|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
Təhsil Nazirliyinin kollegiyasında Sınaq
imtahanlarını keçirməkdə məqsəd orta ümumtəhsil
məktəblərində təhsilin keyfiyyətini artırmaq,
məktəbin və müəllimin nüfuzunu yüksəltməkdir
Martın 15-də Təhsil Nazirliyində 24
fevral 2008-ci il tarixində mərkəzləşdirilmiş
qaydada keçirilən ikinci yoxlama imtahanının
nəticələrinə dair kollegiya iclası keçirildi.
İclasda kollegiya üzvləri ilə yanaşı,
Təhsil Nazirliyinin şöbə müdirləri və struktur
bölmələri rəhbərləri, Bakı Şəhəri
üzrə Təhsil İdarəsinin məsul işçiləri,
sınaq imtahanları keçirilən məktəblərin
direktorları və imtahan rəhbərləri, respublikanın
şəhər və rayon təhsil şöbələrinin
müdirləri iştirak edirdilər. Təhsil naziri Misir Mərdanov kollegiya iclasını
açaraq müzakirə olunan məsələ haqqında
məlumat verdi. Bildirdi ki, orta ümumtəhsil
məktəblərində mərkəzləşdirilmiş
qaydada ikinci sınaq
imtahanı əvvəlkindən daha mütəşəkkil
keçib. Yeni qaydada keçirilən imtahanın başlıca
məqsədinin orta ümumtəhsil
məktəblərində təhsilin keyfiyyətini artırmaq,
məktəbin və müəllimin nüfuzunun yüksəltmək
olduğunu qeyd edən nazir həmin işin artıq
ictimaiyyət tərəfindən də müsbət qarşılandığını
söylədi. Nazir bu yaxınlarda olduğu bir neçə
məktəbdə XI sinif şagirdləri ilə söhbət
etdiyini, onların mərkəzləşdirilmiş qaydada
keçirilən imtahanlarla bağlı fikirləri
ilə tanış olduğunu dedi. Qeyd etdi ki, şagirdlər
imtahanın onlarda məsuliyyət hissinin artmasına,
tədris olunan fənlərə, keçilən
dərslərə daha ciddi yanaşmağa sövq etdiyini
bildirdilər. Təhsil naziri ikinci sınaq imtahanının
nəticələrinin yüksək olduğunu vurğulayaraq,
bu dəfə tətbiq olunan bir neçə yeniliyi, xüsusən
də şagirdlərin verdikləri cavabların çox qısa
bir zamanda yoxlanılaraq nazirliyin rəsmi İnternet saytında
yerləşdirilməsini də müsbət bir addım kimi
dəyərləndirdi. Qeyd olundu ki,şagirdlər və
onların valideynlərinin bu nəticələrlə
əyani tanış olmaları bütün narahatçılıqları
aradan qaldırıb. Misir Mərdanov ikinci sınaq imtahanında
təşkilati işlərin daha yaxşı qurulduğunu,
bu sahədə xeyli irəliləyişlərin olduğunu
dedi. Nazir əldə olunmuş müsbət
nəticələrlə yanaşı, imtahanın gedişində
müəyyən problemlərin, çatışmazlıqların
da qeydə alındığını, bəzi
məktəb direktorlarının imtahanlara
məsuliyyətsiz yanaşmalarını, nəzarətçi
müəllimlərin bir çoxunun öz işlərinin öhdəsindən
gələ bilmədiklərini təəssüf hissi ilə
qeyd etdi. Bununla bağlı məktəb direktorlarına
ciddi iradlarını bildirdi. Məktəblərdə
şagirdlərin deyil, müəllimlərin də
biliyinin qiymətləndirilməsinin vacibliyini
diqqətə çatdıran nazir, direktorlara rəhbərlik
etdikləri təhsil müəssisələrində bu
istiqamətdə iş aparmalarını tövsiyə etdi.
Bildirdi ki, təkcə təhsil alanın yox, eyni zamanda
təhsil verənin də biliyi
qiymətləndirilməlidir. Direktor hər bir müəllimin
biliyinin hansı
səviyyədə olmasını bilməlidir. Nazir artıq Sumqayıtda həmin
istiqamətdə işin aparıldığını
deyərək şəhər təhsil şöbəsinin müdiri
tərəfindən ona təqdim olunan
nəticələrlə bağlı məlumatları
kollegiya iştirakçılarının nəzərinə çatdırdı.
Məlum oldu ki, Sumqayıt şəhərində
təhsil işçilərinin mərkəzləşdirilmiş
şəkildə monitorinqi keçirilib. Müəllimlərin
hər birinin bilik səviyyəsi, peşəkarlığı
yoxlanılaraq müxtəlif parametrlər üzrə təhlil
olunub. Təhsil naziri Sumqayıt
Şəhər Təhsil Şöbəsinin müdiri
Vidadi Bağırovun bu istiqamətdə gördüyü işi yüksək
qiymətləndirərək
direktorlara belə br təcrübəni
məktəblərində tətbiq etməyi məsləhət gördü. İkinci sınaq imtahanı ilə bağlı
başqa məsələlərə
də ətraflı toxunan nazir öz
fikirlərini söylədi. Sonra Təhsil Nazirliyinin Şagird
nailiyyətlərinin qiymətləndirilməsi şöbəsi
müdirinin müavini Təranə Hacıyevanın 24 fevral
2008-ci il tarixində mərkəzləşdirilmiş
qaydada keçirilən ikinci yoxlama imtahanın
nəticələrinə dair hesabatı dinlənildi.
