Beynəlxalq STEAM Azərbaycan Festivalına 2 aydan az vaxt qalıb. Regionlarda yerləşən STEAM mərkəzlərdə festivala hazırlıqların gedişi ilə maraqlandıq. 

Lənkəran STEAM Mərkəzinin əməkdaşı Turanə Heydərlinin “Azərbaycan müəllimi”nə verdiyi məlumata görə, mərkəzdə “SAF 2025”-ə hazırlaşan müxtəlif komandalar bu il 18 müxtəlif kateqoriya üzrə qeydiyyatdan keçiblər. O bildirib ki, komandalar seçim mərhələsinə ciddi şəkildə hazırlaşır və onların hər addımına dəstək olurlar.

“Hazırlıq digər həmkarlarım – Raya Ağayeva və Sevinc Mirzəyeva  ilə birlikdə festivala hazırlaşırıq, komandalarımıza mentorluq edir, onların hərtərəfli inkişafına çalışırıq. Hədəfimiz yalnız yarışa qatılmaq deyil, şagirdlərimizin elm və texnologiya sahəsində özünü ifadə etməsi, bilik və bacarıqlarını reallaşdırmasıdır. SAF Festivalı artıq ənənəyə çevrilib. Hər il yüzlərlə şagird bu festivalda iştirak edərək öz bacarığını göstərir, yeni dostlar qazanır və böyük nailiyyətlər əldə edir. İnanıram ki, bu il komandalarımız daha çox uğur və medal qazanacaq, ölkəmizin elm və texnologiya sahəsindəki potensialını bir daha sübut edəcəklər. Bu festival bizim üçün yalnız bir yarış deyil, gələcəyimizi quran şagirdlərin öz gücünü göstərdiyi böyük bir imkandır. Mən bir mentor olaraq sevinirəm ki, bu prosesin içindəyəm və şagirdlərimizə dəstək verə bilirəm”.

Mərkəzin digər əməkdaşı Sevinc Mirzəyeva bildirib ki, bu il ilk dəfə SAF-da iştirak edəcək: “Hazırda mərkəzimizdə “Flytech”, “Mexatronika”, “Fast and Furious”, “RoboSoccer”, “Cubesat” kimi maraqlı kateqoriyaların mütəxəssisləri komandalara təlimlər keçirlər. Hər komandada 2 və ya 3 uşaq olur. Şagirdlərimiz bu təlimlərdən böyük həvəslə faydalanır, hər gün yeni biliklər qazanır və yarışa daha da motivasiyalı hazırlaşırlar. Mənim komandam “Fast and Furious”, “Imagination to reality”, “VEX Robotics Competition”, “Robo Games”, “VidX” kateqoriyaları üzrə yarışacaq. Daha əvvəlki illərdə Lənkəran STEAM Mərkəzinin uğurları, qalibiyyətləri çox olub. Hər il SAF -da müxtəlif kateqoriyalar üzrə ilk 3 yerin qalibi olublar. Bu il əvvəlkilərdən də yaxşı nəticələr gözləyirik”.

 Qeyd edək ki, Beynəlxalq STEAM Azərbaycan Festivalı 2021-ci ildən etibarən hər il Elm və Təhsil Nazirliyinin dəstəyi və “STEAM Azərbaycan” layihəsinin təşkilatçılığı ilə həyata keçirilir. Festivalın keçirilməsində məqsəd STEAM əsaslı tədrisin təşviqi, təhsilalanlar arasında XXI əsr bacarıqlarının inkişaf etdirilməsi, yaradıcı təhsilalanların aşkara çıxarılması, eləcə də STEAM əsaslı yanaşmanın tətbiqi ilə ətraf mühitin sağlamlaşdırılması, su ehtiyatlarından və alternativ enerji mənbələrindən səmərəli istifadəyə dair innovativ həll və layihələrin hazırlanmasının təşviq edilməsidir.