|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Fənn olimpiadalarının respublika turu keçirildi Məktəblilərin
ənənəvi kütləvi bilik yarışması sayılan
fənn olimpiadalarının final turu bu il də Novruz
bayramı ərəfəsinə təsadüf edirdi.
Təhsil Nazirliyinin 5 mart 2008-ci il tarixli əmrinə uyğun
olaraq martın 17-də S.C.Pişəvəri adına
humanitar fənlər gimnaziyasında, fizika-riyaziyyat və
informatika, kimya-biologiya təmayüllü liseylərdə və
BDU-da keçirilən olimpiadaların finalını
əməkdaşlarımız izləmişlər. Kimya və biologiya fənlərindən
finala vəsiqə alanlar hər il olduğu kimi, bu il
də kimya-biologiya təmayüllü liseyə gəlmişdilər.
Final yarışları martın 17-də
saat 9.00-da başladı. Əvvəlcədən
fənlər və siniflər üzrə liseyin
həyətində sıraya düzülmüş şagirdləri
kimya və biologiya fənləri üzrə münsiflər
heyətinin sədrləri, təşkilat komitəsinin üzvləri,
respublika MEA-nın müxbir üzvü, professor Vaqif Abbasov, biologiya
elmləri doktoru, ADPU-nun kafedra müdiri, professor Ədalət
Fərəcov, liseyin direktoru Mirhəsən Cavadov və b.
bilik bayramı münasibəti ilə təbrik edib qarşıdakı
çətin mübarizədə onlara uğurlar arzuladılar.
Sonra şagirdlər içəri dəvət olunaraq
əvvəlcədən bu məqsədlər üçün ayrılmış
otaqlarda yerləşdirildi, final yarışları,
olimpiada vərəqlərinin doldurulması, təqdim
olunmuş suallarla iş qaydaları onlara izah edildi. Həm biologiyadan, həm də kimyadan yarışanlara
5 məsələ-misaldan ibarət olimpiada tapşırığı
təqdim olunmuşdu. Sualların asan-çətinliyi,
tərtibi qaydası ilə maraqlandıq. öyrəndik ki,
onlar orta məktəblərin proqramlarına və fənn
olimpiadalarına verilən tələblərə uyğundur. Biologiya üzrə respublika münsiflər
heyətinin sədri, professor Ədalət Fərəcov
bizimlə söhbətində olimpiadaya vəsiqə qazanan
şagirdlər arasında istedadlı uşaqların çox
olduğunu, son illər həm müəllimlərin, həm
də məktəblilərin öz üzərində işləmələri
üçün olimpiadalara dair kifayət qədər vəsait
nəşr edildiyini, xüsusən son vaxtlar
məktəblərin istifadəsinə verilmiş elektron
vəsaitlərin şagirdlərin oxumaq-öyrənmək
imkanlarını xeyli genişləndirdiyini, son elmi
yeniliklərlə əyani tanış ola
bilmələrinə şərait yaratdığını
bildirdi. Olimpiadaların təşkilinə, bilik yarışları
üçün sualların hazırlanmasına da münasibət
bildirən müsahibim olimpiadaların həm orta
məktəblərdə keçirilən buraxılış,
həm də ali məktəblərə qəbul imtahanlarından
köklü şəkildə fərqləndiyini, olimpiadanın
əsl istedad meydanı olduğunu, suallar hazırlanarkən
onun fənn üzrə bir mövzunu deyil, bütövlükdə bir bölməni
əhatə etməsinə diqqət yetirildiyini bildirdi.
Olimpiadaları şagirdləri ali məktəblərə
hazırlayan vasitə kimi qiymətləndirən Ə.Fərəcov,
eyni zamanda bu böyük bilik yarışlarında qalib
yerlərin verilməsində müəyyən
məhdudiyyət olduğunu da vurğuladı. Professor Ə.Fərəcovla olimpiadalar
gedən bir neçə otağa baş çəkdik.
