Azərbaycan Rəssamlıq Akademiyasının SABAH qruplarının könüllü qeydiyyatdan keçmiş tələbələri üçün “Azərbaycanın rəngləri – mədəni harmoniyalar” adlı rəng təlimi keçirilib.

“Azərbaycan müəllimi” xəbər verir ki, təlim, akademiyanın “Dizayn” kafedrasının baş müəllimi Xatirə Hüseynəliyevanın şəxsi dəvəti ilə Bakıya gəlmiş İtaliyanın tanınmış rəng və material dizayneri Francesca Valan tərəfindən aparılıb. 

Qeyd edək ki, Francesca Valan “2007–2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” çərçivəsində Xatirə Hüseynəliyevaya Milandakı Dizayn Politexnik Məktəbində (Scuola Politecnica di Design) dərs deyib. 

Xatirə Hüseynəliyevanın qəzetimizə verdiyi məlumata görə, Francesca Valan məhsul kimliyini rəng, material və faktura (CMF Design) vasitəsilə formalaşdıran aparıcı mütəxəssislərdəndir. O, beynəlxalq şirkətlər üçün rəng strategiyaları hazırlayır, ictimai məkanlar və uşaq oyun sahələri üçün dizayn həlləri təklif edir. Milan Avropa Dizayn İnstitutu (IED) və Milan Politexnik Universitetində (Politecnico di Milano) dərs deyir, İtaliya və xaricdə müxtəlif universitet və qurumlarda mühazirələr oxuyur. Chicco, Samsung, Lego, Ferrari kimi markalarla işləyib, 30-dan çox konfransda çıxış edib və eyni sayda nəşrə imza atıb.

O, eyni zamanda rəng mövzusunda sərgilər və seminarlar təşkil edir. Francesca Valan Campari üçün “Qırmızı” rənginə həsr olunmuş sərginin kuratoru olub. Təlimin birinci günü Francesca Valan YARAT Müasir İncəsənət Mərkəzində tələbələrlə görüşərək öz layihələrindən ibarət təqdimatla çıxış edib və təlimin məzmunu, məqsədi barədə məlumat verib. Tələbələr 5 rəng qrupu üzrə (“Ağ-qara”, “Sarı”, “Qırmızı”, “Yaşıl”, “Göy”) bölünərək müvafiq istiqamətlərdə tədqiqatlara başlayıblar. İkinci gün tələbələrlə birlikdə Milli Azərbaycan Tarix Muzeyi və Azərbaycan Milli Xalça Muzeyinə səfərlər təşkil olunmuş, eksponatlarda istifadə olunan rənglərin kodları və onların mənaları araşdırılıb. Təlimin üçüncü günü tələbələr toplanmış rəng məlumatlarını “Asmart MMC”nin yaradıcı mərkəzində sistemləşdirərək təhlil etmiş və ilkin nəticələr üzərində işləyiblər. 

Daha sonra YARAT Müasir İncəsənət Mərkəzinin sərgi kompleksində Francesca Valan 2000-ci ildən bu günə qədər rəng və materiallar sahəsində apardığı araşdırmaların inkişaf dinamikasına dair təqdimatla çıxış edib. Ardınca təlimin nəticələrini əks etdirən 28 tələbənin A4 formatında hazırlanmış və ümumilikdə 52 layihədən ibarət işləri nümayiş olunub, tədbir sərgi ilə yekunlaşıb.  Sərgi və təqdimatda Azərbaycan Respublikasının Əməkdar rəssamı, xalçaçı-rəssam Məmmədhüseyn Hüseynov, Əməkdar rəssam Rəşad Ələkbərov, Azərbaycan Rəssamlıq Akademiyasının SABAH Mərkəzinin dekanı dosent Mətanət Nəsirova, “Dizayn” kafedrasının müdiri professor Faiq Dadaşov, baş müəllim Xatirə Hüseynəliyeva, SABAH Mərkəzinin koordinatoru və eyni zamanda ARA-nın İctimaiyyətlə Əlaqələr və Gənclər Siyasəti şöbəsinin müdiri Röya Mirzəli iştirak ediblər. 

Təlimin nəticəsi olaraq, hər bir qrup seçilmiş rəng üzrə 10 əşyanı araşdıraraq onların rəng kodlarını müəyyənləşdirib. Tələbələr nəzəri biliklərlə yanaşı, praktiki tədqiqat bacarıqları qazanıb, rənglərə mədəni yanaşma və onların sistemləşdirilməsi sahəsində yeni biliklər əldə ediblər.  Bu proses tələbələr üçün həm beynəlxalq rəng dizaynı yanaşmaları ilə tanışlıq, həm də milli vizual irsin rəng dili ilə yenidən əlaqə qurmaq baxımından mühüm təcrübə olub.