Məktəb-valideyn əməkdaşlığı

Valideynlər nə düşünürlər?

Son illər təhsilimizdə aparılan islahatlar, həyata keçirilən tədbirlər özünün müsbət nəticələrini büruzə verməkdədir. Bu gün təhsilin ən müxtəlif pillələrində bir yeniləşmə, canlanma hiss olunmaqdadır. Xüsusilə orta məktəblərimizdə aparılan dəyişikliklər təhsilimizin inkişafına, onun keyfiyyətinin yüksəlməsinə səbəb olmaqla yanaşı, müəllimlərimizin öz işlərinə daha yaradıcı şəkildə yanaşmasına, yüksək peşəkarlıq nümayiş etdirməsinə imkan yaradıb. Hazırda Azərbaycan məktəbi dedikdə göz önündə tamam fərqli, daha müasir, təlim-tərbiyə prosesini çox yüksək səviyyədə quran təhsil ocaqlarımız canlanır. Təbii ki, bu dəyişikliklərin təlim-tərbiyə prosesinin iştirakçıları olan müəllim və şagirdlər canlı şahididirlər.

Bəs görəsən valideynlər necə, öz övladlarının təhsil aldıqları orta məktəblərdə həmin dəyişiklikləri hiss edirlərmi? Valideynlərin məktəblə əlaqələri hansı səviyyədədir?

Təsadüfi deyil ki, təhsil naziri Misir Mərdanovun təhsil işçiləri ilə keçirdiyi müxtəlif görüşlərdə, tədbirlərdə hər zaman məktəb rəhbərlərinə tövsiyəsi bu olur ki, valideynlərlə əməkdaşlığa diqqət verilməli, əlaqələr daha sıx olmalıdır. Bəs təhsil nazirinin xüsusi önəm verdiyi bu məsələ ilə bağlı valideynlərin özləri nə düşünür? Bu və yuxarıda qeyd etdiyimiz digər suallarla bağlı bir neçə valideynlə görüşərək onların fikirlərini öyrəndik.

Aygün Əlibəyova (18 nömrəli orta məktəbin valideyni):

 - 2 övladım var. Hər ikisi bu məktəbdə oxuyur. Vaxtilə özüm də həmin məktəbdə təhsil almışam və ona görə də bura mənim üçün doğmadır. Məktəb həyatında yaxından iştirak etməyə çalışıram. özüm VII sinfin valideyn komitəsinin sədriyəm. Digər valideynlərlə birlikdə məktəbin problemlərinin həllində yaxından iştirak edirəm. Fikrimcə, şagirdin yaxşı oxuması üçün təkcə müəllimin əməyi kifayət deyil. Bu işdə valideynlər müəllimlərin ən yaxın köməkçisi olmalıdır. Ona görə də valideyn-müəllim münasibətini fəallaşdırmaq lazımdır. Bu proses qarşılıqlı əməkdaşlıq şəklində olmalıdır. Yəni buna həm müəllim, həm də valideyn can atmalıdır. Müəllimlə valideynin fikirləri üst-üstə düşərsə, bu şagirdlərin istər təlim, istərsə də tərbiyəsində müsbət nəticələr  verə bilər.

Bizim məktəbdə valideynlər dərslərə mane olmamaq şərti ilə istədikləri vaxt məktəbə gələrək onları maraqlandıran mövzularda söhbət apara bilər, hətta direktor müavininin icazəsi ilə dərslərdə iştirak edə bilərlər.

Aynurə Əliyeva (20 nömrəli məktəb-liseyin valideyni):

- övladlarımın ikisi də bu məktəbdə oxuyur. Onlar hələ kiçikdirlər. Oğlum II sinifdə, qızım isə I sinifdə oxuyur. Uşaqlarım ibtidai siniflərdə oxuduğundan onların müəllimləri ilə daim ünsiyyətdə oluram. övladlarım yuxarı siniflərdə oxuyan zaman da bu əlaqələrin müntəzəm olaraq saxlanmasına çalışacağam. Yəqin ki, onların təhsil həyatında fəal iştirak edəcəyəm. Valideyn olaraq son illər təhsil sahəsində aparılan islahatlardan xəbərim var və bunun müsbət nəticələrini görürəm.