Hərəsində bir və ya iki nəfər qeyri-ixtisas
fənn müəlliminin nəzarət etdiyi otaqlarda şagirdlər
verilmiş tapşırıqların icrası ilə
məşğul idilər. Siniflərdə tam sakitlik hökm
sürürdü. Biologiya üzrə olimpiadanın münsiflər
heyətinin məsul katibi, ADPU-nun dekan müavini, dosent Nizami
Mehdizadədən öyrəndik ki, respublikanın şəhər
və rayonlarından 186 nəfər biologiya olimpiadasının
respublika turuna vəsiqə qazanıb, onlardan 30-u Naxçıvan
Muxtar Respublikasını təmsil edir. Onlarla final turu da
Naxçıvanda təşkil olunub. Nəticələr
olimpiada üzrə respublika münsiflər heyətinə göndəriləcək
və burada onlara təkrar baxılacaqdır. Yarışlarda Bakıdan və respublikanın
digər bölgələrindən 54 IX, 59 X və 52
nəfər XI sinif şagirdi iştirak edir. İştirakçılar
arasında ötən il bu bilik yarışlarında qüvvəsini
sınamış 25 şagird var. Onlardan 12-si ötən il müxtəlif
mükafatlar alanlardır. Kimya fənninin təmsilçilərinə
liseyin tədris korpusunun 3-cü mərtəbəsi ayrılmışdı.
Həmin mərtəbədəki 9 otaqda respublikanın müxtəlif
yerlərindən gəlmiş IX, X və XI sinif şagirdləri
birincilik uğrunda mübarizə aparırdılar. Kimya
fənni üzrə olimpiadanın münsiflər heyətinin
məsul katibi, Təhsil Problemləri İnstitutunun
əməkdaşı Akif Əliyevin məlumatından aydın
oldu ki, bu fənn üzrə istedadlardan 121-i finala
vəsiqə qazanıb. Lakin onlardan 1-i yarışlara
gəlməyib. Ona görə də hazırda 120
nəfər final tapşırığını
yerinə yetirir. İştirakçılardan 14-ü Naxçıvan
MR ümumtəhsil müəssisələrinin şagirdidir. Onlar
muxtar respublikada yarışırlar. Olimpiadaya
gələnlər əsasən rayon, şəhər
turunun qalibləri, yəni I və II yeri tutanlardır. IX
sinif şagirdləri olimpiadada 36, XI sinif şagirdləri
isə 38 nəfərlə təmsil olunub. X sinifdə
oxuyanlardan isə əvvəlki turda qalib daha çox olub - 47. Olimpiadaçılardan 2 nəfəri ötən
il dünya bilik yarışlarında və respublika fənn
olimpiadasının finalında iştirak edib. XI sinif şagirdləri üçün olimpiada tapşırığının
hazırlanmasında yenilik edilib. Onlara 4
sual-məsələ ilə yanaşı, V
məsələ kimi test tapşırığını
yerinə yetirmək təklif olunub, eksperiment müsbət
nəticələnsə, gələn ildən digər
siniflər üzrə yarışanlara da şamil olunacaq. Saat 12-yə yaxın hər iki fənn üzrə
münsiflər heyətinin üzvləri də liseyə yığışdılar.
Artıq şagirdlərdən öz işini təhvil verib
gedənlərin sayı da artırdı. Saat 13.00-da olimpiada üçün ayrılmış
vaxt başa çatdıqdan sonra nəzarətçilər işləri
yığıb münsiflər heyətlərinin
rəhbərlərinə təhvil verdilər. Olimpiada işləri
kodlaşdırılaraq yoxlanılmaq üçün münsiflər
heyətlərinin üzvlərinə verildi. *** Artıq saat 9:30-dan şagirdlər
fizika-riyaziyyat və informatika təmayüllü liseyin
həyətində idilər. Təxminən 10
dəqiqədən sonra onlar olimpiada keçirilən liseyin
binasına daxil oldular. Sual vərəqələri şagirdlərə
paylandıqdan sonra saat 10.00-da olimpiadaya start verildi.
