Tədbir alman dilində keçirildi

Bu günlərdə Bakıdakı 176 nömrəli orta məktəbdə ulu öndər Heydər Əliyevin anadan olmasının 85-ci ildönümü münasibətilə keçirilən tədbiri giriş sözü ilə məktəbin direktoru Sairə Rəsulova açaraq bildirdi ki, Azərbaycanda dövlət quruculuğunun banisi olan Heydər Əliyevin xalqımızın xoşbəxt gələcəyinə yönəlmiş misilsiz fəaliyyəti barədə məktəbin şagirdləri ilə müntəzəm olaraq söhbətlər aparılmış, ulu öndərin möhtəşəm abidəsi ziyarət edilmişdir.

Sonra məktəbin alman dili müəllimləri, filologiya elmləri namizədi Cəmilə Məmmədova, Nuranə Aslanova və başqaları alman dilində ulu öndər Heydər Əliyevin həyat və fəaliyyətindən danışdılar. Şagirdlərdən Nərminə Hacıyeva, Anar və üzeyir Bayramlı qardaşları da Heydər Əliyevə həsr olunmuş şeirləri alman dilində söylədilər.

Tədbirə dəvət olunmuş Bakı Şəhəri üzrə Təhsil İdarəsinin nümayəndəsi Sitarə Məmmədova və digər qonaqlar alman dilində təşkil olunmuş bu tədbiri hazırlayan müəllimlərə və şagirdlərə təşəkkürlərini bildirdilər.

Sonda ümummilli lider Heydər Əliyevin həyatına həsr olunmuş kinolentlərdən fraqmentlər  nümayiş etdirildi.

Şakir CƏFƏROV

Ulu öndərə ehtiramla

Bakı şəhərində fəaliyyət göstərən 88 nömrəli orta məktəbin akt zalında ulu öndər Heydər Əliyevin 85 illik yubileyinə həsr edilmiş tədbir keçirilib.

Məktəbin akt zalında şagirdlərin Heydər Əliyevin 85 illik yubileyi münasibətilə hazırladıqları fotostendlər, albomlar, biri-birindən fərqlənən əl işləri toplantıya dəvət almış qonaqların marağına səbəb olmuşdu.

Azərbaycanın Dövlət himni səsləndi, ümummilli lider Heydər Əliyevin xatirəsi bir dəqiqəlik sükutla yad olundu.

Tədbiri giriş sözü ilə açan məktəbin direktoru Həcər Rəhimli bu gün respublikanın hər yerində təntənəli surətdə 85 illik yubileyi qeyd edilən ulu öndər Heydər Əliyevin respublikaya rəhbərlik etdiyi illərdə digər sahələr kimi elmə, təhsilə, mədəniyyətə xüsusi önəm verdiyini qeyd etdi.

çıxışlarda ulu öndər Heydər Əliyevin dünya siyasətindəki nüfuzundan və Azərbaycan xalqı üçün gördüyü işlərdən ətraflı söz açıldı.

Nizami MİRZƏ

 "Yer günü"nə həsr olunmuş "açıq dərs"  

Aprelin 22-də  Bakıdakı 46 nömrəli orta ümumtəhsil məktəbində   "Yer günü"nə həsr olunmuş "açıq dərs" keçirildi. Qloballaşan aləmdə  dünyanın ekoloji problemlərinin həlli yolları, eləcə də Azərbaycanın ekoloji problemləri "açıq dərs"in əsas müzakirə mövzuları oldu. "Açıq dərs"də Azərbaycan və rus bölməsinin VIII-IX sinif şagirdləri iştirak edirdilər.  

Coğrafya müəllimi Solmaz Əlmərdanova əvvəlcə "ekologiya" sözünün mənasını uşaqlara ("eko" latın sözü olub ev, yaşayış yeri, "loqos" elm deməkdir) açıqladı. 

Biologiya müəllimi İradə Aslanova Azərbaycanın nadir bitki və heyvanlar aləmi haqqında şagirdlərə məlumat verdi.  Dərslərin hər iki fəndən elektron görüntüləri şagirdlərə göstərildi.

Sonra söz şagirdlərə verildi.

İX sinif şagirdi Aysel Məmmədova  işğal olunmuş ərazilərin ekoloji mühiti, yandırılmış ərazilər, bitki örtüyü, heyvanlar aləmi barədə öyrəndiklərindən söz açdı.

Sonda məktəbin direktoru Sevinc Budaqova qeyd etdi ki, hər il aprelin 22-də məktəbimizdə "Yer günü" ilə əlaqədar "açıq dərs"lər keçilir: "Müasir dövrümüzdə cəmiyyət üçün yetişdirdiyimiz hər bir şagird torpaq, onun coğrafiyası, ekologiyası haqqında dərin məlumata malik olmalıdır.

çıxış edən qonaqlar və müəllimlər də müxtəlif fənlərə aid "açıq dərs"lərin keçilməsini vacib saydılar. "Yer günü" mövzusuna aid "açıq dərs"də isə onlar ölkəmizin ekologiyası ilə bağlı bilmədikləri bəzi məlumatları öyrəndiklərini etiraf etdilər.

Rəşad ZİYADOV