İyulun 9-da müəllimlərin işə qəbulu (MİQ) üzrə müsabiqənin test imtahanı mərhələsi ilə yaxından tanış olmaq məqsədilə ictimaiyyət nümayəndələri üçün infotur təşkil olunub.

“Azərbaycan müəllimi” xəbər verir ki, infoturda Elm və Təhsil Nazirliyi yanında İctimai Şuranın üzvləri, Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu, Elm və Təhsil Nazirliyinin İctimaiyyətlə əlaqələr və kommunikasiya şöbəsinin müdir müavini Ayla Həsənova-Məmmədova, digər struktur bölmə rəhbərləri və ictimaiyyət nümayəndələri iştirak ediblər. Tədbirin məqsədi müəllimlərin işə qəbulu prosesində şəffaflıq və obyektivliyin təmin olunmasını ictimai müşahidə yolu ilə qiymətləndirmək olub.

İnfotur iştirakçıları imtahan mərkəzində yaradılan şəraitlə, namizədlərin qeydiyyatı və imtahana buraxılış prosedurları ilə tanış olublar. Onlar test imtahanlarının gedişini izləyərək şəffaflığın və obyektivliyin praktikada necə tətbiq olunduğunu müşahidə ediblər.

Daha sonra iştirakçılar üçün təşkil olunan “dəyirmi masa”da müəllimlərin işə qəbulu prosesi barədə ətraflı məlumat təqdim olunub. Təhsil İnstitutunun şöbə müdiri Muxtar Hacıyev bildirib ki, cari il üzrə test imtahanları 3, 4, 8–10 iyul tarixlərində ölkənin 19 şəhərində yerləşən 44 imtahan mərkəzində keçirilir və bütün mərhələlər tam elektron formatda təşkil olunur. Onun sözlərinə görə, yalnız iyulun 9-da keçirilən imtahanın hər iki seansında ümumilikdə təxminən 15 min, bütün proses ərzində isə 65 mindən artıq namizədin iştirakı nəzərdə tutulur.

Məktəbəqədər və Ümumi Təhsil üzrə Dövlət Agentliyinin direktor müavini Vəfa Yaqublu çıxışında qeyd edib ki, müəllimlərin işə qəbulu müsabiqəsi ölkənin bütün bölgələrində keyfiyyətli təhsilə bərabər çıxışı təmin etməyə xidmət edir. O bildirib ki, məqsəd həm paytaxtda, həm də regionlardakı təhsil müəssisələri üçün eyni meyarlarla seçilmiş, bilik və bacarıqları yüksək olan müəllimlərin təyin olunmasıdır.

Vəfa Yaqublu əlavə edib ki, müsabiqənin bütün mərhələlərində - həm test imtahanı, həm də müsahibə prosesində şəffaflıq və obyektivlik prinsiplərinə ciddi şəkildə əməl olunur.

İnfotur iştirakçıları prosesi yüksək qiymətləndirərək qeyd ediblər ki, imtahanların müasir texnologiyalarla təşkili və ictimaiyyətə açıq şəkildə aparılması təhsildə şəffaflıq və etimada əsaslanan mühit formalaşdırır.

Geniş fikir mübadiləsi şəraitində keçən “dəyirmi masa”da iştirakçıları maraqlandıran məsələlər ətrafında müzakirələr aparılıb, təklif və rəylər səsləndirilib.