Riyaziyyat fənni üzrə şagirdlər 180 nəfər
idi. Onlar tədris korpusunda 6 sinif otağına yerləşdirilmişdi.
Liseyin direktoru Taryel Talıbovla birlikdə olimpiada keçirilən
sinif otaqlarına baxış keçirdik. Xatırladaq ki,
olipiadada yalnız IX, X, XI sinif şagirdləri iştirak
edirdi. Riyaziyyat fənni üzrə münsiflər heyətinin
sədri Rafiq Quluyev bildirdi ki, olimpiadanın gedişində
heç bir problem olmayıb. Olimpiada başlandıqdan sonra sinif otaqlarına
mütəmadi baş çəkmişik. Nəzarət edən müəllimlər
qeyri-ixtisas fənn müəllimləridir. Burada respublikanın
bütün rayonlarından şagirdlər iştirak edir.
Olimpiadanın qurtarmasına bir saat qalıb, saat 13.00-da
yekunlaşacaq. Olimpiadanın
vaxtı bitdikdən sonra münsiflər
heyətinin 8 üzvü tərəfindən işlər
yoxlanacaq. Fizika fənni üzrə aparılan olimpiada
məktəbin yeməkxanasında təşkil olunmuşdu.
Respublika olimpiadasının fizika fənni üzrə münsiflər
heyətinin sədri Mirzəli Murğuzovun sözlərinə
görə, imtahanda 98 nəfər iştirak etməli idi. Bir
nəfər gəlmədiyinə görə, 97 nəfər
iştirak edir. Olimpiadanın
gedişində heç bir problem olmayıb. Qeyd edək
ki, yer böyük olduğundan buradakı şagirdlər o
birilərindən fərqli olaraq tək-tək oturmuşdu.
BDU-da informatika fənni üzrə təşkil
olunan olimpiadada 37 nəfər iştirak etməli idi. Ancaq
33 nəfər iştirak edirdi. Münsiflər heyətinin
sədri Ramin Mahmudzadənin sözlərinə görə,
olimpiada 4 sinifdə keçirilir. Şagirdlərin
əksəriyyəti şəhər
məktəblərindən gəlib. Olimpiadanın keçirilməsində
heç bir problemlə qarşılaşmamışıq. *** S.C.Pişəvəri adına humanitar
fənlər gimnaziyasında Azərbaycan dili,
ədəbiyyatı və
Azərbaycan tarixi fənləri üzrə olimpiadanın
respublika turu keçirildi. 28 sinif otağında təşkil
edilmiş bilik yarışında 56 qeyri-ixtisas fənn müəllimi
nəzarətçi kimi iştirak edirdi. IX-XI sinifləri
əhatə edən olimpiadada 233 şagird Azərbaycan dili
və ədəbiyyatı üzrə, 242-si isə tarix
fənni üzrə öz qüvvəsini sınayırdı.
İştirakçıların təxminən 50 faizi kənd
rayonlarını əhatə edirdi. Saat 10-da başlanan
olimpiadada məktəblilərə 3 saat vaxt verilmişdi.
Cəmi bir neçə şagird prosesdə iştirak etmirdi. Baş çəkdiyimiz sinif otaqlarında şagirdlərin
əhval-ruhiyyəsi yaxşı idi. Hiss olunurdu ki,
gimnaziyanın rəhbərliyi məktəblilərin normal
işləməsi üçün lazımi şərait yaratmışdır.