Məktəb-şagird-valideyn əməkdaşlığı bu gün çox önəmli bir məsələdir. Düşünürəm ki, əməkdaşlıq bizim öz uşaqlarımızı daha yaxından tanımağa, onların nəyə qadir olduqlarını öyrənməyə imkan verir.

Zəka İbrahimov (7 nömrəli orta məktəbin valideyni):

- Söz yox ki, indiki şagirdlər 20-30 il bundan əvvəlkilərdən tam fərqlidirlər. Onlar öz fikirlərini söyləməkdə daha sərbəst və müstəqildirlər. Biz valideynlər də, müəllimlər də uşaqlara bir şəxsiyyət kimi yanaşmalıyıq. Əlbəttə ki, müəllimlə valideyn arasında səmimi bir əməkdaşlıq olmalıdır. Onu da qeyd edim ki, vaxtilə mən özüm də bu məktəbdə təhsil almışam. Buradakı istər təlim-tərbiyənin səviyyəsi, istərsə də müəllimlərin valideynlərə səmimi münasibəti məni qane etdiyindən övladım da məhz burada təhsil alır. Artıq qızım Kəmalə VIII sinifdə oxuyur. Mən bir valideyn kimi qızımın təhsili ilə yaxından maraqlanmaqla yanaşı, məktəbin həyatında baş verən proseslərdə yaxından iştirak etməyə çalışıram. Hesab edirəm ki, məktəblə-valideyn əlaqələri daim inkişaf etməli, genişlənməlidir.

Müxtəlif fənlər üzrə əyləncəli  proqramların keçirilməsi (ədəbi tamaşaların qurulması, viktorinaların təşkil edilməsi), bunların təşkilinə valideynlərin cəlb olunması və bilavasitə iştirakı da, fikrimcə, bizlərin məktəblə əlaqələrinin daha çıx olmasına gətirib çıxara bilər. Bilirsiniz, ilk növbədə, valideyn özü məktəblə əlaqə qurmaqda maraqlı olmalıdır.

Azər Hətəmov (18 nömrəli orta məktəbin Valideyn-Müəllim  Assosiasiyasının prezidenti):

- Təhsilin keyfiyyətinə təsir edən amillər sırasında ailə birinci yeri tutur. Məhz buna görə də məktəbin fəaliyyətinin təşkilində, idarə olunmasında, təlim-tərbiyə prosesində valideynlərin fəal iştirakının təmin olunması olduqca vacibdir. Bir valideyn kimi öz təcrübəmə və bu məsələ ilə əlaqədar apardığım təhlillərə əsaslanaraq tam əminliklə deyə bilərəm ki, hər bir valideyn öz övladının gələcəyinə xüsusi diqqət göstərərək məktəblə, müəllimlərlə əlaqələri daha sıx və daha möhkəm qurarsa, bu, onun övladının bilik səviyyəsinin yüksəlməsinə, gələcəkdə ölkəmiz üçün layiqli vətəndaş kimi yetişməsinə də bir təkan verər. Mənim övladlarımın təhsil aldıqları məktəblə, onların müəllimləri ilə sıx əlaqələrimin nəticəsi buna bariz nümunədir.

Qeyd edim ki, valideyn-müəllim-şagird əməkdaşlığı çox əhəmiyyətli və olduqca vacib bir məsələdir. Bununla əlaqədar olaraq məktəbimizdə də Milli Valideyn-Müəllim Assosiasiyası yaradılıb. Bu assosiasiyanın qarşısında duran əsas məqsəd və vəzifələr valideynlərin, ictimaiyyətin məktəbin həyatında rolunun artırılması, xüsusən valideynlərin məktəbin idarə olunmasında geniş iştirakının təmin edilməsidir.

Məktəblə sıx əlaqələri olan, oradakı proseslərdə yaxından iştirak etməyə çalışan hər bir valideyn yaxşı anlayır ki, son illər təhsildə gedən dəyişikliklər, əldə olunan müsbət nəticələr, məktəblərdə tətbiq olunan bir sıra yeniliklər onun övladının yüksək təlim və tərbiyə almasına yönəlib.

Samirə KƏRİMOVA