Verilən məlumatdan aydın oldu ki, imtahanlar rayon və
şəhərlərdə yaradılmış 89
mərkəzdə keçirilməklə 51727 şagirdi və
895 məktəbi əhatə edib. 94 nəfər imtahan
rəhbəri, 89 nəfər isə bina rəhbəri
təyin edilmiş, 1772 otaqda 4000-dən çox nəzarətçi
müəllim imtahan prosesində iştirak edib. Yoxlama
imtahanlarında 42 məktəb 90-100, 218 məktəb
70-90, 351 məktəb 50-70, 174 məktəb 30-50, 110
məktəb 0-30 faiz arasında nəticə göstərib.
7 məktəbin müvəffəqiyyət faizi 0 olub. Bakı
şəhərinin, eləcə də respublikanın rayon
və şəhərləri üzrə ayrı-ayrılıqda
hazırlanan statistik təhlilləri əks etdirən
cədvəllər kollegiya iştirakçılarının
nəzərinə çatdırıldı. Reytinq cədvəlində ilk 50 yeri tutan məktəblər haqqında
məlumat verildi. Aydın oldu ki,bu reytinq
cədvəlində ilk 50 yeri
tutan məktəblər içərisində ön sırada Ağdam
51 nömrəli orta məktəbidir. Onun müvəffəqiyyət
faizi 100-dür. Təhsil
Nazirliyinin tabeliyində
olan 12 təhsil müəssisəsinin göstəricilərinə
əsasən, ilk sırada Bakı
Avropa Liseyi yer alaraq 92,86 faiz nəticə göstərib. T.Hacıyeva
Bakı şəhərinin rayonları üzrə göstəricilərdən
də danışaraq qeyd etdi ki, bu siyahıda
Xətai rayonu 77,96 faiz nəticə ilə birinci sıradadır.
Rayonlar (şəhərlər) üzrə göstəricilərə
əsasən, Bakı şəhərində 62,95 faiz
nəticə əldə olunub. Ən aşağı göstərici
isə peşə liseylərinə aiddir. Məcburi köçkün
rayonları üzrə göstəricilərə görə,
sonuncu yeri Xocalı rayonu tutur. Onun faiz göstəricisi
27,78-dir. Təranə xanım sonra reytinq
cədvəlində son 50 yeri tutan məktəblər
barəsində danışdı.Şagirdlərin 8
fənnin hər biri üzrə
qiymət göstəricilərinə də toxunan çıxışçı
qeyd etdi ki, onlar ana dili, Azərbaycan tarixi, xüsusən
də coğrafiya fənlərindən suallara cavab
verməkdə çətinlik çəkməyiblər.
Nəticələr ürəkaçandır.O, hər bir
fəndən respublikanın rayonları, eləcə
də Təhsil Nazirliyinin tabeliyində olan lisey və
gimnaziyaları üzrə qiymət
göstəricilərinin ayrı-ayrılıqda təhlilini
apararaq onlardan bu siyahılarda
daha yüksək yerləri tutanların adlarını çəkdi. Təranə Hacıyeva
yoxlama imtahanında fərqlənmiş bir qrup
nəzarətçinin əməyini də xüsusi qeyd etdi.
İmtahanın təşkili, gedişi
nəticələri ilə bağlı digər
məlumatları diqqətə
çatdıran Təranə xanım bu proses zamanı
nəzarətçilərin və məktəb direktorlarının
səhlənkarlığı üzündən qeydə alınan,
həmçinin müşahidə olunan problemlərə də
toxundu. O, növbəti sınaq imtahanında bunların aradan
qaldırılması ilə bağlı bir sıra işlərin
görüləcəyini bildirdi. Təqdimatdan sonra təhsil naziri Misir
Mərdanov bütövlükdə fevralın 24-də keçirilən
ikinci sınaq imtahanının nəticələrindən
razı qaldığını bildirdi. Qeyd etdi ki, ikinci sınaq
imtahanından sonra apelyasiya komissiyasına
müraciət edənlərin sayı əvvəlkindən
xeyli az olub. Nazir aprelin 27-də keçiriləcək növbəti
sınaq imtahanına daha
ciddi hazırlıq işlərinin görülməsini
zəruri sayaraq nazirliyin müafiq şöbəsinə müəyyən
göstərişlərini verdi. Həmin imtahanda tətbiq
ediləcək bir sıra yeniliklər, həmçinin iyunun
6-da keçiriləcək
mərkəzləşdirilmiş buraxılış
imtahanları ilə bağlı hazırlıq işləri
barəsində ətraflı danışdı. Təhsil
naziri digər məsələlərə də geniş
toxunaraq fikir və mülahizələrini söylədi.
Təhsilimizin keyfiyyətinə təsir göstərən
bir sıra həlli vacib məsələləri təhsil
işçilərinin diqqətinə çatdırdı, bəzi
məqamlara aydınlıq gətirərək tövsiyələr
verdi. Kollegiyada Sumqayıt şəhər 11 nömrəli
məktəbin direktoru Ofelya Babayeva, T.İsmayılov adına
"İntellekt" məktəb- liseyinin direktoru Ceyran
Kuliyeva, 220 nömrəli məktəbin direktoru Almaz Əsgərova
və başqaları ikinci sınaq imtahanı ilə bağlı
öz fikirlərini söylədilər. Sonda təhsil naziri bütün təhsil işçilərini
Novruz bayramı münasibətilə təbrik edərək
onlara cansağlığı, uğurlar arzuladı. Samirə KƏRİMOVA
|