Lənkəran Dövlət Peşə Təhsil Mərkəzi dual peşə təhsili və dövlət-özəl sektor əməkdaşlığı çərçivəsində arıçılıq sahəsi üzrə olan “BalTeam” layihəsinin reallaşdırılmasına dəstək göstərib.

Peşə Təhsil Mərkəzinin direktoru Afər Kərimovun “Azərbaycan müəllimi”nə verdiyi məlumata görə, “BalTeam”in əsas məqsədi kənd təsərrüfatında, xüsusilə arıçılıqda data əsaslı qərarvermə mexanizmlərini inkişaf etdirmək, tətbiqi bacarıqları artırmaq və arıçılara zaman, enerji və resurslara qənaət etməyə şərait yaratmaqdır.

“Məlumdur ki, ölkəmizdə kənd təsərrüfatı sahəsində data əsaslı qərarların verilməsi üçün alətlər, demək olar ki, yox səviyyəsində idi. “BalTeam” layihəsi hazırda pilot mərhələdə tətbiq olunur və Prezident İlham Əliyevin “Ağıllı kənd təsərrüfatı və rəqəmsallaşma” çağırışlarına cavab olaraq reallaşan, kənd təsərrüfatında rəqəmsal texnologiyaların tətbiqinə yönəlmiş innovativ bir addımdır. Layihənin əsas texnoloji nailiyyəti olan “Tərəzi” adlı ağıllı cihaz pətəklərə quraşdırılaraq balın miqdarı (ağırlıq sensorları), arıların çıxış-girişi (hərəkət sensorları), temperatur və rütubət (iqlim sensorları), enerji səviyyəsi (şarj göstəricisi) kimi məlumatları real vaxtda toplayır. Bu cihaz vasitəsilə arıçı pətəyə fiziki olaraq getmədən məlumat əldə edir, xəstəliklər və risklər erkən mərhələdə aşkarlanır, məhsuldarlıq və gəlir artır”.

Afər Kərimov onu da qeyd edib ki, layihə çərçivəsində gələcəkdə mobil tətbiqin hazırlanması, “Tərəzi” cihazlarının yerləşdiyi bölgələrin xəritədə əks olunması, şəxsi veb-kabinetlərin yaradılması və onlayn satış imkanlarının genişləndirilməsi nəzərdə tutulur.

Qeyd edək ki, Lənkəran Dövlət Peşə Təhsil Mərkəzinin “BalBee” komandası tərəfindən hazırlanan “Bir Data” layihəsi İnnovasiyalar və Rəqəmsal İnkişaf Agentliyi və SUP.VC şirkəti tərəfindən keçirilən regional hakatonun qalibi olub.