söz
universitetin rektoru, professor Əhmət Saniçə verildi.
Novruzu bütün Şərq dünyasının önəmli bayramı
kimi səciyyələndirən Əhmət bəy türklərin
də bu bayramı çox sevdiyini, Orta Asiyadan Balkanlaradək
hər yerdə onun qeyd edildiyi bildirildi. Sonra tələbələr hazırladıqları
bayram proqramını təqdim etdilər. Onların ifasında
bahara, Novruza həsr olunmuş şeirlər, mahnılar
səsləndi. Teatr qrupu maraqlı səhnəciklər nümayiş
etdirdi, rəqs qrupunun üzvləri milli rəqslərimizi ifa
etdilər. Novruz atributları Kosa və Keçəlin göstərdikləri
məzəli səhnəciklər, danışdıqları
macəralar mərasim iştirakçılarında xoş
ovqat yaratdı. Y.ƏLİYEV A
kosa-kosa, gəlsənə... Martın
18-də paytaxtımızdakı 96 nömrəli körpələr
evi - uşaq bağçasında bayram ovqatı vardı. Müəssisənin
məktəbə hazırlıq qrupunda tərbiyə
alanlar Novruz şənliyinə yığışmışdılar.
Körpə fidanların bayram sevincini bölüşməyə
xeyli qonaq - Bakı Şəhəri üzrə Təhsil
İdarəsinin məktəbəqədər
təhsilə cavabdeh rəsmiləri, şəhərin 11
rayonundan 25 nəfərdən çox bağça müdiri və
musiqi rəhbəri, valideynlər və b. da gəlmişdi.
Qrupun tərbiyəçisi Firuzə
Məmmədovanın, musiqi rəhbəri Sevinc
Vəliyevanın, tərbiyəçi Balaxanım Abdullayevanın
yaxından köməyi və təşkilatçılığı
ilə körpə fidanlar maraqlı bayram proqramı hazırlamışdılar. Bayram mərasimini açan 96 nömrəli körpələr
evi - uşaq bağçasının müdiri Ruhəngiz Qurbanova
şənlik iştirakçılarını Novruz bayramı
münasibəti ilə təbrik etdi, qonaqlara "xoş
gəldin" dedi. Sonra meydan al-əlvan geyimli uşaqlara
verildi. Balaca Nəcibə, Firuzə, Müzəffər,
Umud və başqaları Novruza, bahara həsr olunmuş
şeirlər söylədilər, mahnılar, rəqslər
ifa etdilər, səhnəciklər göstərdilər. Kosa və Keçəl, Bahar qızı da
həmin gün uşaqların qonağı idi. Daha doğrusu
baharın girməsini, Novruzun gəlişini burada
tərbiyə alan 175 nəfər uşağa xəbər
verməyə, onları əyləndirməyə gəlmişdilər.
Uşaqlar onları dövrəyə aldılar. Hamı
Kosadan, Keçəldən, Bahar qızından bayram payı,
sovqat istəyirdi. Onlar öz şux, məzəli sözləri,
hərəkətləri ilə uşaqları
əyləndirdilər, onların körpə
qəlblərinə sonsuz sevinc və fərəh bəxş
etdilər. Beləcə, 96 nömrəli körpələr
evi-uşaq bağçasında həmin gün nəğmə,
şeirlə dolu xoş anlar yaşandı. Y.ƏLİYEV Məktəblilər
bayram sevincini yaşayırlar Bu gün təhsil ocaqlarında bir bayram əhval-ruhiyyəsi yaşanır və məktəblilər
hazırladıqları maraqlı çıxışları
ilə valideynlərini, müəllimlərini,
qohum-əqrəbalarını, eləcə də
bir-birlərini sevindirir, təbrik edirlər. Paytaxtdakı
38 nömrəli orta məktəbdə də Novruz bayramı
böyük təmtəraqla keçdi.
Məktəbin V,
VI, VII sinif şagirdləri şairlərimizin, aşıqlarımızın
Novruza, baharın gəlişinə
həsr etdikləri şeirlərindən parçalar
söylədilər, səhnəciklər göstərdilər.
Onlar nənə və babalarından eşitdikləri
xalq inanclarını, deyimlərini tədbir iştirakçılarına
çatdırdılar. Aşağı sinif şagirdlərinin ifasında
rəqs nömrələri göstərildi. Bayram mərasimində uşaqların
milli geyimlərdən istifadə etməsi tədbiri daha da
yaddaqalan etdi. Kosa ilə keçəlin məzəli
rəqsləri şagirdlərdə yazla qışın görüşü
təəssüratını yaratdı. Tədbirdə VIII,
XI sinif şagirdləri ilə yanaşı,
məktəbin müəllimlərindən Mehparə
Məmmədova, Nəzakət Seyfəlova, Flora Dadaşova
da fəal iştirak etdilər. Martın 18-də Bakının 36 nömrəli
orta məktəbində də Novruz yüksək əhval-rühiyyə
ilə qeyd olundu. Məktəbin direktoru İradə
Babayeva tədbir iştirakçılarını əziz bayram
olan Novruz münasibəti ilə təbrik etdi. Hamının
sevimlisi sayılan Bahar qızı ağ at üstündə
məktəbin həyətinə daxil oldu. O da öz növbəsində
Novruz bayramı münasibəti ilə tədbirə
gələn qonaqları, şagird və pedaqoji kollektivi ürəkdən
təbrik etdi. Ən maraqlı Novruz inanclarından biri olan
tonqal yandırıldı və şagirdlər tonqalın
ətrafında milli bayrama aid şeirlər söyləyərək,
mahnılar oxudular. Sonda şagirdlərin bayram
əhval-ruhiyyəsini əks etdirən rəsm
əsərlərindən ibarət sərgi nümayiş
olundu. Rəşad ZİYADOV
|