YUNESKO-nun regional konfransı haqqında media mənsublarına açıqlama verilir

Mayın 14-də "Gülüstan" sarayında həmin gün işə başlayan "Dünyada Savadlılığın Dəstəklənməsi" üzrə YUNESKO-nun regional konfransına həsr olunmuş mətbuat konfransı keçirildi.

YUNESKO Baş direktorunun təhsil üzrə müavini Nikolas Börnet, ömürboyu təhsil üzrə YUNESKO Beynəlxalq İnstitutunun direktoru Adama Ouen, BMT-nin təhsil prioritetləri üzrə bölməsinin rəhbəri Mark Riçmond və YUNESKO-nun sözçüsü xanım Su Uilyamsın iştirak etdikləri mətbuat konfransını Azərbaycan Respublikasının təhsil naziri Misir Mərdanov açaraq bildirdi ki, YUNESKO-nun "Dünyada Savadlılığın Dəstəklənməsi" üzrə konfransı Bakıda Heydər Əliyev Fondunun prezidenti, millət vəkili Mehriban xanım Əliyevanın təşəbbüsü ilə təşkil olunub. üç gün ərzində - mayın 14, 15 və 16-da keçirilən tədbirdə YUNESKO-nun Baş direktoru cənab Koişiro Matsuura, Hollandiya şahzadəsi  Ulyahəzrət Laurentien, YUNESKO-nun xoşməramlı səfirləri, İordaniya şahzadəsi xanım Ferial, İslandiyanın sabiq prezidenti xanım Viqdos Finboqadottir kimi ali qonaqlarla yanaşı, konfransa qatılan ölkələrin bir çoxunun təhsil nazirləri və nazirlərin nümayəndələri, eləcə də region ölkələrinin savadlılıq problemi sahəsində ixtisaslaşmış 131 nüfuzlu eksperti iştirak edir.

Təhsil nazirinin məlumatından aydın oldu ki, regional konfrans qlobal savadlılığın dəstəklənməsi məqsədilə dünyanın ayrı-ayrı regionlarında keçirilməsi nəzərdə tutulan altı silsilə konfransdan beşincisidir. Bu konfranslar BMT-nin savadlılıq onilliyi və YUNESKO-nun savadlılığın dəstəklənməsi təşəbbüsü çərçivəsində təşkil olunur. Regional konfransların keçirilməsi ideyası ABŞ-ın birinci xanımı və BMT-nin savadlılıq onilliyi proqramının fəxri səfiri xanım Laura Buşun himayəsi ilə 2006-cı ilin sentyabrında Nyu-Yorkda keçirilən Qlobal Savadlılıq üzrə Ağ Ev konfransı zamanı meydana gəlmişdir. Təşəbbüsün əsas məqsədi təhsilə  investisiyaların artırılması və  bununla da qlobal miqyasda insanların savadlılıq səviyyəsinin yüksəldilməsidir. Ərəb ölkələrini əhatə edən birinci regional konfrans 2007-ci ilin mart ayında Qatarın paytaxtında ölkənin birinci xanımının himayəsi altında keçirilmişdir. Şərqi və Cənubi-Şərqi Asiya bölgəsini əhatə edən ikinci konfrans 2007-ci ilin avqust ayında çinin Pekin şəhərində, Afrika bölgəsini əhatə edən üçüncü konfrans 2007-ci ilin sentyabrında Malidə, Cənub və Cənub-Qərbi Asiya bölgəsini əhatə edən dördüncü konfrans isə 2007-ci ilin noyabrında Dehli şəhərində keçirilmişdir. Avropa regionu üzrə bu gün başlayan beşinci regional konfrans bölgənin 31 ölkəsini əhatə edir.

Nazir qeyd etdi ki, bu konfranslar müvafiq regionların savadlılıqla bağlı spesifik problemlərini əhatə etdiyindən Bakı konfransı mahiyyəti və məzmunu etibarı ilə təbii olaraq digər regional konfranslardan fərqli olacaqdır.