Nəzarətçi müəllimlərə lazımi
təlimatlar verilmişdi. Hətta övladını gözləyən
valideynlər üçün də otaq ayrılmışdı. Olimpiadanın təşkili,
əhəmiyyəti və ondakı yeniliklər
barədə fikirlərini öyrənmək
məqsədilə Azərbaycan dili və ədəbiyyatı
və Azərbaycan tarixi fənləri üzrə münsiflər
heyətinin sədrləri Zahid Xəlil və Oqtay Sultanova
müraciət etdik. Bildirdilər ki, ötən ilə
nisbətən şagirdlərin sayı bu il xeyli çoxdur. Sualların səviyyəsindən məlum
olur ki, builki uşaqlar daha biliklidirlər. Bilik yarışında
bu hal təqdirəlayiq hesab olunmalıdır. Qeyd edildi ki,
olimpiadanın keçirilməsinə Təhsil Nazirliyi xüsusi
qayğı ilə yanaşmışdır. Proqram
daxilində çalışılıb ki, uşaqların daha
çox intellektinə təsir edən, düşüncəsini
və qabiliyyətini yoxlayan sərbəst suallara müraciət
edək. Şagirdlərin müxtəlif
mərhələlərdən keçərək burada iştirakı,
onların orta məktəblərdəki sınaq
imtahanlarda öz bilik və bacarığını nümayiş
etdirmələri və həmin biliklərin kompüter
vasitəsi ilə yoxlanılması da yeniliyin bir nümunəsidir.
Bilik səviyyəsinin obyektiv qiymətləndirilməsi müəllim
və şagirdlərin olimpiadaya olan inamını daha da
artırır. Biz inanırıq ki, bu olimpiadalar uşaqların
təfəkkürünü və intellekt səviyyəsini daha yaxşı
aşkarlamağa geniş imkanlar yaradacaq. Yusif ƏLİYEV, Rəşad ZİYADOV, Fazil İDRİSOĞLU
Layihə çərçivəsində hazırlanmış tədris vəsaitləri sınaqdan keçiriləcək Təhsil Nazirliyi və "Uşaqların
xilası" (Save the Children) təşkilatı ilə
birgə yaradılan işçi qrupu tərəfindən
"Uşaqların tolerantlıq təhsili proqramı"
çərçivəsində vəsaitlərin ilkin variantı
hazırlanıb. İbtidai sinif müəllimləri üçün
vəsaitlər "Sülh mədəniyyətinə dair
tədris vəsaiti", şagirdlər üçün isə
"Qısa hekayələr toplusu"
adlanır. Layihə çərçivəsində hazırlanmış
həmin tədris vəsaitlərinin
cari ilin mart-aprel aylarında Bakı, Sumqayıt,
Gəncə, Mingəçevir şəhərlərinin, Abşeron,
Quba, Qazax, Şəki, Lənkəran, Goranboy və Kürdəmir
rayonlarının seçilmiş pilot məktəblərinin müəyyənləşdirilmiş
I-IV siniflərində sınaqdan keçirilməsi
nəzərdə tutulub. Onu da qeyd edək ki, həmin
vəsaitlər Təhsil Nazirliyi tərəfindən
yerlərə göndərilmiş rəsmi məktublar
əsasında sınaqdan keçiriləcək.
Təbiət
fənləri üzrə müəllimlər üçün
təlimlərə başlanılıb 2008-ci ilin martından etibarən "British
Council" təşkilatı Təhsil Nazirliyi ilə
birgə "Təbiət fənləri üzrə müəllimlər
üçün təlimlər" adlı yeni layihəni həyata
keçirməyə başlayıb. Layihənin əsas məqsədi
təbiət fənlərini tədris edən müəllimlərin
interaktiv tədris metodlarından istifadə üzrə bacarıqlarının,
peşəkar qabiliyyətlərinin inkişaf
etdirilməsi və müvafiq təlim vasitələrinin hazırlanmasından
ibarətdir. Layihənin 3 mərhələdə aparılması,
