|
|
· Ana səhifə· Rəsmi· Heydər Əliyev Fondu· Əmrlər, sərəncamlar· Təhsil Nazirliyində· Xəbərlər· Pedaqoji yazılar· Məktəblərimiz· Bizimlə əlaqə
|
İlk 50 yeri tutan məktəblər hansılardır? Söhbət ötən il noyabrın
25-də mərkəzləşdirilmiş qaydada keçirilmiş
yoxlama imtahanının nəticələrinə
əsasən tərtib olunan reytinq cədvəlindən
gedir. Həmin imtahanın bir çox parametrlər üzrə
nəticələri kimi yetirmələri bu sınaqda iştirak
etmiş məktəblərin reytinq cədvəli də
Təhsil Nazirliyinin fevralın 9-da keçirilmiş kollegiya
iclasında açıqlanıb. Əlbəttə, sərlövhədə
ifadə edilmiş suala qısa və dəqiq cavab
vermək üçün reytinq cədvəlini dərc etmək
də olardı. Lakin məqsədimiz oxuculara təkcə
quru faktı təqdim etmək deyil, diqqəti reytinq
cədvəli ilə bağlı bəzi məqamlara yönəltməkdir. Əvvəla, qeyd edək ki, şagirdləri
imtahan verən məktəblər arasında öz
fəaliyyəti, təhsil uğurları ilə seçilən,
ictimaiyyət arasında tanınan və rəğbət
qazanan xeyli tədris ocağı olsa da, yoxlamada cəmi 2
məktəb 100 faizlik nəticə göstərib. Bunlar
Sumqayıtdakı Təbiət-Texniki Elmlər Liseyi və
Cəbrayıl rayonunun Xələfli kənd orta
məktəbidir. Hər iki təhsil müəssisəsinin bütün
onbirinci sinif şagirdləri yoxlama imtahanında iştirak
edərək fənlərin hamısından müsbət
qiymətlər almışlar. Sumqayıt liseyi ilə bağlı
məsələ aydındır. Bu lisey nəinki Sumqayıtın,
hətta ölkənin ən nümunəvi ümumtəhsil müəssisələrindən
hesab olunur. Cəbrayıl məktəbinə
gəldikdə isə onun nəticəsi həm reytinq
cədvəlinin əsasən sonunda yer almış
məcburi köçkün məktəbləri, həm də ilk 50
məktəb sırasına düşə bilməyən tanınmış
təhsil ocaqları üçün bir örnək ola bilər.
Deməli, məsələ heç də köçkünlükdə,
yaxud da tanınmaqda deyil. İmtahanlara hazırlığa
daha məsuliyyətlə yanaşmaqda, təhsilin
keyfiyyətini daim diqqət mərkəzində saxlamaqdadır.
Yeri gəlmişkən deyək ki, reytinq
cədvəlində ilk 50 yeri tutan məktəblər arasında
Cəbrayıl rayonunun Xələfli kənd məktəbi
köçkün məktəbi kimi tək deyil. Kəlbəcər
rayonu 17, 118, 8, Laçın rayonu 34, Ağdam rayonu 81, 35, 32 nömrəli,
Şuşa rayonu Malıbəyli, Zəngilan rayonu 38 nömrəli
məktəblər də bu siyahıda yer alıblar. Bu,
həm də bütövlükdə məcburi köçkün
məktəblərində təhsilin aşağı
səviyyədə olması barədə ictimaiyyət
arasında yayılmış fikirlərin heç də
əsaslı olmadığını göstərir. Başqa bir məqam. Siyahıda heç də
təkcə şəhər məktəbləri təmsil
olunmayıb. Belə ki, 50 məktəbin 36-sı onlardır.
14 məktəb isə kənd rayonlarını təmsil
edir. Bu, özlüyündə müsbət hal olub kənd
məktəblərinin heç də şəhərdəki
təhsil ocaqlarından təhsilin keyfiyyəti baxımından
geri qalmadığını göstərir. Siyahıda diqqəti cəlb edən
cəhətlərdən biri də Təhsil Nazirliyinin
birbaşa tabeliyində olan lisey və gimnaziyaların hamısının
burada yer almamasıdır. Adları cədvəlin önündə
getməli olan bu 12 təhsil ocağından yalnız 5-nin
adı siyahıda var. Buraxılış imtahanlarının
mərkəzləşdirilmiş qaydada test üsulu ilə
aparıldığı şəhər və rayonlarda
fəaliyyət göstərən peşə liseyləri
də bu ildən həmin imtahanlarda iştirak
edəcək. Onların yetirmələri artıq ilk sınaqda
qüvvələrini sınamışlar. Lakin
nəticələr gözlənildiyindən aşağı
olmuşdur. Peşə liseyləri bütünlükdə 8,95
faizlə ümumi reytinq cədvəlinin sonuna yaxın
qərar tutmuşlar. Onlardan heç biri ilk 50 məktəb
siyahısına düşməmişdir. İlk 50 yerə çıxmış
məktəblərin rayon və şəhərlər üzrə
bölgüsü də maraq doğurur və düşünmək üçün
xeyli əsas verir. İmtahanlar keçirilən əksər
şəhər və rayonların adı birinci 50-liyə
düşsə də, Gəncə və Əli Bayramlının
adları burada yoxdur. Bakı 18, Sumqayıt 9, İsmayıllı
2, Mingəçevir, Ucar və İmişli hərəsi 1
məktəb olmaqla siyahıda təmsil olunduqları halda,
Gəncə və Əli Bayramlıdan bir məktəbin
adı belə ən yaxşı məktəblərin
siyahısına düşməyib. Bakının rayonları da ilk 50 yerə çıxmış
məktəblərin siyahısında proporsional təmsil
olunmayıb. Belə ki, burada paytaxtın Xətai rayonunda
yerləşən 8, Səbaildən 6, Nəsimi,
Nərimanov, Sabunçu, Əzizbəyov rayonlarının
hərəsindən 1 məktəbin adı olduğu halda,
digər rayonların, xüsusən də təhsilin
nisbətən yüksək səviyyədə olduğu
Binəqədi, Yasamal rayonlarından bir məktəbin
belə adı yoxdur. Bunu Xətai rayonu
məktəblərinin artıq 3-cü, Səbailin isə 2-ci
ildir ki, mərkəzləşdirilmiş imtahanlarda iştirak
etməsi, bu baxımdan müəyyən təcrübə
qazanmaları ilə izah edənlər ola bilər. Lakin
bizcə, bu heç də həlledici amil sayıla bilməz.
İmtahanlarda bir neçə dəfə iştirak
əsasən texniki cəhətdən təcrübə
toplamağa kömək edir. İmtahan isə daha çox biliyin
keyfiyyətini üzə çıxarır. üzümüzə gələn bazar günü
mərkəzləşdirilmiş qaydada ikinci yoxlama imtahanı
keçiriləcəkdir. Həmin sınaqlarda iştirak
edəcək məktəblərə və onların
yetirmələrinə uğurlar və daha yüksək
nəticələr arzulayırıq. Y.ƏLİYEV
|