Müasir Avropada savadlılıq anlayışı yalnız insanın yazmaq və oxumaq qabiliyyəti ilə məhdudlaşmır və Avropa regionunda artıq savadlılıq probleminə tamamilə yeni baxış mövcuddur. Savadlılıq probleminin yeni tərzdə, daha geniş rakursda şərhi meydana gəlmişdir. Bu gün savadlılıq dedikdə təkcə oxu və yazı bacarığı olan deyil, həmçinin texniki biliklər, kompüter vərdişləri, effektiv ünsiyyət bacarığı, məlumatı anlama, onu şərh etmə və ötürmə bacarığı, sosial bilgilər və eləcə də bütün bunları praktik həyatda tətbiq etmək vərdişləri nəzərdə tutulur. Bu kriteriyalara cavab verməyən gənclər və yaşlılar, əlbəttə, cəmiyyətdə öz funksiyalarını tam və səmərəli şəkildə yerinə yetirə bilmirlər.

Bakı konfransının məhz bu problemlərin müzakirəsinə və onların həlli yollarının axtarılmasına həsr olunduğunu söyləyən nazir tədbirdə Avropa regionu və o cümlədən də Azərbaycan üçün bu vaxta qədər dərindən araşdırılmayan savadlılıqla bağlı müxtəlif aspektlərin müzakirə olunacağını diqqətə çatdırdı. Əlavə etdi ki, bu konfrans Azərbaycanın təhsil işçilərinə və alimlərinə Qərbin nüfuzlu alimləri ilə səmərəli işçi əlaqələrin yaradılmasına və gələcəkdə bu sahədə birgə layihələrin və proqramların həyata keçirilməsinə geniş imkanlar da açacaqdır. Bu baxımdan Avropa ölkələri üçün mühüm olan konfransın Azərbaycan üçün xüsusilə böyük əhəmiyyətə malik olduğunu vurğulayan nazir giriş sözündə daha sonra media mənsublarına  onun keçirilmə qaydaları, müzakirə olunacaq məsələlər barədə məlumat verdi. Qeyd etdi ki, konfrans plenar iclaslar və işçi qruplarında müzakirələr formasında keçiriləcəkdir. Plenar iclaslarda "Savadlılıq konsepsiyası, onun təkamülü və müasir dünyada yaşlıların təhsili", "Qiymətləndirmə: savadlılıq göstəricilərinin və əsas bacarıqların qiymətləndirilməsi", "Pedaqoji yanaşmalar: keyfiyyətli əsas təhsilin təmin olunması", "Yeni tələblərə cavab və təhsil almaq imkanlarının genişləndirilməsi" mövzuları müzakirə olunacaq.

M.Mərdanov konfransın  ikinci və üçüncü günlərində 6 işçi qrupunda müzakirə olunacaq mövzularla da jurnalistləri tanış etdi.

Giriş sözünün sonunda qonaqları KİV nümayəndələrinə təqdim edən Misir Mərdanov konfransı açıb, onu aparmaq üçün sözü YUNESKO-nun mətbuat xidmətinin rəhbəri xanım Su Uilyamsa verdi.

YUNESKO sözçüsü konfransın əhəmiyyətindən danışıb onun təşkilində əməyi olanlara minnətdarlıq etdi. Mətbuat konfransında çıxış edən YUNESKO Baş direktorunun müavini Nikolas Burnet konfransın müzakirə etdiyi mövzunun aktuallığına diqqəti cəlb etdi. Bildirdi ki, hazırda Mərkəzi və Şərqi Avropada 9 milyon insan yazıb-oxumağı bacarmır. Avropada savadlılıq dərəcəsinin 96 faizdən yuxarı olmasına baxmayaraq, bu məsələ region ölkələrinin qarşısında ciddi problem kimi dayanır. Azərbaycan da təhsil sahəsində müsbət ənənələrini saxlamaqla digər ölkələrin yeniliklərini tətbiq edir və bu məsələdə YUNESKO ilə sıx əməkdaşlıq mövcuddur.

Konfransda Azərbaycanla YUNESKO arasındakı əlaqələr, ölkəmizin YUNESKO layihələrində iştirakı məsələlərindən də söhbət açıldı. Bildirildi ki, Azərbaycanda ümumtəhsil məktəblərində inklüziv təhsillə bağlı dövlət proqramı həyata keçirilir. Bu layihənin maliyyələşməsində YUNESKO yaxından iştirak edir. Bu beynəlxalq təşkilatla son vaxtlar peşə təhsilinə dəstək sahəsində də müvafiq razılıq əldə olunub və YUNESKO həmin layihənin həyata keçirilməsində maliyyə yardımı ilə iştirak edəcək.

Konfransda jurnalistləri maraqlandıran suallara cavablar verildi.

Y.ƏLİYEV,

H.ƏKBƏROVA