eyni zamanda I mərhələ üzrə təlimlərin keçirilməsi
məqsədilə müəyyənləşdirilmiş
şərtlər əsasında təlimçilərin seçilməsi
nəzərdə tutulub. Layihə Azərbaycan Müəllimlər
İnstitutu və onun 11 filialı, Bakı Dövlət
Universiteti, Azərbaycan Dövlət Pedaqoji, Gəncə,
Sumqayıt, Lənkəran Dövlət Universitetləri,
eləcə də Bakı,
Gəncə, Sumqayıt şəhər, Lənkəran
və Salyan rayonlarının müəyyənləşdirilmiş
3 ümumtəhsil məktəbində təbiət
fənlərini tədris edən müəllim, metodist,
universitet və
məktəb rəhbərlərini əhatə edib. Hər bir şagirdə fərdi yanaşılan təhsil ocağı ötən il fəaliyyətə başlamasına
baxmayaraq, Bakı Britaniya Məktəbi - "British School
in Baku" səmərəli işi ilə mövqeyini lazımınca
yüksəldə bilib. Britaniyadan dəvət olunmuş
və xaricdə işləyib
kifayət qədər təcrübə toplamış
yerli pedaqoqlar qısa müddət ərzində
tədrisin keyfiyyətini arzu olunan səviyyəyə çatdıra
biliblər. Məktəbdə dərslər ingilis milli
proqramı əsasında təşkil olunub. Təhsil Nazirliyinin lisenziyası əsasında
rəsmi fəaliyyətdə olan "British School in
Baku" həm də Britaniya Məktəblər Şurasının
üzvü, Kembric İmtahan Mərkəzinin Bakıdakı
rəsmi təmsilçisidir. Dünyada tanınan Britaniya beynəlxalq
məktəbləri məzunlarına ingilis təhsil
sisteminə məxsus İGCSE və "A Level"
sertifikatları təqdim edir. İGCSE və "A Level" proqramları
və bütövlükdə Britaniya təhsili Azərbaycan üçün
yenilikdir. Bu
məktəbi uğurla başa vuranlar xarici
universitetlərə qəbul olmaq şansı qazanırlar.
Onlar, eyni zamanda Azərbaycanın orta təhsil attestatını
da alırlar ki, bu da məzunlara həm resrublikamızın,
həm də digər ölkələrin
universitetlərinə qəbul imkanı verir. Məktəbin direktoru Deyvid Dreperin qeyd
etdiyi kimi, "British School in Baku"da tətbiq olunan
tədris və qiymətləndirmə sistemi dünyada
qəbul olunmuş standartlara tam uyğundur. Ona görə
də burada təhsil alan hər bir şagirdin biliyi ona dünyanın
istənilən nöqtəsində gərəkli olacaq. Britaniya beynəlxalq məktəbləri işlə
əlaqədar hər hansı xarici ölkədə yaşayan
ailələr üçün xüsusilə əlverişlidir. çünki
bu məktəblərdə proqram və
qiymətləndirmə sistemi eynidir.
İngilis tədris qaydalarına
əsasən şagirdlər mütəmadi sınaq və
testlərdən əlavə, ibtidai məktəbin
yekununda, IX, XI siniflərdə və "A Level" proqramının
yekununda imtahan verirlər. Bu imtahanların sualları
Kembricdə tərtib olunur. İmtahandan sonra cavablandırılmış
vərəqlər yoxlanılıb
qiymətləndirilmək üçün Kembricə göndərilir. Cənab Dreper "Burada oxumağın daha
hansı üstünlükləri var" sualımızı
cavablandıraraq qeyd etdi: ""British School in
Baku"nun üzərinə düşən öhdəlik uşaqlara
təkcə bilik aşılamaqla bitmir. Biz hesab edirik ki,
məktəb şagirdləri həyata hazırlamalıdır.
Ona görə hər bir şagirdə fərdi yanaşma var.
