Erkən yaş dövründə olan uşaqların sosiallaşması, təməl bilik və bacarıqlar qazanması, eləcə də müstəqil şəxsiyyət kimi formalaşmasında bağçalar mühüm rol oynayır. Ölkəmizdə hər il yeni uşaq bağçaları istifadəyə verilir, eləcə də bir çoxu təmir olunur. 

“Azərbaycan müəllimi” bu yaxınlarda təmirdən sonra istifadəyə verilmiş Sabirabad şəhəri 4 nömrəli uşaq bağçasında olaraq oradakı şərait, uşaqların təhsili və digər məsələlərlə maraqlanıb.

“Təmirdən sonra uşaqların qəbulu artmağa başlayıb”

İlk olaraq bağçanın müdiri İradə Abbasəliyeva ilə həmsöhbət oluruq. Onun sözlərinə görə, dövlət uşaq siyasətinin başlıca prinsipləri uşaqların keyfiyyətli təhsil və müasir tələblərə cavab verən tibbi xidmətlərlə təmin edilməsi, hərtərəfli qayğı ilə əhatə olunması, yüksək mənəvi dəyərlərə əsaslanan sosial mühitdə böyüməsi üçün zəruri şərait yaradılması, uşaqların şəxsiyyət və layiqli vətəndaş kimi formalaşmasıdır: “Bağça 80 yerlikdir və 1985-ci ildən fəaliyyət göstərir. 4 qrupumuz var, burada 18 nəfərlik heyət çalışır. Bağça uşaqların maraq dairəsinə uyğun dizayn edilib. Bura onların rahatlığını, istirahətini və ilkin biliklərə yiyələnməsini təmin etmək üçün əlvan rəngli inventarlarla təchiz olunub, müxtəlif yaş qrupları üçün məşğələ və yataq otaqları, rəsm, idman və musiqi zalları, yeməkxana təmir edilib, balacaların təlim-tərbiyəsi ilə məşğul olmaq, həmçinin onlarda bacarıq və istedadları aşkarlamaq üçün hərtərəfli şərait yaradılıb”.

İradə müəllim həmçinin qeyd edir ki, uşaqların sağlam və düzgün qidalanması onların inkişafı üçün vacibdir:

"Bağçada uşaqlar sağlam qidalarla təmin olunurlar. Gündə 3 dəfə - səhər, günorta və axşam yemək, səhərlə günorta arasındakı vaxtda isə meyvə verilir. Bağçadakı bütün uşaqlar qida qəbulu vaxtını xoş keçirirlər, bu da onların bağçaya davamlı şəkildə gəlməyini təmin edir. Uşaqlar səhər yeməyindən sonra bağçanın həyətində oynayırlar. Bu məqsədlə tikilmiş köşk geniş olduğu üçün orada oyunlar da təşkil olunur. Qrup otaqlarında isə bağçaya verilmiş oyuncaq və öyrədici materiallardan istifadə edərək səmərəli və öyrədici vaxt keçirirlər".
İradə müəllim bildirir ki, bağçada əvvəl uşaq sayı 40 nəfər idisə, təmirdən sonra bu say artmağa başlayıb.

“Uşaqlarla işləmək həm məsuliyyətli, həm də zövqlüdür”

Maraqlıdır, bəs görəsən bağçada tərbiyəçi-müəllimlər uşaqlarla işi necə qururlar? Elə bu sualla təcrübəli tərbiyəçilərdən olan Qumru Hüseynova və Qızbəs Zeynalovaya müraciət edirik. Q.Hüseynova 14, Q.Zeynalova isə artıq 10 ildir ki, burada çalışır:

“Uşaqlarla işləmək həm məsuliyyətli, həm də çox zövqlüdür. Onlarla işləyərkən, ilk növbədə, uşağın fərdi xüsusiyyətlərini, maraq dairəsini və inkişaf səviyyəsini nəzərə alırıq. Məqsədimiz təkcə onlara bilik vermək deyil, eyni zamanda, onların emosional, sosial və psixoloji inkişafını da dəstəkləməkdir. İşin əsas incəliklərindən biri uşaqlarla düzgün emosional bağ qurmaqdır. Sevgi və səbir bu işin təməlidir. Hər gün uşaqlar üçün tərtib etdiyimiz gün rejiminin bütün tələblərini reallaşdırırıq. Oyun əsaslı öyrənmə, məşğələlər arası inteqrasiya, individual yanaşma, uşaqların potensialının nəzərə alınması əsas prinsiplərimizdəndir. Bir sözlə, uşaqların hərtərəfli inkişafını təmin edirik".

Uşaq bağçası yalnız baxım və nəzarət yeri deyil. Burada həm də uşağın ilk təhsil və sosial təcrübəsini qazandığı mühit olur. Bağçada formalaşan vərdişlər və öyrənilən bacarıqlar uşağın gələcək inkişafının təməlini təşkil edir.