Mingəçevir Dövlət Universiteti (MDU) ilə Azərbaycan-Türkiyə İş Adamları Birliyi (ATİB) arasında birgə əməkdaşlığa dair memorandum imzalanıb. 

“Azərbaycan müəllimi” xəbər verir ki, sənədi MDU-nun rektoru Anar Eminov və ATİB-in İdarə Heyətinin sədri Mürsəl Rüstəmov imzalayıblar.

MDU-nun rektoru Anar Eminov universitetin strateji hədəflərindən biri kimi tələbələrin praktiki bacarıqlarının artırılması və əmək bazarına daha hazırlıqlı şəkildə daxil olmalarının dəstəklənməsini vurğulayıb. O, bu məqsədlə sənaye nümayəndələri ilə birbaşa əməkdaşlığın əhəmiyyətini qeyd edərək ATİB-lə imzalanan memorandumu bu istiqamətdə atılmış əhəmiyyətli addım kimi dəyərləndirib.

ATİB-in İdarə Heyətinin sədri M.Rüstəmov isə MDU-nun inkişaf meyillərini və əmək bazarının çağırışlarına cavab verən yanaşmalarını təqdirəlayiq hesab etdiyini qeyd edərək bu əməkdaşlığın həm təhsil alan gənclərə, həm də iş dünyasına fayda gətirəcəyinə inandığını vurğulayıb.

Tərəflər memorandum çərçivəsində bir sıra istiqamətlər üzrə əməkdaşlıq etməyi razılaşdırıblar. Bunlara tələbələrin ATİB-ə üzv şirkətlərdə istehsalat təcrübəsinə, biznes mütəxəssislərinin universitetdə dərslərə cəlb olunması, karyera və iş yarmarkalarının təşkili, innovasiya və startap təşəbbüslərinin dəstəklənməsi, üçtərəfli (Türkiyə tərəfdaşları ilə) layihələrin hazırlanması, təqaüd proqramlarının təşkili və birgə elmi-praktiki tədbirlərin həyata keçirilməsi daxildir. Memorandum, eyni zamanda, ATİB-in üzv şirkətləri ilə MDU arasında daha sıx əlaqələrin qurulmasına, universitet əməkdaşlarının və tələbələrinin peşəkar inkişafına yönəlmiş ixtisasartırma proqramlarının təşkilinə imkan yaradacaq.

Bununla yanaşı, görüş zamanı birliyin üzvü olan iş adamlarının 2025-ci ilin sentyabr-oktyabr aylarında MDU-nun əməkdaş və tələbələri ilə görüşlərinin təşkili, universitet məzunlarının işlə təmini məsələləri üzrə müzakirələrin davamının Mingəçevir şəhərində keçirilməsi ilə bağlı razılıq əldə olunub.