Onlara beynəlxalq mühitdə yaşamağı,
mədəniyyət müxtəlifliyinə və fikir ayrılığına
hörmətlə yanaşmağı öyrədirik". Nərgiz MAHMUDZADƏ, məktəbin müəllimi Riqada
azərbaycanlıların "Bazar günü
məktəbi" fəaliyyət göstərir Latviya
Respublikasının paytaxtı Riqa şəhərindəki
Klassik Gimnaziya eyni zamanda həmin şəhərdə yaşayan
azərbaycanlıların "Bazar günü
məktəbi" kimi də fəaliyyət göstərir. Riqa Klassik Gimnaziyası ibtidai
siniflərdən (1-6-cı siniflər),
gimnaziyayaqədərki siniflərdən (7-8-ci siniflər)
və gimnaziyadan (10-12-ci siniflər) ibarət olan müasir
tədris kompleksidir. Klassik təhsilin ənənələri
və dəyərləri gimnaziyanın direktoru, pedaqoji
elmlər doktoru, həmyerlimiz Roman Əliyev
tərəfindən hazırlanmış gimnaziya
təhsilinin konsepsiyası "Yaradıcı
Yuniversum" Gimnaziyanın tədris proqramının
əsasını təşkil edir. Gimnaziyada tədris
prosesində informasiya texnologiyaları geniş şəkildə
tətbiq edilir. Burada dörd kompüter mərkəzi,
təbiət elmlərinin tədrisi üçün bir xüsusi
laboratoriya və multimedia avadanlıqları ilə
təchiz olunmuş sinif otaqları fəaliyyət göstərir. Bütün şagirdlər 1-ci sinifdən başlayaraq
ingilis dili öyrənirlər. İkinci xarici dil alman, ya da
fransız dili (valideynlərin seçimi əsasında) 4-cü
sinifdən başlayaraq tədris olunur. 10-cu sinifdən başlayaraq
latın dili öyrədilir. Şagirdlərə arzu və
istəklərinə uyğun 10-12-ci siniflərdə üçüncü
xarici dili öyrənmək imkanı verilir. Xarici dillər,
eləcə də rus və latış dilləri
tədris prosesində istifadə olunur. Gimnaziyada Pedaqoji
İnnovasiyalar Laboratoriyası, iki və daha çoxdilli
mərkəzlər fəaliyyət göstərir. Yuxarı
sinif şagirdləri Gimnaziyanın Elmi Tədqiqatlar
Cəmiyyətində iştirak edirlər. Riqa Klassik Gimnaziyası YUNESKO ilə sıx
əməkdaşlıq edir. Riqada 2000 nəfərə yaxın
azərbaycanlı yaşayır. Gimnaziyanın 3 otağı
Azərbaycanın dövlət atributları, Azərbaycan
dilində müxtəlif ədəbiyyatlar,
incəsənət nümunələri ilə təchiz edilmişdir.
Bazar günləri azərbaycanlı uşaqlarına bu
otaqlarda Azərbaycan dili, tarixi, xalqımızın
adət-ənənələri, milli dəyərlərimiz
öyrədilir. 2007-ci ilin yanvarında Latviyada "Ocaq"
Azərbaycan Mədəniyyəti Mərkəzi təsis
edilmişdir. Azərbaycanın Latviyadakı səfirliyinin
və "Ocaq" Azərbaycan Mədəniyyəti
Mərkəzinin təşəbbüsü ilə Azərbaycanın
xalq artisti Alim Qasımov Riqanın "Böyük Qildiya"
konsert salonunda zəngin və maraqlı ifası ilə
soydaşlarımızı sevindirmişdir Rabitə
və İnformasiya Texnologiyaları naziri Əli Abbasov
Riqada olarkən "Ocaq" Azərbaycan
Mədəniyyəti Mərkəzinə ən müasir kompüter
avadanlıqları hədiyyə etmişdir. "Ocaq" Azərbaycan
Mədəniyyəti Mərkəzinin qarşıya qoyduğu
vəzifələrdən biri də ümummilli liderimiz
Heydər Əliyevin zəngin dövlətçilik təcrübəsini
öyrənməkdir. 24-26 fevral 2008-ci il tarixlərdə Riqa
şəhərində "İnklüziv təhsil, siyasi
dialoqdan əməkdaşlığa doğru"
beynəlxalq konfransda iştirak edərkən mən
"Ocaq" Azərbaycan Mədəniyyəti
Mərkəzində həmyerlilərimizlə görüşüb
onların gördükləri işlərlə tanış
oldum. özümlə apardığım milli dərslikləri
Klassik Gimnaziyaya hədiyyə etdim. Əhliyət ADICöZƏLOV, Təhsil Nazirliyinin böyük
məsləhətçisi
|